Metody ludźiłójerstwa wotkryć
Na zjězdźe mjez druhim so z temu reichsbyrgarjow rozestajeli
Wojerecy (AK/SN). „Mjenuje so sam kral Němskeje. Peter Fitzek je ludźiłójer. Kreatiwnje wobeńdźe prawo. Ze swojej charismu přićahuje ludźi runja magnetej a zdobudźe sej tak tež wjele młodych přiwisnikow“, tak rozłožuje sociologa Benjamin Winkler. Wón je fachowc za prawicarski ekstremizm pola cyłozwjazkoweje powšitkownowužitneje Załožby Amadeo Antonio. Na Wojerowskim zjězdźe „Ekstremizm“ nawjedowaše wón dźěłarničku „reichsbyrgarjo a ideologije zapřisahanstwa“.
Peter Fitzek je jedna z najznaćišich wosobow reichsideologiskeho miljeja. K jeho tak mjenowanemu „Kralestwu Němska“ słuša mjeztym tež hižo Bjerwałdski hród. Jemu poddani přiwisnicy jemu tajke inwesticije zmóžnja z tym, zo jemu wulke sumy pjenjez z priwatneho wobsydstwa daruja. Jako sobuzałožićel towarstwa „Nowa Němska“ wuwoła wón „Kralestwo Němsku“ we Wittenbergu a da so tam 2012 ke „kralej krónować“.
Litawska chce so bóle zawěsćić
Vilnius (dpa/SN). Po tym, zo bě raketa zańdźeny tydźeń w susodnej Pólskej zadyriła, chce Litawska swoje powětrowe zakitowanje zesylnić. Narodna wěstotna rada baltiskeho čłona EU a NATO wčera wobzamkny, zo ma so nabytk wotpowědnych wotwobaranskich raketowych systemow pospěšić. Po słowach poradźowarja statneho prezidenta Gitanasa Nausedy planuje knježerstwo tute hižo klětu kupić a instalować. Dale wón naspomni, zo podšmórnje wrjesk rakety w Pólskej wažnosć kooperacije zwjazkarjow w NATO při wutwarje powětroweho zakitowanskeho systema cyłeho regiona. Tutón dypk dyrbjał při přihotach wjerška NATO klětu we Vilniusu na prěnim městnje stać, tak zo by so rozsud za nakup spěšnje zmóžnił a zo by Litawska dokładnje wědźała, hdy móže ze zwoprawdźenjom ličić.
Litawska mjezuje mjez druhim z ruskej eksklawu Kaliningrad a z ruskim zwjazkarjom Běłoruskej. Wójnu w Ukrainje widźa w małym baltiskim staće jako bjezposrědnje wohroženje narodneje wěstoty. Tohodla wužiwaja dźensa hižo powětrowe zakitowanske systemy typa „Nasams“.
To a tamne (22.11.22)
Spěwaca knježna Cristina Scuccia je w Italskej castingowu show dobyła a nětko swój rjad wopušćiła. „Bě to změna we mni“, 34lětna w talkshowje „Verissima“ priwatneho telewizijneho sćelaka Canale 5 rozjasni. Wona bydli nětko w Španiskej a dźěła tam jako pinčnica, wona sobotu powědaše. Město z ćmowym šlewjerjom sedźeše wona moderatorce z nosowym piercingom a pinknym woblekom napřećo. Scuccia bě w lěće 2014 „The Voice of Italy“ dobyła. Šlewjer po 15 lětach nabožneho žiwjenja wotpołožić, běše jej ćežko.
Sydomlětny hólčec w Saarbrückenje bě so minjeny štwórtk po zwadźe ze swojej maćerju w swojej stwě zamknył a telewizor wótře stajał, policija wčera zdźěli. Wołanje a klepanje maćerje njeje wjace słyšał. Mać njewědźeše sej hižo rady a informowaše z wulkej starosću policiju a wohnjowu woboru. Wobornicy zamóžachu durje skónčnje wočinić a nadeńdźechu hólca, kiž bě sej mjeztym wusnył.
Lubosć k blišemu
Köln (B/SN). Na swjatočnosći k 125lětnemu wobstaću Carity su wjacori rěčnicy wuzběhnyli, zo je so katolski dobroćelski zwjazk wot spočatka swojeho skutkowanja sprawnosći, solidariće a lubosći k blišemu wěnował. Dźensa ma wón 700 000 sobudźěłaćerjow a statysacy čestnohamtnikow w 24 000 pěstowarnjach, hortach, starownjach, ambulantnych hladanišćach a poradźowarnjach.
Nowa zwjazkowa jednaćelka
Bonn (B/SN). Něhdyša wotrjadnica ZdK Julia Seeberg je nawodnica poradźowanskeho towarstwa za samodruhich Donum Vitae (Dar žiwjenja). Wone bu 1999 załožene, jako bě so katolska cyrkej ze statneho systema poradźowanja samodruhich rozžohnowała. Donum Vitae wustaja po přeću dale poradźowanske wopismo, kotrež słuži k njechłostajomnemu wotehnaću.
Hida přećiwo křesćanam
Tokajew znowa woleny
Astana (dpa/SN). W bywšej sowjetskej republice Kazachstan je statny šef Kassym-Schomart Tokajew prezidentske wólby po nachwilnych podaćach dobył. Tokajew bu z 81,31 procentami hłosow wolerjow znowa wuzwoleny, zdźěli dźensa centralna wólbna komisija w Astanje. Pjeć napřećiwnych kandidatow docpě při wčerawšich wólbach jenož wuslědki mjez 2,1 a 3,4 procentami. Wólbne wobdźělenje wučinješe 69,4 procenty.
Zemjerženje w Indoneskej
Jakarta (dpa/SN). Při zemjerženju ze sylnosću 5,6 je na indoneskej kupje Java znajmjeńša 46 ludźi zemrěło. To wobkrući dźensa tamniši narodny katastrofowy škit. Tež mnohe domy su zdźěla sylnje wobškodźene. Na widejach w socialnych syćach běchu rozpadanki na dróhach widźeć. Dokładna ličba zranjenych njeje hišće jasna. Dźensa připołdnju (městny čas) je blisko stolicy Jakarta na kupje Java zemja žrała.
Turkowska stejnišća nadpadnyła
Maja wulku financielnu a personelnu nuzu
Bratislava (dpa/SN). Sta słowakskich medicinarjow su při demonstraciji w stolicy Bratislavje před hrožacym kolapsom strowotnistwa w kraju warnowali. Kónc nowembra wotběži wupowědźenski čas 2 100 lěkarjow w chorownjach, kotřiž běchu w oktobrje w zwisku z protestom přećiwo špatnym dźěłowym wuměnjenjam a niskej mzdźě swoje městna wupowědźili.
Šef lěkarskeho dźěłarnistwa LOZ Peter Visolajsky dopomni minjeny štwórtk při manifestaciji na to, zo chcyli wón a jeho kolegojo swoje wupowědźenja jenož cofnyć, jelizo knježerstwo daloko sahace pisomne přizwolenja slubi. Dotalne rozmołwy pak njejsu hišće žane dojednanje wunjesli. Visolajsky měni, zo pobrachowace financowanje chorownjow smjerć něhdźe 5 000 ludźi wob lěto zawinuje. Tele smjertne pady móhli so wobeńć, jelizo so chorownje lěpje wuhotuja a wjace personala k dispoziciji steji.
Chcedźa Moldawsku dale podpěrać
Paris (dpa/SN). Mjezynarodna konferenca dawaćelow chce dźensa w Parisu dalšu podpěru za pod sćěhami wójny w Ukrainje wosebje ćerpjacu republiku Moldawsku organizować. Zwjazkowa wonkowna ministerka Annalena Baerbock (Zeleni) připowědźi wčera wječor dalšu pomoc za bywšu sowjetsku republiku, konkretny wobjim pak wona njemjenowaše. Mjez Rumunskej a Ukrainu ležaca Moldawska z něhdźe 2,6 milionami wobydlerjemi je jedyn z najchudšich krajow Europy.
Nimo Baerbock su na zetkanju jeje francoska kolegina w zastojnstwje Catherine Colonna kaž tež wonkownaj ministraj Rumunskeje Bogdan Aurescu a Moldawskeje Nicu Popescu wobdźěleni. Francoski prezident Emmanuel Macron a moldawska prezidentka Maia Sandu chcetaj k zakónčenju konferency rěčeć.
Dźensa popołdnju běše nimo toho bilateralne zetkanje mjez zwjazkowej wonkownej ministerku a francoskim prezidentom předwidźane, hdźež chcetaj konstruktiwnje diskutowane temy wobjednawać.
Njejsu žadyn krok dale
Swětowa klimowa konferenca z njespokojacym wuslědkom
Scharm el Scheich (dpa/SN). Wot někotrehožkuli horco wočakowany wustup z fosilnych surowiznow kaž wolija, płuna a wuhla njejsu delegaća krajow na swětowej klimowej konferency w Scharm el Scheich docpěli. Po dwutydźenskich wuradźowanjach njeje swětowa zhromadnosć tuž praktisce nastupajo wojowanje přećiwo změnje klimy žadyn krok dale.
Přiwšěm je so na swětowej klimowej konferency tež škrička nadźije pokazała. W Egyptowskej je so poradźiło, štož sej ludźo hižo lětdźesatki žadaja. Bohate staty, kotrychž wysoki wustork parnišćowych płunow sćoplenje zemje rozsudnje zawinuje, nětko chudše kraje financielnje podpěraja. Wobkedźbowarjo maja dojednanje za „měznik“. Po słowach zwjazkoweje wonkowneje ministerki Annaleny Baerbock (Zeleni) je wobzamknjenje „nowy kapitl w klimowej politice“.
To a tamne (21.11.22)
Krótko do zahajenja koparskich mišterstwow w Kataru chce hosćićel kompletny zakaz alkohola kołowokoło stadijow přesadźić. Strategija k wudawanju alkohola ma so znowa změnić, we wobłuku wosom stadijow nima so za čas hrow piwo předawać, rozprawja britiska nowina „The Times“. Rozsud su minjeny pjatk něhdźe 48 hodźin do zahajenskeje hry WM mjez hosćićelom Katarom a Ekuadorom oficialnje wozjewili.
Loni na Berlinskich Gendarmowych wikach pokradnjene a zaso našłe bože dźěćatko so zaso na tamniše hodowne wiki nawróći. Tónraz pak postawu lěpje škitaja. Drjeworězbar Ernst Kraus z Oberammergauwa je ju z rjećazom zawěsćił. Boži narodk z dźěćatkom budźe tónraz we wobłuku zachoda postajeny, hdźež změje wěstotny personal stajnje wóčko na dźěćatko. Něhdźe 50 centimetrow wulka a tři kilogramow ćežka figura je po informacijach wobsedźerjow 3 000 eurow hódna.
Chcedźa studentow podpěrać
Berlin (dpa/SN). Zwjazkowy kabinet chce dźensa pomoc we wobjimje 200 eurow za studowacych a fachowych šulerjow wobzamknyć. Wosebite płaćenje je dźěl spočatk septembra wot amploweje koalicije dojednaneho třećeho wolóženskeho paketa w zwisku z energijowej krizu. Po planach zwjazkoweho kubłanskeho ministerstwa měli so potrjecheni přez centralnu platformu w interneće požadać móc. Tuchwilu pak njeje tajka hišće přihotowana. Nimo toho chcyše kabinet wjace pjenjez za bliskowobchad wobzamknyć.
Dale strašna situacija
Gifhorn (dpa/SN). Po zražce dweju nakładneju ćahow wčera we wokrjesu Gifhorn dale eksploziwny płun z dweju kotołoweju wagonow wustupuje. Před wuchowanjom dyrbjeli wagony prózdne być, zdźěli dźensa rěčnik zwjazkoweje policije. Kóžda škrička móže tam ke katastrofje wjesć. Połoženje na městnje njezboža je njezměnjene. Tež zbytne wozy wobeju ćahow priwatneju železniskeju předewzaćow njejsu so hišće wuchowali. W nocy bu městno njezboža zašlahane a zawěsćene.
Sylny wichor zachadźał
