W Choćebuzu nastanjetej prawdźepodobnje dwě uniwersiće

Podstupim (dpa/SN). W Choćebuzu ma bórze móžno być, medicinu studować. Tak rěka jedyn z planow, kotrež chcedźa po wudobywanju brunicy we Łužicy zwoprawdźić. Naprawa je sobu najwažniša w zwisku ze změnu strukturow w kónčinje. Wot braniborskeho knježerstwa ­zasadźena komisija fachowcow bě so za tajke wukubłanje w druhim najwjetšim měsće Braniborskeje wuprajiła. Wukubłanje mediciny měło so poprawom ­Braniborskej techniskej uniwersiće (BTU) Choćebuz-Zły Komorow přirjadować, nětko pak hinaši koncept zdźěłuja.

Po informacijach powěsćernje dpa zamołwići tuchwilu wo druhej nošerskej strukturje rozmysluja. Wo tym rozprawješe tele dny nowina Lausitzer Rundschau. Braniborske ministerstwo za wědomosć to dotal njekomentuje. „Zamołwita ministerka nochce so do rozsuda kabineta k tomu wuprajić. Zaměr je a wostanje, kónčny koncept hač do kónca měrca wědomostnej radźe spřistupnić“, zdźěli rěčnik wědomostneho ressorta Stephan Breiding. Na doskónčnym koncepće tuchwilu hišće dźěłaja.

Alojs Mikławšk je tajki zapósłanc, kaž sej ludźo zastupjerja ludu přeja: wšědny dźeń wšěm z najwšelakorišej podpěru poboku, kotřiž so w sporće, kulturje, w socialnym wobłuku, w hospodarstwje a při wuwi­wanju regiona, haj w cyłej towaršnosći za žiwjensku kwalitu ludnosće angažuja. A hač wo hrožace wudobywanje kaolina blisko Róžeńčanskeho hnadowneho městna, wonječesćenje znamjenjow křesćanskeje wěry abo druhe palace serbske naležnosće dźěše: Alojs Mikławšk bě a je swěrny posoł swojeho ludu. Hustodosć pragmatiski a diplomatiski, ale, jeli je ­trjeba, tež bojowniski. Dźakowano transparency na internetnej stronje wokrjesneho zwjazka CDU wěmy, zo jeho namjetowana naslědnica za změnu generacijow dawno do „teama 2024“ dorostowych kandidatow CDU Sakskeje za přichodne wólby krajneho sejma słuša. Nětko móže wona pokazać, hač bazu CDU, tež serbsku, ze swojej kandidaturu přeswědči. Marcel Brauman

Při nadpadźe rubježnika na hosćenc w Nižozemskej njeje skućićel z rozsudźenosću hosći ličił. Jako muž minjeny pjatk hosćenc w gmejnje Best z brónjemi nadběhowaše a za pjenjezami žadaše, su jeho wjacori hosći přemóžili. Woni jeho tak dołhe zadźeržachu, doniž njebě policija na městnje. Kaž so pozdźišo wukopa, měješe muž samo atrapu pistole a powětrowu pistolu při sebi.

Ze starobu 9 lět a 210 dnjow je mała myš z mjenom Pat nětko w knize Guiness ­zapisana. Zwěrjatko je najstarša žiwa ­myška, kotruž ludźo hladaja. Pat bydli w zwěrjencu SanDiego Wildlife, hdźež prócuja so wot wotemrěća wohrožene družiny zwěrjatow wuchować. Myška přisłuša k rědkej družinje, kotraž ma swoju domiznu na juhu kaliforniskeho přibrjoha.

Lipsk (dpa/SN). Chorobna kasa Barmer žada sej wjace digitalizacije strowotniskeho wobłuka. Předewšěm w zwisku z wěstotu lěkowanskich srědkow by to pomhało. Často bjeru pacienća přewjele medikamentow, kotrež su jim wšelacy lěkarjo poručili, bjez toho zo je to mjez woběmaj wothłosowane. Z pomocu elektroniskeje akty pacienta móhli lěkarjo zhonić, kotre medikamenty hižo wužiwaja. Po roz­prawje Barmer dóstanje přerězny 40lětny pacient w Němskej w běhu dźesać lět 80 receptow a 125 lěkowanskich srědkow.

Dalša pomoc po puću

Wunstorf (dpa/SN). Zwjazkowe knježerstwo je Turkowskej dalšu pomoc za wopory zemjerženja přilubiło. Zwjazkowa nutřkowna ministerka Nancy Faeser (SPD a zwjazkowy zakitowanski minister Boris Pistorius (SPD) staj dźensa rano lětanišćo we Wunstorfje pola Hannovera wopytałoj, z kotrehož dodawaja tony pomocnych srědkow do potrjechenych kónčinow. Z Turkowskeje a Syriskeje přizjewichu zarjady dźensa wjace hač 21 000 smjertnych woporow.

Projekty spěšnišo wobdźěłać