Tankowe zawěry
Waršawa (dpa/SN). K róčnicy wudyrjenja wójny w Ukrainje je Pólska z tym započała, swoju mjezu k Ruskej a Běłoruskej z tankowymi zawěrami zawěsćić. „To je dźěl našeje strategije zakitowanja a wottrašenja“, piše zakitowanski minister Mariusz Blaszczak wčera na Twitter. Prěnje blokady su hižo na 200 kilometrow dołhej mjezy k ruskej eksklawje Kaliningrad natwarili.
Runje tak chce Pólska na dohromady 418 kilometrow dołhej hranicy k Běłoruskej tankowe zawěry připrawić. Mócnar Aleksander Lukašenko je swój kraj Ruskej jako bazu we wójnje přećiwo Ukrainje k dispoziciju stajił. Běłoruska twori tež zhromadne jednoty z Ruskej. Do wójny aktiwnje zapřimnyła pak dotal njeje.
To a tamne (24.02.23)
Swoje dźěćo je mać na socialnym zarjedźe w Berlin-Neuköllnje porodźiła. Dokelž hižo dwě dźěsći ma a jej hrozy bydlenje zhubić, dóstanje nětko wosebitu pomoc wot zarjada. Žona bě wutoru w prawidłownej rěčnej hodźinje wo strowotniskich problemach skoržiła. Krótko na to su hrona započeli. Hdyž nuzowy lěkar přichwata, je hłójčka hižo widźeć była. Kaž sćelak RBB rozprawješe, traješe porod 15 minutow. Mać a ćěšenk do chorownje dowjezechu, jimaj so derje dźe.
Zmylk druheho šofera při přesćěhowanju je so zahubnje za muža w Schwerinje wuskutkował. Tón bě wjace hač 30 lět bjez jězbneje dowolnosće jězdźił. 57lětny bě 6. februara blisko hrodu z awtom po puću. Hdyž druhi šofer jeho přesćěhaše, sta so njezbožo z pječa snadnej sobuwinu Schwerinjana. Při zwěsćenju njezboža rjekny zastojnikam, zo papjery sobu nima. Policija na to zwěsći, zo bu jemu 1992 jězbna dowolnosć na přeco sćazana.
Wo pomocy Scholza rozmysluja
Potsdam/Schwedt (dpa/SN). Braniborske knježerstwo chce wuwostateho postupa při wućeženju rafinerije PCK w Schwedće dla zwjazkoweho kanclera Olafa Scholza (SPD) wo podpěru prosyć. „Budźe-li wokomik (...), zo prajimy, tale Task Force njeje na tym městnje prawa ručica“, rjekny hospodarski minister Jörg Steinach (SPD) dźensa w krajnym sejmje Braniborskeje. Potom wobroći so ministerski prezident nadźijomnje direktnje na kanclera a prosy jeho wo pomoc.
Zemja w Tadźikiskej ržała
Peking (dpa/SN). Zemjerženja njepopušća. Tajke sylnosće 7,2 po Richterowej skali je dźensa słabje wobsydleny dźěl Tadźikiskeje střasło, chinski centrum za zemjerženje wozjewi. Zarjadnišćo USA USGS rěčeše porno tomu wo sylnosći 6,8. Srjedźišćo rženja ležeše 67 kilometrow wot městačka Murghob zdalene we wuchodnym dźělu kraja blisko mjezy k Chinje. Informacije wo škodach dotal njepředleža.
Próšk ze Sahary
Guterres warnował, konflikt rozšěrić
New York (dpa/SN). Lěto po tym zo je Ruska do Ukrainy zaćahnyła, je debata w połnozhromadźiznje Zjednoćenych narodow njepřećelskosć mjez wójnskimaj stronomaj znowa wotkryła. Ukrainski wonkowny minister Dmytro Kuleba je Ruskej na zetkanju wčera w New Yorku ludmorjenje wumjetował. Ruski wulkopósłanc pola UN Wassilij Nebensja rjekny, zo chce zapad jeho kraj „rozkuskować a zničić“. Generalny sekretar UN Antonio Guterres warnowaše mjeztym před rozšěrjenjom konflikta a zasadźenjom jadrowych brónjow. Dźensniši štwórtk chcyše so zwjazkowa wonkowna ministerka Annalena Baerbock (Zeleni) w plenumje słowa jimać. Za kulisami UNO su w minjenych měsacach rozjimali, kak substancielna móhła rezolucija k róčnicy inwazije być. Kaž bě z kruhow UN zhonić, bě Ukraina na rezolucijomaj dźěłała. Jedna wobrysuje tribunal přećiwo wójnskim złóstnikam. Tamny tekst jedna wo tym, dźesaćdypkowy měrowy plan ukrainskeho prezidenta Wolodymyra Zelenskeho do dokumenta UN přewjesć. Wobeju idejow pak su so do wothłosowanja wzdali, kotrež bě za dźensa předwidźane.
Swětowu banku reformować
Bengaluru (dpa/SN). Organizacija za wuwiće One je sej do zetkanja financnych ministrow wodźacych industrijnych a prohowych krajow (G 20) w indiskim Bengaluru reformy swětoweje banki žadała. Aktualnje zwostawa tójšto pjenjez, tak k podpěrje Ukrainy abo za zmištrowanje změny klimy, njewužiwane na kontach bankow za wuwiće, organizacija dźensa kritizowaše. „Su parametry, kotrež zmóžnja, zo banki za wuwiće runje tak kaž swětowa banka jasnje wjace inwestuja hač dotal – a to bjez nowych zapłaćenjow ze stron dawaćelskich statow.“
Tuchwilu boji so swětowa banka rizikow kaž čert swjećeneje wody, rjekny Stephan Exo-Kreischer, direktor One Němska. Tute nastajenje dyrbi so změnić. Nimo toho měła swětowa banka sylnišo wotwołajomny kapital wužiwać hač dotal. Dotalna politika móžnym a trěbnym projektam bohužel zadźěwa.
Politikar ze stilom
Braniborska a Sakska prědku
To a tamne (23.02.23)
Młodostny z Bangladeša je so po njewotpohladanej jězbje we łódźnym kontejneru zaso do domizny nawróćił. 16lětny njeje so při chowance z přećelemi w januarje z kontejnera na łódźi w Chittagongskim přistawje wuswobodźić móhł, rjekny sobudźěłaćer wonkowneho ministerstwa w Dhaka powěsćerni dpa. Po wjacorych dnjach na morju su hólčeca w Malajziji zesłabjeneho w swojim kontejneru našli. Wottam su jeho do kliniki dowjezli, hdźež bu hladany.
Po spektakularnym zadobyću do drohotneje butiki w nutřkownym měsće Hamburga su 48lětneho na Essenskim hłownym dwórnišću zajeli. Muž je njeskutka nuznje podhladny, zdźěli wčera policija w Hamburgu. Po přepytowanjach je z kradnjenym awtom loni 18. oktobra rano do wukładneho wokna nobel-wobchoda jěł a na to drohe toboły spakosćił.
Tarifowe žadanje wobkrućiło
Berlin (dpa/SN). Do druheho jednanskeho koła w tarifowym konflikće zjawneje słužby Zwjazka a komunow je posłužbowe dźěłarnistwo ver.di swoje žadanje za 10,5 procentami wjace mzdy wobkrućiło. Dźe předewšěm wo tych, kotřiž telko njezasłužeja, rjekny šef ver.di Frank Werneke dźensa w rańšim magacinje sćelaka ZDF. Jich je w zjawnej słužbje wulke mnóstwo přistajenych. Woni wosebje pod wysokimi płaćiznami ćerpja.
Znajmjeńša 25 zranjenych
Tel Aviv/Ramallah (dpa/SN). Při zasadźenju israelskeho wójska w Nablusu w kraju zapadnje Jordana bu po palestinskich informacijach znajmjeńša 25 Palestinjanow zranjenych. Ministerstwo za strowotu w Ramallahu dźensa zdźěli, zo buchu woni wot wutřělow israelskich jednotkow trjecheni. Wjacori ze zranjenych su po tym w chutnym stawje. Israelska armeja jenož wozjewi, zo bě dopołdnja zasadźenje w tutym měsće.
Swójski zakoń trěbny
