Lauterbach reformu zakituje
Berlin (dpa/SN). Zwjazkowy minister za strowotnistwo Karl Lauterbach je wjele diskutowanu reformu chorownjow zakitował a „lěpši lěk“ mjenował. „Chcemy trochu wjace centralizacije, zo móhli specielne operacije tam přewjesć, hdźež je to najlěpje móžno“, rjekny politikar SPD dźensa w rańšim magacinje sćelaka ARD. Runočasnje warnuje towaršnosć chorownjow Němskeje před insolwencami. Wo problemje wuradźować chcychu tež dźensa popołdnju na zetkanju chorownjow z Lauterbachom.
Bamž chcył do Kijewa a Moskwy
Rom (dpa/SN). Bamž Franziskus planuje, so do ukrainskeje stolicy Kijewa podać, tola jenož pod wuměnjenjom, zo móhł po tym tež Moskwu wopytać. „Chcył do wobeju město jěć, abo nihdźe“, rjekny bamž kónc tydźenja nowinarjam. Mjeztym dlěje hač lěto trajaca nadpadniska wójna Ruskeje přećiwo Ukrainje hodźała so po jeho měnjenju jenož z dialogom a konkretnymi měrowymi iniciatiwami skónčić. Vatikan hižo dlěje poskićuje, mjez Ruskej a Ukrainu posrědkować.
Na Ukrainje trjebaja municiju
Towarstwa šwikaja dlijenja
Zakoń pruwować
Unija a Lěwica stej přećiwo namjetej
Berlin (dpa/SN). Amplowa koalicija chce sydła w zwjazkowym sejmje wot 736 městnow na 630 dołhodobnje wobmjezować. Za to žněje knježerstwo wjele kritiki, předewšěm ze stron opozicije. Frakciski jednaćel CDU/CSU Thorsten Frei ma to za problematiske, dokelž njehodźi so to prawnisce přesadźić. „Namjet měri so přećiwo Lěwicy, kotrejž chcedźa z pomocu wólbneho prawa škodźeć“, podšmórny jednaćel frakcije Lěwicy Jan Korte.
Hač do kónca tydźenja chce amplowa koalicija namjet wobzamknyć. Hižo w lěće 2025 ma so nowe wólbne prawo nałožować.
Wo reformje hižo někotre lěta w zwjazkowym sejmje diskutuja. Naposledk měješe sejm dale a wjac zapósłancow, štož zawinuje přidatne kóšty. Přičina toho je němski wólbny system z dwěmaj hłosomaj. Prěni hłós je za direktneho kandidata wólbneho wokrjesa. Z druhim hłosom wobliči so podźěl sydłow, kotrež strony w zwjazkowym sejmje dóstanu. Tak nastanu přidatne mandaty abo wurunanske mandaty.
„Durje trochu wotewrjeniše“
Rozdźělne reakcije na wuslědki konferency biskopow Němskeje
Frankfurt n. M. (dpa/SN). Wuslědki sobotu zakónčeneho reformoweho procesa katolskeje cyrkwje w Němskej su rozdźělne reakcije wubudźili. Wobaj zarjadowarjej, Němska biskopska konferenca a Centralny komitej katolikow Němskeje, hódnoćeštaj facit přewažnje pozitiwnje: Synodalny puć je fungował, najebać wšě wobmyslenja a wšón pesimizm“, rjekny předsyda konferency biskopow Georg Bätzing po zakónčenju pjateje a poslednjeje synodalneje zhromadźizny w Frankfurće nad Mohanom. „Njejsmy hišće wšitko wobzamknyli, wuhibki pak su stajene.“
Kóžda pistola je riziko
To a tamne (13.03.23)
We wjacorych kinach w Němskej a druhich krajach je minjene dny k wukročenjam dóšło. W běhu předstajenja filma „Creed III“ młodostni w kinje stawachu, po sedłach krosnowachu, z popcornom mjetachu a napoje rozkidachu. Na syći TikTok su wideja tajkich mylenskich akcijow wulku kedźbnosć wuwabili. Policija w Essenje je pokazki na wubědźowanje namakała. Při tym čuja so akterojo k tomu pohnući, sej ze swojimi akcijemi přetorhnjenje kinowych předstajenjow wunuzować a tak kedźbnosć pola TikTok dóstać.
Na swójskim kwasnym dnju měješe njewjesta w Oberfrankenje njedawno hubjenu naladu. Najprjedy je 32lětna z frizerskeho wobchoda ćeknyła, bjeztoho zo je cyłkownu sumu za swoju njewjesćinsku frizuru zapłaćiła. Po tym je wona do awta frizerki zajěła. Hač da so žona na wonym dnju přiwšěm hišće zwěrować, njemóžeše rěčnik policije rjec.
Syć za e-awta natwarić
Stuttgart (dpa/SN). Awtotwarc Mercedes-Benz je swoje plany k syći za nabiwanje elektroawtow konkretizował. W Němskej a Francoskej chcedźa lětsa prěnje stołpy za spěšne nabiwanje twarić, rozłoži šef předsydstwa Mercedes-Benz Mobility Franz Reiner nětko w Stuttgarće. Nastać ma wobšěrna syć. Kupcy e-awtow předewzaća maja z toho profitować, dokelž móža sej wotpowědne stołpy rezerwować.
Wšitcy dyrbja energiju lutować
Brüssel (dpa/SN). Europska unija dyrbi hač do lěta 2030 znajmjeńša 11,7 procentow mjenje energije přetrjebać. Na to dojednachu so zastupjerjo europskeho parlamenta krajow EU dźensa rano w Brüsselu. Zakład za to tworja ličby z lěta 2020. Kóždy kraj EU ma tomu přinošować. Na zakładźe formule chcedźa narodne přinoški wuličić. Kraje maja je po móžnosći dodźeržeć. Jenož hač do 2,5 procentow smědźa wot přinoška wotchileć.
Žadaja sej jednoriše postajenja
Wočakuja znowa wjele ćěkancow
Přetwar tepjenjow spěchować
Hospodarski minister Habeck planuje wobšěrny pomocny program
Berlin (dpa/SN). Za raznje diskutowany poněčimny přetwar tepjenjow na klimje přichilene připrawy přilubja zwjazkowy minister za hospodarstwo a škit klimy Robert Habeck miliardy eurow wopřijacy spěchowanski program. Pomoc měła so na dochodach ludźi orientować, je ministerstwo Habecka wčera w Berlinje připowědźiło. „Nichtó njepoběži do pincy, zo by tepjenje zwutorhał“, rjekny politikar Zelenych hladajo na tuchwilu hišće wjele wužiwane płunowe a wolijowe tepjenja. Předwidźane su tuž „mnoholičbne wuwzaća, přechodne rozrisanja a časowe předpisy“, rěka w dokumenće z titulom „Derjeměće klimoneutralnje wobnowić“, kotryž Habeck w tym zwisku w Berlinje předstaji.
