Wobaraja so planam Habecka
Knježerstwo chcyło wot 2024 nowe płunowe a wolijowe tepjenja zakazać
Berlin (dpa/SN). FDP chcyła planowanemu zakazej nowych płunowych a wolijowych tepjenjow wot lěta 2024 zadźěwać. „Našej frakciji dotal žadyn naćisk k zakazej wolijowych a płunowych tepjenjow njepředleži. Tomu tež njedóńdźe“, rjekny frakciski šef FDP w zwjazkowym sejmje Christian Dürr wčera nowinarjam. Wón so boji, zo twarske a podružne kóšty ze zakazom tajkich tepjenjow dale přiběraja. „Pawšalne zakazy mam za wopačne. Město toho měli technologije wuwiwać, z kotrymiž móhli klasiske tepjenje tež w přichodźe na klimje přichilene wašnje dale wužiwać“, Dürr rjekny. Nowiny běchu předwčerawšim, wutoru, wo naćisku hospodarskeho a twarskeho ministerstwa rozprawjeli, po kotrymž ma wot lěta 2024 zakazane być, nowe płunowe a wolijowe tepjenja zatwarić. Město toho měli so tepjenja wužiwać, kotrež 65 procentow swojeje potrjeby z wobnowjomnych energijow wuzbytkuja. Nadrobnosće njejsu hišće znate.
To škitej klimy njetyje
Wot klětušeho žane nowe tepjenje z wolijom abo płunom? Njedawno rěkaše ze stron knježaceje politiki, po tym zo su wobzamkli, po zakónčenju wužiwanja atomoweje energije tež kóncej wudobywanja wuhla puć rubać: Zemski płun je jako ekologisce najčisćiši fosilny nošer energije móst do epochi produkowanja bjez negatiwnych sćěhow za klimu. Tohodla je dosć ludźi spěchowanje stata za nowu termu abo přiražku zjawneje ruki za optiměrowanje płunoweho tepjenja dóstało. Nětko bychu po woli ministerstwa Roberta Habecka (Zeleni) samo ludźo nuzowani byli, so z płunom rozžohnować, hdyž je so tepjenje skóncowało.
Sakski ministerski prezident Michael Kretschmer kaž modlerski młynčk wospjetuje, zo njesměmy poskitk nošerjow energije dale pomjeńšować a tuchwilnu situaciju wójny dla jako dołhodobnje „normalnu“ wobhladać. Škit klimy trjeba dobru towaršnostnu klimu jako bazu. Tomu tajki naćisk njetyje. Marcel Brauman
To a tamne (02.03.23)
Přewšo zajimawy astronomiski zjaw je hišće hač do dźensa wječora na njebju widźeć: „Napřemoběh jaskraweju hwězdow našeho słónčneho systema Jupitera a Venus. Minjene dny běštej so hwězdźe wšědnje zbližiłoj. Dźensa ma Venus Jupitera „přesćahnyć“. Změna pozicije zwisuje ze zemskej perspektiwu na słónčny system. We woprawdźitosći stej wobě hwězdźe daloko wot so zdalenej.
Lód ze sušenymi insektami poskićuja wot najnowšeho w lodarni w badensko-württembergskim Rottachu nad Neckarom. Wumyslił je so njewšědnu kreaciju 33lětny předewzaćel Thomas Micolino. W swojim wobchodźe při hłownym torhošću historiskeho stareho města zbudźa wón tak wjele kedźbnosće. Přiwšěm dóstanješ tam tež cyle normalny lód.
Marko Suchy zaso předsyda rady
Drježdźany (SN). Čłonojo Rady za serbske naležnosće Sakskeje zetkachu so wčera w přitomnosći zastupjerkow a zastupjerjow wšěch knježerstwowych frakcijow a opozicije w rumnosćach Sakskeho krajneho sejma. Po połdralětnej wakancy wuzwolichu Marka Sucheho znowa za předsydu rady. Wón bě zastojnstwo mjez druhim dla njedosahaceho organizatoriskeho wuhotowanja rady złožił. Ze zarjadowanjom jednaćelnje je so tutón njedostatk wotstronił. Wotpowědne městno so bórze zjawnje wupisa. Dale předpołožichu čłonojo swójski jednanski porjad rady, kotryž so dotal na wustawkach krajneho sejma orientowaše. Jedna ze změnow je, zo budu kwartalne posedźenja w Drježdźanach w přichodźe zasadnje zjawne.
Stawki tež w Sakskej
Lipsk (dpa/SN). W tarifowym konflikće přistajenych zjawneje słužby w komunach a Zwjazka je dźěłarnistwo ver.di namołwjało, zajutřišim w pjeć wjetšich sakskich městach stawkować. Tak měli sobudźěłaćerjo bliskowobchadnych předewzaćow w Lipsku, Drježdźanach, Kamjenicy, Šwikawje a Plauenje swoje dźěło złožić. Warnowanske stawki maja so runočasnje z globalnym klimowym stawkom hibanja Fridays for Future přewjesć.
Starosća so wjele ćěkancow dla
Podstupim (dpa/SN). Braniborski nutřkowny minister Michael Stübgen (CDU) starosća so wo komuny, kotřiž su wjele ćěkancow dla přećeženi. „Jelizo dale a wjace ludźi přichadźa, smy nuzowani, stany natwarić a ewentuelnje tež zaso sportowe hale za zaměstnjenje ćěkancow wužiwać“, wón wčera wječor w sćelaku RBB wuswětli. Stübgen sej žada, zo měli njekontrolowanemu přichadźenju zadźěwać. Hižo na čarje w Balkanje měli ludźi zadźeržeć.
Zwada w koaliciji
Po ćežkim njezbožu dweju ćahow w Grjekskej w nocy na dźensa je ...
Nuznje akcisku skupinu załožić
Žane krajne postajenja wjace
Drježdźany (dpa/SN). Po nimale třoch lětach so dźensa sakske postajenja w zwisku z koronapandemiju kónča. „Wjeselu so, zo so škitne postajenja po nimale třoch lětach a 63 postajenjemi kónča. Z tym smy dalšu wažnu kročel do směra normality docpěli“, měni wčera sakska strowotniska ministerka Petra Köpping (SPD) w Drježdźanach. Z tym płaći nětko jenož hišće infekciski škitny zakoń Zwjazka. Po tym maja so w chorownjach, hladarnjach a lěkarskich praksach nahubniki wužiwać.
Krajne postajenja, kaž izolaciska winowatosć, su w Sakskej hižo wot spočatka februara wotstronjene. Infekciske ličby su so minjene měsacy znižili. Přiwšěm je dale wažne, w sensibelnych wobłukach skedźbni wostać.
Giffey chce tola koaliciju z CDU
Berlin (dpa/SN). Po wospjetnych wólbach w Berlinje chce tuchwilna wyša měšćanostka Franziska Giffey (SPD) prawdźepodobnje koaliciju z wólbnym dobyćerjom CDU wutworić. Tole rozprawjachu wčera a dźensa wšelake medije, bjez toho zo su žórło podali.
Dotal knježi w Berlinje koalicija SPD, Zeleni a Lěwica, kotraž móhła hladajo na wólbne wuslědki dale wobstać. Dotal strony w Berlinje hišće wo wšelakich móžnosćach sonděruja. Kaž z kruhow SPD w Berlinje rěka, njeje so hišće próstwa wo koaliciske jednanje na krajne předsydstwo stajiła. Hakle na dźensnišim posedźenju chcedźa wo tym rozsudźić.
Wčera wječor je so třeće a poslednje koło sonděrowanskich rozmołwow mjez SPD a CDU kónčiło. Ani šef CDU Kai Wegner ani načolna kandidatka Zelenych Bettina Jarasch staj informacije wo rozmołwach zjawnje posrědkowałoj. Po słowach Wegnera ma so krajne předsydstwo CDU jutře schadźować, hdźež chcedźa temu koalicije wobjednawać.
Boži dom jako nošer energije
Za dale a wjace solarnych připrawow na třěchach cyrkwjow
Berlin/Podstupim (dpa/SN). Solarne připrawy na třěchach cyrkwjow njejsu za ewangelsku a katolsku cyrkwju w regionje Berlin-Braniborska hižo rědke. A tež politika reaguje na přiběrace wědomje za škit klimy. Tole wuchadźa z naprašowanja powěsćernje dpa, kotraž je so pola cyrkwjow za połoženjom wobhoniła. „Zachowanje stwórby – škit žiwjenskich zakładow – maja za křesćansku cyrkej kaž tež na statnej runinje wulku prioritu“, rěka w zhromadnej rozprawje Ewangelskeje cyrkwje Berlin-Braniborska-šleska Hornja Łužica (EKBO) kaž tež katolskeju biskopstwow Berlin a Zhorjelc. Tež braniborska ministerka za wědomosć Manja Schüle (SPD) je so zhromadnej rozprawje přizamknyła. K tomu pak tež słuša, zo wotwisnosć wot fosilnych energijowych nošerjow pomjeńšimy. Tež cyrkwinske wosady móža k tomu přinošować. „Mjez wutwarom wobnowjomnych energijow a pomnikoškitom njeje přećiwka“, je w zdźělence wozjewjene.
