Wosud hole w rukach justicy
Dresden/Ottendorf-Okrilla (SN/mb)). Prawiznik wobsadźerjow lěsa we Łužničanskej holi, Ingo Blechschmidt, liči w rozmołwje ze Serbskimi Nowinami (SN) z dlěšim rozestajenjom před sudnistwami. Aktiwisća přećiwo wotkrywanju noweje jamy za wudobywanje šćerka, kotřiž spytaja, porubanju 150 hektarow lěsa zadźěwać, su na zarjadniskim sudnistwje w Drježdźanach chwatny namjet zapodali. Z tym chcedźa hrožace zrumowanje protestneho campa ze stron policije wotwobarać. Kaž rěčnik sudnistwa, Robert Bendner, našemu wječornikej wobkrući, „so přisłušni sudnicy z naležnosću zaběraja“. Do redakciskeho kónca dźensnišeho wudaća SN hišće njeje k rozsudej dóšło. Po słowach Blechschmidta budźe so na kóždy podležana strona na wyšu instancu wobroćeć: wyše zarjadniske sudnistwo w Budyšinje.
Aktiwisća hižo połdra lěta w lěsu přebywaja. Namołwu krajnoradneho zarjada, teren hač do 23. wulkeho róžka wopušćić, su ignorowali. Pušćenje drjewa w lěsu je jenož hač do kónca měsaca dowolene, potom so započina sezona škita wosebje ptačkow.
Kabinet w Choćebuzu
Choćebuz (dpa/SN). Braniborski kabinet schadźowaše so dźensa w Choćebuzu. W rjedźe „kabinet na městnje“ chcyše krajne knježerstwo pod nawodom ministerskeho prezidenta Dietmara Woidki (SPD) a wyšeho měšćanosty Tobiasa Schicka (SPD) aktualne temy a zhromadne předewzaća wobrěčeć. Choćebuz płaći jako centrum změny strukturow we Łužicy. Temy su mjez druhim klučowe projekty kaž nowa twornja Němskeje železnicy a stejnišćo uniwersitneje mediciny.
Šmórnu dźěłowe městna
Hamburg/Köln (dpa/SN). Po zjednoćenju RTL a magacinow Gruner + Jahr je sej telewizijny koncern nowinarski wobłuk dokładnišo wobhladał. Přichodnje chcedźa bóle do digitalneho wobłuka inwestować. Jadrowe marki kaž na přikład magacin „Stern“ chce koncern zachować. Tola někotre časopisy njebudu hižo wudawać. To woznamjenja tež, zo něhdźe 700 z 1 900 dźěłowych městnow šmórnu, medijowy koncern dźensa zdźěli. Krok po kroku maja so plany hač do lěta 2025 zwoprawdźić.
Realne mzdy jasnje niše
Protestne akcije rozšěrili
Lipsk (dpa/SN). We wobłuku protestneje akcije po cyłym Zwjazku su klimowi aktiwisća hibanja „Poslednja generacija“ wažny wobchadny zwisk w Lipsku haćili. Tak běchu akcije dla po informacijach policije wčera rano na sewjeru města dróhi z awtami zatykane. Po jednej hodźinje běchu dróhi zaso swobodne. Kaž policija dale zdźěli, je so cyłkownje šěsć aktiwistow na blokadźe wobdźěliło. Štyrjo z nich su so na dróze kruće zlěpili. Přećiwo šěsć wobdźělenym přepytuje policija podhlada nućenja w nadróžnym wobchadźe a ranjenja zakonja wo zhromadźowanju dla.
Po wšej Němskej, mjez druhim w Magdeburgu, Düsseldorfje, Hannoveru, Kölnje a Berlinje su aktiwisća dróhi blokowali. Skupina „Poslednja generacija“ žada sej mjez druhim wjace škita klimy, tempolimit 100 kilometrow na hodźinu na zwjazkowych awtodróhach a 9-eurow-tiket za cyłu Němsku.
Ma nawjedować
Ličba woporow dale přiběra
Istanbul (dpa/SN). Ličba woporow ćežkeho zemjerženja wčera rano w pomjeznym regionje Turkowskeje a Syriskeje dale přiběra. Tamniše zarjady trochuja na nimale 5 000 zemrětych a wjace hač 23 500 zranjenych. Tysacy twarjenjow so sypnychu. Wjele krajow je podpěru přilubiło, tež z Němskeje je pomoc hižo po puću.
Wuchowarjo w Syriskej wuchadźeja z toho, zo je hišće wjele zasypanych swójbow mjez rozpadankami. W nocy su wichora a pobrachowaceje techniki dla pomałšo dźěłali. Lěkarjo su přežadani, dokelž njemóža wulku ličbu zranjenych w dosahacej měrje zastarać. W někotrych kónčinach nimaja tuchwilu žanu milinu. Tohorunja pobrachuja bencin a žiwidła. Někotre regiony njehodźa so tuchwilu docpěć.
W potrjechenej kónčinje njebě w minjenych 900 lětach žanoho ćežkeho zemjerženja, wuswětli geologowka Charlotte Krawczyk z Podstupimskeho geoslědźenskeho centruma. Wčera slědowachu sta dalšich zemjerženjow, čehoždla so ludźo tam jara boja.
Ludnosć njemóže za to
Ludźo zdźeržliwi
Frankfurt nad Mohanom (dpa/SN). Hladajo na stupace danje w zwisku z kreditami a wjele njewěstosće na imobilijowych wikach su přetrjebarjo skedźbliwi. Tak ličby twarskeho financowanja woteběraja. Wobchodnistwo němskich bankow z imobilijowymi požčonkami na priwatne domjacnosće a samostatnych je w decembru wo 43 procentow přirunujo z lońšim měsacom spadnyło. Tole wuchadźa z datow poradźowanskeje firmy Barkow Consulting. Z wolumenom 13,5 miliardow eurow je to najniši staw wot junija 2011.
Ličby z decembra su hižo štwórty negatiwny rekord za sobu, rjekny poradźowar Peter Barkow. Tež posrědkowarjo, kotrež ludźom twarske financowanja wobliča a k dispoziciji staja, rozprawjeja, zo su kupcy jara zdźeržliwi. Runje tak nimaja inwestorojo tuchwilu wulki zajim, swoje pjenjezy za imobilije wudać. Tuž płaćizny za twarjenja abo bydlenja spaduja.
Zastupjerjo SŠT z hosćom kruha „Serbja“ sakskeje SPD
Kamjenc. Sakski krajny dźěłowy kruh „Serbja“ w SPD je so minjeny pjatk z předsydstwom Serbskeho šulskeho towarstwa (SŠT) w Kamjencu zetkał. Mjez druhim bě předsydka SŠT Katharina Jurkowa witana rozmołwna partnerka. Ćežišća zhromadneho wuradźowanja běchu mjez druhim znowawobsadźenje wakantnych nawodnych funkcijow na serbskich šulach. Dale zaběrachu so přitomni z ćežemi přiwótřaceje so wučerskeje problematiki wosebje serbsce rěčacych fachowych wučerjow. Tež zachowanje a wutwar motiwacije za wuknjacych, zo bychu serbske šule wopytali respektiwnje serbsku rěč nawuknyli, bě tema zeńdźenja. Nimo toho rozjimachu čłonojo krajneho dźěłoweho kruha ze zastupjerjemi SŠT wužadanja při skutkowanju na naposledk k wšitkim temam rozsudy tworjacych statnych instancow.
W slědowacych internych wólbach dźěłoweho kruha bu Měrćin Krawc jako rěčnik wobkrućeny. Jako noweho zastupowaceho rěčnika wuzwolichu přitomni Jurja Bulanka.
To a tamne (07.02.23)
Wuknjacy zakładneje šule w hessenskim Griesheimje je so po wšěm zdaću jara na šulu wjeselił. Tak je sydomlětny hólčec wčera rano hižo krótko do pjećich dom wopušćił a so z tobołu a kolesom do šule podał. Staršej staj hišće spałoj, policija zdźěli. Kedźbliwy pasant hólca wuhlada, jako po dróze horje a dele jědźeše, a zdźěli to policiji. Zastojnicy su pachoła potom domoj dowjezli a překwapjenymaj staršimaj přepodałoj.
Jako kat předrasćeny muž z pozdatnym mječom je w Esslingenskim starym měsće minjeny pjatk zasadźenje policije zawinił. Swědkojo so starosćachu, dokelž bě wón jara přeswědčiwje a z namocu wustupował. Tuž zawołachu policiju. Zastojnicy namakachu jeho w pincy domu. Tam přihotowaše so kat na wodźenje po měsće, kotrež chcyše w srjedźowěkowskim stilu wuhotować.
„Naša wutroba je wulka, ale ...“
Sakski nutřkowny minister Armin Schuster 4. Budysku narěč měł
Budyšin (UM/SN). Na štwórte wudaće Budyskich narěčow je sakski nutřkowny minister Armin Schuster (CDU) minjeny pjatk něhdźe 200 wopytowarjow do Budyskeje tachantskeje cyrkwje přiwabił. Ze swojimi wułožowanjemi k temje „wěstota na městnje“ je wón wočiwidnje zajim wjetšiny wopytowarstwa zbudźił. Minister spěšnje wujasni, što sam jako hłowny nadawk w swojim zastojnstwje wobhladuje: bój přećiwo ekstremizmej a radikalizmej – a to ze wšěch politiskich stron. Prawicarski ekstremizm wobhladuje wón jako „najwjetši problem za Saksku. Runočasnje pak Armin Schuster wujasni: „Štóž policistow, sobudźěłaćerjow pomocnych słužbow abo politiskich zastojnikow nadběhuje, ma mje za přećiwnika!“ Podobnje widźi to tež hladajo na přesahowanja napřećo žurnalistam. „Boju so, zo překroča ekstremisća jednoho dnja mjezu mjez werbalnym a realnym nadběhom.
