Wočakowanja na nowu jězdźenku chětro wulke
Wiesbaden/Berlin (dpa/SN). Najebać jězdźenku za dźewjeć eurow je loni mjenje ludźi z busami a železnicu jězdźiło hač w lěće 2019 do koronakrizy. Wosebje pandemija a trend k domjacemu dźěłu su ličby sobujěducych raznje znižili. Cyłkownje su w busach a železnicach w blisko- a dalokowobchadźe 2022 něhdźe 10,2 miliardźe pasažěrow zličili, 14 procentow mjenje hač w lěće do korony. Hladajo na lěto 2021 pak wučinja rozrost na wšě 29 procentow, kaž statistiski zarjad we Wiesbadenje zdźěli.
Jězdźenka za dźewjeć eurow bě loni w měsacach juniju, juliju a awgusće na předań a měješe ludźi z jara snadnej płaćiznu do zjawneho bliskowobchada wabić. W kotrej měrje je so tole radźiło, njehodźi so z ličbow statistiskeho zarjada mnohich faktorow dla jasnje wučitać. Jedyn zjaw přiwšěm napadnje: Bě-li třeći kwartal w lětach do korony stajnje tón z najmjenje hosćimi w linijowym bliskowobchadźe, bě to w lěće 2022 čas z najwjace pasažěrami.
To a tamne (11.04.23)
Mjeztym hižo třeći raz je so 78lětna žona w USA do banki zadobyła. Kaž nowina The Kansas City Star nětko rozprawja, je ju policija po tym zajała. Minjenu srjedu bě wona maskěrowana do banki zastupiła, za pjenjezami žadała a so pola přistajeneje zamołwiła, dokelž je ju tak nastróžiła. Jako ju zastojnicy na parkowanišću lepichu, zwěsćichu, zo bě staruška trochu wjele alkohola piła. Po rozprawje nowiny bě 78lětna hižo raz w lětomaj 1977 a 2020 spytała banku wurubić. Hakle loni nazymu je na pruwowanje wusadźene chłostanje kónčiło.
Z přetwarjenym kófrom ze złotom w hódnoće 24 000 eurow je muž spytał do Indiskeje zapućować. Tak je wón dźěle kófra kaž na přikład šruby ze złota wuhotował, informowaše wčera indiska powěsćernja ANI. Cłownicy pak su wobšudnistwo pytnyli.
Macron a Xi so zetkałoj
Peking (dpa/SN). Chinski statny a stronski šef Xi Jinping a francoski prezident Emmanuel Macron staj so dźensa w Pekingu zetkałoj. „Sym kruće přeswědčeny, zo móže China wažnu rólu při zdobyću měra přewzać“, rjekny Macron krótko do toho nowinarjam hladajo na wójnu w Ukrainje. Macron chcył tole w rozmołwach „diskutować a pohonjować“. Xi Jinping witaše francoskeho hosća w Pekingu z wojerskej ceremoniju. Na rozmołwach wobdźělić chcyše so tež prezidentka komisije EU Ursula von der Leyen.
Dalše protesty připowědźene
Paris (dpa/SN). W Francoskej su dźěłarnistwa dźensa znowa k stawkam přećiwo wjele diskutowanej rentowej reformje prezidenta Emmanuela Macrona namołwjeli. Na mjeztym jědnatym cyłokrajnym protestnym dnju ličachu zamołwići z něhdźe 800 000 wobdźělnikami. Nutřkowny minister Gérald Darmanin chcyše 11 500 policistow zasadźić, 4 200 z nich w Parisu. Spočatnje měrne protesty běchu so minjeny čas dale a bóle k namócnym rozestajenjam wuwili.
Wojacy w Pólskej zwučowali
Na Templowej horje w Jerusalemje je wčera a minjenu nóc znowa k ...
Wuchod robustny
Halle (dpa/SN). Hospodarstwo na wuchodźe Němskeje móže z energijowej krizu lěpje wobchadźeć hač zawody na zapadźe Němskeje. Loni je produkcija na wuchodźe mjenujcy wo tři procentne dypki přiběrała, na zapadźe bě tomu 1,5 procentow, zdźěli wčera Leibnizowy institut za hospodarske slědźenje w Halle. Tež lětsa wočakuja fachowcy wyšu hódnotu nutřkokrajneho bruttoprodukta na wuchodźe přirunujo z cyłej Němskej. Kwota bjezdźěłnych so wulce njezměni.
Na wuchodźe a zapadźe pak njeje energijowa kriza tajke wulke škody zawinowała, kaž wočakowane. W nowych zwjazkowych krajach pak je hódnota předźěłanskeho přemysła přiběrała. Předewšěm twornja Tesla w Braniborskej je k tomu přinošowała. Twarska produkcija je porno tomu trochu woteběrała.
Jutry so wšitke naprawy kónča
Berlin (dpa/SN). Zwjazkowy strowotniski minister Karl Lauterbach (SPD) je wčera w Berlinje wuzběhnył, zo je koronapandemija w Němskej nimo. Hladajo na wirusowe warianty, šćěpjenja a tuchwilne pady w chorownjach móžemy z toho wuchadźeć, zo je pandemija přewinjena.
Strowotniski minister móže zrozumić, zo wobsteji zajim přepytować, kotre rozsudy a naprawy běchu wopačne. Powšitkownje pak hodźi so rjec, zo bě strategija dobra. Tak Lauterbach přizna, zo njeje poprawom trjeba było, šule tak dołho zawrěć. W času lockdownow běchu šule a pěstowarnje dlěši čas zawrjene.
Předwčerawšim je so fachowa rada ke koronje zwjazkoweho knježerstwa posledni raz w kanclerskim zarjedźe schadźowała. Jutry so wšitke statne škitne naprawy w zwisku z pandemiju skónča. Tež w strowotniskim wobłuku njebudźe wot zajutřišeho wjace předpisane nahubniki wužiwać. Šćěpjenja pře koronu nastupajo ma so hišće rozsudźić, kajke budźe dalše financowanje. Wšako maja wone do regularneho zastaranja přeńć.
„Zhromadnje dobudźemy!“
Ukrainski prezident Wolodymyr Zelenskyj na wopyće w susodnej Pólskej
Waršawa/Kijew (dpa/SN). Pólsku a Ukrainu zwjazuje po měnjenju ukrainskeho prezidenta Wolodymyra Zelenskeho wuske partnerstwo. „Wutroby Ukrainjanow a Polakow bija za swobodu, za njewotwisnosć wobeju krajow, za zhromadny dom – dobudźemy“, rjekny Zelenskyj wčera w narěči před kralowskim palastom we Waršawje. „Njeje žaneje mocy, kiž móhła ukrainsko-pólske přećelstwo přewinyć.“
Bě to prěni wopyt Zelenskeho w Pólskej po zahajenju ruskeho nadpada na kraj 24. februara 2022. We Waršawje wočakowaštaj jeho mjez druhim prezident Andrzej Duda a ministerski prezident Mateusz Morawiecki.
Za Pólsku ma wopyt w prěnim rjedźe wažny symboliski wuznam. Wot prěnjeho wójnskeho dnja su so Polacy ukrainskim wójnskim ćěkancam jako pomocliwi hosćićeljo wopokazali. Miliony přińdźechu přez mjezu, mnozy ćehnjechu dale do směra na zapad. Někotři wróćichu so do swojeje domizny. Tuchwilu ma po informacijach UNO něhdźe 1,6 milionow ludźi z Ukrainy w susodnej Pólskej škitny status.
Su přihotowani
Podstupim (dpa/SN). Braniborske kupjele pod hołym njebjom chcedźa za něhdźe měsac zaso wočinić. Po słowach Němskeje towaršnosće za wuchowanje žiwjenja (DLRG) su čestnohamtscy pomocnicy na sezonu derje přihotowani. Woni su w minjenych měsacach mnohich ludźi, kiž njemóžachu hišće płuwać, nětko wukubłali. Dale přewjedźechu kursy za wuchowanskich płuwarjow. Koronapandemije dla dyrbješe DLRG wjele płuwanskich kursow wotprajić. Tuž je čakanska lisćina zajimcow wotpowědnje dołha. Jara pozitiwne je wuwiće, zo maja w Braniborskej nětko 200 nowych wuchowanskich płuwarjow. Přiwšěm je to hišće přemało, zo móhli wšitkich tych wuwučować, kotřiž hišće płuwać njemóža.
Čestnohamtscy DLRG su w 15 braniborskich kupjelach zasadźeni. Při jězorach a druhich wodźiznach zasadźeja wobhospodarjo swójskich płuwanskich wuchowarjow. Tójšto městnosćow za kupanje pak je njewobsadźenych. Ludźo měli swoje płuwanske kmanosće tuž derje wotwažować. Loni je so po informacijach DLRG w Braniborskej 22 ludźi zatepiło, jedna wosoba mjenje hač lěto do toho.
Serbske Nowiny wudawaja so w Domowina-Verlag GmbH Ludowym nakładnistwje Domowina
Jednaćel: Syman Pětr Cyž
Ludowe nakładnistwo Domowina tzwr spěchuje Załožba za serbski lud, kotraž dóstawa lětne přiražki z dawkowych srědkow na zakładźe hospodarskich planow, wobzamknjenych wot Němskeho zwjazkoweho sejma, Krajneho sejma Braniborskeje a Sakskeho krajneho sejma.
Šefredaktor a zamołwity redaktor w zmysle
nowinarskeho zakonja: Marcel Brauman 577 232/233 Naměstnik šefredaktora: Axel Arlt 577 238
tel.: 03591 / 577 232 faks: 03591 / 577 202 e-mail: www.serbske-nowiny.de
Adresa redakcije a nakładnistwa: Sukelnska 27, 02625 Budyšin
Adresse der Redaktion und des Verlages: Tuchmacherstraße 27, 02625 Bautzen
Zamołwita za rozšěrjenje: Manja Bujnowska 577 262
Předań nawěškow: Janka Rögnerowa 577 220 e-mail:
Ćišć: DVH Weiss-Druck GmbH & Co. KG, Lejnjanska 14, 02979 Halštrowska Hola, wjesny dźěl Hory
Vertriebskennzeichen: 2 B 2560 B
To a tamne (06.04.23)
Dokelž njeměješe 11lětna holca prawdźepodobnje wjace lóšt, ze swójbnym psom so wuchodźować, je wona psa prosće bjez wědźenja staršeju cuzemu na dróze předała. Nan holcy přizjewi pad policiji. Minjenu póndźelu bě holca w Landshuće z Yorkshire-terrierom po puću a narěča cuzeho, hač chce psa za něšto stow eurow kupić. Nimo rjaneho fenka pak ma 11lětna wulke mjerzanje ze staršimaj, kotrajž nětko za njeznatym kupcom pytataj. Policija jimaj pomhać njemóže.
Pilot w Južnej Africe dožiwi na lěće 3 300 metrow wysoko njeluboznu překwapjenku. Dokelž bě pytnył, zo so jeho naraz něšto „zymneho“ dótkny, wuhlada pod swojim sydłom jědojtu kobru. Pilot so tuž rozsudźi spěšnje na přichodnym lětanišću přizemić. Wón a štyrjo pasažěrojo mjeńšeje mašiny móžachu so wuchować. Njelubozny hósć, kobra, wšak bě so mjeztym zminył.
