Wustajeńca, kotruž móžeš sej na městnje wobhladać, je zrědka w času pandemije. W Slepjanskej cyrkwi staj to fararka Jadwiga Malinkowa a wuměłc Jörg Tausch z Rownoho zmóžniłoj. Twórby Tauscha, kiž skutkuje jako wučer na Slepjanskej wyšej šuli „Dr. Marja Grólmusec“, předstajeja jutrowne serbske tradicije. Su z kulkopisakom molowane. Techniku je wuwiwał přez ilustracije, kotrež je za knihi towarstwa Kólesko wuhotował. Nowe wobrazy w cyrkwi su tak nastajene, zo je wopytowarjam móžno, trěbny wotstawk dodźeržeć. Slepjanska cyrkej je wotewrjena. Loni su tu prěnju wustajeńcu we wobłuku kulturneho lěća zarjadowali. Foto: LR/Regina Weiß

Minjenu wutoru, 7. apryla 2020, je dźiwadźelnik Měrćin Słodenk zemrěł. Z jeho smjerću wuhasnje hwězda prěnjeho rjada na Budyskim dźiwadłowym njebju. W cyłkownje 45 lětach swojeje karjery błyšćeše so 8. awgusta 1938 rodźeny Słodenk jako mnohostronski předstajer charakterow, zawostaji zaćišć jako słužownik kaž jako knjez, jako nora runje kaž rjek, w komiskim kaž w tragiskim.

Njepřetrjechena bě jeho wobdarjenosć, přenapjate situacije z lapidarnym přispomnjenjom wolóžić a je ze swojim suchim humorom smjeću přepodać. Jako dósta swój prěni personalny wupokaz a zastojnik so za jeho rodźenym městnom wobhonješe, praješe Měrćin: „Stara Cyhelnica!“ Rozzłobjeny zastojnik jeho powuči: „Nječińće tu žane žorty! Měnju městno naroda, a nic dom!“ Měrćin na to sucho wotmołwješe: „Stara Cyhelnica je serbska wjes w Kamjenskim wokrjesu!“

Tež wuměłske dźěło w Serbskim ludowym ansamblu ćerpi pod wuwzaćnymi postajenjemi pandemije koronawirusa dla. Mnohe zarjadowanja su přesunyli, někotre samo na klětu. Přiwšěm maja plany za meju.

Budyšin (SN/CoR). „Njewěmy hišće, hač směmy to činić, mamy pak planowane, w meji zaso ze zarjadowanjemi započeć – jeli nam knježerstwo to, snano tež pod wěstymi wuměnjenjemi, dowoli“, nadźija so medijowy rěčnik SLA Stefan Cuška. Tak chcedźa 6. meje z rjadom „Zynki a linki“ w Budyskej Röhrscheidtowej bašće pokročować. Na hudźbno-literarnym wječorje chce Hanka Rjelcyna z twórbow Marje Młynkoweje čitać a smyčkarjej SLA chcetaj čitanje z hudźbu Detlefa Kobjele, Jura Mětška a serbskeje kaž tež mjezynarodneje folklory wobrubić. Dwaj dnjej pozdźišo, 8. meje, ma so wosebite zarjadowanje rjada „Wobkuzłaca klasika special“ wotměć, a to pod hołym njebjom w Budyskej ruinje Mnišeje cyrkwje. Pod nawodom ­Andreasa Pabsta chce orchester publikumej twórby filma, musicala a klasiki předstajić. Podpěru dóstanu hudźbnicy wot spěwneju solistow Jae-Hyung Cho (bariton) a Jany Marie Gropp (sopran).

Budyšin (SN/JaW). Załožba za serbski lud je nowe wubědźowanje do žiwjenja zwołała. Přichodnje mytuja tydźensce jónu najlěpši nowy serbski onlinowy poskitk. Ideju za projekt pod mjenom „Serbski poskitk tydźenja w syći“ (SPTWS) zrodźili su w zarjadnistwje załožby. „Běchmy zadźiwani, kelko zajimawosćow tuchwilu w digitalnym wobłuku tež w Serbach nastawaja. Nimo toho je a bě zdawna zaměr załožby, zo w interneće tež mnohe serbske poskitki namakamy. Tuž chcemy najlěpše internetne poskitki mytować a na wosebitej stronje zjawnosći prezentować“, rozłoži załožbowy direktor Jan Budar. Jako myto kiwa dobyćerjam stajnje 100 eurow. Wozjewić budu mytowanych a jich kaž tež dalše poskitki na stronje www.info.sorben.com/se/sptws. Dalše informacije a přizjewjenski formular namakaće na mjenowanej internetnej stronje. Wo tym, štó myto dóstanje, rozsudźi jury. Prěnje myto chcedźa jutře spožčić. Běžeć ma projekt dołhož je naše žiwjenje koronawirusa dla dale wobmjezowane, tak Jan Budar. Tuž móža zajimcy swoje poskitki załožbje dale zapodać.