Kulturna zahroda Serbskeho ludoweho ansambla startuje do swojeje pjateje sezony. Rjad open-air koncertow pod Budyskej Röhrscheidtowej baštu skići wot junija do awgusta kóždu sobotu wotměnjawe zynki wot jazza a popa hač k serbskej hudźbje a tangej. Zazběh twori jutře, sobotu, wustup duwa Helena a Jan. Foto: Stefan Zuschke-Mahling

Z pomocu podateho pismika dyrbiće tele słowa zarjadować.

lěwa křižowka: bohudźak, dohrate, Handrij, kopřiwa, přiroda, Swětlik

prawa křižowka: fararka, honorar, nowinar, radiska, wikowar, wokomiki

Kantoraj Maksymilian Kulawik a Michael Vetter (wotlěwa) staj předwčerawšim předstajiwši rědke twórby za dwoje byrgle lětuše Budyske pišćelowe lěćo zahajiłoj. Hač do kónca awgusta wuhotuja renoměrowani organisća stajnje srjedu bjezpłatnje přistupne koncerty w (tachantskej) cyrkwi swj. Pětra. Mjez druhim chcedźa Michael Schönheit, Tobias Linder, Hans Christian Martin, Peter Wingrich a wospjet Tomaš Žur „kralownje instrumentow“ swoju referencu wopokazać. Foto: SN/Bojan Benić

Do šesteho wudaća našeho kulturneho časopisa dóstanjemy so po schodach před domčkom Stareho ludu w Dešnje. Mólba Marka Bruka nas do zešiwka zesrěbnje, hdźež čakaja na nas słowa Leny Weißhoff z apelom, tworić rěčne rumy (nic jenož) za tych, kotřiž serbsce wuknu. Bóle zady w Rozhledźe rozprawi skupina studentow wokoło dr. Katje Brankačkec wo poradźenym stworjenju runje tajkich rěčnych rumow, jako běchu serbscy wuknjacy z Drježdźan, Lipska a Prahi na kónctydźenskej ekskursiji w stolicy Čěskeje. Serija Serbskeho instituta wobjednawa pod titlom „Baje, bajki, basnički“ powědanje jako kulturnu techniku. Dr. Susanne Hozyna wodźi čitarjow po slědźenjach mjez ludowědu, rěčespytom a stawiznopisom. Tak, kaž běchu wědomostnicy tehdy mjez ludźimi ducy, zo bychu material nazběrali, je tež Syć za regionalnu identitu a serbsku rěč ZARI w tutych měsacach po puću, kaž zhonimy wot dr. Nicole Dołowy. W swojim pojednanju wo etnolinguistiskej witaliće předstaja nam trěbne přepytowanja z pomocu naprašnikow.