Sport (19.05.17)
Volleyballowej turněraj
Wólnočasni volleyballisća Viktorije Worklecy a Serbskeho gymnazija Budyšin wuhotuja tradicionalnej volleyballowej turněraj za wólnočasne wučerske mustwa. Viktoria přewjedźe swój turněr póndźelu, 22. meje, we Worklecach a wučerjo Serbskeho gymnazija srjedu, 7. junija, w Budyšinje.
Běhi na Krakečanske wyšiny
Srjedu, 24. meje, zarjaduje MSV Módro-běli Krakecy 30. běhi na Krakečanske wyšiny. Start a cil budźetej w sportowym kompleksu Krakecy. Běhi za dźěći započnu so w 17.30 hodź. (350 m) a 17.40 hodź. (700 m), hłownej běhaj budźetej we 18.30 hodź. (10,2 km) a 18.40 hodź. (5,1 km).
Triatlon za dźěći
Wuchodosakske płuwanske towarstwo (OSSV) Kamjenc přewjedźe 18. junija w Bischheimje triatlon za dźěći. Jednotliwcam poskići OSSV 50 m płuwanje – 1 200 m kolesowanje – 400 m běhanje. Tež za swójbnu staflu je zapisanje móžne. Prěni sportowc dyrbi 100 m płuwać, druhi sportowc 2 400 m kolesować a třeći 800 m běžeć.
Dynamocamp za koparjow
Po dobyću njezasłužena poražka
ST Marijina hwězda
– Zeleno-běli Sepicy 4:1 (3:0)
Zestawa domjacych: O. Schmidt – Wróbl, Škoda, Łušćanski, R. Hawš, Peschmann, T. Jurš (71. Rab), O. Hawš, Smoła (65. P. Schmidt), Pakoßnick (41. Winkler), D. Jurš
Koparske wjedro běše ekscelentne a trawnik wuběrnje preparowany. Nimo toho nadběhowachu hrajerjo ST Marijineje hwězdy wot wšeho spočatka wrota hosći. Prěnjej dobrej móžnosći Dawid Jurš a Falko Peschmann (2., 6.) hišće wuwostajištaj, w 13. min. pak klinkaše. Róžk bu najprjedy wotwobarany, Maćij Wróbl flankowaše bul na to Jakobej Pakoßnickej, kiž trjechi z niskej třělwu 1:0. Žane 180 sekundow pozdźišo bě to znowa Pakoßnick, smalacy po brilantnej přihrawce Stanija Smoły na přećiwniskeho wrotarja, zo by so wo 2:0 postarał. Třeće wrota (23.) poradźichu so Dawidej Juršej hišće do přestawki.
Z dobrej hru dypkowali
Zeleno-běli Sepicy
– SJ Njebjelčicy 2:2 (0:0)
Zestawa hosći: D. Ričel, Zeller (66. Kral), Haška, Pawlik, Hommel, Šołta (53. Hoelzel), Hrjehor, Hanuza, Korjeńk, Janca (72. Čornak), Lejnart
Znowa su sej koparjo Njebjelčanskeje SJ z wonkowneje hry dypk sobu domoj přiwjezli. Mnohe šansy Pawla Hrjehorja a Roberta Lejnarta w prěnim połčasu pak hišće ničo njewunjesechu. W swójskich wrotach znješkódni Daniel Ričel najwjetšu móžnosć domjacych hižo w 1. min. Prawy signal sadźi Jakub Šołta ze spěšnym nadběhom přez lěwu stronu, ale sadźi bul snadnje nimo klětki.
W 55. min. je Lejnart na lěwej stronje po přihrawce Hrjehorja nisko k 0:1 přetworił. Z rjanym soloběhom přesadźi so na to Jurij Haška hač k přećiwniskej šěsnatce, hdźež bu jasnje foulowany. Hwižk sudnika pak mjelčeše. Hosćićel so mócnje wobaraše a w 69. min. z přewšo dwělomnej jědnatku wuruna. Dźesać mjeńšin pozdźišo nawjedowaše samo z 2:1, a to po wysokej třělwje pod łatu Ričeloweje klětki. Njebjelčenjo pak njedachu so zatrašić a dale nadběhowachu. Skónčnje Gabriel Čornak po přihrawce Ronyja Hanuzy z niskej třělwu wuruna (85.).
Wuslědki (18.05.17)
Wokrjesna koparska liga, stafla III
Sepicy – Njebjelčicy2:2 (0:0)
Němske Pazlicy – Mar. hwězda 1:0 (1:0)
1. SG Großnaundorf 22 72 : 19 54
2. TSV Wachau 22 75 : 29 48
3. Natw. Němske Pazlicy 22 48 : 33 42
4. SV Haselbachtal 22 50 : 33 39
5. SJ Njebjelčicy 22 39 : 33 38
6. SC Großröhrsdorf II 22 49 : 40 36
7. Zeleno-běli Sepicy 22 50 : 47 30
8. SV Frankenthal 21 41 : 35 29
9. Arnsdorfske KT 22 27 : 33 27
10. SV Hermsdorf 22 30 : 49 25
11. ST Marijina hwězda 21 29 : 34 22
Konječanscy blidotenisća wicemišter
Za neutralnymi blidami w Njeswačidle wuhrachu blidotenisća mustwa DJK Konjecy jako suwereny dobyćer stafle I a MSV Budyšina 04 IV jako dobyćer stafle II, prěnjeje wokrjesneje ligi wokrjesa Budyšin wokrjesne mišterstwo. Wobaj cyłkaj nastupištej w najsylnišej zestawje. Pola dwójkow wupadaše dołho za tym, zo budu Konječenjo z 2:1 nawjedować. Pětr Bejma/Dierk Šewc dobyštaj jasnje z 3:0 André Čórlich/Michael Elstner přěhraštaj z 0:3. Načolna dwójka Maćij Kokla/Alojs Čóška nawjedowaše hižo po sadźbach z 2:1. W štwórtej při stawje 10:6 trjebaštaj hišće jenički dypk, a delanscy blidotenisća bychu po dwójkach 2:1 nawjedowali. Kokla, najlěpši Konječan cyłeje sezony, pak so na kolenje tak ćežko zrani, zo njemóžeše dale hrać. Konječenjo so přiwšěm njepodachu a wojowachu wo kóždy dypk. Čóška w prěnjej hrě snadnje podleža, Čórlich a Šewc dobyštaj swojej duelej, tak zo Budyšenjo ze 4:3 nawjedowachu. Bejma a Elstner nawjedowaštaj w přichodnymaj partijomaj po sadźbach hižo 2:0. Wupadaše za tym, zo budu serbscy blidotenisća po połojcy z 5:4 prědku. Tola z toho ničo njebu, wobaj wjac hač njezbožownje z 2:3 přěhraštaj.
Po dobrej hrě žane myto nježnjeli
FC Viktoria Berlin
– FSV Budissa Budyšin 2:1 (0:0)
Zestawa hosći: Große – Heppner, Patka, Kloß, Salewski, Müller, Hoßmang, Rosendo (78. Šisler), Barnickel (63. Hermann), Barth (46. Žuljević), Hänsch
W rjadach Viktorije Berlin hraje z Chrisom Reherom něhdyši kopar Budissy Budyšin. W prěnjej fazy hry móžeše ta z hosćićelom derje sobu dźeržeć a měješe dwě dobrej móžnosći přez Daniela Bartha (4.) a Daniela Hänscha (9.). Dwójce pak doby duel wrotar Dominik Kisiel. Dale njeje so w prěnich 45 mjeńšinach ničo naspomnjenjahódne stało.
Wuslědki (17.05.17)
Regionalna koparska liga
1. Jena 33 64 : 25 72
2. Energija Choćebuz 33 56 : 23 66
3. RB Lipsk II 33 65 : 41 57
4. FC Viktoria 33 62 : 44 56
5. Berlinski AK 33 53 : 40 55
6. Babelsberg 03 33 51 : 42 52
7. Hertha BSC II 33 46 : 44 48
8. Nordhausen 33 44 : 47 48
9. Neugersdorf 33 38 : 31 45
10. Auerbach 33 47 : 46 45
11. BFC Dynamo 33 51 : 50 44
12. Lok Lipsk 33 49 : 49 44
13. Schönberg 33 51 : 59 44
14. Fürstenwalde 33 46 : 58 42
15. Meuselwitz 33 33 : 35 41
16. Luckenwalde 33 35 : 72 24
17. Budissa Budyšin 33 28 : 64 18
18. Neustrelitz 33 29 : 78 11
Koparki SGB slěbro a bronzu dobyli
We wurisanju „Młodźina trenuje za olympiju“ wotmě so minjeny tydźeń w Großröhrsdorfje regionalne finale koparkow w starobnymaj klasomaj III a IV. Šulerki 5. do 7. lětnika Serbskeho gymnazija Budyšin (SGB) startowachu mjez cyłkownje pjeć šulemi a nawróćichu so ze slěbrom a bronzu.
Starobna skupina IV (5. a 6. lětnik): Štyri šule wuchodneje Sakskeje kwalifikowachu so za regionalne finale w kopańcy holcow, jeno tři gymnazije pak běchu w Großröhrsdorfje zastupjene. Najmłódše koparki SGB startowachu přećiwo holcam, Schilleroweho gymnazija Budyšin z połnym zapalom a nawjedowachu k połčasej z 1:0 přez wrota Leticije Gust, kotraž wot dźewjećmetrowskeho dypka suwerenje přetwori. Sportowy kontrahent pak so njepoda a wuruna přez swoju najlěpšu hrajerku na 1:1. Samsna šulerka zwyši dwě mjeńšinje do wothwizdanja na 2:1. Wulkemu faworitej z Biskopic so serbske holcy mócnje wobarachu a dopušćichu jenož dwoje wrota. Wrotarka Salome Bjeńšec steješe zwjetša na prawym městnje a dalše šansy Goethoweho gymnazija znješkódni.
kónčny staw starobneje skupiny IV
Přećiwnikej so cyle podali
FSV Budissa Budyšin
–BFC Dynamo 0:4 (0:0)
Zestawa domjacych: Große – Heppner, Hoßmang, Hausdorf, Hänsch, Hermann (65. Müller), Kolan (61. Šisler), Kloß, Salewski (83. Barnickel), Rosendo, Žuljević
Do hry buchu wjacori koparjo Budissy Budyšin rozžohnowani: Maik Salewski, kapitan Martin Kolan, Patrick Baudis, Daniel Barth, Theocharis Iliadis a Norman Wohlfeld. Po tym drje chcyše so Budissa swojim swěrnym fanam porjadnje prezentować, štož pak so jej scyła njeporadźi. Hosćo hru wot spočatka postajachu, a Budyšenjo móžachu wjeseli być, zo so přećiwnikej w prěnim połčasu žane wrota njezešlachćichu.
Krótko po połčasu BFC nawjedowaše (47.). A we 58. min. rěkaše třělc wrotow znowa Kai Pröger. BFC nětko žane štomy zwutorhać njetrjebaše, dokelž so hosćićel cyle jednorje poda. To njebě žana kopańca za regionalnu ligu. Přez dwójny dyr Dennisa Srbenyja (77., 85.) bě hra doskónčnje rozsudźena. Šansu na čestne wrota měješe hišće Maik Salewski, ale Berlinski wrotar třělwu wotwobara.
Na pokazany wukon móža přiwšěm hordźi być
Sokoł Ralbicy/Hórki II
– LSV Nowe Město 1:3 (1:1)
Zestawa domjacych: Bjeńš – Šnajder, Bogusz, Dinar, T. Matka (65. Čornak), Kobalc, Młynk, J. Matka, M. Matka, Šěn, Jakubaš
Koparske mustwo z Noweho Města nad Sprjewju ma poprawom potencial, znajmjeńša klasu wyše hrać. Wone njeje w druhej połseriji hišće žanu hru přěhrało. Wot prěnjeho wokomika přewzachu hosćo komando. Sokoljo pak derje stejachu. Prěnju stoprocentnu móžnosć njezamó přećiwnik wužić, jako pjeć metrow před wrotami bul wyše nich třěli. W 15. min. bu jedyn ze spěšnych nadběhowarjow wot Symana Bogusza w šěsnatce połoženy. Kopar z rjanym mjenom Arlilsom Do Carmo Ferreira postajenu jědnatku wěsće přetwori. Z prěnjej składnosću pak móžachu Sokoljo wurunać. Wólny kop ze 40 metrow docpě Tomaša Matku, kiž ze zadnjej hłójčku do hornjeho kuta k 1:1 přetwori (24.). Sokoljo dobywachu dale a wjac dwubojow, naspomnjenjahódne šansy pak sej njewuhrachu. Krótko do kónca prěnjeho połčasa pospyta so přećiwnik hišće raz z 20 metrow. Jurij Bjeńš w domjacych wrotach pak bul w poslednim wokomiku hišće na łatu wodźeše.
