Berlin (dpa/K/SN). Dźensa je so dohladowarska rada koncerna Bombardier schadźowała, při čimž dźěše wo produkciske městna wagonotwarca w Němskej. Wobzamknyła wona po rozjimanju posudkow ničo njeje. Tak njewěstosć za dźěławych dale traje. W juliju chce management koncerna swoje konkretne plany wozjewić. Kanadiske wulkopředewzaće ma přibližnje 40 000 sobudźěłaćerjow, z nich něhdźe 8 500 w Němskej. W Berlinje je dźensa 1 000 wagonownikow před centralu koncerna demonstrowało.

Woheń nješkódny

Baršć (dpa/K/SN). Ze žehliweho wohenja deponije na pólskej stronje za wobydlerjow we wokrjesu Sprjewja-Nysa žanych přidatnych akutnych wohroženjow strowoty njewuchadźa. To je wunjesło měrjenje powětra, kotrež bě wokrjes přewjesć dał. Wuslědki su wčera wozjewili. Zamołwići maja za to, zo so poradźi hač do kónca tydźenja woheń zhašeć. Braniborski ministerski prezident Dietmar Woidke (SPD) bě kritizował, zo pólska strona za podušenje wohenja dołho njeje skutkownje zasahowała.

Airbag defektny

Washington (dpa/K/SN). Ivanka Trump, dźowka prezidenta USA Donalda Trumpa, přistaji so oficialnje w Běłym domje. Mzdu žanu njedóstanje. „Sym wo wobmyslenjach słyšała, kotrež někotři mojeho poradźowanskeho skutkowanja za prezidenta maja, ja wšak budu jako njepłaćena přistajena dźěłać, po wšěch prawidłach, płaćiwych za zwjazkowych słužacych“, 35lětna rjekny. Róla Ivanki jako poradźowarki nana je njewšědna. Zo šefojo statow abo knježerstwow demo­kratisce njelegitimowanych swójbnych do knježerstwoweje dźěławosće sobu zapřijimaja,­ njeje w zapadnych demokratijach z wašnjom. Mandźelski Ivanki Jared Kush­ner je hižo poradźowar Trumpa.

Paris (dpa/K/SN). Nowy zwjazkowy prezident Frank-Walter Steinmeier (SPD) přebywa dźensa w francoskej stolicy na nastupnym­ wopyće. Z prezidentom Françoisom Hollandeom rozjimaše wón nimo bila­teralnych prašenjow palace naležnosće tuchwilnych mjezynarodnych krizow. Tež nastajnostne zesylnjowanje prawicarsko-populistiskich stron w Europje bě tema jeju jednanjow. Po zhromadnym wobjedźe wustupištaj wonaj na nowinarskej konferency. Přichodnu wutoru poda so Steinmeier do Strasbourga a porěči před parlamentom EU. Za 7. a 8. apryl je wopyt Athena předwidźany. Tež do Waršawy prezident pojědźe, termin za to pak njeje hišće znaty.

Brüssel/Flensburg (SN/JaW). Komisija Europskeje unije je wčera w Brüsselu wobydlersku iniciatiwu Minority Safepack dowoliła. Wo tym informowaše gene­ralny sekretariat Federalistiskeje unije europskich narodnych mjeńšin FUEN (SN wčera skrótka rozprawjachu).

„Minority Safepack wotwěra nowu a jónkrótnu móžnosć, prawa mjeńšin w Europskej uniji spěchować“, rjekny k tomu prezident FUEN Loránt Vincze. Jedne lěto maja zamołwići nětko chwile, Europu na situaciju narodnych mjeńšin skedźbnjeć. Domowina, kotraž je wot lěta 1990 čłon FUEN, rozsud EU-komisije wita a ma jón za wulke dobyće mjeńšinam. Kaž předsyda Dawid Statnik na naprašowanje SN zdźěli, je to zazběh do noweho kwalitneho stopnja mjeńšinoweho prawa. „Poradźi-li so w běhu lěta jedyn milion podpismow zezběrać, móhli so wobsahi wobydlerskeje iniciatiwy Minority Safepack ze zakonjom Europskeje unije stać. Tak bychmy pokazali, zo – kaž to hesło iniciatiwy hižo praji – njejsmy sami“, Statnik podšmórny.