Njerjany žort su sej njeznaći w Choćebuzu dowolili: Z mydłowym próškom zanjerodźichu woni wodu Serbskeje studnje na Grodkowskej dróze wosrjedź města, tak zo je nětko­ z běłym ješćom pokryta. Zamołwitym drje ničo njezwostanje, hač wodu dospołnje­ wotpušćić a studnju dokładnje wurjedźić. Foto: Michael Helbig

Naprawy za wjetšu wěstotu trěbne

Mittwoch, 10. August 2016 geschrieben von:
Berlin (dpa/K/SN). Jako reakciju na njedawne terorowe nadpady w Němskej chce zwjazkowy nutřkowny minister Thomas de Maizière (CDU) lěkarsku winowatosć mjelčenja zmjechčić. Tole je předwidźane w katalogu naprawow za wjetšu wěstotu w Němskej, kotryž wón jutře zjawnosći předstaji. Po změnje zakonja by lěkarjam přichodnje móžno było, přisłušne instancy sčasom informować, zo jich pacienća njeskutki planuja. Minister chce dale docpěć, zo wukrajnych wohrožowarjow a za wupokazanje předwidźanych kriminelnych migrantow skokšo z kraja wotsunu. Dalše kročele wjetšeje wěstoty chcedźa sej krajowi nutřkowni ministrojo CDU/CSU na schadźowanju 18. awgusta žadać. W naćisku „Berlinskeho wozjewjenja“ je rěč mjez druhim wo wjetšej prezency policije a wo wobkedźbowanju zjawnych městnow z widejokamerami.

Racije islamizma dla

Mittwoch, 10. August 2016 geschrieben von:
Düsseldorf (dpa/K/SN). Na přikaz generalneho statneho rěčnistwa je policija w Sewjerorynsko-Westfalskej dźensa racije přewjedła, prawdźepodobnje zwisowace z islamistiskej scenu. Tak přepytachu w Duisburgu turkowski pućowanski běrow.­ Raciji běštej tež w Dortmundźe a Hildesheimje. Wčera běchu w porynsko-pfalcskim Mutterstadće 24lětneho požadarja azyla zajeli, islamizma podhladneho. Wotpowědny pokiw dóstali běchu ze Sewjerorynsko-Westfalskeje. Muž sedźi mjeztym w přepytowanskej jatbje. Nětko pruwuja, hač je atentat planował.

Kozel: Zběžk slědy zawostajił

Mittwoch, 10. August 2016 geschrieben von:

Serbja spominaja na bój wo zachowanje Chróšćanskeje srjedźneje šule

Budyšin (SN/MkWj). Chróšćan zběžk lěta 2001 – bój wo zachowanje tamnišeje srjedźneje šule – je we Łužicy a za jeje mjezami slědy zawostajił. Wo tym je zapósłanc Lěwicy w Sakskim krajnym sejmje Hajko Kozel přeswědčeny. „Sebjewědomje Serbow bu skrućene, štož so dźensa na přikład w prócowanjach towarstwa Stup dale nastupajo dwurěčne kubłanje w Drježdźanach wotbłyšćuje“, rěka w zdźělence Kozela. Nimo toho stej zajim za Serbow a solidarita z nimi po wšej Němskej a mjezynarodnje nowu kwalitu docpěłoj, Kozel piše, skedźbnjejo na stipendije čěskeho knježerstwa za serbskich studentow a čěskich wučerjow we Łužicy.­ Nětko měli so hladajo na aktualnu debatu wo sakskim šulskim zakonju konkluzije z Chróšćan zběžka sća­hnyć. Při tym dyrbjało so pruwować, hač nowy šulski zakoń tehdyše zasadne žadanja wobkedźbuje a w kotrej měrje su naležnosće Serbow scyła zakótwjene.

To a tamne (10.08.16)

Mittwoch, 10. August 2016 geschrieben von:

Na betonowej pisće Madridskeho lětanišća Barajas je muž za lětadłom spěchał, kotrež bě do toho zapasł. Na wideju je widźeć, kak wón z wačokom w ruce na nastupnym mosće steji, jako je lětadło hižo wotjěło. Skoči tuž na pistu a běži za ma­šinu, doniž jeho sobudźěłaćer njezadźerži. Tón mužej rozłoži, zo za wopačnym lětadłom běži a zo jeho mašina hišće na lětanišću­ čaka. Kaž španiske medije rozprawjeja, hrozy jemu přiwšěm pokuta hač do 45 000 eurow.

Fatalneho pisarskeho zmylka dla je klinika w westfalskim Halle pacientku za mortwu deklarowała. W zdźělence chorobnej kasy bě sekretariat wotličenske čisło za zaprajenje wutroby město praweje diagnozy zapisał. Kasa přiwuznym na to zdźěli, zo je ze smjerću žony chorobne zawěsćenje skónčene. Kli­nika chce so nětko pola pacientki zamołwić.

Pólska pomha ćěkancam

Dienstag, 09. August 2016 geschrieben von:

Waršawa (B/SN). Katolska cyrkej w Pólskej přeńdźe do chutneje fazy, wutworić humanitarne koridory za syriskich ćěkancow z Libanona. Narodny direktor pólskeje Caritas Marian Subocz rjekny, zo chce z wonkownym a nutřkownym ministerstwom za to trěbne wuměnjenja wujednać.

Wusudy w procesu Vatileaks

Rom (B/SN). W procesu Vatileaks staj hłownaj wobskorženaj zasudźenaj. Španiski měšnik Lucio Angel Vallejo Balda­ dyrbi 18 měsacow do jastwa njedowo­leneho daledawanja informacijow dla. Italska PR-poradźowarka Francesca Chaou­qui je připomocy dla k dźesać měsacam na pruwowanski čas zasudźena. Asistent Valleja Nicola Malo bu wuwinowany, tež žurnalistaj Gianluigi Nuzzi a Emiliano­ Fittipaldi.

Mjez bjezdomnymi přebywał

Wjace wotpokazanych ludźi

Dienstag, 09. August 2016 geschrieben von:

Berlin (dpa/SN). Němska dźeń a wjace ludźom na mjezy zapowědźa, do kraja přińć. Jeničce w prěnich šěsć měsacach lěta su 13 324 wosobow na namjeznych přechodach abo lětanišćach wotpokazali. To je 50 procentow wjace hač 2015. Tole wuchadźa z wotmołwy zwjazkoweho knježerstwa na naprašowanje Lěwicy. Tež ličba wotsunjenych ćěkancow přiběra: Wot januara hač do junija su 13 743 migrantow do domizny wróćo pósłali, loni bě jich cyłe lěto 20 888.

Sto demonstrantow zatřělili

Addis Abeba (dpa/SN). Na demonstracijach přećiwo etiopiskemu knježerstwu je po informacijach organizacije Amnesty International něhdźe sto demonstrantow žiwjenje přisadźiło. Wěstotne mocy su njedaloko stolicy Addis Abeba z wótrej municiju na nich třěleli, kaž Amnesty International piše. Sta ludźi su so při protestach minjeny kónc tydźenja zra­nili. Demonstranća běchu sej politiske reformy žadali.

Žane pjenježne chłostanje

W japanskim Nagasakiju su dźensa 71. róčnicu zničenja města přez amerisku atomowu bombu wopominali. Při jeje rozbuchnjenju 9. awgusta 1945 běchu dźesaćitysacy ludźi zahinyli. Při měrowym pomniku dachu tradicionalnje hołbjam jako symbol měra wotlećeć (hlej wobraz). Minjenu sobotu běchu w Hiroshimje na prěnju atomowu bombu spominali. Foto: dpa/Ma Ping

Wuznamne zetkanje

Dienstag, 09. August 2016 geschrieben von:
Pětrohród (dpa/K/SN). W historiskej metropoli kraja je prezident Wladimir Putin dźensa hłowu Turkowskeje Recepa Tayyipa Erdoğana přijał. Po wottřělenju ruskeho bombowca přez turkowske wójsko loni w nowembru je to prěnje jeju zetkanje. W jednanjach dźěše mjez druhim wo miliardowy projekt płunowoda Turkstream a wo natwar atomoweje milinarnje w Turkowskej z pomocu Ruskeje.

Forum zahajeny

Dienstag, 09. August 2016 geschrieben von:
Montreal (dpa/K/SN). W kanadiskim Montrealu zahajichu dźensa 13. swětowy socialny forum. Na njón wočakuja 50 000 ludźi. Na zetkanju wobdźěla so wjac hač 1 000 organizacijow, předewšěm nje­knježerstwoweho razu. Předwidźanych je na wšě 1 200 jednotliwych zarjadowanjow, na kotrychž wobjednawaja temy kaž změnu klimy, šansy młodźiny a dawkowu sprawnosć.

Chróšćan Šulerjo

Neuheiten LND