Ćěkaja přez morjo
Pólska žada sej změny w EU
Waršawa (dpa/SN). Pólski wonkowny minister Witold Waszczykowski sej žada, zo měła so móc w Europskej uniji ze stron komisije EU statnym a knježerstwowym šefam jednotliwych čłonskich krajow přewostajić. „Dźěl wjednistwa EU dyrbjał wotstupić“, rjekny Waszczykowski wčera po zetkanju ze šefdiplomatami dźewjeć krajow we Waršawje. Zdobom sej wón žadaše, zo měło so nowe zrěčenje EU zdźěłać. Kaž pólska ministerska prezidentka Beata Szydło w tym zwisku namjetowaše, měli zastupnicy komisije politisku zamołwitosć za wuslědk referenduma Wulkeje Britaniskeje za wustup z Europskeje unije přewzać. EU dyrbjała so tak přetwarić, „zo bychu Europjenjo składnosć měli, sami wo swojich naležnosćach rozsudźić móc“.
Tež nawoda narodnokonserwatiwneje strony Prawo a sprawnosć Jarosław Kaczyński je za wosobinske konsekwency. Z Pólskeje pochadźacy předsyda Rady EU Donald Tusk je po jeho słowach za brexit wosobinsce zamołwity a dyrbjał so „z europskeje politiki zminyć“.
Prócuja so wo twar mošeje
Erfurt (B/SN). Nimo hižo wobstejaceje mošeje w Berlinje chce muslimska wosada Ahmadiyya dalšu w Erfurće-Marbachu natwarić. Na wuchodźe maja muslimojo swoje Bože słužby dotal w bydlenjach abo w něhdyšich wobchodach. Te pak su po informacijach wosadow dale a bóle přepjelnjene, dokelž ličba ćěkancow přiběra. Erfurtska wosada ma 70 sobustawow. Nabožinske zhromadźenstwo Ahmadiyya Muslim Jammar (AMJ) rozumi so jako swětowe islamske reformowe hibanje. Po swójskich podaćach zastupuje jeničce měrliwe hódnoty islama, kaž su to runohódnosć muža a žony, dźělenje nabožiny wot stata, skónčenje namócnych akcijow w mjenje islama a dodźerženje w koranje zapřijatych čłowjeskich prawow. W Němskej ma AMJ po swójskich podaćach 35 000 sobustawow a wudźeržuje 39 mošejow, 225 wosadow, jedyn TV-sćelak a jedne nakładnistwo.
Wobswětowa encyklika
To a tamne (28.06.16)
Dieselowu lokomotiwu pokradnyć spytał je 21lětny w Halle nad Solawu. Tam bě so wón do porjedźernje lokomotiwow na ležownosći Němskeje železnicy zadobył, hdźež chcyše ćežke jězdźidło startować. Sobudźěłaćer železnicy jeho lepi a zawoła policiju. Kaž muž zastojnikam wuzna, chcyše wón lokomotiwu měć, zo by z njej jězdźić móhł. Při tym njesteješe ani pod wliwom alkohola ani drogow. Nětko wšak dyrbi ze skóržbu ličić.
Nachribjetnik z 30 000 eurami je 61lětny w ćahu zabył. Muž bě po puću z Frankfurtskeho lětanišća do Wiesbadena. Po tym zo bě wón ćah na hłownym dwórnišću we Wiesbadenje wopušćił, jemu po někotrych mjeńšinach napadny, zo nima nachribjetnik při sebi. Jako so do ćaha nawróći, pak bě tón hižo fuk. Podarmo muž za nim pytaše. Za čo telko pjenjez trjebaše, nichtó njewě.
Město wróćo zdobyli
Falludsha (dpa/SN). Pjeć tydźenjow po zahajenju ofensiwy na stejnišćo Islamskeho stata (IS) w Falludshi je irakske wójsko město zaso wróćo zdobyło, kaž zdźěli. Ekstremistow su z poslednjeje štwórće Falludshe wuhnali, zdźěli wčera komandant armeje statnemu sćelakej Al-Iraqiya. Wójsko bě so před dźesać dnjemi do centruma zapadoirakskeho města zadobyło. Falludsha bě wot januara lěta 2014 pod kontrolu IS a bě nimo Mossula jeho najwažniše stejnišćo.
Dojednanje wobzamknjene
Ankara (dpa/SN). Kaž turkowske knježerstwo informuje, je so Ankara z Israelom na normalizowanje poćahow dojednała. „Wobzamknjenje woznamjenja diplomatiske dobyće Turkowskeje“, rjekny zastupjer knježerstwa, kiž chce anonymny wostać. W Romje stej so wčera delegaciji wobeju krajow zetkałoj, zo byštej so wo poslednich detailach dorozumiłoj. Israelske knježerstwo je dojednanje mjeztym tohorunja wobkrućiło.
Manewer so započał
Tež 16. mjezynarodna folklorna lawina w delnjołužiskich Kopańcach ...
Prowokacija a njespokojnosć
Joachim Gauck na pućowanskim dnju w Sakskej Šwicy nadběhowany
Sebnitz (dpa/SN). Agresiwna skupina ludźi je zwjazkoweho prezidenta Joachima Gaucka na wčerawšim wopyće we wuchodosakskim Sebnitzu haniła a křiwdźiła. Tak přiwołachu jemu na 116. němskim pućowanskim dnju po Sakskej Šwicy, zo dyrbi so zminyć, a mjenowachu jeho přeradnika ludu. Přitomneju ministerskeho prezidenta Sakskeje Stanisława Tilicha (CDU) a zwjazkoweho justicneho ministra Heika Maasa (SPD) tole chětro rozhori. Po informacijach policije bu Gauck wot něhdźe 30 ludźi werbalnje nadběhowany. Jednoho z nich su zastojnicy nachwilnje zajeli, při čimž dyrbjachu sylneho wobaranja dla wottrašowanski spray zasadźić. Jedna njewobdźělena wosoba so zrani.
