Nowemu nawalej ćěkancow zadźěwać
Chcedźa delnjoserbšćinu bóle spěchować
Podstupim (dpa/SN/BŠe). Braniborske krajne knježerstwo chce delnjoserbsku rěč bóle spěchować. Ministerka za wědomosć, slědźenje a kulturu Martina Münch (SPD) bě wčera plan předpołožiła, z kotrymž chce delnjoserbšćinu na juhu kraja zesylnić. K tomu słušeja informacije za rěčnu wučbu w šulach a pěstowarnjach kaž tež wuwiće online-poskitkow w delnjoserbšćinje a wukubłanje wučerjow, kotřiž móhli ju podawać.
„Delnjoserbšćina je po wuprajenju UNESCO jedna z najwohrožeńšich rěčow Europy“, podšmórny Münch. Z krajnym mytom chcedźa wosebity angažement za rěč narodneje mjeńšiny přichodnje wuznamjenić. Dale je w planje předwidźane sobudźěłaćerjam zarjadnistwow zmóžnić dalekubłanja k naležnosćam mjeńšiny. Zdobom chcedźa jich wo prawniskich předpisach informować a wabić, zo bychu delnjoserbšćinu w zarjadach nałožowali. Cyłkownje 50 zdźěla hižo zwoprawdźenych naprawow je w planje zakótwjenych. Kulturne ministerstwo tuž loni w juliju wobzamknjeny plan, rěč mjeńšiny spěchować, chutnje bjerje. Hižo w juliju so krajny sejm z tym zaběra.
Na změnu so přihotować
W Braniborskej a Sakskej wo wosebitym fondsu za Łužicu wuradźowali
Podstupim (dpa/K/SN/BŠe). Opozicionelni Zeleni w Braniborskim krajnym sejmje skonkretizowachu swoje žadanje za Łužiskim fondsom, kotryž ma so za potrjecheny region po móžnym kóncu wudobywanja brunicy załožić. Čerwjeno-čerwjene krajne knježerstwo měło Zwjazk naležnje wo to prosyć, zo wutwori cyłoněmski brunicowy program, do kotrehož dyrbjało so kóžde lěto znajmjeńša 250 milionow eurow zwjesć za wuwjedźenje a zawěsćenje strukturneje změny. Z tutych srědkow móhł Łužiski fonds čerpać, rěka we wozjewjenju, kotrež su Zeleni dźensa předpołožili.
Spomnjena suma wotpowěduje ně- hdźe štwórćinje bruttoweje hódnoty, wo kotruž region přińdźe, hdyž brunicu spušći, rjekny šef frakcije Zelenych Axel Vogel. Podźěl Łužicy na spomnjenym programje by lětnje něhdźe 70 do 80 milionow eurow wučinjał. Po jeho wědźenju ma Zwjazk wob lěto na wšěch 230 milionow eurow dochodow jeničce z wikowanja z emisijemi z łužiskich milinarnjow. Za Łužiski fonds je so tež hižo CDU wuprajiła.
To a tamne (22.06.16)
Chětro dołho je kołp wobchad na hłownej dróze w Ludwigshafenje haćił. Wodźerjo awtow přizjewichu policiji, zo wosrjedź puća kołp steji. Zastojnicy pak njezamóchu jeho z dróhi wabić. Tež šćowkacy pos w słužbnym awće ptaka ani kuska njemyleše. Samo pospyt wobydlerja, kołpja z pomocu chlěba z jězdnje wabić, so njezešlachći. Hakle přiwołani wuchowarjo zwěrjatow móžachu kołpja po něhdźe dwěmaj hodźinomaj přeswědčić, zo jich sćěhuje a do bliskeje krajnoškitneje kónčiny čampa.
Irscy fanojo kopańcy móža wjac hač jenož stadionowe spěwy halekać. Zašły kónc tydźenja su woni ćěšenkej w Bordeauxskej tramwajce kolebawku „Twinkle, twinkle, little star, How I wonder what you are!“ zanjesli. Wusnyło pak sej dźěćko přiwšěm njeje. Po wšěm zdaću běchu tola přewótře „psst!“ wołali.
Wšitke naćiski zwrěšćili
Washington (dpa/SN). Po terorowym atentaće w Orlandźe su w senaće USA wjacore naćiski k přiwótřenju brónjenskeho prawa zwrěšćili. Z pomocu nowych postajenjow chcychu docpěć, zo ludźo z móžnym teroristiskim pozadkom hižo móžnosć nimaja sej bróń kupić. Štyri naćiski běchu demokraća a republikanojo rozjimali. Trěbnu wjetšinu 60 hłosow pak žadyn namjet njedósta.
Móžny Brexit tež buram škodźi
Berlin (dpa/SN). Wustup Wulkeje Britaniskeje z Europskeje unije by němskim buram chětro zeškodźał. Brexit móhł eksport němskich wudźěłkow wuznamnemu partnerej poćežować. Tole zdźěli wčera Němski burski zwjazk w Berlinje. Jednanja wustupa Wulkeje Britaniskeje z EU móhli lěta trać, štož by wulku njewěstosć agrarneho wikowanja zawiniło. A by so zdobom na agrarne financowanje wuskutkowało, by-li Wulka Britaniska jako wažny płaćer do etata EU wupadnyła.
Dwěle na dieselowej strategiji
Mjeztym druhi raz je frakcija Lěwicy Sakskeho krajneho sejma tak ...
Železniske čary wutwarić
Drježdźany (dpa/SN). Do jutřišich němsko-pólskich knježerstwowych konsultacijow w Berlinje tłóča železnicarjo wobeju krajow na spěšny wutwar přezmjezneho železniskeho wobchada. „Dalše wuwiće dobrych poćahow mjez susodomaj měł wutwar wobchadnych zwiskow přewodźeć“, žadaše sej wčera rěčnica iniciatiwy Němsko-pólski wosobowy wobchad na kolijach (KolejDEPL) Anja Schmotz. Zdobom warnowaše wona před dalšim dlijenjom, zwoprawdźić formulowane zaměry loni přewjedźeneho němsko-pólskeho železniskeho wjerška.
Wutwar a elektrifikacija čary mjez Drježdźanami, Zhorjelcom a Wrócławjom kaž tež čarow Berlin–Angermünde–Szczecin a Choćebuz–Zhorjelc měłoj so w zwjazkowym wobchadnym planje hač do lěta 2030 jako prěnjorjadna potrjeba zakótwić. Tele projekty nimaja tuchwilu žane wulke wuhlady, dokelž so zwjazkowe wobchadne ministerstwo dliji je zwoprawdźić.
Přezmjezny železniski wobchad je centralneho połoženja Němskeje a Pólskeje w Europje dla jara wažny.
