Zschäpe nětko cofnjenča
Berlin (dpa/SN). Społnomócnjena zwjazkoweho knježerstwa za wopory nacionalsocialistiskeje skupiny NSU Barbara John kritizuje, zo přiwzaja zasudźenu prawicarsku teroristku Beatu Zschäpe do programa za něhdyšich neonacijow. Tući chcedźa prawicarsku scenu wopušćić. „Zo chce knjeni Zschäpe nětko scenu prawicarjow wopušćić, nichtó ze swójbow woporow njewěri“, rjekny John nowinarjam. W sudniskim jednanju přećiwo skupinje NSU bě Zschäpe lěta dołho mjelčała a njeje při wujasnjenju złóstnistwow pomhała. John tuka na druhi motiw: Z přiwzaćom do programa cofnjencow chce Beate Zschäpe docpěć, zo ju dočasnje z jastwa pušća.
Zschäpe běchu 2018 jako sobuskućićelku wjacorych mordarstwow skupiny NSU k jastwu na čas žiwjenja zasudźili. Mnichowske wyše krajne sudnistwo je zdobom wukazało, zo njesmědźa ju po 15 lětach dočasnje pušćić. Wona sedźi w Kamjeničanskim jastwje. John kritizuje, zo njesmědźa přiwuzni woporow swoje měnjenje wo móžnym dočasnym pušćenju Zschäpe zwuraznić. John chce tuž sam sudnistwu stejišćo zapodać.
To a tamne (07.08.25)
Kupanske wjedro a horcotu wjedrarjo wulkim dźělam Němskeje přichodne dny wěšća. Na juhu Němskeje wočakuja hač do 30 stopnjow, zwjetša wostanje sucho. Jenož na sewjeru drje su šwihele móžne. Hrimanja horcoty dla tohorunja wuzamknjene njesu. Ludźo njesměli na škitnu kremu pře słónco zabyć. W nocach budźe přiwšěm poměrnje chłódno.
Monogamija je po měnjenju wjetšiny wobydlerjow Němskeje najlěpša forma lubosćinskeho žiwjenja. 72 proc. dorosćenych njemóže sej předstajić, z wjacorymi partnerami runočasnje žiwy być. Tole je woprašowanje instituta Civey wunjesło. Jenož 18 procentow sympatizuje z alternatiwnymi žiwjenskimi formami. Přičina wulkeho přihłosowanja monogamiji je jednora: Ludźo su z tutej formu zhromadnosće přewažnje spokojom.
Polarizuja z dweju bokow
Sprjewine město hotuje so na třeći CSD. Loni hižo bě situacija napjata, lětsa liči policija ze hišće wjetšim potencialom namocy. Prawicarjo a lěwicarjo cyłeje Němskeje do zarjadowanja polarizuja.
Staraja so wo čiste chódniki
Witkoff wuradźuje w Moskwje
Washington/Moskwa (dpa/SN). Wurjadny pósłanc USA Steve Witkoff so dźensa w Moskwje ze zastupnikami Ruskeje zetka, zo by z nimi wo skónčenju wójny w Ukrainje wuradźował. Za něšto dnjow skónči so ultimatum prezidenta Donalda Trumpa, z kotrymž chce wón Rusku k přiměrej nuzować. Ruski prezident Wladimir Putin je zasadnje zwólniwy, zo wójnu w Ukrainje skónči, su-li wšitke žadanja Ruskeje spjelnjene, wón rjekny.
Karola Nawrockeho spřisahali
Waršawa (dpa/SN). Narodno-konserwatiwny politikar Karol Nawrocki je nowy prezident Pólskeje. 42lětneho bjezstronskeho stawiznarja su dźensa dopołdnja we Waršawje spřisahali. Nawrocki, kotryž ma podpěru opoziciskeje PiS, bě wólby prezidenta spočatk junija snadnje přećiwo kandidatej knježerstwa, Waršawskim wyšim měšćanostu Rafałom Trzaskowskim, dobył. Nawrocki naslěduje Andrzeja Dudu, kotryž njesmědźeše wjace kandidować.
Stegner kritizuje uniju
W japanskim měsće Hiroshima su dźensa na wopory prěnjeje atomoweje ...
Naćisk rentow dla zapodaty
Berlin (dpa/SN). Stabilny niwow renty a lěpša maćerska renta: Socialna ministerka Bärbel Bas je dźensa naćisk noweho zakonja wo rentach zwjazkowemu knježerstwu předpołožiła. Zwjazkowy sejm ma jón nětko hač do kónca lěta wobzamknyć. Nimo toho diskutowachu ministrojo knježerstwa na swojim dźensnišim posedźenju hišće dalše temy.
W koaliciskim zrěčenju běchu CDU/CSU a SPD zakótwili, zo wostanje niwow renty dale na runinje 48 procentow, a to hač do 2031. Po tym drje wón poněčim woteběra. Bas chce ze swojim zakonjom tomu zadźěwać. Za to pak trjebaja dalše miliardy eurow, kotrež stat rentowej kasy kóžde lěto přepokaza. To samsne płaći za maćersku rentu.
Israel žada sej pušćenje jatych
Wuběrk Epsteina žada sej akty
Washington (dpa/SN). Kontrolny wuběrk domu reprezentantow w USA žada sej w aferje wokoło seksualneho złóstnika Jeffreyja Epsteina, zo wšitke akty wozjewja. Nimo toho su sej wjacorych bywšich zastojnikow kraja skazali.
Gremij je wotpowědne listy rozesłał. Mjez druhim přeproša justicnu ministerku Pam Bondi, bywšeho prezidenta Billa Clintona a něhdyšu wonkownu ministerku Hillary Clinton. Tež bywšej direktoraj zwjazkoweje policije Robert Mueller a James Comey staj přeprošenje dóstałoj.
Epstein bě wjele lět systematisce njepołnolětne holcy znjewužiwał. Lěta 2019 su 66lětneho mortweho w jastwowej celi našli – wón je so wobwěsnył. Wjelelětnu dowěrnicu Epsteina Ghislaine Maxwell běchu 2022 na 20 lět do jastwa zasudźili, dokelž bě system znjewužiwanja natwariła.
Smjerć Epsteina bě w USA wulke spekulacije zbudźiła, dokelž pěstowaše wón tehdy wuske styki k bohatym a tež k politikarjam. Tež prezident USA Donald Trump słušeše k tym, kotřiž Epsteina stajnje zaso wopytowachu.
