Łužica boji so njelěpšinow
Zwjazkowa ministerka Reiche energijowy koncern LEAG wopytała
Grodk (dpa/SN). Zwjazkowa ministerka za hospodarstwo Katherina Reiche (CDU) je dźensa we wobłuku swojeje lěćneje jězby energijoweho zastaraćela LEAG we Łužicy wopytała. W srjedźišću stejachu aktualne problemy energijoweho hospodarstwa a wuhlady a wužadanja nastupajo energijowu změnu, kotraž Łužicu wosebje potrjechi.
Přistajeni energijoweho koncerna Leag we Łužicy wšak dotal najlěpše měnjenje wo hospodarskej ministerce njemějachu. Zawodna rada boji so njelěpšinow při twarje nowych płunowych milinarnjow, kotrež maja po woli knježerstwa předewšěm na juhu Němskeje nastać. „Fairplay hinak wupada“, rěkaše tele dny na protestnej akciji w Choćebuzu.
Čwačk nadźije
Druhdy, ale jenož druhdy směmy so nad powěsćemi w nowinach wjeselić. Wobrazy wo zetkanju młodźiny zašłe dny w Romje su tajke małe wjeselo. Hdyž přichwata na zakónčacu Božu mšu milion młodych wěriwych, haj hdyž přenocuja do toho samo wonka, zo bychu so zhromadnje z bamžom modlili, potom je tole čwačk nadźije, zo njeje katolska cyrkej snano tola hišće cyle tak mortwa, kaž to stajnje twjerdźimy. Cyrkej mjenujcy njeje jenož Němska, to njeje jenož Europa, ale to je cyły swět. A mjeztym zo so tule z dźeń a mjenje duchownymi a dale a prózdnišimi cyrkwjemi bědźimy, je druhdźe na swěće dźeń a wjace wěriwych. Z poł milionom młodostnych běchu zamołwići w Romje ličili, na kóncu bě jich dwójce telko. Zo nastanje potom wěsty chaos, to je logiske. Přiwšěm běchu wšitcy w modlitwje a wěrje zwjazani. Za jednotliweho młodostneho je tajke dožiwjenje jónkrótne a jeho pozbudźa.
Maximilian Gruber
Wobšěrnu wustajeńcu wotewrěli
To a tamne (04.08.25)
Wójsko Južneje Koreje wotnětka wótřerěčaki podłu mjezy Sewjerneje Koreje wottwarja. Tole je „praktiska naprawa“, kotraž ma napjatosće mjez sewjerom a juhom korejskeje połkupy znižić, zakitowanske ministerstwo w Seoulu zdźěla. Južna Koreja bě z wótřerěčakami přinoški wusyłała, kotrež so přećiwo režimej Sewjerneje Koreje měrjachu. Nowe knježerstwo prezidenta Lee Jae Myunga chce napjatosće z Pjöngjangom redukować.
Wulkan Krašeninnikow je po 400 lětach znowa wudyrił. Stało je so tole na połkupje Kamčatka na dalokim wuchodźe Ruskeje něšto dnjow po zemjerženju před Kamčatku. Mróčel popjeła a płuna saha šěsć kilometrow wysoko. Dotal lawa wulkana lěsy a sydlišća w přirodnym rezerwaće Kronozki njewohrožuje. Krašeninnikow je jedyn z cyłkownje wosom wulkanow w tutej kónčinje.
Sudnistwo zadźěwki zwyšiło
Luxemburg (dpa/SN). Sudnistwo Europskeje unije je zadźěwki nastupajo postajenje tak mjenowanych „wěstych krajow“, z kotrychž ćěkancy přichadźeja, zwyšiło. Čłonske kraje EU smědźa kraje jenož potom jako wěste zastopnjować, hdyž žórła za tajki posudk wozjewja a hdyž je wša ludnosć w potrjechenym kraju wěsta, sudnistwo w Luxemburgu rozsudźi. W jednanju dźěše wo wjele diskutowany „Albanski model“ italskeho knježerstwa.
Ponowja wažnu čaru železnicy
Ludwigslust (dpa/SN). Přichodne dźewjeć měsacow wostanje wjele wužiwana železniska čara mjez Berlinom a Hamburgom wot dźensnišeho zawrjena. W tym času chcedźa 165 km kolijow a nimale 250 wuhibkow ponowić. Podłu 278 km dołheho koridora ponowja 28 dwórnišćow, nimo toho šěsć wuhibkarnjow. Twarske naprawy płaća 2,2 miliardźe eurow. Spěšniki trjebaja přez Stendal a Uelzen wotnětka 45 mjeńšin dlěje. Němska železnica zwoprawdźi z tym naročny twarski program.
Pólska chce kontrole podlěšić
Přewažnje młodźi demonstranća protestowachu wčera před ...
Inflacija wostanje „stabilna“
Wiesbaden (dpa/SN). Płaćizny za přetrjebarjow su w juliju spochi přiběrali. Kaž hižo w juniju běchu twory a posłužby přerěznje wo dwaj procentaj dróše hač loni, zwjazkowy statistiski zarjad zdźěla.
Z tym drje je wulka žołma inflacije minjenych lět wosłabnyła, „priwatne domjacnosće pak maja přeco hišće z tym činić, so na ‚stabilnje‘ wysoke płaćizny zwučić. Mjeztym pak su so tež mzdy zwyšili. Tema inflacije so dale a bóle z hłowow ludźi zminje“, je nawoda předewzaća Deka Ulrich Kater přeswědčeny.
Wosebje stupace płaćizny za posłužby (3,1 procent) a žiwidła (2,2 procentaj) su inflaciju dale ćěrili. Energija je porno tomu wo 3,4 procenty tuńša hač w juliju 2024.
Wyše cła USA přestorčene
Washington (dpa/SN). Nowe cła USA na importy z wukraja płaća hakle wot 7. awgusta a nic, kaž předwidźane, wot dźensnišeho 1. awgusta. Tole je zastojnik knježerstwa USA powěsćernjam zdźělił. Postajenje płaći tež za cło 15 procentow za importy z Europskeje unije. Prezident USA Donald Trump je wotpowědny wukaz podpisał. Zastojnik rjekny na prašenje za přičinami přestorčenja, zo trjebaja USA wjace chwile, nowe cłowne zakonje praktisce přesadźić.
Na njedawnym zetkanju Trumpa ze zastupnikami EU běchu termin 1. awgusta za cła 15 proc. hišće raz potwjerdźili. Běły dom we Washingtonje bě nimale 70 krajow wopřijacu lisćinu wozjewił, kotrymž nowe cła napołoža. Trump argumentuje, zo knježi w mjezynarodnym wikowanju njesprawnosć na njedobro USA, kotruž chce wón wotstronić. Fachowcy su pak přeswědčeni, zo nowe cła USA bóle zeškodźa hač druhim krajam.
Nowe mjezsobne škaranja
Moskwa (dpa/SN). Werbalne rozestajenja mjez prezidentom USA Donaldom Trumpom a bywšim ruskim prezidentom Dmitrijom Medwedjewom dale traja. „Hdyž móža słowa něhdyšeho ruskeho prezidenta tajku nerwoznu reakciju prezidenta USA zbudźić, potom je Ruska na prawym puću a ma we wšěm prawje“, pisa Medwedjew na Telegramje.
Trump a Medwedjew staj sej minjene dny wospjet nadawałoj. Nastork bě nowy dźesać dnjow trajacy ultimatum Trumpa přećiwo Ruskej za přiměr w Ukraine. Na to Medwedjew USA hrožeše, zo je to krok do směra na wójnu. Trumpa mjenowaše wón „dźěda“, kiž měł radšo mjelčeć. Trump hrozy nětko Indiskej ze sankcijemi, dokelž ta rusku energiju kupuje.
Wadephul: Njeznjesliwe połoženje
Tel Aviv/Gaza (dpa/SN). Hladajo na dorazne warnowanja před hłodowej nuzu w Gazaskim pasmje tež Němska ćišć na Israel dale zwyši. „To je dospołnje njeznjesliwe połoženje, kiž ma so hnydom změnić“, rjekny wonkowny minister Johann Wadephul (CDU) po rozmołwje z israelskim knježerstwom w Jerusalemje. Trěbne je „fundamentalne polěpšenje na dobro ludźi w Gazaskim pasmje.“ Hewak hrozy Israelej mjezynarodna izolacija.
Wurjadny pósłanc USA Steve Witkoff a wulkopósłanc USA w Israelu Mike Huckabee staj so dźensa w Gazaskim pasmje wo połoženju wobhoniłoj. W zawrjenym pobrjóžnym pasmje z 2 milionomaj wobydlerjow hrozy hłodowa katastrofa.
Wadephul chcyše so dźensa do Zapadnojordanskeho kraja podać. Tam wočakowaše jeho palestinski prezident Mahmud Abbas. Wobrěčeć chcyštaj Wadephul a Abbas přiběracu namóc židowskich sydlerjow přećiwo tam bydlacym Palestinjanam a rozmyslowanja Israela, kónčinu anektěrować. Němska tajke plany runja druhim krajam raznje wotpokazuje.
