Scholz přeje Merzej wjele wuspěcha
Berlin (dpa/SN). Rozžohnowacy so zwjazkowy kancler Olaf Scholz je změnu knježerstwa w Němskej w swojej poslednjej narěči w zastojnstwje „wuraz demokratiskeje normality“ mjenował. Zo wotměwa so změna na ciwilizowane, kolegialne a přistojne wašnje, njeje w tutych časach normalne, rjekny wón na wulkej wojerskej ceremoniji k swojemu rozžohnowanju w Berlinje, kotruž je zwjazkowa wobora do dźensnišeho přepodaća zastojnstwa k jeho česći wuhotowała.
Ciwilne wobchadźenje mjez demokratami měło so zachować, Scholz rjekny. „To je drohotny pokład.“
Swojemu naslědnikej Friedrichej Merzej, kiž z mandźelskej Charlottu w prěnim rynku sedźeše, přeješe Scholz „wjele wuspěcha, chrobłosć a zbožownu ručku“. W ćežkich hodźinach, tak Scholz radźeše, su rozmołwy z wobydlerjemi najlěpše žórło noweje mocy.
Olaf Scholz wostanje po skónčenju zastojnstwa zapósłanc zwjazkoweho sejma. Wón bě w Podstupimje direktny mandat dobył, kotryž chce wón wužiwać.
Hišće klaca z dowěru
Twarja pomocny móst nad Łobjom
Bad Schandau (dpa/SN). Po měsacy trajacym zawrjenju je móst nad Łobjom w Bad Schandauwje za nadróžny wobchad zaso wužiwajomny. Nětko započinaja prowizoriski móst twarić. K tomu přepytuja najprjedy raz krutosć pódy, na kotrejž ma móst stać. Pomocny móst ma 31 milionow eurow płaćić a tuchwilny móst narunać, dołhož jón ponowja.
Cyłkownje 19 dźěrow chcedźa 15 do 20 metrow hłuboko točić. K přepytowanju krutosće nałožuja wjacore techniske metody. Hač do 9. meje maja wšitke přihotowace dźěła wotzamknjene być. Mjez 12. meju a 20. junijom dźěry za fundament mosta toča. W tymle času su wobmjezowanja nadróžneho wobchada njewobeńdźomne. K tomu liča zawrjene chódniki, wuše jězbne čary a zniženje dowoleneje spěšnosće.
Móst nad Łobjom běchu 7. nowembra 2024 njewočakowano z wěstotnych přičin zawrěli. Do toho běchu móst po sypnjenju Carolineho mosta w Drježdźanach přepytowali. Dokelž je móst w Bad Schandauwje ze samsnych maćiznow twarjeny kaž Drježdźanski, so bojachu, zo móhł so wón tohorunja sypnyć.
Nawodnistwo planetarija přepodał
To a tamne (06.05.25)
Božu słužbu ze swětnišćowej tematiku woswjećili su w ewangelskej cyrkwi w sewjerorynsko-westfalskim Bensbergu. Cyle pod znamjenjom filmoweje trilogije Star Wars bě farar Samuel Dörr (37) ze swojimi sobudźěłaćerjemi cyrkej wupyšił a wěriwych prosył, wotpowědnje zdrasćeni kemši přińć. „Dyrbimy jako cyrkej po nowych pućach kročić a tak tež młodych ludźi narěčeć“, je sej duchowny wěsty. Wothłós bě pječa jara dobry.
Krematorij wurubili su njeznaći skućićeljo w Rutesheimje njedaloko badensko-württembergskeho Ludwigsburga. Minjeny kónc tydźenja su tam wokno rozbili a so do domu zadobyli. Zaměrnje měrjachu so na běrow, dokelž njejsu nihdźe druhdźe slědy zawostajili. Tam pokradnychu wjace hač tysac eurow z pjenježneje kasety a so zminychu. Policija pyta za swědkami, kiž su něšto widźeli.
Serbskim jutram přichilena
Drježdźany (B/SN). Sakska ministerka za kulturu a turizm Barbara Klepsch napřećo ewangelskej powěsćerni serbske jutrowne nałožki w Swobodnym staće Sakskej wysoko hódnoći, wosebje křižerske procesiony, jutrowne spěwanje a debjenje jejkow jako „wuraz wosobinskeje nabožneje a kulturneje identity“. Wusahowace su za nju tež swjatočne Bože słužby a koncerty po cyłej Sakskej.
Zhromadnje jutry swjećili
Bonn (B/SN). Lětsa swjećachu křesćenjo nimale po cyłym swěće jutry po julianskim a po gregorianskim kalendrje samsny dźeń 20 apryla, ale na rozdźělne wašnje. Na grjekskich jutrach jědźachu wěriwi sobotu wosebitu poliwku (majirítsa), jutrowny chlěb (tsuréki), jutrowne pječwo (kulurákia) a njedźelu jehnjo na róžni pječene (ovelías). Muslimojo njeswjeća jutry, dokelž do smjerće Jězusa na křižu a do zmortwychstanjenja njewěrja.
Swobodu měnjenja zaručić
Młodźi sorabisća wo swojim dźěle rozprawjeli
Budyšin (SN/lym). Hižo pjaty raz je Serbski institut (SI) zašłej pjatk a sobotu zetkanje sorabistiskeho dorosta w Budyšinje přewjedł. Zarjadowanje organizuja stajnje kóžde druhe lěto, při tym stejitej nawjazanje nowych kontaktow a interdisciplinarna wuměna w srjedźišću. Cyłkownje 13 přednošowarjow z Němskeje, Pólskeje a samo Chile předstaji lětsa wudźěłki masterowych, doktorskich abo studentskich dźěłow. Nimo toho móžachu wobdźělnicy sobudźěłaćerjow SI zeznać a so z nimi wo jich wědomostnym wuwiću rozmołwjeć.
Tónraz planowachu zetkanje štyrjo wot cyłkownje sydom na SI promowowacych dorostowych wědomostnikow. Młode mustwo chce zarjadowanje z mjenom sad (sorabistiski akademiski dorost) etablěrować. Po witanju předstaji wědomostnica SI dr. Lubina Malinkowa stawizny kaž tež dźěławosć Serbskeho instituta. Sćěhowaše mjezsobne zeznaće přitomnych z pomocu hrow wonka na zahrodźe instituta.
Kak wobchdźeć z AfD?
Berlin (dpa/SN). Frakcija CDU/CSU w zwjazkowym sejmje chce so po słowach jeje přichodneho předsydy Jensa Spahna wo zhromadnym wobchadźenju z AfD dorozumić. „Doporučenje, zapósłancow AfD za předsydow wuběrkow wuzwolić, z našeje strony njepodamy“, piše wón na platformje X. Minjeny čas bě so wón wospjet za to wuprajił, z AfD runje tak wobchadźeć, kaž z kóždej druhej opoziciskej stronu. Tole bě kritiku zbudźiło.
Ruska Ukrainu dale nadběhuje
Kijew (dpa/SN). Najebać prócowanja wo přiměr w Ukrainje ruske wójsko susodny kraj po informacijach z Kijewa dale masiwnje nadběhuje. Generalny stab ukrainskeho wójska rozprawja wo wjace hač 200 ruskich nadběhach. USA hižo dlěši čas spytaja, přiměr mjez Ruskej a Ukrainu posrědkować. Mjeztym je ukrainski prezident Wolodymyr Zelenskyj přiměrej bjez wuměnjenjow přizwolił, kiž bě prezident USA Donald Trump namjetował. Ruska tole wotpokazuje.
Prawicar 40 procentow zdobył
Z wulkej Božej słužbu pod hołym njebjom su wčera w Hannoveru 39. ...
Israel zwyši ćišć na Hamas
Tel Aviv (dpa/SN). Israel chce swoju ofensiwu w Gazaskim pasmje přećiwo islamistiskej Hamas přiwótřić. Tole su na posedźenju wěstotneho kabineta pod nawodom ministerskeho prezidenta Benjamina Netanjahuwa wobzamknyli. Zaměr je, ćišć na Hamas zwyšić a sej tak pušćenje dalšich zastajencow wunuzować. Nimo toho je kabinet plan schwalił, po kotrymž chcedźa ludźi w dospołnje zawrjenym pobrjóžnym pasmje zaso ze žiwidłami zastarać.
W Gazaskim pasmje knježi humanitarna katastrofa, dokelž tamnišich ludźi hižo měsacy wjace njezastaraja. Israel chce rozdźělenje žiwidłow sam kontrolować, zo njeby Hamas ničo dóstała. UNO tute postupowanje raznje kritizuje.
