Rom (dpa/SN). Bamž Leo XIV. je po słowach italskeje ministerskeje prezidentki Giorgije Meloni potwjerdźił, zo chce z hosćićelom jednanjow wo skónčenje wójny w Ukrainje być. Meloni je po swójskich informacijach wčera z bamžom telefonowała. Při tej składnosći jej Leo XIV. wobkrući, zo steji Vatikan jako neutralne městno za móžne měrowe jednanja mjez Ruskej a Ukrainu k dispoziciji. Hižo minjeny tydźeń bě nawoda katolskeje cyr­kwje to namjetował. Meloni dźakowaše so bamžej za jeho „njepowalne zasadźenje“ na dobro měra. Statni a knježerstwowi šefojo EU běchu Meloni pón­dźelu prosyli, zo by so we Vatikanje ­wobhoniła, hač poskitk bamža dale ­wobsteji.

Drježdźany (dpa/SN). Nowy hospodarski minister Sakskeje Dirk Panter (SPD) je dźensa prěni raz w swojim zastojnstwje w krajnym sejmje fachowu knježerstwowu deklaraciju předpołožił. Wona steji pod hesłom: „Z krizow k šansam. Kak sakske hospodarstwo dźensa zesylnimy a za přichod přihotujemy.“

SPD nawjeduje ministerstwo za hospodarstwo a dźěło hižo wot lěta 2014. Dźesać lět bě Martin Dulig zamołwity minister. CDU so stajnje zaso wo resort prócowaše, njemóžeše pak so přesadźić.

W aktualnej hodźinje rěčachu na próstwu frakcije SPD wo wočakowanjach swobodneho stata na nowe zwjazkowe knježerstwo. Druhu temu wužichu Zeleni, zo bychu w zwisku z planowanymi skrótšenjemi financowanja wopomnišćow na wohroženja demokratije pokazali.

Wječor rozsudźichu zapósłancy krajneho sejma wo tym, hač zběhnu imu­nitu kultusoweho ministra Conrada ­Clemensa (CDU). Wón dyrbi wobchadneho přeńdźenja dla ze sudniskim chło­stanjom ličić. Imunita tomu zadźěwa.

Z nošerstwom serbskeje dźěćaceje skupiny dnjoweje maćerje w Drježdźanach je Serbske šulske towarstwo předloni wažnu kročel šło a zamołwitosć za Serbow w sakskej stolicy přewzało. Angažowane serbske swójby zwonka Łužicy trjebaja tajku podpěru. Měšćanski zarjad běše drje wulkomyslny z dowolnosću, jako bě wjac dźěći hač po normje, ale so tuchwilu wuskomyslny pokazuje, dokelž je nachwilnje – kaž druhdźe tež – přemało dźěći. To pak je bjez logiki, wšako njeje serbska skupina konkurenca němskim žłobikam. Tule dźe wo zdźerženje serbšćiny w duchu sakskeje wustawy, wšako njenawróća so młodźi Serbja dźensniši dźeń po wukubłanju a do załoženja swójby hižo awtomatisce do Łužicy. Nimo toho je stare serbske mjeno sakskeje stolicy dopokaz toho, zo je tu stary sydlenski rum. Tohodla njech kultusowe ministerstwo potrjechenych jenož z rjanymi słowami njetróštuje, ale tež aktiwnje daledawanje serbšćiny přichodnym generacijam podpěruje. Marcel Brauman

Lipsk (dpa/SN). Demonstracija na dobro Palestinjanow w Lipsku je kontrola po­licije z namocu skónčiła. Při tym je so něhdźe dźesać ludźi zraniło, policija zdźěli. Nimo toho buštej tramwajka a awto zarjada za porjad w měsće wobškodźenej, wjacore medije rozprawjeja.

Zastojnicy běchu tramwajku póndźelu wječor zadźerželi. W njej njeběchu jenož wobdźělnicy demonstracije, ale tež podhladni, za kotrymiž policija w zwisku z demonstraciju 1. meje pytaše. Jim ­wumjetuja, zo su so naprawam policije ­spjećowali. Zaměr zastojnikow bě, zo personalije potrjechenych zwěsća, rěčnik policije rozłoži.

Při kontroli pak so situacija w tramwajce přiwótři. Dale a wjace ludźi so přećiwo policiji solidarizowaše a so jim ­spjećowaše. Wokna tramwajki při tym rozbichu. Zastojnicy zasadźichu popjerjowy spray, zo bychu zaso kontrolu ­dóstali. Přećiwo wobdźělnikam rozestajenjow přepytuja nětko ćežkeho kaženja měra dla, spjećowanja přećiwo policajskim zastojnikam a dalšich chłostajomnych njeskutkow dla. Personalije 40 wosobow su registrowali.