Hrózbne podawki swěta křesćanow jimali
Budyšin (SN/at). Wětřik, dešć a miłe temperatury město zmjerzka a sněha běchu wonkowne znamjenja swjatych dnjow. To pak njeje křesćanow we Łužicy wottrašiło, w bohatej ličbje Bože słužby abo hodowne nutrnosće swjećić. We hłowje mějachu často hišće krawny atentat na adwentne wiki na Berlinskim Breitscheidowym naměsće. Strach ludźi před terorom tematizowachu duchowni tež w hodownym prědowanju.
Drježdźansko-Mišnjanski biskop Heinrich Timmerevers rečeše w tym zwisku wo „njepředstajomnych“ podawkach. „Přeco hižo smy so toho bojeli; smy so nadźijeli, zo njebudźemy wot toho potrjecheni. A tola je so to nětk stało.“
Biskop Ewangelsko-lutherskeje krajneje cyrkwje Sakskeje dr. Carsten Rentzing ma Berlinski atentat za nadpad na hodowne poselstwo. Tohodla je najlěpša wotmołwa ta, „zo so wokoło tohole poselstwa hromadźimy“, wuzběhny wón na bohosłužbje pod hołym njebjom 23. decembra před cyrkwju Našeje knjenje w Drježdźanach.
Policistow lěpje škitać
Berlin (dpa/K/SN). Nutřkowni ministrojo zwjazkowych krajow chcedźa policistow wěsćišich wuhotować, zo bychu před móžnymi nadpadami teroristow lěpje škitani byli. Bayerska wuda klětu za nakup kulki njepřepušćomnych lacow 30 milionow eurow. W Sewjerorynsko-Westfalskej nutřkowny minister Ralf Jäger (SPD) planuje, wšitke patruljowace awta z mašinskimi pistolemi wuhotować.
Šofer hižo mortwy był
Berlin (dpa/K/SN). Pólski šofer nakładneho wozydła, z kotrymž je Tunezičan Anis Amri mordarski atentat w Berlinje skućił, bu po informacijach nowiny Bild hižo hodźiny do wuwjedźenja njeskutka z kulku do hłowy morjeny. To je kónčna obdukcija wupokazała. Dotal z toho wuchadźachu, zo bě šofer hišće krótko do atentata w swojej kabinje ze skućićelom wojował a jemu do wodźidła přimnył. Mnozy sej žadaja, spožčić morjenemu Zwjazkowy zasłužbowy křiž.
Wopory nalěta wopominałoj
Pólska opozicija parlament wobsadźiła
Nětko wažneměstu Aleppo pomhać
Zapisowak ruskeho lětadła namakany
Soči (dpa/SN). Před ruskim pobrjohom Čorneho morja pytaja nurjerjo dale z wotmachom za woporami lětadłoweho njezboža z cyłkownje 92 mortwymi. Dźěła su po oficialnych informacijach zakitowanskeho ministerstwa na dobrym puću. Hač do wčerawšeho wječora móžachu 13 ćěłow z wody wućahnyć. Nurjerjo su nimo toho dźěle mašiny typa Tupolew 154 namakali a někotre z nich na kraj dowjezli, kaž powěsćernje rozprawjeja.
Lětadło ruskeho zakitowanskeho ministerstwa bě njedźelu po puću do Syriskeje z dotal njeznateje přičiny do morja zrazyło. W mašinje bě wjace hač 60 spěwarjow wojerskeho Aleksandrowskeho ansambla ze swojim nawodu Walerijom Chalilowom, kotřiž wšitcy zahinychu. Mjez woporami je tež skupina žurnalistow wjacorych telewizijnych sćelakow. Woni chcychu wo koncerće sławneho ansambla na ruskim lětadłowym zepěranišću Hamaimim w Syriskej rozprawjeć. Z teje přičiny su wčera po wšej Ruskej statne žarowanje wukazali.
Nastajenje změnić
Pomjeznu kónčinu spěchować
Koncept wo splećenju Sakskeje a Delnjeje Šleskeje do lěta 2030 předleži
Drježdźany (SN). W lěće 2030 ma wšón saksko-delnjošleski pomjezny region na wšitkich runinach, wot infrastruktury hač k wobswětoškitej, zhromadnje postupować. Lěta 2014 zdźěłany němsko-pólski koncept přichoda předwidźi derje splećenu infrastrukturu w nadróžnym wobchadźe, w socialnym a techniskim wobłuku a při zhromadnych napinanjach hladajo na zniženje přetrjeby energije, kaž sakske nutřkowne ministerstwo zdźěla.
Nazhonjenja a efekty susodstwa maja so hišće intensiwnišo wužiwać. Zadźěwki mjez dźěłowymi wikami chcedźa dale wotstronjeć a wjace do slědźenja a wuwića inwestować. Zdźěłany je zhromadny Koncept přichoda 2030 mjez druhim na zakładźe pólskeje koncepcije rumnostneho wuwića hač do lěta 2030 a němskich směrnicow za rumnostne wuwiće. Při tym su strategiske dokumenty krajneje, wojewódskeje a europskeje runiny zapřijate. Hłowny zaměr je socialnu a ekonomisku situaciju a žiwjensku kwalitu scyła zbližić.
Namšu bohaće wobrubili
To a tamne (27.12.16)
Njewšědne swójbne hodowne wobradźenje w Düsseldorfje je zasadźenje wohnjoweje wobory zawiniło. Wjacore awta chwatachu njedźelu do města, po tym zo bě muž woheń w susodnym bydlenju zwěsćił. Wohnjowa wobora wěc spěšnje wujasni: Nan swójby chcyše wobradźenje wosebje napjate činić a zapiny nastroj, kotryž kur produkuje. Zamołwity wohnjoweje wobory pak jeho namołwi, do tajkich akcijow přichodnje radšo susodow informować.
Hotowy dešć pjenjez je 62lětny Jendźelčan na awtodróze A 3 pola Würzburga načinił. Po tankowanju bě wón patoržicu z wjacorymi tysacami eurow pjelnjenu tobołku na třěchu awta połožił a wotjěł. Wětřik pjenjezy wotnjese a po awtodróze rozdźěli. Policisća namakachu jenož hišće mały dźěl z nich. Tójšto šoferow bě zastało a pjenjezy zezběrało.
Putin wěrił, zo Trump dobudźe
Moskwa (dpa/SN). Ruski prezident Wladimir Putin nadźija so dobrych poćahow k přichodnemu republikanskemu prezidentej USA Donaldej Trumpej. Tole rjekny wón dźensa na swojej kóždolětnej nowinarskej konferency před wjacorymi stami žurnalistow z kraja a wukraja w Moskwje. Zdobom kritizowaše Putin knježerstwo Baracka Obamy a demokratisku prezidentsku kandidatku Hillary Clinton. Wuraznje pak chwaleše Trumpa, dokelž je naladu w kraju prawje spóznał a přećiwo wšěm wočakowanjam dobył.
Biskop: Njedać so zlemić
Freiburg (dpa/SN). Arcybiskop Freiburga Stephan Burger namołwja ludźi k hodam k wjetšej towaršnostnej zhromadnosći. „Hladajo na teror a namóc njesměmy so zatrašić a zlemić dać“, rjekny Burger dźensa powěsćerni dpa. „Smy wužadani, druhim ludźom solidarisce poboku być a so zasadźeć za čłowjesku dostojnosć, wot Boha spožčenu.“ Tole je wučba teroroweho nadpada w Berlinje a druhich njeskutkow. Křesćanske poselstwo „Njebojće so!“ je aktualne kaž hišće ženje.
Nadpadomaj zadźěwali
