Dialog EU z Israelom přetorhnyć?
Brüssel (dpa/SN). Hłowny diplomat EU Josep Borrell namjetuje statam Europskeje unije, prawidłowny politiski dialog z Israelom přetorhnyć. Hłowna přičina su rozprawy njewotwisnych mjezynarodnych organizacijow, kotrež wo tym rozprawjeja, zo Israel čłowjeske prawo a mjezynarodne čłowjeske ludowe prawo rani. Tole je powěsćernja dpa z kruhow zastojnikow EU zhoniła. Namjet Borrella chcedźa na přichodnym zetkanju wonkownych ministrow EU wobjednawać, kotrež wotměje so přichodnu póndźelu.
Politiski dialog z Israelom rjaduje tak mjenowane asociěrowanske zrěčenje z lěta 2000. Tute předwidźi mjez druhim prawidłownu wuměnu za skrućenje poćahow a za dalše wuwiće partnerstwa. W nim zakótwjeny je tež zawjazk, zo wobě stronje čłowjeske prawa a zasady demokratije dodźeržitej.
Borrell bě hižo w oktobru připowědźił, zo chcył z wonkownymi ministrami EU wo wójnskim postupowanju Israela w Gazaskim pasmje a w Libanonje rěčeć. Tam ćerpja wosebje ciwilisća.
Merz Scholzej wumjetował
Razna debata zwjazkoweho sejma po narěči zwjazkoweho kanclera
Berlin (dpa/SN). Tydźeń po zwrěšćenju amploweje koalicije je nawoda opozicije Friedrich Merz razne wosobinske nadběhi přećiwo zwjazkowemu kanclerej Olafej Scholzej (SPD) w zwjazkowym sejmje zwuraznił. Z tym je wólbny bój zahajił. Předsyda CDU a kanclerski kandidat unije CDU/CSU w swojej wotmołwje na knježerstwowu deklaraciju Scholzej kompetencu nawjedowanja wotrjekny. „Wy tutón kraj pačiće, knježe kanclero. Wy sće za tute rozestajenja a za pačenje Němskeje zamołwity. Takle njemóže nichtó kraj nawjedować“, wón rjekny.
Scholz bě do toho w knježerstwowej deklaraciji pušćenje financneho ministra Christiana Lindnera (FDP) a z tym zwisowacy kónc amploweje koalicije SPD, Zelenych a FDP jako „njewobeńdźomne“ zakitował. Runočasnje warnowaše před pačenjom kraja a namołwješe wšitkich, kompromisy tworić. „Sym přeswědčeny, zo je to jenički prawy puć“, tak Scholz.
Wólby su trěbne
Mjeztym je jasne, zo wolimy klětu 23. februara nowy zwjazkowy sejm. Tež prěni kandidaća Budyskeho wólbneho wokrjesa su hižo připowědźili, zo chcedźa k wólbam nastupić. Wólbny bój je startował a budźe krótki. Čas za organizaciju wólbnych forumow a rozmołwow drje telko njebudźe. Snano pak namakaja so druhe formy, wo hłosy wolerjow wojować. Sym wćipna.
Hladajo na wólbny termin 23. februara měli wolerjo w swojich protykach přepruwować, hač su w domiznje, wšako je to wosrjedź zymskich prózdnin w Sakskej. Wulka ličba ludźi budźe tuž do toho z listom wolić dyrbjeć, jeli sej za čas wólbow zymski dowol popřeje. Wězo je jasne, zo budźe organizacija wólbow w komunach přichodne tydźenje wulke wužadanje. Adwent a hodowny čas kaž tež přihoty na póstnicy su sej mnozy trochu hinak předstajili. Přiwšěm je nětko nuznje trěbne, zo ma Němska ručež móžno zaso jednanja kmane knježerstwo. Bianka Šeferowa
To a tamne (14.11.24)
Roznošowar paketow je w badensko-württembergskim Rheinfeldenje paket pokradnył, kotryž bě druhi roznošowar runje wotstajił. Póstownik widźeše, kak 41lětny paket do swojeho awta tykny a wotjědźe. Swědk zazwoni policiju a paducha wjacore kilometrow přesćěhowaše. W Lörrachu zastojnicy złóstnika zajachu. Wón dyrbi so nětko zamołwić. Što w pakeće bě, njeje znate.
Namócnosćam popjelneje srjedy w badensko-württembergskim Biberachu sćěhuja sudniske konsekwency. 40lětnemu ratarjej wumjetuja ranjenje krajneho měra a spjećowanje přećiwo policistam. 14. februara běchu ratarjo před halu, w kotrejž planowachu Zeleni politisku popjelnu srjedu, hnój mjetali a juchu wukidali. Slědowachu rozestajenja z policiju. Ratarjej pósłachu chłostanku 3 200 eurow. Tón pak nochce pokutu zapłaćić.
Wurjadne městnosće Łužicy do wučby zapřijeć
Zły Komorow (SN). Wobłuk kubłanske wědomosće Braniborskeje Techniskeje uniwersity Choćebuz-Zły Komorow su wčera zastupjerjow kubłanskich a slědźenskich institucijow kaž tež łužiskich městnosćow UNESCO a dalšich regionalnych partnerow z regiona na zarjadowanje „Lernwelten Lab“ do campusa uniwersity w Złym Komorowje přeprosyli. Tam wuwiwachu inowatiwne kubłanske ideje za Łužicu.
Steinmeier termin wólbow wita
Berlin (dpa/SN). Zwjazkowy prezident Frank-Walter Steinmeier měni, zo je wot frakciskich nawodow CDU/CSU, SPD a Zelenych namjetowany termin dočasnych wólbow zwjazkoweho sejma móžny. „Po dźensnišim hódnoćenju je za njeho 23. februar 2025 jako termin nowowólbow realistiski“, zdźěli jeho rěčnica w Berlinje. Předsydźa frakcijow běchu termin wčera namjetowali. W Sakskej kritizuja, zo leži dźeń wosrjedź zymskich prózdnin a, zo budźe tójšto ludźi w dowolu.
Scholz rěči w sejmje
Berlin (dpa/SN). Tydźeń po zwrěšćenju amploweje koalicije chcyše zwjazkowy kancler Olaf Scholz (SPD) dźensa w zwjazkowym sejmje knježerstwowu deklaraciju wo aktualnym połoženju wotedać. Z tym je wólbny bój zahajeny. Reagować chcetaj na to nawoda opozicije Friedrich Merz (CDU) a předsyda CSU Markus Söder. Tón nima drje žadyn mandat zwjazkoweho sejma, wobdźěli so pak jako zastupnik Zwjazkoweje rady.
USA Israelej dale pomhaja
Z wojerskej ceremoniju su wčera w Hannoveru załoženje zwjazkoweje ...
SPD přiznawa mórkotanje
Trump překwapja z rozsudami
Zeleni hotuja so na wólbny bój
Berlin (dpa/SN). Zeleni su tež při dočasnych wólbach zwjazkoweho sejma dobreje nahlady. „Smy zwólniwi za bližacy so wólbny bój“, rjekny politiska jednaćelka strony Emily Büning w Berlinje. W běhu někotrych tydźenjow po wuzwolenju noweho předsydstwa na zwjazkowym zjězdźe přichodny kónc tydźenja w Berlinje, chce předsydstwo nowy naćisk programa za zwjazkowy sejm předpołožić. Tón budźe wo wjele krótši hač dotalny program. Na dalšim stronskim zjězdźe chcedźa jón schwalić. Program Zelenych za wólby 2021 měješe 270 stronow.
Wuzwolenje kanclerskeho kandidata planuja Zeleni přichodnu njedźelu. Nimo Roberta Habecka nimaja žanych wotpowědnych kandidatow. Hač Habecka hižo njedźelu za kanclerskeho kandidata wuzwola, nochcyše Büning přeradźić. Habeck bě so z widejom na wolerjow wobroćił a rjekł: „Sym zwólniwy, swoje nazhonjenje, swoju móc a swoju zamołwitosć poskićeć. Hdyž chceće, tež jako kancler.“
Zeleni hotuja so pječa hižo wot lěća na dočasne wólby do zwjazkoweho sejma. Tuchwilu docpěwaja dwanaće procentow.
