Demokratija na wuchodźe žiwa
Drježdźany (dpa/SN). Tysacy ludźi su Dźeń jednoty Němskeje w sakskim sejmje swjećili. Prezident parlamenta Alexander Dierks (CDU) wupraji so w swojej narěči na oficialnym swjatočnym zarjadowanju za demokratiju. „Sym přeswědčeny, zo demokratija diskusije trjeba“, wón zwurazni. „Demokratija je to najdrohotniše, štož wobsedźimy.“ Zhromadny nadawk tuž je, „w dobrych debatach tež ze zwadami pokazać, zo smy kmani, na tutym fundamenće centralne prašenja ludźi w našim kraju rozrisać“. Dale skedźbni Dierks na zmužitych wobydlerjow, kotřiž běchu nazymu 1989 na dróhu šli a jednotu Němskeje zmóžnili.
Prezident Sakskeho wustawoweho sudnistwa Matthias Grünberg je hladajo na diskusije wo pozdatnych deficitach demokratije na wuchodźe Němskeje zadźiwany. Wólbne wobdźělenje je w potrjechenych krajach wysoke. „Z tym ludźo dopokazuja, zo je jim politika wažna.“
Ćěriwa su dźeń a tuńše
Mnichow (dpa/SN). Ćěriwa za jězdźidła su dźeń a tuńše. Bencin družiny Super E10 je mjeztym tak tuni, kaž w oktobrje lěta 2021, zdźěli wčera němski awtomobilny klub ADAC. Hladajo na přerězk po cyłej Němskej płaćeše zawčerawšim liter 1,631 eurow. To bě 1,2 centaj mjenje hač před dźewjeć dnjemi. Płaćizna za diesel je so tohorunja znižiła, tola nic tak sylnje kaž bencin. Tak bě tomu jenož 0,5 centow mjenje. Za liter diesela dyrbjachu kupcy w Němskej zawčerawšim 1,529 eurow zapłaćić.
Wobě płaćiznje za ćěriwo stej so minjene měsacy tendencielnje znižiłoj. Zańdźeny tydźeń bě to krótkodobnje hinak. Najwažniši signal za wuwiće je płaćizna za wolij.
Předsydaj zastojnstwo złožitaj
Drježdźany (dpa/SN). Předsydaj sakskeje Lěwicy Susanne Schaper a Stefan Hartmann swoje zastojnstwo złožitaj. „Hač do krajneho stronskeho zjězda w nowembrje chcetaj swoje dźěło hišće wukonjeć“, zdźěli jednaćel Lěwicy Lars Kleba. Do toho běchu wšelake medije wo tym rozprawjeli. Kaž strona wčera informowaše, zwisuje rozsud z přesłapjacym wólbnym wuslědkom. Lěwica w Sakskej je jenož 4,5 procentow hłosow wolerjow na zašłych wólbach krajneho sejma dóstała. Zapósłancy su Susann Schaper minjeny tydźeń za předsydku frakcije wuzwolili, Hartmanna za městopředsydu.
Wobaj běštaj zańdźenu wutoru stronjanow internje přez mejlku wo rozsudźe informowałoj a zmylki přiznałoj. „Fakt je, zo njemóžachmoj swojemu narokej wotpowědować a wólbne wuslědki našeje strony stabilizować. Nochcemoj na našimaj křesłomaj lěpić“, wonaj rozkładźeštaj. Dale wuzběhnyštaj, zo je tež nadawk předsydy, w ćežkich krizach nowy započatk zmóžnić. „Połoženje je chutne a dyrbimy nowy započatk zmištrować.“
Wjacore lěty šmórnyć dyrbjeli
Lipsk/Drježdźany (dpa/SN). Warnowanske stawki přistajenych posłužbowych wotnožkow Lufthansy su na lětanišćomaj w Lipsku/Halle a Drježdźanach zapozdźenja a wupady zawinili. W Lipsku dyrbjachu pjeć lětow šmórnyć, w Drježdźanach samo jědnaće.
Pozadk je cyły dźeń trajacy warnowanski stawk posłužboweho wobłuka, kotryž bě dźěłarnistwo ver.di organizowało. Nawoda tarifoweje skupiny ver.di Paul Schmidt bě z wobdźělenjom spokojom. Wón nochcyše wuzamknyć, zo k tajkim stawkam tež w času nazymskich prózdnin dóńdźe. Dźěłarnistwo wojuje wo jasnje lěpše zapłaćenje něhdźe 140 přistajenych. Po informacijach dźěłarnistwa zasłuža woni zdźěla tysac eurow mjenje hač kolegojo na zapadźe. Tarifowe jednanja z dźěłodawarjemi Lipšćanskeho a Drježdźanskeho lětanišća njejsu dotal žane dojednanje wunjesli.
Lufthansa je mjeztym připowědźiła, zo chcyła wobě předewzaći zawrěć. Nadawki kaž přihot lětadłow za wotlět chcedźa z eksternymi firmami zmištrować. Dźěłarnistwo wojuje w tym padźe tež wo socialne tarifowe rjadowanje.
Nowy pawiljon kwětkow w Rogeńcu
BSW sej jasnu poziciju žada
Podstupim (dpa/SN). Něhdźe połdra tydźenja po wólbach krajneho sejma w Braniborskej zetkatej so SPD a BSW k prěnjej rozmołwje. Ćežišćo zetkanja je, zo chcetej so wobě stronje najprjedy raz zeznać. Debatu wo konkretnych politiskich wobsahach fachowcy njewočakowachu, snano dojednaja so zastupjerjo stronow na dalše postupowanje. Městnosć a čas rozmołwy stej tajnej.
Po wólbach krajneho sejma 22. septembra matej jenož SPD a zwjazkarstwo Sahry Wagenknecht (BSW) wjetšinu w parlamenće, dokelž nochce žana druha frakcija z AfD koaliciju wutworić. AfD dźě je druha najwjetša frakcija braniborskeho krajneho sejma.
Zwjazkowa předsydka BSW Sahra Wagenknecht ma hladajo na rozmołwy ze stronami w Sakskej, Durinskej a Braniborskej wo móžnym wutworjenju knježerstwa jasne žadanja. Knježerstwo, na kotrychž so BSW wobdźěli, dyrbjało hladajo na wójny, měr a diplomatiju kaž tež k zaměstnjenju raketow z USA w Němskej jasnu poziciju zabrać, wona we widejowym podcasće „Focus Online“ wuzběhny.
To a tamne (04.10.24)
Z kapsnym nožom, z kotrymž sej hewak jabłuko přihotuje, je chirurg w jendźelskim Brightonje operował. Lěkar bě hrudźno pacientki z nožom wočinił, sćelak BBC tele dny rozprawješe. Chorownja zwurazni, zo bě to nuzowy pad, dokelž njeje chirurg w chwatku sterilny skalpel namakał. Dale zamołwići měnja, zo njeje tajke jednanje lěkarja z wašnjom. Pacientka pak je operaciju derje přetrała. Policija pad pak přiwšěm přepytuje, dokelž je tam prawdźepodobnje wjele njedostatkow w zwisku z lěkowanjom.
Dokelž bě šofer busa jězdźidło strašnje wodźił a samo do wodźaceje planki jěł, su sobujěducy ze strachom nuzowe čisło narunanskeho busoweho wobchada zazwonili. Přichwatani policisća su šofera potom w Dessau kontrolowali. Kaž so wukopa, měješe 43lětny 1,6 promilow alkohola w kreji.
Bamž prosy wo wodaće
Rom (dpa/SN). Bamž Franciskus je na pokutnej swjatočnosći za hrěchi a přeńdźenja zastupnikow katolskeje cyrkwje wo wodaće prosył. Nawoda něhdźe 1,4 miliardow katolikow rjekny na pokutnej liturgiji w katedrali swj. Pětra w Romje, zo měła cyrkej za swoje přeńdźenja pokućić, chcyła-li sej mjez wěriwymi zaso dowěru zdobyć. W srjedźišću steješe při tym wobchadźenje ze splažnym znjewužiwanjom. Trěbne je, tak bamž, hrěchi cyrkwje a jich zastupnikow jasnje pomjenować.
Schneider wabi za wuchod
Berlin (dpa/SN). Społnomócnjeny zwjazkoweho knježerstwa za naležnosće wuchodneje Němskeje Carsten Schneider, je sej wěsty, zo maja młodostni na wuchodźe Němskeje dobre perspektiwy w swojej domiznje. Wón młodym ludźom radźi, „šansy před swójskimi durjemi wužiwać“. Mjeztym je tež na wuchodźe derje płaćenych městnow. Nichtó njetrjeba wjace do zapada hić.“ Wón reagowaše na nowe ličby statistikarjow, po kotrychž dale wjele młodostnych do zapada woteńdźe.
Klimowa debata rozdźělna
