Washington (dpa/SN). Hladajo na katastrofalne humanitarne połoženje w Gazaskim pasmje zwyša knježerstwo USA ćišć na swojeho zwjazkarja Israel: Njedyrbjała-li so situacija za ludźi w dospołnje zawrjenym pobrjóžnym pasmje w běhu 30 dnjow widźomnje polěpšić, hrozy ranjenje zakonja USA nastupajo wojersku pomoc. Tak rěkaše we Washingtonje. Tole móhło wojersku podpěru USA na dobro Israela chutnje wohrozyć. Najnowše wobrazy po nadpadźe israelskeho wójska na chorownju w Gazaskim pasmje su „grawoćiwe“, praji rěčnik Narodneje wěstotneje rady w Běłym domje John Kirby.

Wonkowne ministerstwo USA je w tym zwisku tež rozprawy medijow wo lisće wobkrućiło, kotryž staj wonkowny minister Antony Blinken a zakitowanski minister Lloyd Austin spisałoj. W nim zwuraznitaj wonaj swoje „hłuboke starosće“ wo humanitarnym połoženju a žadataj sej „chutne a trajace naprawy“ ze stron israelskeho knježerstwa.

Kijew (dpa/SN). Na wuchodźe Ukrainy ruske wojerske jednotki swoje nadběhi na wjes Kurachiwka dale zesylnja. Ukrainski generalny stab w Kijewje zdźěla, zo su Rusojo jeničce wčera 40 króć wjes nadběhowali. Ukrainscy wojacy su wšitke pospyty wotwobarali. Samsny čas ukrainscy wojerscy blogarjo w interneće rozprawjeja, zo su ruske jednotki wjes Ostriwske južnje Kurachiwki zdobyli a zo hrozy ukrainskim jednotkam nětko wobkruženje. Oficialne wobkrućenje tuteje informacije njepředleži. Wčera je Ruska pječa zaso masiwnje truty zasadźiła. Wulki dźěl móžeše Ukraina wottřělić.

Po tydźenje trajacych diskusijach chcyše ukrainski prezident Wolodymyr Zelenskyj dźensa swój tak mjenowany plan dobyća w Kijewje zjawnje předstajić. Naposledk bě Zelenskyj swój plan na wopytach pola partnerow we Washingtonje, Londonje, Parisu, Romje a Berlinje prezentował. Jutře chcedźa jón tež w Brüsselu předpołožić.

Marek Krawc rozprawja wo aktualnje rozjimanych temach w Čěskej

Praha. Póndźelu rano přepytowachu zastojnicy Policajskeje centrale za zakročenje přećiwo organizowanej kriminality (NCOZ) twarjenja a běrowy Praskich wobchadnych zawodow. Pozdźišo zdźěli najwyše statne rěčnistwo, zo přepruwuje policija 13 wosobow wobtykowanja a wobšudźerstwa dla. Nowinarjo informowachu, zo zwěsćuja zastojnicy wobstejnosće w zwisku ze skazanku wěstotneho systema za Praske metro. System běchu drje hižo před 15 lětami skazali, policija pak so za wobstejnosće zajimuje. Generalny direktor Petr Witowski, personalny šef Jiří Špička kaž tež čłon předsydstwa Marek Kopřiva dyrbjachu z poli­cistami posedźenje předsydstwa Praskich wobchadnych zawodow dočasnje wopušćić. Wobchadny měšćanosta Zdeněk Hřib žada sej nětko, zo by Petr Witkowski­ swoju funkciju złožił. Njebudźe-li zwólniwy wupowědźić, chce jeho Hřib wotsadźić.

Wodźe dyrbimy wjetši wuznam přiznać – tež hladajo na móžne podkopki za wudobywanje kopora. Njetrjeba nam pak być zatrach, a tež panika njesměła so rozšěrjeć. Přiwisnicy a přećiwnicy planowanych podkopkow su w Grodku měrnje pódla so sedźeli. Nimale třihodźinske zjawne zarjadowanje je so jara wěcownje wotměło. Njezrozumliwe je, zo njeje so žadyn zastupjer města najebać přeprošenja měšćanostce na diskusiji wobdźělił. Měšćanski zarjad njech je tež potom zwólniwy rozmołwy wjesć, hdyž sam přeprosył njeje. Na tutym wěcownym zarjadowanju bychu wo wjele wěckach rěčeć móhli. A wo rozmołwach njech tež hórnistwowe předewzaće KSL přemysluje. Grodkowscy maja zhromadnje dosć mocow, problem koporowych podkopkow w zmysle wšěch wobdźělenych a potrjechenych rozrisać. Zo by so to radźiło, maja pak wšitcy cyle sprawnje „kartki na blido połožić“. Hišće njeje přepozdźe. Z tym bychu tež spekulacijam zadźěwali. Jost Schmidtchen