Wien (dpa/SN). Prawicarska FPÖ je wólby parlamenta w Awstriskej ze 29,2 procentomaj hłosow dobyła. Tole zdźěla nutřkowne ministerstwo kraja jako dotalny kónčny wuslědk wólbow. Dotalna strona zwjazkoweho kanclera ÖVP dyrbi so ze 26,5 procentami z druhim městnom spokojić. Konserwatiwna ÖVP je jědnaće procentow přirunujo z wólbami lěta 2019 přisadźiła. Samsny čas je FPÖ wo 13 procentow rozrostła.

Třeća najsylniša strona w Narodnej ­radźe, wulkej komorje parlamenta, je přichodnje SPÖ ze 21,1 procentom (-0,1). ­Liberalna strona Neos dósta dźewjeć procentow (+0,9). Zeleni, kotřiž su dotal z konserwatiwnymi knježili, docpěchu tónkróć jenož wosom procentow (-5,9). Małe strony kaž Piwowa strona abo komunistiska KPÖ wostachu jasnje pod w Awstriskej płaćacej mjezu štyrjoch procentow a njejsu tak hižo w parlamenće zastupjene. Předsyda dobyćerskeje FPÖ Herbert Kickl je tamne strony do koalicije namołwjał. Zwjazkowy kancler Karl Nehammer (ÖVP) tole wotpokazuje.

Nominowanje kandidatow za nowu Radu za serbske naležnosće Sakskeje móhli ­jako dwójny signal wobhladować. Na jednym boku skutkuja w njej dale čłonojo, kotřiž su minjene lěta swoje nazhonjenja ze zamołwitymi krajneho knježerstwa w Drježdźanach zběrać móhli. Na druhim boku pak je z Janom Ryćerjom z Jaseńcy muž w gremiju zastupjeny, kiž nima žane politiske nazhonjenja – za to pak krutu wolu, na polu šulstwa něšto změnić. Wón je jako šuler wojowanje wo zachowanje Chróšćanskeje šule sobu dožiwił. Tehdyša poražka je jemu hłuboku ranu nabiła, kaž w Slepom rjekny. Dopóznaće, zo njeje so na polu serbskeho šulstwa poprawom ­wjele změniło, dokelž dyrbimy dale wo serbske rjadowanje wojować, jeho pohonjuje. A štó wě? Snano sedźa jemu w Drježdźanach přichodnje ze stron knježerstwa tohorunja nowe młode mjezwoča napřećo, kotrymž je dźěło w tajkim gremiju nowe. Signal ze Slepoho je pozbudźowacy: Młodźina doprědka! Marko Wjeńka

Zhorjelc (dpa/SN). Wot prawicarskich protestow přewodźene su sta ludźi mjeztym třeći Christopher Street Day (CSD) w Zhorjelcu swjećili. Pod hesłom „Samsne prawa za wšěch!“ ćehnjechu woni zawčerawšim po hraničnym měsće tež do Pólskeje. W socialnych syćach běchu němscy a pólscy prawicarjo namołwjeli, přećiwo přiwisnikam CSD protestować. Po informacijach policije wobdźěli so wjace hač 700 ludźi na zarjadowanju CSD, při napřećiwnym protesće bě jich něhdźe 460.

Němska kaž tež pólska policija běštej wjetše zasadźenje přihotowałoj. Po informacijach policije su zastojnicy direktnemu zetkanju wobeju zhromadźiznow zadźěwali. „Ćahaj smy w rozdźělnych časach dowolili, najprjedy přećah CSD a potom napřećiwny protest“, rěčnik policije wuswětli. Po informacijach policije je wšitko poměrnje měrnje wotběžało a njedóńdźe k wukročenjam abo namócnym rozestajenjam. Na spočatku napřećiwneje zhromadźizny pod hesłom „Domiznu a tradiciju wobchować“ někotři wobdźělnicy zakazane prawicarske parole pokazachu. Přećiwo potrjechenym je policija přepytowanje zahajiła.

Při pytanju hribow w lěsu pola Regensburga je 64lětneho muža dźiwje swinjo nadběhało. Kaž muž nowinje „Donaukurier“ rozprawja, měješe wón strach wo swoje žiwjenje a je 20 mjeńšinow ze skoćećom wojował, doniž njeje skónčnje ćeknyło. Muž a dźiwje swinjo staj so při tym zraniłoj. Jako nadpadnjeny k swojemu awtu chwataše, zetka dalšeho muža, kotrehož je skoćo tohorunja atakěrowało. Tón pak móžeše so z kijom wobarać. Wobaj mužej stej na to zhromadnje do chorownje jěłoj. Policija a lěsnicy za dźiwim swinjećom pytachu a je naposledk zatřělichu.

Turistaj z Vietnama staj tele dny spytałoj z sportowymi črijemi a ćeńkimaj cho­lowomaj na 4 478 metrow wulku horu Matterhorn zalězć, štož so wězo zymy, sněha a loda dla njeporadźi. Pomocnicy dyrbjachu jeju na 3 500 metrach wuchować.