New York (dpa/SN). Po zražce transportneho lětadła ruskeho wójska pod njejasnymi wobstejnosćemi stej sej Ruska a Ukraina w Bjezstrašnostnej radźe UNO mjez sobu wumjetowałoj. Jedna so wo „wotpohladne a derje přemyslene złóstnistwo“, rjekny wulkopósłanc Ruskeje pola UNO Dmitrij Poljanski na posedźenju gremije wčera w New Yorku.

Zastupowaca ukrainska wulkopósłanča pola UNO Chrystyna Hajowyšyn wumjetowanja wotpokaza: Ukraina njebě wo tym informowana, kak chce Ruska ukrainskich wójnskich jatych transportować, kotřiž běchu při njezbožu žiwjenje přisadźili, kaž Ruska twjerdźi.

Dotal nimaja wobkrućene informacije wo tym, što abo koho je Ruska w mašinje typa Iljušin IL-76 transportowała. Po ruskich informacijach bě w lětadle 65 ukrainskich wójnskich jatych, po puću k planowanej wuměnje jatych. Moskwa Kijewej wumjetuje, zo je lětadło ze zapadnej raketu wottřěliło.

Wjacore błyskače wotrězał je dotal njeznaty minjene dny na sewjeru Italskeje. Skućićel njeje znaty. Postupowanje na to pokazuje, zo jedna so wo jednotliwca, kiž z elektriskej piłu sćežory awtomatiskich nastrojow podrěza a powali. W socialnych medijach chwala skućićela jako rjeka a noweho Robina Hooda. Nětko diskutuja wo radarowych paslach na dróhach Italskeje. Kraj ma najwjace błyskačow po wšej EU: 11 000. Němska porno tomu něhdźe 5 000.

Hoberske mnóstwo metamfetamina z Němskeje su awstralscy cłownicy našli. 157 kilogramow syntetiskeje drogi běchu hižo kónc decembra na lětanišću w Sydneyju sćazali. Metamfetamin bě w 211 pakćikach pod zapakowanskim materialom schowany. Policija wumjetuje mjezynarodnym kartelam, zo chcedźa Awstralsku z drogami zapławić.

Berlin (dpa/SN). Předsyda CDU Friedrich Merz njewidźi žane ekstremistiske tendency w stronje. Njeje žanych „prawicarsko-ekstremistiskich prócowanjow“. Mjez nimale 400 000 čłonami CDU su snano někotři, kotřiž su něhdy „wopak wotbočili“, rjekny Merz na wotpowědne prašenje nowinarjow. Za 99 procentow čłonow pak Merz garantuje, zo su „přistojni křesćanscy demokraća“. Na njedawnych demonstracijach běchu tež CDU prawicarske tendency wumjetowali. Němska planuje zakitowanje

Berlin (dpa/SN). Zwjazkowa wobora chce so z lěpšim splećenjom wěstotnych zarjadnišćow, organizacijow za škit před katastrofami a industrijnymi předewzaćemi na cyłostatne zakitowanje Němskeje přihotować. Za to zdźěłuja tuchwilu nowy operaciski plan Němskeje. W nim je zakótwjene, kak maja so ludźo w padźe napjatosćow a zakitowanja kraja zadźeržeć. Wo dospołnje tajnym a sta stron wopřijacym dokumenće chcedźa přichodny tydźeń na sympoziju wuradźować.

Njeplanowana přestawka