Rekordny staw inflacije
Luxemburg (dpa/SN). Inflacija w europasmje je kónc decembra dalši rekord docpěła. Płaćizny za přetrjebarjow běchu w decembru wo pjeć procentow wyše hač lěto do toho, kaž statistiski zarjad Eurostat w Luxemburgu informuje. Je to najwyša inflaciska kwota po zawjedźenju eura w lěće 2002. W nowembru wučinješe wona 4,9 procentow.
Rozrost płaćiznow w decembru bě šesty za sobu. Hłownje wina na stupacych płaćiznach w krajach ze zhromadnej měnu běchu spochi přiběrace kóšty za energiju. Te běchu w decembru 26 procentow wyše hač lěto do toho. Zežiwidła podróšichu so wo 3,2 procentaj, posłužby wo 2,9 procentow.
Najsylniša bě inflacija kónc lěta 2021 w baltiskich krajach. W Estiskej bě rozrost płaćiznow z dwanaće procentami najwjetši. Slědujetej Litawska z 10,7 a Letiska ze 7,7 procentami. Najniše bě podróšenje na kupje Malta z 2,6 procentami. Němska zaběra w europskim přirunanju z 5,7 procentami srjedźne městno wšěch krajow z eurom. Srjedźodobny zaměr Europskeje centralneje banki (EZB) dweju procentow su we wšěch krajach europasma překročili. EZB z tym liči, zo płaćizny w běhu lěta zaso woteběraja.
Lauterbach: Dalše naprawy trěbne
Berlin (dpa/SN). Zwjazkowy minister za strowotnistwo Karl Lauterbach wočakuje, zo su w boju přećiwo warianće koronawirusa omikron dalše naprawy trěbne. Wot Zwjazka a zwjazkowych krajow dojednane prawidło „2G-plus“ w gastronomiji a nowe prawidła karanteny mjenowaše politikar SPD wčera wječor w telewiziji ARD wuspěch. „Sym sej wěsty, zo nam to pomha.“ Zdobom wón doda, zo drje naprawy njedosahaja, omikron přewinyć. „Ličby dale přiběraja. Tuž budu dalše naprawy trěbne, jeli tak daloko budźe. Tuchwilne naprawy su najprjedy raz wažna kročel doprědka.“
Zwjazk a kraje běchu so minjeny pjatk dojednali, prawidło „2G-plus“ w hosćencach, kofejownjach a korčmach nałožować. Po tym maja tam jenož hišće šćěpjeni a wustrowjeni z přidatnym negatiwnym koronatestom kaž tež ludźo z třećim šćěpjenjom přistup.
Politikar Zelenych Janosch Dahmen w telewiziji ZDF njewuzamkny, zo prawidło „2G-plus“ tež w dalšich wobłukach towaršnostneho žiwjenja nałožuja.
Zazběh wažnych jednanjow
Zastupnicy USA a Ruskeje jednaja a wuradźuja
Genf (dpa/SN). Zastupnicy USA a Ruskeje schadźuja so dźensa w šwicarskim Genfje. W srjedźišću rozmołwow steja koncentracija ruskich wojerskich jednotkow na mjezy k Ukrainje a žadanja Moskwy za wěstotnymi garantijemi ze stron NATO. Wobě stronje warnowaštej hižo zwoprědka před přewulkimi wočakowanjemi. Genfske zetkanje je zazběh cyłeho rjadu wažnych jednanjow w tymle tydźenju.
Wonkowny minister USA Antony Blinken rjekny wčera, zo je ćežko „w atmosferje eskalacije z brónju při hłowje Ukrainy“ wuspěchi docpěć. Zdobom wón potwjerdźi, zo njebudu USA wo cofnjenju swojich jednotkow z wuchodneje Europy jednać. Nimo toho nochcedźa Ruskej přilubić, zo so NATO dale na wuchod njerozšěri. Zastupnik knježerstwa USA rjekny, zo nima Moskwa wo tym rozsudźić, z kim druhe kraje zwjazki tworja.
Prěnje dwurěčne kemše w Žylowje
Prawosławni hody swjećili
Moskwa (dpa/SN). Miliony prawosławnych wěriwych w Ruskej, Georgiskej a Ukrainje su minjeny pjatk hody swjećili. Rusko-prawosławny patriarch Kiril rjekny na Božej słužbje w Moskowskej katedrali Chrysta-Wumóžnika hladajo na njeměry w susodnym Kazachstanje, zo njemóža krejpřeliwanje a zražki „nikomu wšojedne być“. Wón so za to modli, zo by do něhdyšeje sowjetskeje republiki zaso měr zaćahnył. W Kazachstanje bě minjene dny ke krawnym namócnosćam z dźesatkami mortwych dóšło.
Ruski prezident Wladimir Putin je Božu słužbu w Nowo-Ogarjowom njedaloko Moskwy wopytał. Tam wuzběhny wón wažnu rólu cyrkwje w towaršnosći, kaž z Krjemla rěka. Cyrkej pěstuje historiske a kulturne herbstwo Ruskeje a sylni „instituciju swójby“, Putin rjekny.
Mnozy ortodoksni křesćenjo swjeća hody 7. januara. Dokelž maja so cyrkwje po julianskim kalendru, wopominaja woni narod Chrysta 13 dnjow pozdźišo hač katolikojo a protestanća, kotřiž maja so po gregorianskim kalendru. Prawosławnej cyrkwi přisłuša po cyłym swěće něhdźe 300 milionow ludźi.
To a tamne (10.01.22)
Při tankowni w swojim awće wusnył je sej muž w badensko-württembergskim Heidenheimje. Sobudźěłaćerjej bě wóz 21lětneho napadnył, dokelž tam dlěši čas steješe. Wón wuhlada muža spjaceho na zadnjej ławce awta. Na widejowym nahrawanju bě widźeć, kak muž po tankowanju zady do awta zalěze. Zastojnicy zwěsćichu při jězdźidle čerstwe slědy njezboža. Hač steješe muž pod wliwom alkohola abo drogow, njeje znate.
Ze swojim awtom runjewon wotlećał je 58lětny šofer we Warnemündźe nad Baltiskim morjom. Prawdźepodobnje měješe wón strowotniske problemy. Muž bě wčera z wulkej spěšnosću w křiwicy z dróhi zjěł. Při tym prasny do stejaka kolesow. Awto wotzběhny, přeleća murju mórskeje promenady a je skónčnje w pěskowym nasypje tčacy wostało. Muža dowjezechu do chorownje.
Wojacy kontroluja lětanišćo
Almaty (dpa/SN). W kazachskim měsće Almatach, hdźež běchu wosebje ćežke namócnosće we wobłuku protestow, su ruscy wojacy po informacijach z Moskwy lětanišćo pod kontrolu přinjesli. Bjezposrědnje po přizemjenju započachu woni „swoje nadawki spjelnjeć“, rěčnik zakitowanskeho ministerstwa zdźěli. Prezident Kasym-Žomart Tokajew bě masowych protestow dla susodne kraje pod nawodom Ruskeje wo wojersku pomoc prosył.
Poněčimny kónc pandemije
Berlin (dpa/SN). Bonnski wědomostnik Hendrik Streeck wěšći „poněčimny kónc koronapandemije. Njezmějemy pak tón dźeń wuswobodźenja wot wirusa.“ Streeck wěšćeše wčera w sćelaku ZDF, zo ličby infekcijow nalěto zaso woteběraja. Potom měli składnosć wužić a strowotniski system skrućić. Runočasnje měli dale šćěpić. Snano změjemy potom tež skutkowniši serum, wón rjekny. Nětčiše šćěpiwa jenož krótki čas škitaja. Debata wo winowatostnym šćěpjenju je tuž w jeho wočach njetrjebawša.
Macron von der Leyen witał
Přiwisnicy serbiskeho tenisoweho hrajerja Novaka Đokovića su so w ...
Za rozumne postupowanje
Berlin (dpa/SN). Do dźensnišich wuradźowanjow Zwjazka a zwjazkowych krajow wo raznišich naprawach přećiwo koronawirusej su sej zastupnicy hospodarstwa rozumne postupowanje politiki žadali. Rozsudne je, zo su naprawy poměrne a zo njejsu na njedobro hospodarstwa“, rjekny hłowny jednaćel Industrijneje a wikowanskeje komory Jan Eder powěsćerni dpa. „Při dalšich wobmjezowanjach hospodarstwa měli so Zwjazk a kraje wo wurunanje starać. K tomu słuša, zo móža sej předewzaća zarunanje za přidatne kontrole po prawidłach 2G žadać.“
W běhu dnja chcychu ministerscy prezidenća zwjazkowych krajow z kanclerom Olafom Scholzom (SPD) wo dalšich naprawach přećiwo wirusowej warianće omikron wuradźować. K debaće stejachu dalše wobmjezowanja kontaktow a skrótšene časy karanteny.
