Berlin a Paris chcetej pomhać
Wjerškowe zetkanje EU z wuchodnymi krajemi – konflikt na Ukrainje
Brüssel (dpa/SN). Němska a Francoska chcetej napjatosće na rusko-ukrainskej mjezy nastupajo zaso sylnišo mjez Moskwu a Kijewom posrědkować. Hižo wčera běštaj so zwjazkowy kancler Olaf Scholz (SPD) a francoski statny prezident Emmanuel Macron z ukrainskim prezidentom Wolodimirom Zelenskim w Brüsselu zetkałoj. Wšitcy třo potwjerdźichu, zo chcedźa tak mjenowany Normandijowy format wožiwić, po kotrymž Němska a Francoska wot lěta 2014 mjez Ukrainu a Ruskej posrědkujetej. Ruska bě sej w tym lěće po namócnym powalenju ukrainskeho knježerstwa w Kijewje połkupu Krim přiswojiła. A započa separatistow podpěrać, kotřiž wuchodnu Ukrainu wojersce kontroluja, dokelž nochcedźa so na zapad wusměrjenemu kursej Kijewskeho knježerstwa přizamknyć.
Štó što přihotuje?
To a tamne (16.12.21)
Zahrodnika za park hrodu Windsor pola Londona pyta britiska kralowna Elizabeth II., kaž z wotpowědneho nawěška kralowskeje swójby wuchadźa. Dźe wo to, so wo zahrodu starać „kotruž tysacy wobdźiwuja“, we wupisanju rěka. Nimo toho měł zajimc „zahorjeny za hladanje trawnika“ być. Poskićena mzda pak je wšo druhe hač kralowska: Queen chce jemu runje 22 800 eurow brutto wob lěto dać, ani 2 000 wob měsac, a to w Londonje, hdźež su žiwjenske kóšty wosebje wysoke.
Crystal meth w barbjenčkowych tyzkach abo ecstasy w hodownych kulach: Fantazija pašowarjow drogow na lětanišću Köln/Bonn tež lětsa žane hranicy njeznaje. Najebać to su cłownicy jenož w nowembrje 600 kilogramow drogow sćazali. Dale namakachu dekoraciju z kokaina a marihuanu w meblowych platach.
Ćěkancow z bahna wuchowali
Waršawa (dpa/SN). Na wjace hodźiny trajacej wuchowanskej akciji su pólscy namjezni policisća a wohnjowi wobornicy štyrjoch ćěkancow wuchowali, kotřiž běchu so za běłoruskej mjezu w bahnje zabłudźili. Z pomocu truta bě so poradźiło ludźi w ćežko přistupnej kónčinje namakać. Wobrazy pokazuja dospołnje přemokaneho muža, kotrehož pomocnicy z bahna njesu. Migranća běchu z mobilnym telefonom njedaloko wsy Siemianówka wo pomoc wołali.
Putin žadanja potwjerdźił
Moskwa/Paris (dpa/SN). Ruski statny prezident Wladimir Putin je w telefonaće z francoskim prezidentom Emmanuelom Macronom swoje žadanja potwjerdźił, zo měła NATO přestać so dale na wuchod rozšěrjeć. Moskwa trjeba za to prawnisce zawjazowace garantije, kotrež nimo toho zaručeja, zo NATO žane strašne brónje na mjezy k Ruskej njenastaja, z Krjemla rěka. Hladajo na napjatosće wokoło Ukrainy bě Putin hižo póndźelu z britiskim premierministrom Borisom Johnsonom telefonował.
Ćišć na Johnsona přiběra
W Drježdźanskim Rudolfa Harbigowym stadionje, domjacym kopanišću ...
Přepytuja hroženjow dla
Scholz: Energija njesmě luksus być
Lauterbach: Přemało šćěpiwa
Berlin/Mühlheim (dpa/SN). Inwentura w składach šćěpiwa přećiwo koronawirusej je po słowach zwjazkoweho ministra za strowotnistwo Karla Lauterbacha (SPD) wunjesła, zo njezměje Němska w prěnim kwartalu 2022 dosć seruma k dispoziciji. To je mnohich překwapiło. „Tež mje“ rjekny Lauterbach wčera wječor w telewiziji ARD. Wón na tym dźěła njedostatk wotstronić. Prócowanja běža „přez wšě kanale“, tež direktnje k předewzaćam, zo móhli spěšnje wjace seruma wobstarać.
Předsyda zwjazka kasowych lěkarjow Andreas Gassen rěčeše wo fatalnym signalu za wšěch, kotřiž z wotmachom přećiwo pandemiji wojuja. „Smy w Němskej mjeztym rekordnu spěšnosć při šćěpjenju w praksach docpěli, a nětko tale powěsć“, rjekny Gassen nowinarjam. „Njemóžeš nikomu rozkłasć, zo njeje w kraju, w kotrymž bu serum wuwity, dosć šćěpiwa pře koronu.“
Zwjazkowe knježerstwo ma šćěpjensku kampanju za centralny element boja přećiwo koronawirusej.
Nadźijeja so nowych srědkow
Waršawa (dpa/SN). Nowe zwjazkowe knježerstwo chce w zwadźe wo prawostatnosć w Pólskej a Madźarskej ćišć z pomocu pjenježnych sankcijow wukonjeć. Pola móžnych instrumentow póńdźe tež wo prašenja etata a wo pomocne srědki k přewinjenju sćěhow koronapandemije, rjekny statna ministerka za europske naležnosće Anna Lührmann (Zeleni) wčera na kromje wuradźowanjow EU w Brüsselu. Zo bychu kročele k wuspěcham wjedli, měli nětko hladać, kak móhła Europska unija tele instrumenty dale wuwiwać. Zdobom je wažne z Pólskej a Madźarskej dale w dialogu wostać.
Nowe, ale dotal njewužiwane jednanje za škit prawostatnosće w EU předwidźi, zo čłonskim krajam srědki ze zhromadneho etata skrótša, hrozy-li strach, zo pjenjezy ranjenja prawostatnosće dla znjewužiwaja. Kritikarjo pólskemu a madźarskemu knježerstwu wumjetuja, zo swoju justicu přećiwo směrnicam Europskeje unije wobwliwujetej. Wobaj krajej wumjetowanja wotpokazujetej a mjeztym na Europskim sudnistwje přećiwo planam EU skoržitej, dokelž wone pječa europske prawo ranja.
