Wočakuja mjenje bjezdźěłnych
Kamjenica (dpa/SN). Sakska dźěłowa agentura liči klětu z mjenje bjezdźěłnymi a měni, zo móža samo niwow do krizy docpěć, zdźěli dźensa šef regionalneje direkcije Zwjazkoweje agentury za dźěło Klaus-Peter Hansen. Zo móhli wuskutki pandemije pomjeńšić je pak wažne, zo so wjace ludźi šćěpja. W minjenym lěće je so ličba bjezdźěłnych ze 139 000 wosobow w januarje na 108 900 w nowembrje znižiła. Aktualne ličby za december agentura spočatk januara wozjewi.
Wjacori mortwi a zranjeni
Denver (dpa/SN). Dotal njeznata wosoba je wčera w měsće Denver znajmjeńša štyri wosoby zatřěliła. Kaž rěčnik policije zwjazkoweho stata Colorado w USA zdźěli, bu podhladny pozdźišo zatřěleny. Hač je kulka zastojnika skućićela trjechiła, je dotal njejasne. Muž bě na wjacorych městnosćach w Denveru a Lakewoodźe ludźi nadpadnył. Při tym je tež wjacore wosoby mjez druhim zastojnika zranił. Motiw je hišće njeznaty.
Płaćizny wostanu wysoke
Před Braniborskimi wrotami w Podstupimje zeńdźechu so wčera ...
Naprawy dale přiwótřa
Drježdźany/Lipsk (dpa/SN). Hladajo na nachilace so lěto 2021 a silwester płaća w Sakskej wot dźensnišeho přiwótřene naprawy za priwatne zeńdźenja. Dotal běchu zetkanja za hač do 20 šćěpjenych a wustrowjenych dowolene, nětko pak je to jenož hišće za maksimalnje dźesaćoch móžno. Dźěći a młodostni pod 16 lětami so sobu njeliča. Ručež pak su nješćěpjeni přitomni, su jenož hišće zeńdźenja mjez jednej domjacnosću a jednej dalšej wosobu dowolene. Dale maja so w zarjadnišćach, zawodach, wobchodach a zarjadach FFP2-nahubniki wužiwać.
Na zjawnych městnach su silwesterske a nowolětne swjedźenje zakazane. Tež praskotaki njesmědźa so lětsa zapalić. Lěkarjo Lipšćanskeho uniwersitneho klinikuma naprawu jara witaja. Minjene lěto mějachu wo wjele mjenje pacientow, kotrychž dyrbjachu w zwisku z wopačnym wužiwanjom praskotakow lěkować.
Sejm ma zamołwitosć
Lěto 2021 najdróše za zawěsćernje
Berlin (dpa/SN). Katastrofy zapławjenja, wichory a njewjedra: Hišće nihdy njetrjebachu zawěsćernje w Němskej tak wulke škody narunać kaž lětsa. „Ze zawěsćenymi škodami na domach, domjacej potrjebje, zawodach a jězdźidłach něhdźe 12,5 miliardow eurow je lěto 2021 najdróše lěto přirodnych wohroženjow wot spočatka statistiki w 1970tych lětach“, rjekny hłowny jednaćel zwjazka němskich zawěsćernjow Jörg Asmussen wčera w Berlinje. Najwjetši dźěl škodow, 8,2 miliardźe, su zahubne zapławjenja w juliju w Porynsko-Pfalcy a Sewjerorynsko-Westfalskej načinili. 7,7 miliardow z toho dyrbjachu za wobškodźene domy, domjacu potrjebu a zawody wudać, 450 milionow za wobškodźene jězdźidła. Ćežke njewjedra z krupami běchu w juniju wulke škody na jězdźidłach zawostajili.
Lěto 2021 njeje jenož w Němskej, ale tež po wšěm swěće najdróše lěto za zawěsćernje. Srjedź decembra bě zawěsćernja Swiss Re wot přirodnych katastrofow zawinowane škody na 93 miliardow eurow trochowała.
Ludźi k šćěpjenju pohnuwać
Braniborska chce ludźi wo lěpšinach wosobinskeho škita přeswědčić
Podstupim (dpa/SN). Nutřkowny minister Braniborskeje Michael Stübgen (CDU) je so přećiwo winowatostnemu šćěpjenju korony dla wuprajił a so nadźija, zo da so hišće wjele ludźi dobrowólnje šćěpić. „Mam debatu wo winowatostnym šćěpjenju za lochkomyslnu, dokelž wotpohladane wuslědki njewunjese a dokelž njemóže tole tuchwilu naša tema być“, rjekny minister Podstupimskim nowinarjam. „Dyrbimy so wo to postarać, zo je dosć šćěpiwa k dispoziciji a kak móžemy ludźi k šćěpjenju pohnuwać.“
Stübgen so nimo toho boji, zo winowatostne šćěpjenje towaršnostnu debatu dale přiwótři – do wopačneho směra. „Njejsym swoju nadźiju hišće spušćił, zo móžemy wulki dźěl ludźi tola hišće wo trěbnosći šćěpjenja přeswědčić“, wón rjekny. Přirunujo z lěćom je mjeztym podźěl ludźi zaso přiběrał, kotřiž chcedźa so dobrowólnje prěni króć šćěpić dać. „Tych bě minjene tydźenje něhdźe 80 000, dwójce telko, kaž tuchwilu prawidłownje demonstrować chodźi.“
To a tamne (28.12.21)
Porik w karantenje wobroći so patoržicu wulkeje nuzy dla na swěrneho pomocnika – policiju. Zežiwidłowe rezerwy chilachu so mjenujcy ke kóncej a nichtó ze znatych njemóžeše jimaj pomhać. Tuž zawoła porik z badensko-württembergskeho Maulburga policiju. Zastojnicy tuž přeća mandźelskeju přiwzachu, wšitko wobstarachu a jimaj dowjezechu.
Dźěłowy poskitk je drje chětro rjany, ale móhł tež ze samotu zwjazany być. Gmejna na sewjerozapadźe Jendźelskeje pyta za pub na 20 hektarow wulkej kupje Piel Island wobhospodarjerja. Nimo stareje ruiny hroda a někotrych chěžow rybarjow je tam tež pub z mjenom Ship Inn. Kaž wjacore medije rozprawjeja je gmejnska rada wupisanje za baru dobyła a pyta nětko korčmarja. Dotalni wotnajerjo su so nadawka wzdali, dokelž dyrbješe pub w běhu pandemije swoje durje zawrěć.
Nowa generalna sekretarka
Fulda (B/SN). Němski ewangelski cyrkwinski dźeń (DEKT) je 45lětnu durinsku superintendentku Kristin Jahn za nowu generalnu sekretarku wuzwolił. Wona nastupi zastojnstwo klětu w februaru a naslěduje Juliju Helmke, kotraž je so 1. oktobra do słužby Ewangelsko-lutherskeje krajneje cyrkwje Hannovera wróćiła. „Kristin Jahn rozumi z rěčnje sylnymi poselstwami a z hłubokim zmysłom wutroby ludźi wotewrěć a změny nastorčić. Wona přeswědča ze swojim jasnym wustupowanjom a zasadźenjom za demokratiju“, wuzběhny prezident DEKT Thomas de Maizière.
Krejny dźiw dožiwili
Scholz: Njesebičny wojowar
Berlin (dpa/SN). Zemrěty južnoafriski duchowny Desmond Tutu je po słowach zwjazkoweho kanclera Olafa Scholza (SPD) čas žiwjenja njesebičnje za wurunanje a wujednanje wojował. Lawreat Měroweho Nobeloweho myta je rozsudnje k skónčenju apartheidy w Južnej Africe přinošował, rjekny Scholz w Berlinje. Tutu je so stajnje za čłowjeskosć, swobodu a runoprawosć zasadźował. Wón je wčera rano 90lětny zemrěł.
Namócnosće při demonstraciji
Schweinfurt (dpa/SN). Při namócnych protestach přećiwo naprawam w zwisku z koronawirusom je policija wčera w Schweinfurće wjacorych ludźi zajała. Při rozestajenjach je so tež štyrilětne dźěćo zraniło. Policija je wosom demonstrantow zajała a jednanja přećiwo 44 wosobam zahajiła. Wobdźělnicy běchu wjacore kolony zestajeli, kotřež spytachu, zawěry policije přewinyć. Při tym zastojnikow z pjasćemi nadběhowachu a do nich kopachu. Policija zasadźi sylzopłun a retle.
Třo mortwi pola Hamburga
Nětko nowe naprawy přećiwo omikronej
Berlin (dpa/SN). Po wšej Němskej płaća wot jutřišeho razniše naprawy k wobmjezowanju nowych infekcijow z koronawirusom, wosebje hladajo na rozšěrjacu so wariantu omikron. Zwjazkowy kancler Olaf Scholz (SPD) bě so minjenu wutoru z ministerskimi prezidentami zwjazkowych krajow na nje dojednał.
Priwatne zetkanja nješćěpjenych su nutřka a wonka na přisłušnikow jedneje domjacnosće a z najwjace dwěmaj dalšimaj wosobomaj wobmjezowane. Za šćěpjenych a wustrowjenych płaći, zo smě so najwjace dźesać wosobow zetkać, dźěći k tomu njesłušeja.
Nješćěpjeni smědźa dale jeno z wšědnje aktualizowanym spěšnotestom na dźěło chodźić kaž tež srědki blisko- a dalokowobchada wužiwać.
Hladajo na kedźbliwosć Zwjazk a kraje wšitkich wobydlerjow namołwjeja so dobrowólnje kontaktow wzdać, naprawy hygieny a wěstotny wotstawk dodźeržeć a so radšo testować dać.
Silwesterske a nowolětne zarjadowanja su zakazane. Na zjawnych městnach njesmědźa ludźo žane silwesterske praskotaki wužiwać. Předań praskotakow je zakazana.
