NAWAL hnydom prěni dźeń po tym zo směš sej za swoje awto registracisku tafličku po přeću zhotowić dać, bě na přisłušne zarjady po cyłej Čěskej hišće wjetši hač wočakowane. W Teplicach na přikład je hodźinu do wotewrjenja hižo dlěši rynk zajimcow zymu mrějo před durjemi registrowarnje stał. Dźesać mjeńšin po zastupjenju su prěni pjećo swoje nowe znamjo zregistrowane měli. Na jich wozydłach budźe na tafličkomaj prědku a zady mjez druhim stać MARTIN01 resp. TOMAS007. Po nowinje Mladá fronta dnes je sej w Ústíju nad Labem něchtó samo kuzłarske čisło 1IIIIIII registrować dał. Dowolene je tohorunja mjeno firmy (za reklamu), taflička pak dyrbi wosom znamjenjow měć, mjez nimi znajmjeńša jednu cyfru. Za motorske je maksimalnje sydom znamjenjow trěbnych, za mopedy pjeć. Za kóždu wosebitu registracisku tafličku dyrbi měnjer 5 000 krónow (něhdźe 185 eurow) nałožić, a dokelž stej za awto dwě trěbnej, tuž 10 000 krónow (370 eurow) woprować. W Ústíju młody muž registrowarjam wupowěda, zo je pjenjezy za to wot swojeho dźěda jako hodowny dar dóstał.
Po tym zo bě nacionalno-konserwatiwna strona Prawo a Sprawnosć (PiS) Jarosława Kaczyńskeho njedawno absolutnu wjetšinu w sejmje zdobyła, přewza wona knježerstwo Pólskeje.
Waršawa (dpa/K/SN). Spočatk je činiła dwělomna reforma wustawoweho sudnistwa z přitřihanjom kompetencow; kónc tydźenja slědowaše kontrowersny medijowy zakoń, zmóžnjacy knježerstwu, w zjawnoprawniskej telewiziji a rozhłosu wobsadźić nawodne městna ze swojimi ludźimi, rozprawja powěsćernja dpa.
Peter Čačko z Bratislavy rozprawja za Serbske Nowiny:
Tójšto mojich krajanow drje po zwěsćenju agentury Polis Slovakia nima ani jenički politiski podawk lěta 2015 za pozitiwny a za najnegatiwniši hódnoći žołmu migrantow do Europy. Nowe lěto pak zawěsće wšitcy pozitiwnje přiwitaja, dokelž budźe žiwjenje trochu tuńše. 1. januara dźě zniži so nadhódnotowy dawk za cyrobizny z 20 na dźesać procentow.
Apropos migranća: Do Košic bě krótko do hód lětadło přiwjezło 25 asyriskich křesćanskich swójbow ze sewjerneho Iraka – dohromady 149 ludźi. Woni rěča dwaj tysac lět staru biblisku aramejšćinu. Hižo 15 měsacow do wotlěta běchu doma započeli sej słowakšćinu ertnje a pisomnje přiswojeć. Na lětanišću witaše jich biskop Jozef Hal’ko. Zastupnik knježerstwa njebě žadyn přitomny.
Krakow (dpa/SN). Pólskeho chemikarja su k 13 lětam jastwa zasudźili, dokelž bě bombowy atentat na parlament w stolicy Waršawje planował. Wobskorženy bě kruće rozsudźeny swoje plany zwoprawdźić, rěčnica sudnistwa wčera pólskej powěsćerni PAP w Krakowje zdźěli. Muž chcyše najwažniše wosobiny kraja morić a tak rewoluciju zahajić, wona rjekny. Mjez wosobami, na kotrež so atentatnik konkretnje měrješe, běštaj tež bywši liberalnokonserwatiwny ministerski prezident Donald Tusk a bywši prezident Bronisław Komorowski.
Muža běchu w nowembru 2012 w Krakowje zajeli. Policija namaka w jeho domje material za twar bombow. Po informacijach policije bě muž spočatnje spytał, dweju studentow za nadpad nawabić. Po tym zo běštaj wonaj wotprajiłoj, bě atentatnik swoje plany sam dale zwoprawdźił. Zasudźeny orientowaše so při tym na njeskutki prawicarskoradikalneho norwegskeho atentatnika Andersa Behringa Breivika. Před sudnistwom je wón wšitke wumjetowanja prěł.