Cile kedźbliwje zwoprawdźić
Energijowy forum zmóžnja wuměnu fachowcow ze wšelkich wobłukow
Lipsk (dpa/SN). Klimowe cile maja so po měnjenju wuchodoněmskeho hospodarstwa z dalokim widom a jara kedźbliwje zwoprawdźić. „Předewzaća maja tuchwilu wulke financielne wužadanja koronapandemije dla zmištrować. Energijowe kóšty pomjeńšić by wažny signal hospodarskemu wobłukej woznamjenjało“, wuzběhny rěčnik zajimoweho zjednoćenstwa předewzaćelskich zwjazkow we wuchodnej Němskej a Berlinje Rolf Paukstat.
Zhromadnje z Industrijnej a wikowanskej komoru zarjaduje zajimowe zjednoćenstwo dźensa zahajeny 9. wuchodoněmski energijowy forum w Lipsku. Zastupjerjo z politiki, wědomosće a srjedźneho stawa rozjimuja tam móžnosće, kak energijowu změnu wuspěšnje zwoprawdźić. Najwažniši zaměr je, zhromadny konsens wšelakich towaršnostnych skupin nańć.
To a tamne (13.10.20)
Twjerde pjenjezy po kilach w rěce našli su dźěći w badensko-württembergskim Bretzfeldźe. Dubiozneje namakanki dla je nan dźěsća skónčnje policiju zawołał. Zhromadnje ze zastojnikami su skónčnje 45 kilogramow dwueurowkow z wody zwućahali, a to w hódnoće 10 000 eurow. Kaž pak so spěšnje wukopa, běchu wšitke wopačne. Nětko pyta policija za wotstronjerjemi pjenjez.
Nurjenski woblek zdrasćeny je muž na tři najwyše hory Wulkeje Britaniskeje zalězł. W nimale 60 kilogramow ćežkim wuhotowanju, z kotrymž hodźi so wosebje hłuboko nurić, je 58lětny Lloyd Scott 978 do 1 345 metrow wysoke wjerški zmištrował a přez tak mjenowanu „Three peaks challenge“ něhdźe 46 000 puntow nazběrał. Z pjenjezami financuje Scott sportowe poskitki za zbrašenych młodostnych.
Čas je zrały za koncil
Basel (B/SN). W debaće wo wuswjećenje žónskich na měšnicy w katolskej cyrkwi wupraja so swjećacy biskop z Basela Denis Theurillat za koncil. „Fakty leža na blidźe, čas je zrały. Wšitcy biskopja swěta měli so schadźować a wo haj abo ně rozsudźić“, rjekny Theurillat šwicarskemu katolskemu internetportalej kath.ch. Prašenje njeměł bamž Franciskus sam rozrisać. Na koncilu by so Denis Theurillat „rady jako biskop wobdźělił. A jeli to hižo njedožiwju, potom z njebjes přihladuju.“
Kemše na łuce njeswjećili
Eisleben (B/SN). Wiki na łuce w Eislebenje, najwjetši ludowy swjedźeń w srjedźnej Němskej, njewotměchu lětsa pandemije dla wonka w swjedźenskim stanje. Tradicionalnu ekumenisku Božu słužbu swjećachu w cyrkwi swjateju Pětra a Pawoła, a to z wobmjezowanej ličbu wěriwych. W swojim prědowanju wěnowaše so ewangelski farar Conrad Herold z Erfurta cirkusej a jeho personalej a rozkładźe jeho ćežku situaciju. Optimistisce zhladowachu přitomni hižo na klětuši jubilej 500 lět wikow na łuce.
Bjezdomny měšnika zakłół
Nazymski wjeršk infekcijow
Berlin (dpa/SN). Nazymski wjeršk je Roberta Kochowy institut (RKI) sobotu ze 4 721 nowozwěsćenymi koronainfekcijemi wozjewił, kotrež běchu jemu strowotniske zarjady w Němskej přizjewili. Wčera bě jich 3 483, dźensa 2 467. Njedźelne a póndźelne hódnoty su po dotalnych nazhonjenjach snadniše, dokelž wšitke strowotniske zarjady tej dnjej swoje daty dale na RKI njeposrědkuja.
Maas za sankcije wabił
Luxemburg (dpa/SN). Zwjazkowy wonkowny minister Heiko Maas (SPD) je dźensa na zetkanju Europskeje unije w Luxemburgu za to wabił, němsko-francoski namjet za nowe sankcije Ruskej napřećo podpěrać. Wón powoła so na wobkrućenje Organizacije za zakaz chemiskich bróni, zo je zajědojćenje kritikarja Krjemla Alekseja Nawalneho zrěčenje wo chemiskich brónjach zraniło. Ruska njeje dosć k wujasnjenju padu přinošowała. Chłostanja měli jednotliwcow trjechić.
Wiki koronakrizu njerjaduja
Steinmeier žnjo- wu krónu přijał
Smochćicy (SN/BŠe). W Smochčanskim kubłanišću swj. Bena je so zwjazkowy prezident Frank-Walter Steinmeier wčera na ekumeniskim žnjowodźaknym swjedźenju wobdźělił. Kaž wón zwurazni, je jemu wažne tajki swjedźeń a Božu słužbu we wjesnych kónčinach přewjesć, hdźež burja swoje žně domchowaja. Farar Clemens Hrjehor a superintendent Tilmann Popp staj ekumenisku nutrnosć swjećiłoj. Serbski duchowny skedźbni na dwurěčny region a tak je tež Steinmeiera a dalšich hosći, kaž sakskeho ministerskeho prezidenta Michaela Kretschmera (CDU) a Drježdźansko-Mišnjanskeho biskopa Heinricha Timmereversa, serbsce postrowił. Serbski ludowy ansambl kemše hudźbnje wobrubi. Mjez druhim zaklinčachu tež serbske twórby. Skónčnje farar Clemens Hrjehor žnjowu krónu ze serbskimi słowami požohnowa. Zastupnicy Němskeho burskeho zwjazka a Němskeho zwjazka wjesnych žonow su ju zwjazkowemu prezidentej přepodali.
Na konsensso wusměrić spomóžne
Huštań/Budyšin (SN/at). W srjedźišću dwudnjowskeje klawsury Serbskeho sejma steješe kónc tydźenja w delnjołužiskim Huštanju (Wüstenhain) pola Wětošowa dźěłarnja wo principje konsensa. Na zakładźe tuchwilu předležaceho naćiska za móžne serbske statne zrěčenje su so wobdźělnicy w tym wudospołnili, při wotchilacych so měnjenjach so tak daloko přibližić, zo nastanje wot wšitkich akceptowany konsens. Kaž bě z kruha sejmarjow zhonić, mějachu wjacori z nich tele postupowanje za spomóžne. Samo ći, kotřiž su dotal zwučeni byli problemy na konflikt poćahowane wašnje rozrisać, widźachu w tym lěpšinu, za rozsud po móžnosći šěroki spektrum – tež ćichich – měnjenjow, pozicijow a nazhonjenjow zapřijeć. W kónctydźenskej klawsurje su najprjedy wšitke prašenja a přispomnjenja k předležacemu tekstej zezběrali. Kaž w nowinskej zdźělence Serbskeho sejma k tomu rěka, bě zaměr workshopa, zwučować metody, kak konsens namakać a tajki zeskutkownić.
Zhromadnu wiziju wuwili
Zhromadnje chcetej Zhorjelc a Zgorzelec wobydlerjow z ćopłotu zastarać
Zhorjelc (AK/SN). Měsće Zhorjelc a Zgorzelec chcetej so wot lěta 2030 zhromadnje dospołnje z klimowoneutralnej dalnoćopłotu zastarać dać. Za tónle zaměr wabješe Zhorjelski wyši měšćanosta Octavian Ursu (CDU) minjeny pjatk w Berlinje. Němskim a pólskim politikarjam předstaji wón tam projektaj klimowoneutralne zastaranje z dalnoćopłotu za europske město a masterski plan klimoneutralneho města 2030. Zaměr bě, sylnych partnerow na wšitkich runinach zdobyć. „Tuž zetka so wón z pósłancom Pólskeje republiki prof. dr. Andrzejom Przyłębskim“, informuje nowinska rěčnica města Zhorjelca Juliane Zachmann.
To a tamne (12.10.20)
Z 51 lětami zapozdźenja je klóšter w Bayerskej pohladnicu z Roma skónčnje dóstał. Hižo 20. apryla 1969 bě wěsta Hildegard postrow z Roma wotpósłała. Njekorektneje adresy dla pak njeje karta swój cil dotal docpěła. Hakle před dnjemi je póstownica póstowu kartu w klóštrje Münsterschwarzach pola Würzburga wotedała, a ta je tam nětko wulka tema.
Njeznata žona je roznošowarja nowin minjeny štwórtk w badensko-württembergskim Bermatingenje chětro rozhněwała. Najprjedy jeho zadźeržeše, hač móhł ju sobu wzać, štož wón wotpokaza. Krótko po tym wostaji póstownik klučik w awće tčacy, zo by nowinu do listoweho kašćika tyknył, njeznata z awtom prosće wotjědźe. Pjatnaće kilometrow dale je padušnica samo hišće njezbožo zawiniła a pěši ćeknyła. Pozadk kuriozneho padu dotal hišće wujasnjeny njeje.
Projekty za přichod Łužicy
Braniborska nochce we wobłuku swojeje strategije Łužicu jenož jako wědomostnu a slědźensku městnosć rozšěrjeć a kulturny region na juhowuchodźe kraja skrućić, ale tež serbske kulturne namrěwstwo dale wuwić. Tohodla bu wubědźowanje „Serbski pśichod: Łužyca – sorbische/wendische Zukunft: Lausitz“ wuwołane. 17 směrodajnych projektow su nětko mytowali.
Podstupim (SN/at). Wubědźowanje je braniborski wotpowědnik k serbskej kategoriji sakskeje akcije „Čiń sobu!“. Z nim „podpěramy dobre projekty a ideje ciwilnotowaršnostnych akterow na městnje“, zwěsći krajny społnomócnjeny za naležnosće Serbow, statny sekretar Tobias Dünow minjenu wutoru składnostnje wozjewjenja dobyćerjow. Přisłušne ministerstwo za wědomosć, slědźenje a kulturu spěchuje z mytami projekty, kotrež před pozadkom koronakrizy kulturne žiwjenje pozbudźeja a kulturnu mnohotnosć skrućeja.
Wjace přetrjeby, wjetši dawk
Berlin (dpa/SN). Reforma wozydłoweho dawka je wobzamknjena, Zwjazkowa rada je jej dźensa přihłosowała. Tak stupa wot klětušeho za awta z wulkej přetrjebu ćěriwa wozydłowy dawk. To ma ludźi wobwliwować, zo bychu zlutniwiše wosobowe awta kupili. Hižo přizwolene jězdźidła wot noweho rjadowanja potrjechene njejsu. Komponenta wuhlikoweho dioksida ma nětko wjetši wuznam hač ta zběhoweho ruma.
Trump jutře na wólbny bój
Washington (dpa/SN). Prezident USA Donald Trump chce so hižo jutře na wólbnobojowym zarjadowanju w zwjazkowym staće Florida direktnje na swojich přiwisnikow wobroćić. „Hdyž mamy dosć chwile podawk organizować“, chcył wón tam wustupić, rjekny Trump wčera wječor w sćelaku Fox News. Jenož něšto hodźin do toho bě jeho lěkar wozjewił, zo budźe najskerje wot soboty wěste, zo móže so Trump po schorjenju na koronu zaso na zjawnych terminach wobdźělić.
Pomoc za žiwe centrumy
