Zwjazkowy prezident Frank-Walter Steinmeier je dźensa zhromadnje ze swojej žonu Elku Büdenbender na lětanišću w sewjero-italskim Mailandźe přizemił. Ze swojim wopytom chcył wón signal solidarity z Italskej sadźić, kotraž bě spočatnje wot koronapandemije wosebje potrjechena. W tym zwisku bě mjez Němskej a Italskej k njedorozumjenjam dóšło. Foto: dpa/Bernd von Jutrczenka

Tesla chce wjace lěsa trjebić

Donnerstag, 17. September 2020 geschrieben von:

Podstupim (dpa/SN) Twarc elektroawtow Tesla z USA chce za swoju fabriku w Grünheidźe pola Berlina dalši dźěl lěsa trjebić. „Tuchwilu to pruwujemy“, rjekny referatny nawoda za škit před imisijemi we wobswětowym ministerstwje Frank Beck wčera w hospodarskim wuběrku krajneho sejma w Podstupimje. Dotal su něhdźe 90 hektarow lěsa na cyłkownje 300 hektarow wulkim arealu pušćeli. Dalše sto hektarow ma k tomu přińć.

Po měnjenju Swobodnych wolerjow w Braniborskim krajnym sejmje leži dźěl lěsa w přirodoškitnym pasmje. Ministerstwo chce pruwować, hač je nětko přirodoškitne přepytowanje trěbne.

W Grünheidźe twari Tesla swoju prěnju twornju za elektroawta w Europje. Klětu w lěću chcedźa tam dźěłać započeć a 500 000 jězdźidłow wob lěto twarić.

Dowěru zasadnje njezhubić

Donnerstag, 17. September 2020 geschrieben von:
Berlin (dpa/SN). Prezident zwjazkoweho kriminalneho zarjada Holger Münch je po wotkryću prawicarskoekstremnych internetnych skupin w rjadach sewjerorynsko-westfalskeje policije před tym warnował, zo móhli ludźi dowěru do policije zasadnje zhubić. „To su podawki, kotrež dowěru do policije chětro střasu“, rjekny Münch nowinarjam. To samsne płaći za hrožace listy, w kotrychž wu­žiwachu daty policajskich kompjuterow. W Sewjerorynsko-Westfalskej wotkrychu pjeć internetnych skupin, na kotrychž bě 29 žónskich a muskich policistow wobdźělenych. Jich su hnydom z policajskeje słužby pušćili.

Dalše regiony rizikowe kónčiny

Donnerstag, 17. September 2020 geschrieben von:

Berlin (dpa/SN). Přiběraceje ličby nowych natyknjenjow z koronawirusom dla je zwjazkowe knježerstwo nimo awstriskeje stolicy Wiena dalše kónčiny wjacorych europskich krajow jako rizikowe deklarowało a wotpowědne warnowanja wuprajiło. Zwjazkej słušacy Roberta Kochowy institut je mjeztym aktualizowanu lisćinu wozjewił. Z toho wuchadźejo warnuje zwjazkowe knježerstwo „před njetrjebawšimi turistiskimi jězbami“ do rizikowych regionow.

Warnowanje před jězbami płaći wotnětka tež ­za srjedźočěske kónčiny wokoło stolicy Prahi, kotraž słuša hižo dobry tydźeń ­do rizikowych. Madźarska stolica ­Budapest je tohorunja wot warnowanja potrje­chena.

Dowolnicy, kotřiž so z rizikowych kónčin do Němskeje nawróća, dyrbja winowatostny test na koronawirus přewjesć dać a tak dołho w domjacej karantenje wostać, doniž jim negatiwny wuslědk ­testa njepředleži.

Krótkodźěło dale móžne

Donnerstag, 17. September 2020 geschrieben von:

Knježerstwo chce dotalne rjadowanje hač do kónca lěta 2021 podlěšić

Berlin (dpa/SN). Předewzaća w Němskej móža swojich přistajenych koronakrizy dla tež přichodnje do krótkodźěła pósłać. „Krótkodźěło je najstabilniši móst nad hłubokim hospodarskim dołom“, rjekny minister za dźěło Hubertus Heil (SPD), po tym zo su wotpowědny zakonski naćisk w zwjazkowym kabineće wčera w Berlinje, wobzamknyli.

Hospodarscy slědźerjo běchu namołwjeli, zo njeměli předewzaćam ze zestarjenym wičnym modelom z pomocu krótkodźěła zmóžnić, zo kumštnje přežiwja. Heil znapřećiwi: „Štóž nětko wo zničenju předewzaćow soni, jedna cynisce. W koronakrizy je najprjedy raz wažne wobstejacu substancu zachować.“

Doba přijimanja pjenjez za krótkodźěłacych ma so na 24 měsacow podlěšić, najdlěje hač do kónca lěta 2021. Tele pjenjezy chcedźa wot nětko 67 na 70 procentow mzdy zwyšić, za dźěławych z dźěćimi na 77 procentow. Po sedmym měsacu so pjenjezy za krótkodźěłacych na 80 resp. 87 procentow zwyša.

To a tamne (17.09.20)

Donnerstag, 17. September 2020 geschrieben von:

Pjany z awtom na policajski stražu přijěł je 45lětny muž we Wulkej Dubrawje. Wón so tam přizjewi, dokelž bě pisomnje skazany. Zastojnicy wšak hnydom pytnychu, zo njeje cyle strózby. Test alkohola wu­njese 1,4 promile. Tak su jemu nablaku jězbnu dowolnosć wotewzali a skóržbu wupisali. Čehodla bě muž na stražu skazany, njeje znate.

Pytanje za krokodilom zakónčili su po­dłu rěki Unstrut w Kyffhäuserskim wo­krjesu. Podhlad, zo bě so eksotiske zwěrjo do rěki zabłudźiło, njeje so po dźesać dnjow trajacym pytanju přeco hišće po­twjerdźił, zdźěli krajnoradny zarjad. Tam ani njewuzamkuja, zo „njeje krokodil tam nihdy eksistował“. Reptila běchu před dźesać dnjemi na brjoze Unstrut pječa prěni króć wuhladali. Na to za nim z pomocu wohnjoweje wobory, policije a samo helikoptera wobšěrnje pytachu.

EU z nowym zaměrom

Mittwoch, 16. September 2020 geschrieben von:

Brüssel (dpa/SN). Prezidentka komisije EU Ursula von der Leyen chcyła wustork škódnych maćiznow do powětra hač do lěta 2030 wo znajmjeńša 55 procentow porno lětu 1990 pomjeńšić. Drastiske přiwótřenje klimoweho zaměra je von der Leyen dźensa w narěči k połoženju Europskeje unije w Brüsselu formulowała. Dotal rěkaše zaměr 40 procentow. „Znajmjeńša 55 procentow“ ma dalšemu woćoplenju zemje zadźěwać.

Lawrow namołwja Maasa

Berlin/Moskwa (dpa/SN). Ruska je hladajo na zajědojćenje ruskeho režimoweho kritikarja Alekseja Nawalneho před dalšej politizaciji padu warnowała a namołwja Němsku wospjet k zhromadnemu dźěło. Tole rjekny ruski wonkowny minister Sergej Lawrow dźensa němskemu wonkownemu minister Heikej Maasej (SPD). Lawrow skedźbni na wotpowědne zrěčenje wo juristiske pomocy. Strowotny staw Nawalneho so polěpša. Wčera je so wón prěni króć słowa jimał.

Přećiwo zapućowanju

Wot baterijow ćěrjeny ćah typa Desiro ML koncerna Siemens su dźensa na Drježdźanskim Hłownym dwórnišću předstajili. ­Wobchadny zwjazk Hornje Łobjo chce jězdźidło na čarach wupruwować, hdźež nětko hišće dieselowe ćahi zasadźeja. K tym ­čaram słuša tež zwisk Drježdźany–Kinspork, po kotrejž měješe nowy a modernje wuhotowany ćah hišće dźensa prěni króć jěć. Po informacijach Siemens docpěwa tajki spěšnosć hač do 140 km/h. Foto: dpa/Sebastian Kahnert

Merkel: Hida na Židow mje wohańbja

Mittwoch, 16. September 2020 geschrieben von:

Berlin (dpa/SN). Zwjazkowa kanclerka Angela Merkel zaběra jasnu poziciju přećiwo nadpadam na židowske žiwjenje w Němskej. „Je šamałe a mje hłuboko wohańbja, hdyž widźu, kak so rasizm a antisemitizm w našim kraju w tychle časach zwuraznjeja“, rjekny politikarka CDU wčera w Berlinje na swjatočnosći składnostnje załoženja Centralneje rady Židow před 70 lětami.

Rasizm a antisemitizm njeběštej ni­hdy přewinjenej. „Tola hižo něšto časa stej wonej dźeń a widźomnišej“, Merkel rjekny. Ranjenja, hroženja abo teorije zapřisahanja měrja so cyle wotewrjenje přećiwo židowskim wobydlerkam a wobydlerjam. „W socialnych medijach su mnohe wuprajenja połne hidy a šćuwańcy. Njesměmy k tomu nihdy mjelčeć!“ Spěšnje móža so ze słowow skutki stać, kaž je nadpad na synagogu w Halle „na wosebje surowe wašnje“ pokazał. Tam swjećeše 52 ludźi najwyši židowski swjatk jom kipur. Atentatnik pak njemóžeše durje přewinyć. Na to zatřěli wón žonu, kotraž tam připadnje nimo dźěše, a krótko po tym muža w denerowym wobchodźe.

Wuspěch z čornymi blakami

Mittwoch, 16. September 2020 geschrieben von:

Berlin (dpa/SN). Dźěłarniski zwjazk DGB ma 30lětnu dobu po zjednoćenju Němskeje za wuspěšnu stawiznu z čornymi blakami, měni předsyda DGB Reiner Hoffmann. Wón skorži, zo dyrbja ludźo na wuchodźe Němskeje dlěje dźěłać a zo přiwšěm mjenje zasłužeja. To njeznjese so z narokom, na wuchodźe a zapadźe jenake žiwjenske wuměnjenja wutworić. Problem je tež tón, zo so tójšto firmow na wuchodźe spjećuje tarifowe mzdy płaćić.

Zwjazkowe knježerstwo je dźensa swoju rozprawu wo stawje jednoty Němskeje rozłožiło. Po tym zo bě so kabinet z rozprawu zaběrał, předstaji jón społnomócnjeny zwjazkoweho knježerstwa za wuchodne zwjazkowe kraje Marco Wanderwitz (CDU) zjawnosći. Po jeho słowach wuchodoněmske hospodarstwo dale rosće, štož pokazuje so tež we woteběracej bjezdźěłnosći. Hospodarska móc wuchodnych krajow pak wostawa dale pod cyłoněmskim přerězkom.

Chróšćan Šulerjo

Neuheiten LND