To a tamne (12.05.17)
Po zwadźe ze staršimaj je 14lětny młodostny ze wsy njedaloko schleswigsko-holsteinskeho Norderstedta z nanowym awtom typa Porsche wotjěł, po tym zo bě sej klučiki hrabnył. Wottam smaleše do směra na Hamburg. Wobsadka policajskeho awta pachoła zadźerža a wza jeho sobu na stražu. Tam wón přizna, zo bě z awtom twochnył, bjez toho zo staršej to wědźeštaj. Nětko wšak dyrbi z chłostanskim jednanjom jězdźenja bjez jězbneje dowolnosće a njewoprawnjeneho wužiwanja awta dla ličić.
41 kilogramow kokaina su cłownicy w chłódźenskim kontejneru w přistawje Bremerhaven namakali. Na čornych wikach bychu drogi wjace hač šěsć milionow eurow wunjesli, kaž z Hamburgskeho cłowneho zarjada rěka. Ličba tajkich namakankow kaž tež sćazane mnóstwa kokaina spochi přiběraja. Drogi běchu w bananowych kartonach z Ekuadora schowane. Kontejner bě za Rusku mysleny.
Wjeršk aliancy tema był
Berlin (dpa(K/SN). Kanclerka Angela Merkel (CDU) je dźensa generalneho sekretara NATO Jensa Stoltenberga přijała. Jeju zetkanje słužeše přihotam přichodneho wjerška aliancy. Na jeho wuradźowanjach, na kotrychž wobdźěli so prěni raz nowy prezident USA Donald Trump, póńdźe wo bój přećiwo terorej. Tema bě dźensa tohorunja ameriski wid na přeniske wudawki Europy za wojerstwo. Stoltenberg ma ćežki nadawk, zwjazkarjow dowjesć na zhromadnu liniju.
Kandidaća za Macrona
Paris (dpa/K/SN). Politiske hibanje přichodneho francoskeho prezidenta Emmanuela Macrona předstaji dźensa lisćinu kandidatow za parlamentne wólby w juniju. Wšo hromadźe ma 577 kandidatow nastupić – jedyn za jedne sydło w narodnej zhromadźiznje. A woni maja nětčišemu njestronskemu prezidentej při wólbach wunjesć trěbnu wjetšinu za dalše skutkowanje jeho knježerstwa. Macronowe hibanje La République en Marche nastupi strony přesahujcy.
Zeleni kritizuja knježerstwo
Němscy a pólscy policisća su dźensa na awtodróze A 12 mjez ...
Běły dom chětro we wuskosćach
Dobre wuhlady na lěpše poćahi
Mjeńšiny maja nětko zwisk do Brüssela
Apenrade/Brüssel (SN/MkWj). Iniciatiwa narodnych mjeńšin Minority SafePack je dalši wuspěch docpěła. Europski parlament přilubja so problemam narodnych mjeńšin wěnować a poskića so w tymle prašenju jako partner.
Tydźenja běchu so wodźacy zastupnicy iniciatiwy, kotraž žada sej zakótwjenje prawa mjeńšin we wustawkach Europskeje unije, z wodźacymi wosobinami Europskeho parlamenta zetkali a wo dalšim postupowanju wuradźowali. Iniciatiwa dyrbi nětko milion podpismow zezběrać, zo by žadanje Europskemu parlamentej jako zakonski naćisk předpołožić móhła.
Předsyda iniciatiwy Hans Heinrich Hansen ze Sewjerneje Schleswigskeje w Danskej, bywši předsyda Federalistiskeje unije europskich narodnych mjeńšin, móžeše přewšo pozitiwny rezimej swojeje rozmołwy z prezidentom Europskeho parlamenta Antonijom Tajanijom a toho kabinetnym kolegu Markusom Warasinom sćahnyć. Warasin přisłuša sam němskej mjeńšinje w Južnym Tirolu. Tajani bě Warasina za społnomócnjeneho za narodne mjeńšiny powołał. To je Hansenej „jasne a dobre znamjo“.
Porjedźenka
Njejsu so hišće podali, ale maja ideale
Budyšin (CS/SN). „Młody być w NDR“ rěka tema lětušeho 28. Budyskeho foruma, wuhotowaneho wot Friedricha Ebertoweje załožby. Hač do jutřišeho je tam tójšto rozprawow wo wosobinskich dožiwjenjach słyšeć. Forum w Budyskej piwarni zahajachu dźensa z wědomostnje podkładźenym přednoškom dr. Ilka-Sasche Kowalczuka, sobudźěłaćerja zarjada za podłožki stasi. 1969 narodźenemu synej komformneje swójby, kiž započa so jako 15lětny statej NDR spřećiwjeć, bě lěto 1989 kaž wuswobodźenje a samowuswobodźenje. Wón rjekny, zo su w stawiznach a w přitomnosći přeco młodźi ludźo, kotřiž protestuja. Woni njejsu so hišće podali, ale maja ideale. Oponowacy pak běchu w diktaturomaj 20. lětstotka stajnje jenož nakromne skupiny, wjetšina dźě je sobu činiła. Hrana mjez pasiwnym přiměrjenjom a aktiwnej podpěru knježacych pak bě přewšo wuska.
To a tamne (11.05.17)
Zabłudźeneho ptačka w cockpiće pasažěrskeho lětadła „Dreamliner“ dla je předewzaće British Airways lět z Londona do USA wotprajiło. Kós bě dźiwje lětajo cockpit blokował. Sobudźěłaćerjo na to hodźiny dołho spytachu jeho wućěrić. Tón pak so stajnje zaso chowaše. Pasažěrojo dyrbjachu do druheje mašiny přelězć, zo móhli dale lećeć. Što je so z ptačkom stało, předewzaće njezdźěli.
Pokład dźesać slěbornakow ze 16. lětstotka su ruscy archeologojo w šachowej figurje namakali. Kaž z Moskwy rěkaše, běchu fachowcy při twarskich dźěłach njedaloko katedrale Chrystusa-Wumóžnika w centrumje stolicy na drohotny pokład storčili. Pjenjezy běchu wokoło lěta 1540 w Moskwje a Twjeru zhotowili a za čas carja Iwana Złeho wužiwali.
Hišće ničo njerozsudźene
Drježdźansko-Mišnjanske biskopstwo dale rozmysluje tež serbske katolske wosady do jeničkeje wulkeje zjednoćić
Biskopstwo Drježdźany-Mišno njeje hišće wo přichodnej strukturje přisłušnych serbskich wosadow rozsudźiło. To zdźěla biskopski ordinariat na naprašowanje Serbskich Nowin. „Wot lěta 2013 su biskopstwo a wšitke jeho wosady w tak mjenowanym ‚pastoralnym wotkrywanskim procesu‘, kotryž tuchwilu traje. Nimo pytanja za dušepastyrskim nadawkom kóždeho cyrkwinskeho regiona steji při tym tež prašenje w srjedźišću, kotre financne a personalne ramikowe srědki změjemy přichodnje za pastoralne dźěło na městnje k dispoziciji. Konkretne wobzamknjenja za serbske wosady njejsmy hišće tworili“, wobkrući nowinski rěčnik biskopstwa Michael Baudisch. Wo kotre „hišće njetworjene“ wobzamknjenja a móžne změny so jedna, pak rěčnik biskopstwa, najebać prašenja za tym, njezdźěli.
Bórze jenož hišće jenička serbska wulkowosada?
