Za „čisćiši“ internet
Berlin (dpa/K/SN). Zwjazkowe knježerstwo je dźensa schwaliło naćisk zakonja, po kotrymž ma so nětko w interneće raznišo jednać přećiwo komentaram hidy a wopačnym powěsćam. Operateram Twittera, Facebooka a dalšim hroža čućiwe pokuty, jeli přichodnje dosć přećiwo chłostajomnym wobsaham njezakroča. Po słowach zwjazkoweho justicneho ministra Heika Maasa (SPD) je pospyt zwrěšćił, zo wone předewzaća dobrowólnje přećiwo hidźe a łžam zakročeja.
Wójsko z nowej jednotku
Berlin (dpa/K/SN). Zwjazkowa ministerka za zakitowanje Ursula von der Leyen (CDU) je dźensa w Bonnje nowu cyberowu jednotku Zwjazkoweje wobory oficialnje do słužby stajiła. Jeje nadawk je, wójsko a Němsku docyła přichodnje lěpje w cyberowym a informaciskim rumje škitać. Komandu CIR přisłuša 260 sobudźěłaćerjow. Wot 1. julija ma jednotka 13 500 wojakow a ciwilnych přistajenych wopřijeć.
Dalšu pomoc ćěkancam
Bjezradny steji tónle muž w měsće Mocoa na juhozapadźe ...
Jědojty płun 72 ludźi morił
Rozmyslowanja hódne
To a tamne (05.04.17)
Wosrjedź wulkich hromadow njerjada su w Japanskej přeličene 360 000 eurow našli. Sobudźěłaćer wotpadkoweje firmy w prowincy Gumma njedaloko stolicy Tokija pjenjezy namaka, jako chcyše wotpadki po maćiznje rozrjadować. Firma informowaše na to hnydom policiju. Ta mjeztym z toho wuchadźa, zo je něchtó 42 milionow yenow mylnje preč ćisnył. Za wobsedźerjom pjenjez nětko pytaja.
Dokelž bě so pawka nastróžiła, je žona w Kaiserslauternje znjezbožiła a swoje awto zešrotowała. 23lětnu dyrbjachu ze zranjenjemi tyła do chorownje dowjezć. Jako bě žona póndźelu z awtom po puću, zalěze pawk do njeho. Šoferka so tak wustróži, zo ze swojim wozom do kromy chódnika zrazy. Jězdźidło so přećisny a wosta na boku ležo. Dospołnje skóncowane dyrbjachu je wotwlec.
Zhromadnje eucharistiju přijeć
Bensberg (B/SN). Biskopske konferency budu so přichodnje sylnišo z temu zaběrać, pod kotrymi wuměnjenjemi móža so mandźelscy wšelakeje konfesije zhromadnje na katolskej Božej mši wobdźělić a zhromadnje swjate woprawjenje přijeć. Tole připowědźi předsyda Němskeje biskopskeje konferency, kardinal Reinhard Marx, na kóncu nalětnjeje hłowneje zhromadźizny 62 katolskich biskopow a swjećacych biskopow Němskeje w Bensbergu pola Kölna. Pod wěstymi wuměnjenjemi móže biskopska konferenca prawidła wo eucharistiji za njekatolskich křesćanow postajić, rěka w rozprawje hłowneje zhromadźizny.
Tafle tež ćěkancow zastaruja
Berlin (B/SN). Zwjazkowe zjednoćenstwo Němska tafla je po swójskich podaćach minjene lěta něhdźe 280 000 ćěkancow ze žiwidłami zastarało. Cyłkownje mamy w Němskej 1,5 milionow ludźi, kotřiž wobstajnje darmotne tafle wužiwaja, zdźěli zjednoćenstwo składnostnje „mjezynarodnych tydźenjow přećiwo rasizmej“ w měrcu w Berlinje. Tafle pomhaja ludźom, kiž pomoc trjebaja, njewotwisnje wot socialneho abo etniskeho pochada, splaha, narodnosće a nabožiny.
Konferenca na dobro Syriskeje
Brüssel (dpa/SN). Z naležnej próstwu wo dalšu humanitarnu pomoc Syriskej je so dźensa w Brüsselu zetkanje zastupnikow 70 statow w pomocnych organizacijow zahajiło. „Je naša moraliska winowatosć jako mjezynarodne zjednoćenstwo statow, swojej zamołwitosći napřećo syriskemu ludej, dołhož je trjeba, wotpowědować“, rjekny za humanitarnu pomoc zamołwity komisar Europskeje unije Christos Stylianides. Němski wonkowny minister Sigmar Gabriel (SPD) wobdźěli so jutře na konferency, hdyž rěča wo politiskich móžnosćach, wójnu skónčić.
Susodźa chcedźa skoržić
Luxemburg (dpa/SN). Štyri susodne kraje Němskeje chcedźa so wo skóržbje přećiwo němskemu dróhowemu popłatkej za wosobowe awta dorozumić. Za to so wobchadni ministrojo Luxemburgskeje, Nižozemskeje, Awstriskeje a Belgiskeje 7. junija wurjadnje schadźuja, kaž luxemburgski ministerski prezident Xavier Bettel powěsćerni dpa zdźěli. Awstriska bě hižo před dlěšim připowědźiła, zo chcyła na Europskim sudnistwje přećiwo němskemu popłatkej skoržić, dokelž tón „wukrajnikow diskriminuje“.
Senatorojo w Serbskim gymnaziju
Budyšin (SN). 14 politikarjow Čěskeje republiki pod nawodom prezidenta čěskeho senata Milana Štěcha je we wobłuku swojeje wčerawšeje wizity we Łužicy tež Serbski gymnazij w Budyšinje wopytało. Tam witaštaj jich šulski nawoda René Wjacławk a mały chór gymnazija. Wjacławk pokaza na spočatki tohole kubłanišća w Českej Lípje a we Varnsdorfje a předstaji jeho dźensniši profil. Senatorojo dožiwichu tež hodźinu stawiznow w serbskej rěči. Jim so wosebje lubješe, zo gymnaziasća nimo hornjoserbšćiny, němčiny a jendźelšćiny dalšu cuzu rěč wuknu.
Aspekty komunalneje politiki wobrěčachu hosćo při dźěłowym wobjedźe, na kotrymž wobdźělištaj so tež Budyski krajny rada Michael Harig (CDU), a wyši měšćanosta Alexander Ahrens (SPD). Po tym podachu so do srjedźneje Łužicy, hdźež zetkachu so z lokalnymi politikarjemi na rozmołwu wo strukturnej změnje we Łužicy a zhromadnym dźěle w euroregionje.
Zasudźeja njeskutk
Atentatnik prawdźepodobnje Kirgiza z ruskim staćanstwom był
Pětrohród (dpa/K/SN). Atentat z bombu w Pětrohródskej metro je sej znajmjeńša 14 smjertnych woporow žadał. Nědźe dalšich 50 zranjenych ludźi hladaja lěkarjo w chorownjach. Bomba sylnosće něhdźe 250 gramow TNT a napjelnjena z kowowymi dźělčkami bě wčera popołdnju w podzemskim ćahu rozbuchnyła, jako bě wón pod centrumom pjeć milionow wobydlerjow wulkeho města po puću. Statny přepytowanski komitej rěči wo terorowym njeskutku.
Prezident Wladimir Putin, kiž přebywaše za čas rozbucha w jednym z Pětrohródskich předměstow, hnydom na to připowědźi, zo dźěłaja přepytowanske mocy z połnej paru na tym, hrózbne złóstnistwo wuswětlić. Dźeń po njeskutku je sebjemordarski atentatnik prawdźepodobnje identifikowany. Po zwěsćenju kirgiziskeje wěstotneje wyšnosće jedna so pola njeho wo 1995 w Ošu rodźeneho Kirgizu, kiž ma tež ruske staćanstwo. Wo motiwach jeho złóstneho počinanja njeje dotal ničo znate.
To a tamne (04.04.17)
Njeprošeneho hosća su dźěći a kubłarki jedneje z Kasselskich pěstowarnjow wčera rano wuhladali: W hrajkanskim róžku spaše paduch, kiž bě sylnych bolosćow w chribjeće dla swoju nócnu rubježnu akciju w pěstowarni přetorhnyć dyrbjał. Policiji 69lětny bjezdomny přizna, zo bě so tam přez wokno zadobył. Spakosćił bě něšto twjerdych pjenjez, bananu a lizaki. Bolostneho podkłóća (Hexenschuss) dla pak bě so lehnyć dyrbjał. Zastojnicy dowjezechu jeho najprjedy do chorownje a po tym na policajsku stražu.
Ze samopřiprawjenej módrej swěcu je 46lětny muž z Vogtlanda po awtodróze A 9 jěł. Policisća jeho pola bayerskeho Gerfreesa zadźeržachu, po tym zo bě so dalši šofer spodźiwnje wuhotowaneho přezpólneho awta dla pola nich přizjewił. Módru LED-swěcu na motorowej hawbje dyrbi muž nětko zaso wotstronić.
