Zelenskyj: Historiski dźeń
Putin wumjetuje zapadej zmylki
Zymu mrěć k nuzy „zakonsce“?
Berlin (dpa/SN). Zwjazkowy minister za hospodarstwo Robert Habeck (Zeleni) jako konsekwencu z redukowaneho dodawanja ruskeho zemskeho płuna do Němskeje zakonske rjadowanja k lutowanju energije hižo njewuzamkuje. „Hdyž njemóžemy składy porjadnje napjelnić, dyrbimy dalše naprawy k lutowanju – k nuzy tež zakonsce – wukazać“, rjekny Habeck wčera wječor w sćelaku ARD. Tuchwilu su składy płuna k 56 procentam napjelnjene. To pak za cyłu zymu njedosaha. Mjeztym je sejm městow a gmejnow Němskeje namjetował, zakonske rjadowanja nastupajo minimalnu temperaturu w bydlenjach změnić. Hłowny jednaćel zwjazka Gerd Landsberg je sej wěsty, zo móžeš tež w bydlenju z 18 abo 19 stopnjemi hišće derje žiwy być.
Zwjazkowa ministerka za twarstwo Klara Geywitz (SPD) tole wotpokazuje. „Zakonsce wukazane zymumrěće mam za njezmysł“, rjekny wona powěsćerni dpa. Wona na to skedźbni, zo płaći dotal minimalna temperatura 20 stopnjow w bydlenjach. „Wšitko pod tym móže strowotu wohrožować a njeje tež za twarjenja derje. Debata ničo njewunjese.“
Što nas historija wuči?
To a tamne (17.06.22)
Sławny dwuposchodowy bus swójby hudźbnikow Kelly chcychu dźensa po parkowanišću wopytowarjow w Europaparku Rust ćahnyć – a to z 50 dźěćacymi awtami Bobby-car. Spěwar Joey Kelly je sej 49 pomocnikow wupytał, zo by swětowy rekord nastajił. Institut za rekordy w Němskej chcyše pospyt přewodźeć. Bus waži dźesać tonow. Přičina akcije we wólnočasnym parku su 50. narodniny woblubowaneho čerwjeneho awta, kiž běchu 1972 prěni raz předstajili.
Njewočakowana to spowědź: 31lětny wodźer mopeda je so w badensko-württembergskim Althausenje pola policije přizjewił a zastojnikam wuznał, zo je pjany něhdźe dźesać kilometrow daloko ze swojim jězdźidłom po puću był. Test alkohola wunjese 1,48 promilow. Muža wočakuje chłostanje. „Druhdy napitych moralka přemóže“, policija zdźěli.
Sto milionow ludźi ćěka
Genf (dpa/SN). Wjace hač sto milionow ludźi po wšěm swěće je tuchwilu na ćěkancy, telko kaž nihdy po Druhej swětowej wójnje. Pomocny skutk UNO na dobro ćěkancow UNHCR rěčeše w Genfje wo „dramatiskim mězniku“, kotryž su ruska wójna přećiwo Ukrainje, kriza w Afghanistanje a wójny w druhich krajach zawinowali. Surowy trend drje póńdźe dale, njenamaka-li swětowe zjednoćenstwo žadyn puć, konflikty trajnje rozrisać.
Wodźaca dań w USA zwyšena
Washington (dpa/SN). Z najwjetšim zwyšenjom danje po nimale 30 lětach chce so měnowa banka USA přiběracej inflaciji wobarać. Federal Reserve (Fed) je wodźacu dań raznje wo 0,75 procentow zwyšiła, kaž minjenu nóc zdźělichu. Nawoda Fed Jerome Powell rěčeše wo „njewšědnej kročeli“, zdobom pak dalše zwyšenje danje připowědźi. Inflacija w USA je so w meji na 8,6 procentow zwyšiła. Nětko wočakuja, zo so europske měnowe banki kročeli Fed přizamknu.
Steinmeier w Indoneskej
Dźensniši swjedźeń Božeho ćěła su w bayerskim Seehausenje na ...
Chcedźa wjace přestrjenjow za žito
Lübeck (dpa/SN). Burski zwjazk so nastupajo mjenje plahowane žito w Ukrainje starosća a chce produkciju w Němskej rozšěrić. Prezident zwjazka Joachim Rukwied je so zawčerawšim na burskim dnju w Lübecku za to wuprajił a wuzběhnył, zo Ruska žiwidła jako brónje zasadźa. „Tutón mječ dyrbi tupiši być, a móžemy jón wotupić“, wón podšmórny. Zwjazkowy ratarski minister Cem Özdemir (Zeleni) so k tomu njewupraji. Hladajo na napjate wiki a wysoke energijowe płaćizny smědźa kóšty žiwidłow w kupnicach wysoke być. Rukwied pak žadaše sej nachwilne wužiwanje přidatnych přestrjenjow, z čimž móhli 1,4 miliony tonow pšeńcy wjace naplahować, štož wučinja hladajo na mnóstwo žnjow w Němskej cyłkownje wjace hač 40 milionow tonow žita. Kóžda přidatna tona wosłabja agresora Rusku, argumentowaše burski prezident. Wón wočakuje wot politiki, zo instrument wužiwa. Özdemir je mjez druhim hižo zmóžnił, zo smědźa ratarjo wuwzaćnje přestrjenje za trawu a rostliny ekologiskich prioritnych přestrjenjow jako picu wužiwać. Dale sahace žadanja wón znowa wotpokaza.
Scholz, Macron a Draghi w Kijewje
Washington/Kijew (dpa/SN). Prezident USA Joe Biden je Ukrainje dalše brónje, municiju a srědki humanitarneje pomocy přilubił. Wojerske srědki maja hódnotu cyłeje miliardy dolarow. Za humanitarnu pomoc přewostaja Washington 225 milionow eurow. Zwjazkowa ministerka za zakitowanje Christine Lambrecht (SPD) je připowědźiła, tři rakety mjetace systemy typa Mars II do Ukrainy pósłać. Wjace słać njeje po jeje słowach móžne, dokelž by hewak kmanosć zakitowanja Němskeje wohrožena była. Poprawom běchu štyri tajke systemy připowědźili.
Zwjazkowy kancler Olaf Scholz (SPD) je dźensa do ukrainskeje stolicy Kijewa dojěł. Jeho přewodźataj francoski prezident Emmanuel Macron a italski ministerski prezident Mario Draghi. Na wobrazach bě widźeć, kak třo politikarjo minjenu nóc w pólskim Rzeszówje do ćaha zalězu, po tym zo běchu tam dolećeli.
Po informacijach medijow chce so ukrainski prezident Wolodymyr Zelenskyj na wjeršku G7 wot 26. do 28. junija w bayerskim hrodźe Elmau a bjezposrědnje po tym na wjeršku NATO w španiskej stolicy Madridźe wobdźělić.
Płun drje nětko hišće dróši
Připowědźenje płunoweho koncerna Gazprom zbudźa wulki njeměr
Berlin (dpa/SN). Zniženje mnóstwa dodawaneho zemskeho płuna z Ruskeje po płunowodźe Nord Stream I móhło po posudku přirunowanskeho portala Verivox k hišće wyšim kóštam za wobydlerjow wjesć. Hižo ryzy připowědźenje ruskeho statneho koncerna Gazprom kaž tež rozbuchnjenje w druhim najwjetšim eksportnym přistawje USA za židki płun běštej wyše płaćizny płuna pola wulkowikowarjow zawinowałoj, rěčnik Verivox zdźěli. „Sćěh tutoho wuwića su wyše płaćizny płuna za priwatnych přetrjebarjow, wón rjekny. Lěwica liči samo z raznym zwyšenjom płaćiznow a žada sej hnydomne napřećiwne naprawy zwjazkoweho knježerstwa.
