Baerbock: Nord Stream 2 bě zmylk
Riga (dpa/SN). Wonkowna ministerka Annalena Baerbock je baltiskim krajam hladajo na wójnu přećiwo Ukrainje podpěru w padźe móžneho ruskeho wohroženja přilubiła. NATO teritorij zwjazkarjow zakituje a „kóždy kućik zhromadnje škita“, rjekny politikarka Zelenych wčera po zetkanju ze swojim letiskim kolegu w zastojnstwje Edgarsom Rinkevicsom w stolicy Rize. Wěstota Europy je kruće zwjazana z wěstotu baltiskich krajow, rjekny wona k zahajenju wopyta Letiskeje, Estiskeje a Litawskeje.
Raznje kritizowaše Baerbock energijowu politiku napřećo Ruskej ze stron bywšeje zwjazkoweje kanclerki Angele Merkel (CDU). Zakitowanje wot krajow srjedźneje a wuchodneje Europy dawno kritizowaneho němsko-ruskeho płunowoda Nord Stream 2 bě z jeje wida „fatalny zmylk“. „Město Nord Stream bychmy Baltic Stream na zakładźe čisteje energije twarić móhli a poprawom dyrbjeli“, wona doda. „To běchu jasne a widźomne zmylki, kotrež je nowe zwjazkowe knježerstwo mjeztym skorigowało.“
Wočakuja rusku ofensiwu
Dalše wojowanja wokoło ukrainskeho Luhanska – Zelenskyj optimistiski
Kijew (dpa/SN). Ruske wojerske jednotki ze swojej ofensiwu w Ukrainje pokročuja. Wočakowanu wulkoofensiwu pak drje hišće zahajili njejsu. Minjenu nóc rozprawjachu z wjacorych ukrainskich městow wo wobtřělenju ze stron ruskeho wójska. Wulki dźěl kónčiny wokoło Luhanska je po ukrainskich informacijach w rukach ruskeho wójska, pječa něhdźe 80 procentow. Do toho běchu ukrainske jednotki město Kreminnu wopušćili. Tež měsće Rubišne a Popasna stej po informacijach regionalnje zamołwitych „zdźěla“ pod ruskej kontrolu. Tuchwilu tam pak hišće zasakle wojuja. Při zahajenju ruskeje inwazije před něhdźe wosom tydźenjemi mějachu separatisća „Ludoweje republiki Luhansk“ jenož 30 procentow teritorija w swojich rukach.
To a tamne (21.04.22)
Z pomocu mobilneho telefona su pilatko wuchowali, kotrež bě jutry njedźelu do kanalizacije w Bremerhavenje padnyło. Wohnjowi wobornicy z telefonom wołanje kački za młodźatom nahrawachu a w kanalizaciji wothrawachu. Tak móžachu pilo namakać a wuchować. Młode zwěrjo bě do nadróžneho gullyja padnyło, štož pěšcy wobkedźbowachu.
Na kofej, pizzu a solotej wjeseli so němski astronawt Matthias Maurer, kotrehož słužbny čas w swětnišćowej staciji ISS so po šěsć měsacach nachila. Kónc apryla ma so wón na zemju nawróćić. „Wjeselu so jara“, rjekny 52lětny powěsćerni dpa, na wšo to, štož w swětnišćowej staciji njeměješe. Wosebje čerstwa jědź jemu pobrachowaše: čerstwy sad, čerstwa solotej, horca pizza a wočerstwjace napoje. „A wězo na prawy kofej, Latte Macchiato z bitym mlokom horjeka.“
Žadaja sej dale wotstup Wöllera
Drježdźany (dpa/SN). Po krizowym posedźenju ze sakskim nutřkownym ministrom Rolandom Wöllerom (CDU) je dźěłarnistwo policije swoje žadanje za wotstupom ministra potwjerdźiło. Předsyda Dźěłarnistwa policije (GdP) Hagen Husgen rěčeše wo dołhej, intensiwnej a wěcownej rozmołwje. W njej je Wöller lěpšu komunikaciju připowědźił. Najebać to žadaja sej jeho wotstup. Ministra hižo dny dołho personelnych rozsudow dla kritizuja, wumjetujo jemu wujowstwo.
Johnson dale we wuskosćach
London (dpa/SN). Britiski premierminister ma swojeje afery zakazanych swjedźenjow za čas lockdowna dla dale mjerzanje. Jutře chcedźa zapósłancy delnjeje komory parlamenta wo tym rozsudźić, hač ma přepytowanski wuběrk dotalne wuprajenja Johnsona na to pruwować, hač su wěrne. Dyrbjało-li so wukopać, zo je parlament nałžał, ma wón wotstupić. Wčera bě Johnson w tutej naležnosći zapósłancow wo wodaće prosył.
Telewizijny duel do wólbow
Swjatočnje su wčera w Pólskej 79. róčnicu zběžka we Waršawskim ...
Kritizuja poskitk Scholza jako njedosahacy
Kijew (dpa/SN). Ukraina je na wuchodźe kraja z masiwnej koncentraciju ruskich wojerskich jednotkow konfrontowana. „Nětko je praktisce wšón do boja kmany dźěl ruskeje armeje na teritoriju našeho kraja a w pomjeznych kónčinach zhromadźeny“, rjekny ukrainski prezident Wolodymyr Zelenskyj minjenu nóc we widejowym poselstwje. Mjeztym je Ruska zakitowarjam wobkruženeho města Mariupol dalši ultimatum stajiła, so podać. Za to chce ruske wójsko w běhu popołdnja přiměr wukazać, zo móhli wojowarjo brónje złožić a ciwilisća město wopušćić. Dotal njejsu ukrainscy wojowarjo na tajke ultimata reagowali.
Mjeztym w Němskej dale wo móžnym dodawanju ćežkich bróni Ukrainje diskutuja. Nastork su najnowše wuprajenja zwjazkoweho kanclera Olafa Scholza (SPD). Wón bě Ukrainje přilubił, zo chcył brónje němskeje brónjenskeje industrije financować. Při tym jedna so wo tanki a lětadła wotwobarace systemy, municiju a podobne brónje.
Baltiske kraje bóle podpěrować
Zajim jara wulki
Lipsk/Drježdźany/Kamjenica (dpa/SN). Po ćěkanju před wójnu w Ukrainje prócuje so wjele studowacych wo pokročowanje swojeho wukubłanja. Hač k jutram je 700 naprašowanjow zajimcow na Drježdźanskej Techniskej uniwersiće dóšło. K lětušemu lěćnemu semestrej je so pjeć wosobow zapisało, kotřiž chcedźa po zahajenju studija w Ukrainje dale w stolicy Sakskeje studować. Na zakładźe tak mjenowaneho Learning Agreement, štož je móst za ćěkanych studentow wšitkich krajow, je pokročowanje z regularnym studijom dale móžne. Na Lipšćanskej uniwersiće bu dźesać Ukrainjanow imatrikulowanych. W měrcu štyrjoch do studijneho kolegija přiwzachu. Wot februara nimo toho wjac hač 900 na studiju zajimowanych Ukrainjanow poradźuja. Kamjeničanska Techniska uniwersita přizjewi 26 požadanjow Ukrainjanow, kotřiž chcedźa ze studijom pokročować. Předewšěm potrjechi to wobłuk MINT předmjetow, ke kotrymž słuša mjez druhim matematika abo technika.
To a tamne (20.04.22)
Wospjet wobkradnjena žona w sewjerorynsko-westfalskim Herne je dekoraciskeho jutrowneho zajaca z nawigaciskim nastrojom wuhotowała a po tutym puću paducha zwěsćiła. Jutrowna dekoracija bě so minjene lěta stajnje zaso z rowa zemrěteho mandźelskeho zhubiła. Tónkróć měješe hornčerski zajac sćelak při sebi. Jako bu dekoracija njedźelu znowa pokradnjena, móžeše 65lětna zhubjeny předmjet w bliskim zahrodkownišću zwěsćić. Policisća pokradnjeneho zajaca pola 72lětneho sćazachu a jeho žonje wróćichu. Paducha wobskorža.
Woheń na dworje zakładneje šule je w Hirschfelde njedaloko Zhorjelca zasadźenje policije zawinował. Młodostni běchu woheń zadźěłali a samo štom pušćili, jako bě jim drjewo wušło. Po pokiwje wobydlerja zastojnicy woheń zhašachu a pósłachu sydom młodostnych domoj.
Město swjateje Marije zničene
Mariupol (B/SN). Postsowjetske industrijne město Mariupol je ruske wójsko nimale dospołnje zničiło. Město bu 1780 załožene a ma 1 600lětnu křesćansku tradiciju. W běhu nětčišeje wójny su wjele cyrkwjow a cyrkwinskich drohoćinkow zničili. Tak je so w Mariupolu česćena „ikona swj. Jurja z Bachćisaraja“ zhubiła runje tak ikona swj. Ignacija, wot kotrejež bu znajmjeńša dźěl na domjacu grjeksku kupu Kythnos wuchowany. Roztřěskany je pomnik metropolita Ignaciusa před grjekskim kulturnym institutom. Tuchwilu steji hišće 2004 swjećena cyrkej swj. Ignaciusa z jeje pozłoćanymi kupolemi, kotrež kaž paćer wo měr do njebja sahaja.
Měšnicy přećiwo patriarchej
