Naslědnistwo zrjadować
Berlin (dpa/SN). Dobre štyri měsacy po nastupje amploweje koalicije dyrbja Zeleni za swójbne ministerstwo nowu ministerku abo noweho ministra pomjenować. Nawodnistwo strony je wčera připowědźiło, zo chcyli w blišim času naslědnistwo wčera wotstupjeneje Anne Spiegel zrjadować. Zwjazkowe předsydstwo Zelenych je so dźensa w schleswigsko-holsteinskim Husumje ke klawsurnemu posedźenju zešło a tam drje tež wo personalnych prašenjach rěčało.
Baerbock w Maliju
Bamako (dpa/SN). Wonkowna ministerka Annalena Baerbock (Zeleni) je dźensa w afriskim Maliju na wjacore dny trajacy wopyt dolećała. Politikarka chce so tam ze zastupnikami europskeje wukubłanskeje misije EUTM a wěstotneje misije UNO Minusma zetkać. Ze stron Němskeje je dohromady 1 400 wojakow zwjazkoweje wobory wobdźělenych. Wobaj mandataj kónc meje kónčitej. Wo jeju podlěšenju dyrbitej zwjazkowe knježerstwo a zwjazkowy sejm hač do toho rozsudźić.
Nadpadnik zatřěleny
Syły ludźi wopytuja tele dny najsławnišu wišninu Japanskeje ...
Merkel nochce so dale wuprajić
Berlin (dpa/SN). Bywša zwjazkowa kanclerka Angela Merkel (CDU) wostanje najebać wotpowědne namołwy tež ze swojeje strony při tym, zo njebudźe so tuchwilu wo swojej politice napřećo Ruskej wuprajić. Na prašenje, hač je swoje nastajenje mjeztym změniła a hač planuje dalše stejišćo, rjekny jeje rěčnica wčera powěsćerni dpa „ně“. Wona zdobom na to pokaza, zo chcyše so Merkel w běhu dnja z Italskeje nawróćić a zo nochce žane dalše informacije wo priwatnych planach do zjawnosće dać.
Ministerski prezident Schleswigsko-Holsteinskeje Daniel Günther (CDU) bě nowinarjam rjekł, zo nikoho njeznaje, kiž njeby přiznał, zo su we wobchadźenju z Ruskej zmylki činili a zo bě zapad lochkowěriwy. Debata wo tym je nuznje trěbna. Merkel bě ruski nadpad na Ukrainu zasudźiła a rjekła, zo prócowanja podpěruje, wójnu spěšnje skónčić.
Wočakuja nadpad
Steinmeier Polakam so dźakował
Berlin/Waršawa (dpa/SN). Zwjazkowy prezident Frank-Walter Steinmeier je so dźensa na dźeń trajacy wopyt do Pólskeje podał. We Waršawje wočakowaše jeho pólski prezident Andrzej Duda. W srjedźišću rozmołwow steješe wojerski nadpad Ruskeje na Ukrainu. Zwjazkoweho prezidenta přewodźuje toho mandźelska Elke Büdenbender. Wobaj chcyštaj po tutym puću jězbu nachwatać, kotruž dyrbještaj w měrcu infekcije z koronawirusom dla krótkodobnje wotprajić.
Steinmeier chcyše po informacijach zwjazkoweho prezidialneho zarjada signalizować, zo steja Němcy a Polacy zhromadnje po boku Ukrainy. Nimo toho chcyše zwjazkowy prezident dźak a respekt za přiwzaće ćěkancow z Ukrainy wuprajić. Po pólskich informacijach je sej dotal 2,7 milionow ludźi z Ukrainy wójny dla do Pólskeje wućeknyło. Na programje steješe tež wopyt w centrumje dobrowólnych pomocnikow Carity. Je to druhi wukrajny wopyt Steinmeiera po znowawuzwolenju do zastojnstwa. Prěni wjedźeše jeho minjeny pjatk do Finskeje.
Křesćenjo jenož hišće mjeńšina
Socialni wědomostnicy rěča wo historiskej cezurje po lětstotkach
Berlin (dpa/SN). Po wobličenjach fachowcow je nětko mjenje hač połojca wobydlerjow Němskeje z čłonom w jednej z wobeju cyrkwjow. „Je to historiska cezura, dokelž njeje, hdyž to w cyłku wobhladujemy, prěni króć po lětstotkach wjace ‚normalne‘, čłon cyrkwje być“, rjekny socialny wědomostnik Carsten Frerk wot slědźenskeje skupiny za swětonahlady w Němskej. „Woteběracy trend hižo dlěje wobkedźbujemy. Tón pak je so minjene šěsć lět raznišo pospěšił hač smy sej to myslili.“ Jutry jako najwažniši swjedźeń křesćanow wotměja so tuž lětsa prěni króć po wjacorych lětstotkach w Němskej, w kotrejž njeje wjetšina ludźi wjace cyrkwinsce wjazana.“
Před 30 lětami bě hišće 70 procentow ludźi w romsko-katolskej abo w ewangelskej cyrkwi zakótwjenych. Před 50 lětami bě hišće wjace hač 90 procentow ludźi z čłonom cyrkwje – znajmjeńša w tehdyšej zwjazkowej republice a w zapadnym Berlinje. Analyza cyrkwje pokazuje, zo w lěće 2060 drje jenož hišće něhdźe 30 procentow wobydlerjow katolskej abo ewangelskej cyrkwi přisłuša.
Němska pola ćěriwa najdróša
Wiesbaden (dpa/SN). Jenož mało krajow w Europje ma hišće wyše płaćizny bencina a diesela hač Němska. Jenož w Finskej a Šwedskej je diesel tuchwilu hišće dróši, Zwjazkowy statistiski zarjad wčera zdźěli. Po informacijach zarjada płaćeše diesel 4. apryla 2,06 eurow na liter. To je 45 centow wjace hač w susodnej Pólskej. Mjeztym je so płaćizna snadnje znižiła a wučinješe njedźelu 1,995 eurow.
Tež w druhich susodnych krajach je diesel wo wjele tuńši, na přikład płaći w Luxemburgu 1,76 eurow, w Awstriskej 1,84 a w Francoskej 1,89 eurow. Z woteběracym trendom slědujetej susodnej krajej Čěska a Belgiska z płaćiznu 1,93 eurow a 2,02 euraj. Najtuńši je diesel na kupje Malta, hdźež płaća 1,21 eurow na liter.
Pola bencina słuša Němska z płaćiznu 2,06 eurow k najdróšim krajam Europy. Dróši je sprit jenož hišće w Finskej, Nižozemskej a Danskej. Najpřijomnišo tankuješ w Pólskej, hdźež dyrbja šoferojo 1,42 eurow na liter płaćić. Sćěhuja Awstriska (1,42 eurow), Luxemburg (1,73 eurow), Čěska (1,81 eurow) a Francoska (1,83 eurow). W tójšto z tutych krajow su po wudyrjenju wójny w Ukrainje dawki znižili.
Žane transporty zwěrjatow wjace
Podstupim (dpa/SN). Braniborska zakazuje wójny w Ukrainje dla transporty zwěrjatow do Ruskeje, Běłoruskeje a Ukrainy. Howjada, wowcy abo swinje njesmědźa wjace po tutych krajach transportować, dokelž njeje zastaranje skoćatow wjace zaručene. To je ministerstwo za škit přetrjebarjow dźensa w Podstupimje wukazało. Wokrjesy njesmědźa tuž tajke transporty wjace wuhotować. Jeničke wuwzaće je Kaliningradska kónčina.
„Z ruskim nadpadom a z tym zwjazanym njepřewidnym połoženjom njemóžemy ani za wěstotu šoferow ani skotu garantować, tež hdyž transporty snano ani direktnje po wójnskich kónčinach njewjedli“, zdźěli ministerka za škit přetrjebarjow Anna Heyer-Stuffer (Zeleni). Wójny dla dyrbja po posudku ministerstwa z tym ličić, zo mjezy krótkodobnje zawru a zo dóńdźe tam k njewočakowanym a přewšo dołhim čakanskim časam abo k zawrjenju zastaranskich centrumow. Nimo toho dyrbja z wobchadnymi ćežemi wojerskich kolonow abo na puću so hibacych ćěkancow dla ličić. Tuž njeje zaručene, zo transporty po najkrótšim puću swój cil docpěja.
To a tamne (12.04.22)
Hnydom cyły móst pokradnyła je cwólba paduchow w Indiskej. Něhdźe 18 metrow dołhu železnisku konstrukciju su w běhu třoch dnjow rozebrali a dźěle wotwjezli. Policija je wosom podhladnych zajała a w tym zwisku bager, 247 kilogramow železa a dalši material sćazała. Dźěle mosta běchu wikowarjam šrota předali.
Makabernu zběrku wulkich wutykanych zwěrjatow je španiska policija njedaloko Valencije namakała. Po wotpowědnym pokiwje podachu so zastojnicy k ležownosći w małym měsće Bétera z halemi a wulkej wilu: Tam wuhladachu 1 090 wutykanych elefantow, nosorohačow, běłych mjedwjedźow, lawow, leopardow a tigrow – nastajenych před kulisu afriskeje sawany. Je to najwjetša priwatna zběrka, kotruž su hdy w Španiskej namakali, policija zdźěla. Policija trochuje hódnotu na 30 milionow eurow.
Bamž na kupje Malta
Gharb/Valletta (B/SN). Nimale dwě lěće su wobydlerjo Malty na wopyt bamža Franciskusa korony dla čakali. Něhdźe 2 000 přewažnje młodostnych so na naměsće zhromadźi, zo bychu 85lětneho ze žołto-běłymi chorhojčkami a popowej hudźbu witali. Malta je štwórty najmjeńši kraj Europy a na lisćinje krajow z najwyšim podźělom katolskeho wobydlerstwa na druhim městnje, hačrunjež tež tu wustupy z cyrkwje přiběraja. Prezident Malty George Vella rěčeše při witanju bamža wo problemach kaž wo „chorym, mučnym a surowym planeće“ a wo „njepředstajomnych wójnach, ćěkanjach a migracijach“. Bamž jemu w dalokej měrje přihłosowaše, šwikaše pak tež problem korupcije na kupje a přeješe sej „nawrót k rozswětlenju ewangelija“.
Wobmyslenja k wopytej
