To a tamne (23.12.21)
Noweho korčmarja pytaja na wosamoćenej kupje na sewjeru Jendźelskeje. Runje 20 hektarow wulka kupa Piel Island leži na sewjeru połkupy Furness a je něhdźe 800 metrow wot kraja zdalena. Nimo rozwaliny stareje twjerdźizny a někotrych rybarskich chatow je tam korčma Ship Inn. Dotalny wotnajer je zwrěšćił, po tym zo dyrbješe pub korony dla zawrěć. Najebać to chce komuna na kóždy pad noweho korčmarja namakać.
Wo wusadźeneho runje narodźeneho ćěšenka starała je so psyca w Indiskej. Wobydlerjo namakachu nahu holčku w zymnej nocy mjez młodźatami psycy, po tym zo bě dźěćko žałosćiło. Wone je strowe, kaž lěkar při přepytowanju zwěsći. Nětko pytaja za maćerju holčki. W Indiskej zas a zaso holcy wusadźeja, dokelž maja je swójby – hinak hač pola hólcow – za wulke pjenježne poćežowanje.
Jónkrótny krok a što so po tym sta
Dźěłowy zakład serbskeje rady jara njedospołny
Rada za serbske naležnosće w Sakskej je zastupnistwo, kotrež matej tudyši krajny sejm a statne knježerstwo słyšeć, dźe-li wo prawa serbskeje ludnosće dótkace so naležnosće. To wuchadźa z paragrafa 6, wotrězk 2 płaćiweho sakskeho Serbskeho zakonja. „Wšitke zakonje nastupajo, potrjechjace zajimy serbskeho ludu, dyrbi rada słyšana być. Při tym je jej zarjadnistwo krajneho sejma podpěrujo poboku.“ Takle citowachu Serbske Nowiny słowa prezidenta Sakskeho krajneho sejma dr. Matthiasa Rößlera (CDU) w zwisku z nowym jednanskim porjadom parlamenta na konstituowacym posedźenju Rady za serbske naležnosće w 7. wólbnej periodźe loni w meji.
Wo přichodźe regiona ludźi sobu rěčeć dać
Kritika na strukturach za jich změnu po kóncu zmilinjenja brunicy njepopušća. Nětko je so Zwjazk za wobswět a přirodoškit Němskeje (BUND) w Sakskej słowa jimał. Ludźo na městnje maja bóle zapřijeći być. Pod tymle aspektom móhł so tež kónc brunicy hač do lěta 2030 radźić, měni Lěwica.
Lěwica: Iniciatiwy sylnić
Drježdźany (dpa/SN). Sakski krajny sejm je dźensa na swojim poslednim lětušim posedźenju mjez druhim wo financnej politice a wo škiće klimy debatował. Temy běchu SPD a Zeleni na dnjowy porjad aktualneje hodźiny stajić dali. Třeća tema bě namjet Lěwicy. Ta chcyła hladajo na agresiwne protesty přećiwo politice koronawirusa dla ciwilnotowaršnostne iniciatiwy bóle sylnić. Wčera bě krajny sejm mjez druhim wobzamknył, slepych z wjac pjenjezami podpěrać.
Ludźi wosobinsce přeprosyć
Berlin (dpa/SN). Němska etikowa rada so za to wupraja, njedawno wobzamknjene winowatostne šćěpjenje za personal chorownjow a hladarnjow na dalše dźěle wobydlerstwa rozšěrić. Fachowcy namjetuja, ludźi zaměrnje a wosobinsce na šćěpjenje přeprosyć a jim samym rozsudźić dać, z kotrym serumom chcedźa šćěpjeni być. Etikowa rada je njewotwisny gremij 24 fachowcow, kotřiž zwjazkowe knježerstwo w etiskich prašenjach koronapandemije poradźuja.
Biden wabi za šćěpjenje
Dotalny knježacy wyši měšćanosta Berlina Michael Müller je ...
Lauterbach: Ničo njewuzamknyć
Berlin (dpa/SN). Zwjazkowy minister za strowotnistwo Karl Lauterbach (SPD) najnowše wobzamknjenja Zwjazka a zwjazkowych krajow k přewinjenju koronakrizy zakituje, njewuzamkujo razniše naprawy. „Štož smy wobzamknyli, budźe skutkowne“, rjekny Lauterbach wčera wječor w telewiziji ARD. „Ale nochcemy ničo wuzamknyć. Dyrbjeli-li so ličby infekcijow tak wuwiwać, zo dyrbimy wo krutym lockdownje diskutować, potom njebudu žane čerwjene linije. Tuchwilu pak tam hišće njejsmy.“
Zo bychu spěšnemu rozšěrjenju warianty koronawirusa omikron zadźěwali, su Zwjazk a kraje wobšěrne wobmjezowanja zjawneho žiwjenja wobzamknyli. Te pak maja hakle po hodźoch płaćić. Wot 28. decembra smě so zasadnje jeno dźesać wosobow priwatnje zetkać. Kluby a diskoteki kaž tež koparske stadiony wostanu potom za zjawnosć zawrjene.
Dale na so słuchać
Scholz a Putin wo Ukrainje rěčałoj
Moskwa/Berlin (dpa/SN). Wosrjedź masiwnych napjatosćow mjez Moskwu a Berlinom staj ruski prezident Wladimir Putin a zwjazkowy kancler Olaf Scholz (SPD) w telefonaće swoju zwólniwosć k rozmołwam signalizowałoj. Wobě stronje stej na wuwiću rusko-němskich poćahow zajimowanej, rěkaše z Krjemla. Bě to prěni telefonat wobeju politikarjow po nastupje Olafa Scholza jako kancler.
Po informacijach zwjazkoweho knježerstwa rěčeštaj Scholz a Putin tež wo zesylnjenej ruskej wojerskej prezency njedaloko ukrainskeje mjezy. Kaž rěčnik zwjazkoweho knježerstwa zdźěli, je Scholz swoje starosće hladajo na połoženje zwuraznił. Putin informowaše jeho w tym zwisku wo ruskich namjetach za zawjazowace wěstotne garantije. Ruska je NATO, USA a jich zwjazkarjam, mjez druhim Němskej, naćisk wotpowědneho dojednanja přepodała. W nim žada sej kónc rozšěrjenja NATO do směra na wuchod, dokelž čuje so z toho wohrožena.
Čakać na ruski nadpad
EU kritizuje pólski zakoń
Brüssel (dpa/SN). Medijowa krajina w Pólskej steji po měnjenju komisije EU pod dźeń a wjetšim ćišćom. Nowy rozhłosowy zakoń móhł k nanuzowanej změnje wobsydstwowych strukturow w medijowych předewzaćach wjesć a je chutne riziko za swobodu a mnohostronskosć medijow, zdźěli rěčnik komisije w Brüsselu. „To móže k wobmjezowanju medijoweje swobody wjesć, kotraž hižo přiběraceje polarizacije dla ćerpi.“
Pólski parlament bě změnu rozhłosoweho zakonja minjeny pjatk wobzamknył. Po tym dóstanu wukrajne medijowe předewzaća jenož hišće licency, hdyž maja swoju centralu we wobłuku europskeho hospodarskeho ruma. Po słowach kritikarjow měri so zakoń přećiwo priwatnemu sćelakej TVN, kiž je knježerstwu PiS napřećo kritisce nastajeny.
Doskónčnje rozsudźić dyrbi nětko prezident Andrzej Duda, kiž móhł zakonjej ze swojim wetom hišće zadźěwać. Ministerski prezident Mateusz Morawiecki změnu zakonja zakituje a skedźbnja na to, zo wobsteja podobne wobmjezowanja na njedobro wukrajnych inwestorow tež w Němskej, Francoskej a Awstriskej.
