Hišće je nadźija
Wulki nawal „postcovida“ dla
Lipsk (dpa/SN). Naprašowanja za lěkowanjom pacientow z dołhodobnymi symptomami schorjenja na koronawirus přesahuje móžnosće sakskeju uniwersitneju chorownjow w Drježdźanach a Lipsku. „Kapacity dawno hižo njedosahaja, tola wjace njeje tuchwilu móžno. Bychmy sej w tym nastupanju wjace pjenježneje podpěry ze stron chorobnych kasow přeli“, rjekny Paul Baum wot ambulancy Lipšćanskeje uniwersitneje kliniki za zastaranje pacientow z postcovidom. Tam lěkuja ludźi, kiž tež měsacy po přetratej infekciji z koronawirusom difuznych symptomow kaž nuzy při dychanju, wučerpanosće abo „mły w mozach“ dla ćerpja.
W Lipsku zastaruja tež potrjechenych z druhich zwjazkowych krajow kaž z Bayerskeje, Saksko-Anhaltskeje a Durinskeje. Podobne je połoženje na Drježdźanskej uniwersitnej klinice, kotraž poskića psychosomatiske rěčne hodźiny. Tež tam maja za nuznje trěbne, kapacity rozšěrić, zo móhli lěpje pomhać.
Njemóža so dojednać
Na wjerškowym zetkanju EU rozdźělnje na omikron reagowali
Brüssel (dpa/SN). Hladajo na wulke starosće noweje warianty koronawirusa omikron dla su čłonske kraje Europskeje unije wčera w Brüsselu za zhromadnej liniju nastupajo swobodne pućowanje po EU pytali. Na prěnim wjerškowym zetkanju EU z nowym němskim kanclerom Olafom Scholzom (SPD) běchu wjacori statni a knježerstwowi šefojo hladajo na nowe winowatosće testowanja skeptiscy. Při tym su kraje kaž Italska a Irska nowe prawidła dawno přesadźili. Tak hrozy zaso raz šmjatańca postajenjow w Europje. Tuchwilny certifikat jako dopokaz šćěpjenja abo wustrowjenja, kiž bě pućowanje po Europje dotal wolóžił, móhł hižo bórze swój wuznam zhubić.
To a tamne (17.12.21)
Sam do ćaha skočił je šěsć měsacow stary psyk z mjenom Baldur w Münsteru a je bjez swojeho wobsedźerja wotjěł. Policija pak so z pomocu interneta wo to postara, zo běštaj wón a wobsedźer spěšnje zaso zjednoćenaj. Tak twitterowaše z fotom psa, zo za jeho wobsedźerjom pyta. Muž tweet wuhlada a so přizjewi. Swědk bě wobkedźbował, kak pos na dwórnišću do ćaha skoči, a informowaše policiju.
Składowar wačokow je sej w lětadle w indiskim Mumbaiju wusnył, po tym zo bě kófry zapakował. Lětadło ze slepym pasažěrom wotleća na to do Abu Dhabija. Hakle po přizemjenju w Zjednoćenych arabskich emiratach sobudźěłaćerjo lětanišća muža wuhladachu. Lěkarske přepytowanje wunjese, zo je jeho ćělny staw „stabilny a normalny“. Wón móžeše w samsnej mašinje wróćo lećeć, njesmě pak najprjedy raz swoju słužbu dale wukonjeć.
Kampanju za rěč hač do lěta 2024 dale wjesć
Budyšin/Drježdźany (SN). Zapósłancy wšěch frakcijow Sakskeho krajneho sejma kaž tež zastupjerjo statneho ministerstwa za kulturu a turizm wobdźělichu so na wčerawšim, pandemije dla, online-posedźenju Rady za serbske naležnosće w Sakskej.
Aktualny staw imageoweje kampanje „Sorbisch? Na klar.“ rozłoži Christina Flume ze statneho ministerstwa za wědomosć, kulturu a turizm. Wona skedźbni na pozitiwne wuwiće wosebje w socialnych syćach kaž tež na někotre kedźbyhódne projekty, kaž su to „serbski“ ćah a bus, wuhotowanje fasady w Budyšinje a zawodny časopis w Nadróznej Hrabowce, kotrež tyja wědomju za Serbow a serbšćinu. Ministerstwo kampanju lětsa ze 130 000 eurami spěchuje. Kaž Christina Flume připowědźi, chcedźa kampanju tež klětu a w přichodnym dwójnym etaće swobodneho stata 2023/2024 dale wjesć To wuchadźa z nowinskeje informacije serbskeje rady. Jeje čłonojo prašachu so mjez druhim za ewaluaciju kampanje a dalšimi móžnosćemi wabjenja, kaž na přikład w rozhłosowych sćelakach.
Prěnje přesłyšowanja po raciji
Drježdźany (dpa/SN). Po wčerawšej raciji pola čłonow internetneje skupiny smjertnych hroženjow přećiwo sakskemu ministerskemu prezidentej Michaelej Kretschmerej (CDU) dla su prěnje přesłyšowanja wotzamknjene. Hač su so wobskorženi k wumjetowanjam wuprajili, njemóžeše rěčnik krajneho kriminalneho zarjada rjec. Z woprašowanjemi chcedźa pokročować a sćazane dopokazy wuhódnoćić. Policija bě bydlenja podhladnych wčera rano přepytała.
Srědki zaměrnišo zasadźić
Drježdźany (dpa/SN). We wuchodoněmskich brunicowych krajach njejsu pomocne srědki wjacorych miliardow eurow za strukturnu změnu po měnjenju instituta Ifo zaměrnje dosć zasadźene. „Tuchwilne směrnicy za spěchowanje měli spěšnje změnić, hewak přetwar hospodarstwa w potrjechenych kónčinach zwrěšći“, rjekny nawoda Drježdźanskeje wotnožki instituta Joachim Ragnitz. Dotalne projekty su skerje na to wusměrjene, powšitkowne žiwjenske wuměnjenja wobydlerjow polěpšić, wón kritizuje.
Wobmjezuja pućowanje
Rekordny dobyćer swětowych mišterstwow formule 1 Lewis Hamilton ...
Žanu šćěpjensku winowatosć
Berlin (dpa/SN). W debaće wo winowatostne šćěpjenje přećiwo koronawirusej bu zwjazkowemu sejmej prěni naćisk próstwy zapodaty. Wot wjace hač 20 zapósłancow FDP podpisany dokument měri so jasnje přećiwo tajkej winowatosći. Zwjazkowy sejm měł wobzamknyć, „zo njebudźe w Němskej žana winowatosć šćěpjenja wukazana“. Zwjazać měł to „z namołwu, zo so po móžnosći wjele ludźi přećiwo koronawirusej škita, z tym, zo wužiwaja poskitki šćěpjenja“. Najprominentniši podpisar dokumenta, kiž powěsćerni dpa předleži, je wiceprezident zwjazkoweho sejma Wolfgang Kubicki. Zwjazkowe knježerstwo měło ludźi ze šěroko zapołoženej wabjenskej akciju pohnuć so šćěpić dać.
W spisu pokazuja tež na winowatostne šćěpjenje přećiwo jětram a wosypicam. „Koronawirus wutupić pak njeje z tuchwilnymi šćěpiwami docpějomne“, awtorojo pisaja.
Dźěći znjezbožili
Braun: Etatowa solidarita ranjena
Berlin (dpa/SN). Politikar CDU Helge Braun je dodatny etat amploweje koalicije SPD, Zelenych a FDP wótrje kritizował. Bjezposrědnje do spočatka dźensnišeje debaty zwjazkoweho sejma rjekny bywši šef kanclerskeho zarjada: „To budźe jara chutna debata, dokelž so jara starosćimy. Je to jara zasadne ranjenje etatoweje solidarity w Němskej, štož tule runje dožiwjamy.“
Financny minister Christian Lindner (FDP) chce za inwesticije do škita klimy a digitalizacije 60 miliardow eurow přerjadować, kotrež běchu lětsa jako kredity hižo přizwolene, bjez toho zo bychu dotal trěbne byli. Lindner chce srědki w fondsu za klimu a transformaciju składować, zo bychu tež přichodne lěta hišće k dispoziciji byli. Nowe kredity Zwjazk z přerjadowanjom srědkow njetrjeba. Opozicija ma krok Lindnera přiwšěm za wustawu ranjacy, dokelž so srědki, kotrež běchu za bój přećiwo koronakrizy přizwolene, nětko za škit klimy a hinaše předewzaća wužiwaja. Wona chce etat wot wustawoweho sudnistwa pruwować dać.
