To a tamne (27.12.19)
Z blešu piwa w ruce je muž z Kölna w nocy na štwórtk ze swojim e-scooterom na awtodróze po puću był. Wokoło 2.20 hodź. běchu hnydom wjacore nuzowe telefonaty pola policije dóšli. Šoferojo rozprawjachu, zo běchu muža z elektriskim rolerom na A 4 pola Olpe na nabóčnej čarje widźeli. Zastojnicy jeho krótko na to zadźeržachu. Test wunjese 1,3 promile alkohola w kreji. Policistam muž rjekny, zo je so mylnje na awtodróhu dóstał. Jemu hrozy nětko jednanje jězdźenja pod wliwom alkohola dla.
Hodowny karp je w Čěskej ćežke wobchadne njezbožo zawinował. Šoferka bě žiwu rybu w małej plastowej wańčce na pódlanskim sedle transportowała a jenož z plastowej titu zawodźěła. Ryba pak so tam a sem mjetaše a skónčnje z wańčki 62lětnej žonje na klin wuskoči. Ta so tak nastróži, zo kontrolu nad jězdźidłom zhubi a w Čěskej Lipje do betonoweho sćežora nadróžneho wobswětlenja prasny. Ju dowjezechu ćežko zranjenu z helikopterom do chorownje. Přiwšěm njebě w smjertnym straše, policija rozprawja.
To a tamne (23.12.19)
Wšědnje ludźom pakety rozdawać je dweju roznošowarjow w Mindenje krótko do hód na kriminelnu mysličku přinjesło: Město toho zo byštaj je adresatam dałoj, wočinještaj pakety w transporteru samaj. Jako wonaj na dźěło njepřińdźeštaj, chcyše jeju dźěłodawar doma wopytać. Tam pak namaka jenož wopušćenej transporteraj a tójšto prózdnych kartonow. Roznošowarjej w starobje 27 a 29 lět staj zhubjenaj.
Muža w kófrowym rumje přezpólneho wosoboweho awta je za nim jěduca šoferka za ćěło měła, a tak alarmowaše wona policiju. Zastojnicy podachu so k bydlenju wobsedźerja awta a nańdźeštaj tam čiłeju a stroweju mandźelskeju. Kaž muž jim rjekny, chcyše tomu zadźěwać, zo so runje kupjena kuchinska dźěłowa plata z kófroweho ruma sunje. Tak bě so na platu lehnył a z ruku dźeržeše kófrowe durje awta, kotrež žona wodźeše. Policija wšak nětko pruwuje, hač njenapisa mužej chłostanku zwažliweje jězby dla.
To a tamne (20.12.19)
Prěni króć sobu rozsudźić smědźa wobydlerjo Mariánskich Lázni wo rozdźělenju wosebiteje sumy měšćanskeho etata. We wobłuku programa „Wuhotujemy swoje město zhromadnje“ móža woni pjeć inwesticiskim projektam dypki dać. Najwuspěšniše chcedźa zwoprawdźić. Mjez projektami su psyče hrajkanišćo, wobswětlenje studnje w parku, zjawne knižne kamory a nowe grilowanišćo.
Sućelna kruwa je wčera železniski wobchad mjez Gießenom a Wetzlarom w Hessenskej hodźiny zlemiła. Poprawom chcychu „Lottu“ rano do Gießenskeje zwěrjećeje kliniki dowjezć. Wona pak skoči z připowěšaka a twochny na kolije. Hakle po štyrjoch hodźinach móžachu kruwu z kolijow zehnać. Skótny lěkar bě spočatnje podarmo spytał ju z narkozowymi kłokami pohłušić. Připołdnju móžachu železnisku čaru zaso wužiwać.
To a tamne (19.12.19)
Silwestra dla chcedźa w Berlinskim měšćanskim dźělu Srjedźa wšitke 1 300 parkowanskich awtomatow zamknyć, zo bychu je před praskotakami škitali. Kaž přisłušny porjadniski zarjad zdźěla, budu awtomaty wot 27. decembra hač do 1. januara wotpowědnje škitane. Šoferojo maja so najebać to na nadróžny porjad dźeržeć. Pak zapłaća z mobilnym telefonom, pak połoža sej parkowansku tačel do awta. Štóž so na to dźerži, tón budźe ze šokolodku mytowany, kaž rěka.
Z nostalgiskej podzemskej železnicu móža zajimcy w do- a hodownym času po New Yorku jězdźić. Ćah z 30tych lět wozy hosći po podzemskim systemje ameriskeje metropole. Zamołwići na to dźiwaja, zo wšitko kaž něhdy wupada. Na sćěnach wisaja plakaty tehdyšeho časa, kotrež wabja za wójnske požčonki abo mydło za dźesać centow.
To a tamne (18.12.19)
W padźe pozdatneho smjerda z twarožkarnje w hornjej Bayerskej je sudnistwo rozsudźiło: Susodka njesmě so hižo dlěje z nalěpkami na smjerd hóršić, za to smě pak wšudźe wo tym powědać, zo ma smjerd za wobćežowacy a zo so na njón mjerza. „To je zwuraznjenje měnjenja“, rěčnica sudnistwa zdźěli. Dokelž bě žona zas a zaso nalěpki ze zwobraznjenym nosom připrawjała, je mějićel wobchoda a twarožkarnje přećiwo tomu skoržił.
Z čerwjenym měškom, połnym chłóšćenkow, je braniborske knježerstwo na Berlinskim Hłownym dwórnišću měšćanow, kotřiž wšědnje z ćahom do Braniborskeje na dźěło jězdźa, wabiło do Braniborskeje přećahnyć. 3 000 tajkich měškow měješe dźěl marketingoweje kampanje być: Čehodla wjele časa w ćahu přesedźeć, hdyž móžeš tež tam, hdźež dźěłaš, tež cyle derje žiwy być?
To a tamne (17.12.19)
Sam zahrjebał je so paduch, ćěkacy před policiju w hornjej Bayerskej. Zastojnicy namakachu 24lětneho nimale dospołnje pokryteho w lěsu. Muž bě so do wužłobiny lehnył a so z hałzami a lisćom zawodźěł. Jeho kumpanaj móžeštaj ćeknyć. Swědcy su trójku překwapili, kotraž bě spytała so do wobchodneho domu zadobyć, ale so na to chětř zminy. Policija lěs wobstupi a z pomocu helikoptera z wosebitej kameru zahrjebaneho namaka.
W zwadźe wo smjerd z twarožkarnje w hornjobayerskim Bad Heilbrunnje měješe dźensa sudnistwo rozsudźić. Při tym dźěše wo prašenje, hač smědźa so wobydlerjo domu nad wobchodom z nalěpkami na smjerd hóršić, kotryž so pječa po cyłym domje rozpřestrěwa. Zwada traje hižo wjacore lěta. W zadnim dźělu wobchoda je twarožkarnja, w kotrejž leža a zrawja tři tony twarožka.
To a tamne (16.12.19)
Škleńčanu hodownu pyramidu z 5 038 palencowych blešow su w Schleswigsko-Holsteinskej natwarili. Wjace hač 20 muži trjebaše dwaj dnjej, zo bychu 6,50 metrow wysoki twar w Bendorfje we wokrjesu Rendsburg-Eckernförde zdokonjeli. Zezběrali běchu bleše pola hosćencarjow a na wjesnych swjedźenjach. Nětko chcedźa so naprašować, hač maja wuhlady na zapis do Guinnessoweje knihi rekordow.
Pěskowčik je rumpodicha wopytał. Wobaj postrowištaj so sobotu w braniboskim Himmelpforće, hdźež ma rumpodich swoju póstowu filialu. Pěskowčik rozhladowaše so tež po hodownych wikach. Wobaj lubuškaj dźěći swjećitaj lětsa jubilej: Pěskowčik bu w nowembru 60 lět, rumpodich přijimuje mjeztym 35 lět listy dźěći. Tam dochadźeja hodowne přeća dźěći ze wšeho swěta, na kotrež rumpodich swěru wotmołwja.
To a tamne (13.12.19)
Premiju dźesać milionow dolarow (nimale dźewjeć milionow eurow) je ameriske předewzaće njewočakowano swojim sobudźěłaćerjam k hodam dariła. Na hodowničce imobilijoweje firmy z Baltimora přepodachu přistajenym čerwjene listowe wobalki. Suma wučinješe wotpowědnje słužbnym lětam mjez sto a 270 000 dolarami za něhdźe 200 sobudźěłaćerjow. Šef rozłoži, zo je z dźakownosće jednał, dokelž je firma wažny zaměr docpěła. W dołhich rynkach stejo so přistajeni jemu dźakowachu.
Wěrowanski pjeršćeń su sobudźěłaćerjo wólbneho lokala w britiskim Hale Barnsu namakali. Njemało so dźiwachu, jako so tam debjenka z wólbneje urny wukuli. Prawdźepodobnje je so pjeršćeń někomu z porsta sunył, jako bě wčera wólbny lisćik za nowy parlament do kašćika tyknył.
To a tamne (12.12.19)
Za trjebane žwjenkački maja w Berlinje wot najnowšeho wosebite sćěny, na kotrež móža je ludźo zlěpić. Zawod za rjedźenje města je so po dwuměsačnym wupruwowanju rozsudźił, 25 tak mjenowanych „gum walls“ w nutřkownym měsće zarjadować. Zamołwitych hižo dołho mjerza, zo ludźo žwjenkačk cyle jednorje na dróhu plunu.
Dźewjećlětny Japanjan je test matematiki na uniwersitnym niwowje wobstał. Shogi Ando, šuler 4. lětnika w prowincy Hyogo na zapadźe kraja je tak nowy starobny rekord nastajił. Hólčec bě před lětomaj započał za test wuknyć. Swoje kmanosće chcył na dobro towaršnosće zasadźeć, na přikład w boju přećiwo woćoplenju zemje. W Japanskej dźeń a młódše dźěći za šulski wuspěch trenuja. Často wužiwaja hižo do šulskeho zastupa zwonkašulsku wuknjensku pomoc.
To a tamne (11.12.19)
Pulowry z hodownymi motiwami su mjez kupcami tuchwilu jara požadane, byrnjež někotre grawoćiwe byli. Tak poskićeše předewzaće Walmart na swojej kanadiskej internetnej stronje pulower, na kotrymž rumpodich drogi bjerje. Dźerži rołku w ruce, jeho woči stej chětro wulkej a na blidźe su tři rynki z běłym próškom wotmolowane. Mjeztym je Walmart poskitk wotstronił.
Prěnje němske žonjace mustwo, wobstejace ze štyrjoch Hamburgčankow, chce so na najćešim wubědźowanju swěta wobdźělić a z wosom metrow dołhim čołmom Atlantiski ocean přeprěčić. Za cyłkownje 5 000 kilometrow na wodźe planuja wone 40 dnjow a podadźa so jutře na puć. Cyłkownje 18 měsacow su so na wubědźowanje přihotowali, na kotrymž wobdźěli so sto ludźi z dwanaće krajow.
