To a tamne (13.03.20)
K wulkej bijeńcy mjez wopicami je tele dny w thailandskim měsće Lopburi dóšło. Kaž z internetneho wideja wuchadźa, su so tam wjacore swójby wopicow do so dali, štož je w tajkim rozměrje njezwučene. Bitwa wotmě so při horcoće 40 stopnjow a trajacej suchoće. Prawdźepodobnje nimaja wopicy dosć picy, dokelž ličba turistow coronawirusa dla spochi woteběra. Turistam su wopicy wosebita atrakcija, a tak je rady picuja.
Wulki skorpawowy rak je wědomostnicy na Hodownych kupach w Indiskim oceanje 6 000 dolarow drohu specialnu kameru pokradnył. Sobudźěłaćerka Western Sydney Uniwersity slědźeše mjez njetopyrjemi, jako něhdźe štyri kila ćežka kraba kameru spakosći. Tale družina rakow je za tajke padustwa znata: Wone su přewšo wćipne a maja dobry nós.
To a tamne (12.03.20)
Před prózdnymi přihladowarskimi městnami Hamburgskeje Połobskeje filharmonije je pop-spěwar James Blunt wčera wječor koncertował. Jako prěni scyła je tam 46lětny Brita bjez publikuma hudźił. Ludźo dyrbjachu corona-wirusa dla doma wostać, móžachu pak koncert internetnje originalnje sćěhować. Blunt hudźeše, jako by žurla wupředata była, a měješe po wšěm zdaću wjele wjesela. Na kóncu je sej band sama přikleskowała.
Chrobłeho wobšudnistwa dla dyrbitaj skućićelej w Francoskej sydom a jědnaće lět do jastwa. Tak rěka wusud Pariskeho sudnistwa. Mužej běštaj so před pjeć lětami jako tehdyši francoski zakitowanski minister Jean-Yves Le Drian wudawałoj, z čimž staj sej miliony eurow předewzaćelow, prominentnych a załožbow wulišćiłoj. Wužiwałoj běštaj silikonowu masku z mjezwočom ministra.
To a tamne (11.03.20)
Woblubowane telewizijne wusyłanje „Pjenjezy za žadnostki“ (Bares für Rares) wuńdźe nětko jako kniha. Wona dawa dohlad za kulisy wusyłanja, kotrež wobradźa sćelakej ZDF wot lěta 2013 prawidłownje tójšto přihladowarjow. W meji chcedźa 1000. slěd pokazać. W knize dokumentuja tež najspektakularniši pad: Z diamantami wudebjeny křiž z relikwijemi bě wobsedźerjej na wšě 42 000 eurow wunjesł.
Přeco hišće w přepytowanskej jatbje w Paraguayju je swětosławny brazilski kopar Ronaldinho. Wón bě minjeny tydźeń z bratrom do Paraguayja přijěł, zo by tam beneficne zarjadowanje přewjedł. Při tym so wukopa, zo běštej jeju pućowanskej dokumentaj falšowanej. Spočatnje za tym wupadaše, zo je wěc spěšnje zrjadowana. Nětko pak wukaza sudnistwo za wobeju jatbu.
To a tamne (10.03.20)
Ćipki město mobilneho telefona – z tajkej njewšědnej akciju chce indoneske město Bandung dźěći wot smartfona wotwabić. Po měnjenju měšćanosty bě naprawa wuspěšna. Kokoše su mjeztym derje narostli. Hač su dźěći za to woprawdźe mjenje časa w interneće byli, njeje dopokazane. Město Bandung bě 2 000 ćipkow rozdźěliło. Njeńdźe pak jenož wo handyje: Dźěći maja nawuknyć zwěrjata lubować a zamołwitosć za nje přewzać.
Najprjedy čerwjeny kał a potom kača pječeń: Dokelž bě žonje w hosćencu w Hornjej Frankskej čerwjeny kał na talerju přezymny, je wona čuwy zhubiła. Wona so wótře pola pinčnicy hóršeše. Jako ta na to ćopły kał přinjese, bě mjeztym kača pječeń wustudnyła. To 56lětnu tak rozhori, zo korčmarku na ruce drapny. Nětko přećiwo njej ranjenja ćěła dla přepytuja. Do hosćenca žona najprjedy wjac njesmě.
To a tamne (09.03.20)
Najdlěše a najćeše wubědźowanje psyčich sankowych zapřahow swěta w Alasce, tak mjenowany „Iditarod“, wjedźe wot Anchoragea, najwjetšeho města zwjazkoweho stata USA, do 1 600 kilometrow zdaleneho Nome nad Beringowym morju. Prěnje z wjacorych dźesatkow mustwow wočakuja tam po dźewjeć dnjach. „Iditarod“ wotměwa so wot lěta 1973.
Přewulka dowěra do nawigaciskeho nastroja wjedźeše šofera Pkw-ja w Dortmundźe do zahuby. Wón zajědźe sobotu rano do přistawoweho basenka tamnišeho Dortmundsko-Emsoweho kanala, dokelž bě dróha „nadobo ke kóncej“. Na zbožo móžeše so 25lětny z podnurjaceho so awta wuchować a na pobrjóh płuwać. Přemokany a přemjerznjeny wołaše na to wo pomoc. Muž wšak bě do jězby alkohol pił a drogi brał, kaž wón policiji pozdźišo sam přizna.
To a tamne (06.03.20)
Z wudu je sej paduch w awstralskim Melbournje wosebitu debjenku přez dźěru wukładneho wokna wobchoda „popadnył“. Dokelž njebě z małkej wudu wuspěšny, sej spěšnje wulku wobstara. Po třoch hodźinach měješe złoćany medaljon skónčnje na hóčce. Policija je drje sej akciju na nahrawanym pasku wobchoda wobhladała, pakostnika w treningowych cholowach pak dotal hišće nima. Wosebje drohotny wšak medaljon njeje, přiwšěm je šef wobchoda zludany. Wšako njeje so ani alarm zaswěćił.
Nuznikowa papjera je hladajo na wupřestrěće corona-wirusa tež w Awstralskej chětro požadana twora. Lokalna nowina je sej tuž žort dowoliła a wčera wosom prózdnych ekstrastronow aktualnemu wudaću připołožiła, z kotrychž móža sej ludźo papjeru přitřihać. „Nimaće žanu hajzlowu papjeru? NT News so wo was stara, a to z limitěrowanej ediciju nuznikowych nowinskich łopjenow“, nowina k tomu pisa.
To a tamne (05.03.20)
Polcy w kupnicach su prózdne, desinfekciske srědki wupředate, wšudźe so wulki strach šěri. Na tym wina je corona-wirus. Mnichowčanka spyta tule njewěstosć za sebje wužić a poskića na Facebooku titu bionudlow a blešu z desinfekciskim srědkom za „blido na oktoberskim swjedźenju“. Hač drje tónle poskitk něchtó přiwozmje, je dwělomne.
Dźiwadźelnik Florian Bartholomäi zwaži so kónc měrca na 200 kilometrow dołhe pućowanje po afriskej Saharje. Na swój dyrdomdej so pilnje přihotuje, připasajo sej za to 15 přidatnych kilogramow na chribjet, z kotrymiž po lěsach chodźi. Přećelka je jemu tež yoga w ćopłej rumnosći doporučiła, zo móhł so na horce temperatury zwučić. Wosebje pak wjeseli so Bartholomäi na ćišinu w pusćinje a je wćipny, što w nim wuskutkuje.
To a tamne (04.03.20)
Wohnjowemu wobornikej z belgiskeje gmejny Kaprijke je po puću k zasadźenju zawěsće wutroba stejo wostała. Najprjedy bu jeničce informowany, zo so na Rysselhofskej dróze pali. Čisło domu njebě podate. Čim bóle pak so z hašenskim jězdźidłom městnosći bližeše, ćim wěsćiši sej Patrick Goossens bě, zo jědu k jeho domej. Susod bě wohenja dla nuzowe čisło wolił. Po štyrjoch hodźinach běchu płomjenja skónčnje zhašane.
Paduchaj staj w Moskwje před kupnicu 20 tonow butry w hódnoće wjac hač 100 000 eurow z nakładneho awta spakosćiłoj. Šofera awta a sobujěduceju běštaj do druheho nuzowałoj a staj jich w lěsu wusadźiłoj. Jako so šofer na městno njeskutka nawróći, drje tam Lkw hišće steješe, ale butra bě fuk. Policija je ju w druhim awće našła, što pak měještaj paduchaj z njej planowane, wostanje potajnstwo.
To a tamne (03.03.20)
Z punkpop-band Little Big chce Ruska na lětušim Eurovision song contesće w nižozemskim Rotterdamje dypki zběrać. Skupina je w Ruskej jara znata. Minjene lěta je sej kraj stajnje zaso dobre městna wubědźił: Sergej Lazarow bě loni třeći. Wjele kedźbnosće zbudźił bě před lětami pisany cyłk wowkow Buranowskije babuški, kotrež docpěchu samo druhe městno. Zarjadowanje wotměje so w meji. Za Němsku nastupi 22lětny Ben Dolic.
Sylny wichor a temperatury pod nulu su domy při Erie-jězoru w USA njedaloko kanadiskeje mjezy na skurilne objekty změnili: Wone su z hač do 90 centimetrow tołstej worštu lodu pokryte. Ludźo starosća so mjeztym wo swoje twarjenja, na přikład, hač třěchi ćežki lód wudźerža. Fotografojo porno tomu so wjesela: Woni maja motiwy, kajkež tak hižo wjele lět widźeć njeběchu.
To a tamne (02.03.20)
Ze zwěrjećim kandidatom chce Lěwica ke komunalnym wólbam w Francoskej nastupić. Kóčka „Rec“ steji za lěwicarsku stronu La France Insoumise na lisćinje w bretoniskim měsće Renne. Z kóčku chcedźa škit zwěrjatow bóle tematizować, kaž strona zdźěli. Tuchwilu steji „Rec“ na 60. městnje wólbneje lisćiny a nima tuž žaneje šansy. Nimo toho dyrbi něchtó kmótřistwo za kóčku přewzać a so z mjenom zapisać, sej wólbne prawo žada.
Tykanc z 29 wobstatkami a 29 swěčkami su minjenu sobotu 17 dźěćom-narodninarjam na „party šaltowanskeho lěta“ w bayerskim Bad Hindelangu poskićili. Direktor turistiskeho zarjada zahaji swjedźeń z narěču, kotraž wobsteješe z 29 słowow a traješe 29 sekundow. Allgäuski dowolowy centrum wot lěta 1988 dnja 29. februara tajki swjedźeń zarjaduje a wšitke kóšty za njón zaruna.
