To a tamne (28.04.20)
Z wulkimi a nadměrnymi kłobukami na hłowje chcedźa wuknjacy zakładneje šule w chinskim měsće Hangzhou socialny wotstawk dodźeržeć pomhać. Pisane, meter wulke kłobuki běchu sej dźěći z pomocu staršich doma same zhotowili. We wuchodochinskim měsće z dźewjeć milionami wobydlerjow su po 99 dnjow trajacej přestawce koronawirusa dla šule zaso wotewrjene.
Hišće hač do lěća chcedźa Lipšćanske dźiwadłowe dźěłarnje škit za hubu a nós produkować. Hač do julija móhło jich tak 46 000 hromadu přińć, přiwšěm so šwalče nadźijeja, zo móža so potom zaso swojemu poprawnemu dźěłu wěnować a kostimy za přichodnu hrajnu dobu šić. Dźěłarnje běchu w měrcu po zawrjenju hrajnišćow koronapandemije dla započeli tajke škitne srědki zhotowjeć.
To a tamne (27.04.20)
Stara a jednora šijawa je so w hornjobayerskim Morsbachu wo rjany podawk postarała. Wobsedźer nastroj wjace njetrjebaše a wotstaji jón na kromu puća jako dar. Zo bě mašinu něhdy jako schow pjenjez wužiwał, je 56lětny dawno zabył. 21lětny wza šijawu sobu domoj a namaka w njej tysac eurow. Dokelž wobsedźerja njeznaješe, prošeše policiju wo pomoc, a ta 56lětneho wuslědźi, kiž bě telko sprawnosće dla hnuty.
Pjany kolesowar je so w Zhorjelcu dowěrliwje na zastojnikow Zwjazkoweje policije wobroćił. Zastojnicy běchu w nocy na njedźelu wobkedźbowali, zo 20lětny chětro chabłajo po dróze jědźe. Prjedy hač móžachu jeho zadźeržeć, muž pola nich zasta a so přećelnje wopraša: „Móžeće mje domoj dowjezć?“ Woni pak wzachu jeho sobu na policajsku stražu, hdźež je test alkohola 1,8 promilow wunjesł.
To a tamne (24.04.20)
Přetwarjene žwjenkačkowe awtomaty na dobro pčołkow so w Němskej dale rozšěrjeja. Za projekt, kotryž běchu před poł lětom w Dortmundźe z jeničkim awtomatom zahajili, je mjeztym po wšej Němskej 20 sobuwojowarjow. Přetwarjene nastroje wudawaja nopaški ze symješkami, kotrež překasancam w časach zazyglowanych płonin, pesticidow a monokulturow pomhaja přežiwić. Wuchowarjo pčołkow akcija jara zwjesela.
Małeho leoparda mylnje za kóčku měli a sobu domoj wzali su dźěći w Nepalu. Woni běchu małe rubježne zwěrjo při hrajkanju na kromje lěsa namakali. Jako pak wone naraz cyle hinak mjawčeše hač kóčka, informowaše swójba sobudźěłaćerjow weterinarneho zarjada. Tući dowjezechu małeho leoparda do stacije za namakane dźiwje zwěrjata, dokelž njeby w lěsu sam přežiwił.
To a tamne (23.04.20)
Sławny běh po schodach New-Yorkskeho Empire State Building su tónraz koronapandemije dla wotprajili. Zarjadowanje chcedźa hakle klětu zaso přewjesć, kaž organizatorojo zdźěleja. Wobdźělnikow su mjeztym informowali. Poprawom bě 43. běh toho razu 12. meje planowany. Loni bě Polak Piotr Łobodziński 1 576 schodźenkow znateho twarjenja w Manhattanje w dźesać mjeńšinach a pjeć sekundach zmištrował a tak dobył.
Koronawirus pola domjaceho skotu zwěsćili su prěni króć w USA. Dwě kóčce w zwjazkowym staće New York su pozitiwnje na wirus testowali. Skoćeći, kotrejž bydlitej na rozdźělnymaj městnomaj zwjazkoweho stata, měještej problemy při dychanju. W jednym padźe bě tež wobsedźer kóčki pozitiwny. Dotal njeje dopokazow, zo móže domjacy skót wirus přenjesć.
To a tamne (22.04.20)
Twarcy elektriskich šijawow w Japanskej njemóža tuchwilu dočinić, dokelž sej dale a wjace ludźi w kraju škit za hubu a nós samych šije, kaž nowiny rozprawjeja. Zawody maja trójce telko skazankow kaž hewak w tym času na blidźe. Dokelž nimaja w Japanskej dosć škitow, sej mnozy nětko šijawy kupja. Mustry za šiće firmy internetnje poskićeja.
Hudźba z wótřerěčakow ma zwěrjatam w bayerskich lěsnych parkach pomhać wostudu přewinyć, kotruž pobrachowacych wopytowarjow dla tuchwilu pasu. Za to hladarjo zwěriny wšědnje hudźbny program zestajeja a jón wot ranja we wosmich do wječora w šesćich wusyłaja. Při tym su wiolinowe koncerty runje tak słyšeć kaž twjerdy rock skupiny AC/DC. Mjez spěwami wothrawaja wodźenja wopytowarskich skupin. Koronawirusa dla su wšitke bayerske parki dźiwjeje zwěriny hač do 3. meje zawrjene.
To a tamne (21.04.20)
Koronapandemije dla su lětušu, mjeztym 50. „pride“-paradu, w New Yorku wotprajili. Hoberska party, na kotrejž stajnje w juniju na prawa homoseksualnych skedźbnjeja, njehodźi so tónkróć přewjesć, kaž tamniši wyši měšćanosta Bill de Blasio zdźěli. Na tym tež „historiski wuznam“ 50. razu ničo njezměni, wón rjekny. Parada dopomina na namócnosće mjez homoseksualnymi demonstrantami a policiju 1969 w New Yorku.
„Lěpje hač ničo“ mjenuje sakski ministerski prezident Michael Kretschmer (CDU) namjet, hry zwjazkoweje koparskeje ligi w nuzy tež bjez přihladowarjow přewjesć. „Ludźo w Němskej so na koparske hry wjesela, ja tež“, rjekny wón nowinarjam. Bohužel njeje wjele sportowych družin tak móžnych. „Znajmjeńša kopańca nam wostanje.“ Wot 9. meje móhli so hry zaso wotměć.
To a tamne (20.04.20)
Drogi na Facebooku poskićeli su třo młodostni w Kambodźi a maja nětko problemy z justicu. 20lětna bě swój „ice“ za „dobru płaćiznu“ dźewjeć eurow na pakćik poručała. Nimo toho wona na internetnej stronje zmužiće pokazowaše, kak drogi bjerje. Policija njeměješe za to scyła žane zrozumjenje a ju kaž tež tamneju dweju zaja. Zastojnikam młodostni rjeknychu, zo běchu sami „high“ byli, jako swoje poskitki do interneta stajichu.
Šćerk jako najwažniša tudyša twarska maćizna njeje w Němskej hižo dosahajcy k dispoziciji. Po tym zo běštej loni předewšěm Poruhrska a Hamburg potrjechenej, so problem zastaranja mjeztym tež na druhe kónčiny rozpřestrěwa, kaž w twarskej industriji zwěsćeja. Hrubeho pěska je drje w Němskej dosć, z přirodoškitnych přičin pak nowe pěskowe jamy lědma hišće přizwoleja.
To a tamne (17.04.20)
Wospjet zwonjenje cyrkwinskich zwonow přetorhnył je šup (Waschbär) w Löwenhagenje pola Göttingena. Zwěrjo, kotrež hižo dlěši čas na łubi ewangelskeho Božeho domu bydli, bě ručicu elektriskeho motora zwonow na druhi bok połožiło. Zamołwići wěsty čas trjebachu, zo bychu zwěsćili, zo šup trójne wšědne zwonjenje stajnje zaso přetorhnje. Šup smě dale na łubi wostać, ručicu chcedźa z groćanej konstrukciju wobdać, tak zo njemóže jón šup hižo dosahnyć.
Wjace hač 20 000 eurow namakała a hnydom wotedała je 60lětna žona w poruhrskim Mühlheimje. Žona bě w předrumnosći banki na pjenježnym awtomaće čornu tobołu namakała. W njej běchu pjenjezy we wobalkach a dwaj klučej. Sprawna namakarka tobołu w susodnym nakupowanskim centrumje woteda. Policija nětko za wobsedźerku toše pyta.
To a tamne (16.04.20)
Wopity muž w zaječim kostimje je w sewjerorynsko-westfalskim měsće Unna z priwatnym jutrownym wohenjom hnydom dwójce zasadźenje policije zawinował. Jako zastojnicy při wrotach kłapachu, jim 64lětny w zaječim kostimje a z košom w ruce wočini, w kotrymž bě bleša palenca. Muž dyrbješe sylneho kura dla woheń hašeć. Tři hodźiny pozdźišo so woheń znowa paleše, bleša palenca bě wupita. Nětko dyrbi wón pokutu płaćić.
Jězdźo ze swojim rolatorom po zahrodźe je 99lětny Brita Tom Moore na internetnej stronje dźesać milionow eurow zezběrał. Pjenjezy chce wón statnemu strowotniskemu systemej NHS přewostajić. Moore bě připowědźił, zo chcył hač k stoćinam zahrodu njedaloko Cambridge sto króć wobkružić. Wuraznje dźakowaše so wón lěkarjam a hladarjam, kotřiž „sej tute pjenjezy zasłuža“.
To a tamne (15.04.20)
Alkohol njepomha přećiwo koronawirusej! Tole zdźěla swětowa strowotniska organizacija WHO, wobroćejo so zdobom přećiwo daloko rozšěrjenemu předsudkej, zo wysokoprocentowski alkohol wirus niči: „To wón nječini“, zdźěla regionalny běrow WHO w Kopenhagenje. Nawopak alkohol strowoće ludźi zeškodźi a tak riziko zwyši, na wirus schorjeć. Alkohol žada sej kóžde lěto po wšěm swěće tři miliony smjertnych woporow.
Mzdu sej sama skrótšiła je ministerska prezidentka Neuseelandskeje Jacinda Ardern koronakrizy dla. Wona wzdawa so přichodne šěsć měsacow 20 procentow swojich dochodow. To samsne płaći za čłonow knježerstwa a dalšich wysokich zastojnikow, wona na nowinarskej konferency we Wellingtonje zdźěli. Rjadowanje njepłaći za strowotniski personal a policistow, kiž přećiwo wirusej wojuja.
