To a tamne (04.06.15)
Z transparentami, demonstracijemi a internetnymi akcijemi so wobydlerjo starownje w bayerskim Forchheimje hrožacemu spotorhanju swojeho domu wobaraja. Město bě wukazało twarjenje wotstronić, dokelž su stwy přemałe. Přetwar njeje ze statiskich přičin hižo móžny. Nastać ma nowotwar z apartementami. Wobydlerjo hladarnje so boja, zo zhubja swoju zhromadnosć, socialne kontakty a dotal zwučenu wokolinu.
Hdyž maš awto bjez přizjewjenja a zawěsćenja, čisłowe taflički kradnjene, wodźiš jězdźidło bjez dowolnosće, za to chětro natutkany – to napadnješ. 34lětny pak tarnowaše swój transporter z módrej swěcu na třěše a poda so na awtodróhu. Přiwšěm mějachu nimojěducy policisća podhlad, zo njesedźi za wodźidłom awta kolega a zadźeržachu je. Šoferej hrozy nětko chłostanske jednanje.
To a tamne (03.06.15)
Kolesowarja na awtodróze zadźeržała je policija pola Nossena. Z Bołharskeje pochadźacy muž bě jězdnju wotlěwa doprawa přeprěčił. Při tym šmórny so jeho awto. Najebać to 50lětny na kromje dale jědźeše. Policistam wón rozłoži, zo je na wulěće do Mnichowa. Kolesowar dyrbi so nětko strašneho zasahnjenja do wobchada dla zamołwić.
Lěta dołho bjez jězbneje dowolnosće, bjez přizjewjenja a zawěsćenja swojeho awta bě muž w Bayerskej po puću. Wón drje sej mysleše, zo wšo to njetrjeba, hdyž jenož jara pomału jězdźi. Policisća běchu jeho awto při spěšnosći 20 km/h zadźerželi, a wone njebě ani přizjewjene ani zawěsćene. Muž twjerdźeše, so stajnje tak pomału jězdźi a tuž žane papjery njetrjeba. Zastojnicy jeho powučichu: Jězbna dowolnosć hač do 6 km/h drje žana trěbna njeje, přizjewjenje a zawěsćenje jězdźidła pak přeco.
To a tamne (02.06.15)
Na wšě 37 milionow eurow zarunanja žada sej muž wot Berlinskeho hotela, dokelž bě so před nim na zalodźenej dróze wobsunył a sej nohu złamał. Wotpowědne jednanje su na Berlinskim krajnym sudnistwje zahajili. Muž argumentuje, zo dyrbješe jako předewzaćel złamaneje nohi dla twarski wulkoprojekt w Aziji wotprajić. Při tym je pječa 37 milionow eurow přisadźił.
Dospołnje wopiteho jěža su w nižozemskim Arnheimje namakali. Tón bě do toho z rozbiteje palencoweje bleše wšón jejkowy liker wušlapał, kaž Arnheimska zwěrjatownja zdźěla. Takle wopity ležeše jěž na puću, hdźež bychu jeho bjezmała přejěli. Wón bě tak pjany, zo so ani hižo njezakuli, jako jeho sobudźěłaćerjo nuzoweje zwěrjaceje słužby zběhnychu. Nětko ma so w zwěrjatowni wuspać. „Hdyž je zaso strózby, jeho w přirodźe wusadźimy“, wottam rěkaše.
To a tamne (01.06.15)
Marihuanu w płokanskej mašinje zabył je 19lětny w Frankfurće nad Mohanom. Sobudźěłaćerjo wobchoda za elektroniku wzachu staru mašinu sobu, po tym zo běchu nowu přiwjezli. Jako so do zawoda wróćichu, čujachu woni sylnu wóń a namakachu w płokawje titku z 50 gramami wopojneho jěda. Z wurěču, zo je drastu w mašinje zabył, chcyše sej młody muž drogi zaso wotewzać. To pak čakaše hižo policija, zo by jeho sobu wzała.
Hotowu drohoćinku našli su sobudźěłaćerjo recyclingoweje firmy mjez elektroniskimi nastrojemi, kotrež bě wudowa po smjerći muža přiwjezła: prěni kompjuter Apple z lěta 1976. Runje 200 eksemplarow tohole typa běchu swój čas twarili. Firmje so poradźi, nastroj za 180 000 eurow zajimcej předać. Połojca wunoška přisteji po zasadach firmy darićelce. Ta pak njebě mjeno zawostajiła.
To a tamne (29.05.15)
Wobchad awtodróhi haćiło je wojerske lětadło wčera mjez Berlinom a Mnichowom. Po A 9 transportowachu mašinu typa Eurofighter do hornjobayerskeho Manchinga, hdźež chcedźa ju zwuporjedźeć. Dokelž bě nastroj šěrši hač jědnaće metrow, njemóžachu jón awta přesćahnyć. Wodźer wosebiteho nakładneho wozydła, kotrež njepohibowaše so spěšnišo hač 60 km/h, tuž wospjet na šěršich městnach zastawaše, zo móhli za nim jěduce awta nimo jěć. Lětadło bě so při manewru wobškodźiło.
Z mlokom palace so awto hašał je wodźer nakładneho awta pola Kulmbacha. Kaž policija zdźěli, bě so wobruč horceho borzdźidła dla zapaliła. Šofer spěšnje reagowaše a da něšto mloka z wulkeho tanka wuběžeć, zo by z nim woheń hašał. Jako policija dojědźe, bě wón płomjenja hižo podusył a tak móžnym wjetšim škodam zadźěwał.
To a tamne (28.05.15)
Swoje stare ručne tobołki wotbyć a město toho hinaše dóstać móža žony njedźelu, 7. junija, w Berlinje. K akciji namołwja syć susodskeje pomocy Polly & Bob. Štóž žanu tobołu njenamaka, dóstanje kupon, kotryž za přichodnu bursu tajkeho razu płaći. Kotra žona smě při swojoraznej akciji w jednej piwowej zahrodźe w Friedrichshainje jako prěnja tobołku wuzwolić, to chcedźa wulosować.
Prototyp prěnjeho domjaceho nastroja swěta k zwěsćenju samodruhosće chcedźa w New Yorku přesadźować. Ameriska grafikowa designerka Margaret Crane bě test kónc 60tych lět minjeneho lětstotka wunamakała, informuje awkciski dom Bonhams. Bě to jedne z najrewolucionarnišich wunamakanjow, kotrež je žiwjenje tójšto ludźi a wosebje žonow zasadnje změniło, kaž w zdźělence domu rěka. Bonhams nadźija so 8 300 eurow.
To a tamne (27.05.15)
Plahowar nukli w durinskim Saalfeldźe změje přichodnje snano tójšto dorosta. Něhdźe 150 jeho nukli skakaše po jeho zahrodźe, po tym zo běchu njeznaći pukloty zwočinjeli. Kaž policija zdźěli, je 43lětny wobsedźer swoje zwěrjata sam zaso łójił a do puklotow stykał. Dokelž wón nukle hewak po splahu dźělene dźerži, je lochce móžno, zo wone jemu po wjacorych hodźinach na swobodźe bórze bohaty dorost wobradźa.
Samopaslena atrapa bomby za dźěćace narodniny je so w Dortmundźe wo zasadźenje policije postarała. Pěšcy nańdźechu blisko kazina tobołu z podhladnym wobsahom. Policija wokolinu zašlaha a skaza rumowarjow bombow. Młoda žona so přizjewi a situaciju rozjasni. Wona bě atrapu spasliła a w tobole schowała a nalěpk „dźěćace narodniny“ na nju zlěpiła. Policiji wšak za swjećenjom njebě.
To a tamne (26.05.15)
Wopačneho jateho pušćili su na kupje Bali, dokelž běchu mjeno zaměnili. Muž šansu wužiwaše a so zminy, kaž nawoda jastwa nowinarjam napřećo přizna. Jedna so wo wikowarja drogow, kiž njeje strašny. Zastojnicy běchu mylnje wopačneho jateho do běrowa skazali. Mjeztym je tež jaty pušćeny, za kotrehož wukaz pušćenja poprawom płaćeše. Wón bě wjaceměsačnu jatbu kradnjenja dla wotsedźał.
Połtřeća hodźiny je policija swjatki njedźelu w Mönchengladbachu tři žrěbjata přesćěhała, kotrež po měsće běhachu. Z wosom policajskimi awtami spytachu je popadnyć. Awta dyrbjachu so jim wuwinyć. Policija wjacore dróhi zaraći. Skónčnje móžachu žrěbjata na pastwu ćěrić. Bilanca běchu dwě wobškodźenej policajskej awće a wjacore wottorhnjene špihele. Wobsedźer koni njebě znaty.
To a tamne (22.05.15)
Tójšto jebakow je so pola čěskeje loterijoweje towaršnosće přijzjewiło, po tym zo bu znate, zo je Čech 90 milionow eurow w eurojackpoće dobył. Dźesatki při telefonje twjerdźachu, zo su prawe ličby nakřižikowali, lotolisćik pak zhubili abo mylnje preč ćisnyli, loterijowa towaršnosć Sazka zdźěli. Žona chcyše jej napowědać, zo je pos lotolosćik póžrěł. Druzy twjerdźachu, zo bu lisćik pokradnjeny. Dobyćer so dotal přizjewił njeje, ma pak k tomu 35 dnjow chwile.
Stawizny spódnjeje drasty dokumentuja wot dźensnišeho w Domje stawiznow badensko-württembergskeje stolicy Stuttgart. Pod hesłom „Na nahej koži“ prezentuja tam dohlad do stawiznow mody minjenych třoch lětstotkow. Drasty swědča wo towaršnostnych trendach, ćělnych idealach, róli muži a žonow kaž tež wo moralnych předstawach. „Stawizny towaršnosće njepokazuja so jenož we wulkich statnych akcijach. Druhdy dosaha pohlad dospody“, rěka tam.
To a tamne (21.05.15)
Legenda je žiwa: Wopomnjenska tafla dopomina wot wčerawšeho na prěni koncert Joe Cockera (1944-2014) w Drježdźanach. Sławny rockowy hudźbnik bě 2. junija 1988 na łuce njedaloko koparskeho stadiona wustupił a wjace hač 85 000 fanow přiwabił. Łuku, na kotrejž bě wón koncertował, Drježdźanjenjo hišće dźensa „Cockerwiese“ mjenuja. Přichodnje ma wona oficialnje tak rěkać. Cocker by wčera, 20. meje, swoje 71. narodniny swjećił.
Jehnjo z bordela wuswobodźiła je Mnichowska policija. Něhdźe tři tydźenje stare jehnjo žiworješe w stwě prostitutki, kaž policija zdźěli. Dokelž bě 25lětna minjeny čas wospjet zakoń wo plahowanju skotu raniła, wzachu zastojnicy skoćo sobu na stražu. Tam je sobudźěłaćerjo zwěrjatownje wotewzachu. Čehodla bě prostitutka jehnjo při sebi měła, njewědźa.
