To a tamne (18.06.18)
Nachribjetnik z 2 400 eurami namakałoj stej šulerce njedaloko Magdeburgskeho hłowneho dwórnišća. Sprawnej holcy z Podstupima běštej z rjadownju po puću a informowaštej swoju wučerku. Policisća nachribjetnik přewzachu. Wobsedźer móže sej jón nětko pola zwjazkoweje policije wotewzać. Tam pak hrozy jemu skóržba wobsydstwa drogow dla: Nimo pjenjez su policisća tež tyzku z marihuanu namakali.
Wótře nastajeneho telewizora dla su susodźa rentnarja wosrjedź nocy w allgäuskim Immenstadće policiju wołali. 71lětny pak ani zastojnikow ani wohnjowu woboru njepytny. Skónčnje dyrbjachu pomocnicy durje bydlenja namócnje wotewrěć, zo móhli telewizor wotpinyć, zastojnicy zdźěleja. Přičina: Samostejacy rentnar hladaše telewiziju we łožu ležo, słuchatka pak ležachu w bydlenskej stwě
To a tamne (15.06.18)
Hłodowy stawk koparskich swětowych mišterstwow dla zahajili su jeći w jastwje argentinskeho města Puerto Madryn. Tam je hižo dny dołho kablowy telewizor skóncowany. Jeći pak sej žadaja, jón najspěšnišo sporjedźeć. Kaž w zjawnym lisće pisaja, je telewizor jich „njeparujomne prawo“. Dokelž je sudnica žadanje wotpokazała, njemóža sej woni tuž tež dźensnišu hru argentinskeho narodneho mustwa přećiwo Uruguayjej wobhladać.
Na wysokim powjazu zwěrować dać chcetaj so jutře Nicole Backhaus a Jens Knorr w saksko-anhaltskim Staßfurće. Ideju za njewšědnu akciju mějachu organizatorojo tamnišeho měšćanskeho swjedźenja. Pory, kotrež chcyli sej na te wašnje wěčnu lubosć slubić, móžachu so přizjewić. Na wysokim powjazu přewodźeć budźe njewjestu a nawoženju sławny artist na powjazu Falko Traber.
To a tamne (14.06.18)
To a tamne (13.06.18)
Narodny napoj Pólskeje ma wotnětka swój muzej: We Waršawje su „Muzeum Polskiej Wodki“ swjatočnje wotewrěli. Na terenje něhdyšeje palencarnje „Koneser“ zhonja wopytowarjo wšitko wo stawiznach napoja, kiž njesmě na žanym swjedźenju pobrachować. „Wodka je wažny wobstatk pólskeje kultury, kotryž Polakow při woswjećenju wažnych wokomikow přewodźa“, muzej zdźěla.
Swoju mandźelsku w tunlu z awta wusadźił je muž z Erfurta, po tym zo bě so z njej zwadźił. Wobaj běštaj w Rennsteigowym tunlu na awtodróze A 71 po puću, jako žona njepřestajnje na njeho swarješe a jemu samo z pukami hrožeše. Na to muž zasta a ju z awta ćisny. Policistam po tunlu nóžkowaca žona napadny. Dowjezechu 37lětnu na dwórnišćo. Hač so wona a jeje 45lětny mandźelski nětko zaso znjesetaj, njeje znate.
To a tamne (12.06.18)
Ze swojej „čumpatej kačku“ a w domjacych črijach běše dwulětny pachoł w bayerskim Marktoberdorfje na zwjazkowej dróze po puću. Pozdźišo so wustaji, zo je wón wowce twochnył a so bjez cila na puć nastajił. Kaž rěčnica policije pozdźišo měnješe, drje chcyše sej hólčk jenož raz wulećeć. Napadnył bě wón busowemu šoferej, kiž jeho na to na policiju dowjeze.
Dwě tiće ze 36 000 eurami namakachu w spowědnym stole cyrkwje w Romje blisko Vatikana, jako ju rjedźachu. Farar Giovanni Martire Savina, kiž tiće wočini, bě wustróžany a so boješe, zo je w nimaj snano rozbuchlina. Njeje hišće jasne, hač jedna so wo anonymny dar abo wo skutk hrěšnika z hubjenym swědomjom. Po słowach duchowneho su drje hižo časćišo pjenjezy namakali, ale hišće ženje tajke wulke mnóstwo.
To a tamne (11.06.18)
Wobhladniwaj wnučkaj staj w porynsko-pfalcskim Kirchheimbolandenje zasadźenje policije zawinowałoj. Dokelž nochcyštaj w nocy na sobotu wowku wubudźić, zalězeštaj wonaj w pózdnich hodźinach přez wrota statoka. Wowka woměrje dale spaše, kedźbliwa susodka pak měješe młodeju muži za paduchow. Policija na to statok „z wulkej jednotku“ wobstupi. Hakle na to so wukopa, zo běšta pozdatnaj paduchaj wnučkaj, kotrajž běštaj dom bjez kluča wopušćiłoj.
Nopawa jako slepy pasažěr je šoferku awta w Duisburgu tak nastróžiła, zo ta do před njej jěduceho awta zrazy. Při tym so wobaj šoferaj snadnje zraništaj. 53lětna žona bě z awtom po puću, jako ju naraz prawa ruka zabola. Žona nochcyše swojimaj wočomaj wěrić, jako nopawu pódla sebje wuhlada. Nichtó njewě, kak bě ta do awta přišła.
To a tamne (08.06.18)
Bronza, slěbro a nětko snano złoto? Studenća Lipšćanskeje Wysokeje šule za techniku wuličeja sej za Robocup 2018 dosć dobre šany na koparski titul. 15. junija wotleća woni do kanadiskeho Montreala. Sobu změja dźewjeć małych roboterow, kotrež potom na kumštnym trawniku kopańcu hraja. Wotpowědnu software běchu studenća sami wuwili. Na dotalnych swětowych mišterstwach su sej hižo bronzowu a slěbornu medalju zawěsćili.
W myjerni awtow tčacy wostał je rentnar w Bochumje. Wohnjowa wobora dyrbješe muža wuswobodźić. Tón bě z awta wulězł, jako připrawa hižo dźěłaše. Tak dósta so muž z nohu do šćětkow, kotrež kolesa awta rjedźachu. Ze železnej žerdźu móžachu wobornicy rentnarja po dźesać minutach wuswobodźić a dowjezechu jeho do chorownje.
To a tamne (07.06.18)
Znateho krosnowarja po fasadach Alaina Roberta (55) su zajeli, jako tón spyta, bjez kóždeho zawěsćenja na wysokodom w juhokorejskej stolicy Seoulu zalězć. Na 77. poschodźe 555 metrow wysokeho Lotte World Towera bě krosnowanje za chrobłeho Francozu po dwěmaj hodźinomaj skónčene. Z wisatej platformu dowjezechu jeho na třěchu 123poschodoweho twarjenja. Policija jemu wumjetuje, zo njeje wobsedźerja mróčeloškrabaka do swojeje akcije wo dowolnosć prosył.
Z cirkusa ćeknjeny elefant je so po porynsko-pfalcskim Neuwiedźe přechodźował. Při tym so ani awtow ani pěškow njeboješe. Zwěrjo bě měrne, a sobudźěłaćerjo cirkusa móžachu je bjez problemow zaso wróćo wjesć. Prawdźepodobnje bě elefant elektriski płót swojeho wobhrodźenja roztorhał. Jeho puć na swobodźe wšak bě runje kilometer dołhi.
To a tamne (06.06.18)
Wulět z awtom maćerje je so za bratrow w starobje šěsć a wosom lět w Delnjofrankskej runje hišće někak zbožownje skónčił. Hólcaj z Rothfelsa běštaj so rano zahe skradźu z domu zminyłoj, jako mać hišće spaše. Z jeje awtom jědźeštaj cyłkownje dźewjeć kilometrow, mjez sobu so wotměnjejo. Skónčnje zrazyštaj do nabóčneho wobhrodźenja. Tam jeju policija wotewza. Wobaj wostaštaj njezranjenaj, awto maćerje pak dyrbjachu wotwlec dać, w policajskej rozprawje rěka.
Kofej z brokolijom, espreso z brokolijom a cappuccino z brokolijom poskićeja wot najnowšeho w scenowej kofejowni „Commonfolk Coffee“ w awstralskim Melbournje. Za to měšeja zeleninowy próšk do kofeja abo sypaja jón na ješć. Pječa ma łžička próška telko wutkow kaž cyła porcija zeleniny. Reakcije ludźi na nowu kreaciju wšak su tež chětro měšane.
To a tamne (05.06.18)
Zo móže čołm z betona spěšny być, su studenća Lipšćanskeje wysokeje šule za techniku dopokazali. Na wubědźowanju tajkich nastrojow w Nižozemskej běchu woni z třomi złotymi, třomi slěbornymi a dwěmaj brozowymaj medaljomaj najwuspěšniši wšěch nastupjenych 17 mustwow. Jich pjeć metrow dołhi čołm wažeše 42 kilogramow. Runje tak wulki plastowy čołm přińdźe na 25 do 30 kg.
Z hońtwjerskim nožom wobrónjeny je muž w delnjosakskim Hitzackeru spytał tykanc kradnyć. Byrnjež jemu to zakazali, zastupi 54lětny do pjekarnje. Tam wućahny nóž a wotkra sej někotre skibki tykanca. Kupcaj staj muža přemóhłoj a jemu nóž wotewzałoj. Paduch so zminy – bjez noža a tykanca. Policija přepytuje nětko wobrónjeneho padustwa dla. Čehodla bě jemu zakazane do wobchoda zastupić, njeje znate.
