To a tamne (22.12.17)
Nastupajo najwoblubowanišej předmjeni lěta 2017 móhłoj Marie a Paul cyle prědku stać, kaž prěnja prognoza Towaršnosće za němsku rěč we Wiesbadenje wěšći. Po wšěm zdaću budu tež Emilia a Emma, Ben a Alexander na načolnych městnach. W dźělnej probje wuhódnoćichu rěčewědnicy daty z dźesać stawnistwow po cyłej Němskej, při čimž su prěnje a dalše mjena runohódnje zapřijeli. Doskónčnu lisćinu prezentuje towaršnosć hakle nalěto.
Přejara z njewobeńdźomnymi hodownymi pěsnjemi nochce so policija w Kemptenje zaběrać. Twitterowała je tuž foto přijimarskeho wokna policajskeje straže z připrawjenym pokiwom: „Hodowne spěwy, kotrež na čuwy du, njejsu přičina, přizjewjenje zapodać. Waša policija.“ Mjenowanej stej předewšěm spěwaj „Last Christmas“ a „Feliz Navidad“.
To a tamne (21.12.17)
Z nuznikowej papjeru z hnoja pandow wuličeja sej w Chinje wulki wobrot. Firma Sichuan Qianwei Fengsheng je z centrumom za plahowanje pandow na juhozapadźe kraja zrěčenje wotzamknyła. Firma chce wšědnje wulke mnóstwa fekalijow a wupluwane zbytki žratwy wužiwać, zo by je na nuznikowu papjeru a druhe hygieniske wudźěłki předźěłała. Pica mjedwjedźow z čorno-běłym kožuchom – narodneho symbola Chiny – ma wulki podźěl bambusa a tuž wjele włoknin.
115 milionow lět stary wotćišć nohi dinosawriera su njeznaći w parku blisko awstralskeho města Melbourna nětko wobškodźili. Kaž sćelak ABC rozprawja, běchu skućićeljo kromy nimale 30 centimetrow wulkeho wotćišća z hamorom wotbili. Parkowi dohladowarjo mjenuja to „hruby wandalizm“ a chcedźa historisku wosebitosć zaso sporjadkować.
To a tamne (20.12.17)
Před wjetšej škodu zachował je tankownik 99lětneho z braniborskeho Perleberga, kiž bě so z awtom do Mecklenburgsko-Předpomorskeje zabłudźił. Tróšku zamyleny starc póndźelu wječor w Plauwje zasta a so tam za pućom prašeše. Starosćiwy tankownik informowaše na to policiju, kotraž zawoła nuzoweho lěkarja. Tón wšak zwěsći, zo bě muž bjez orientacije. Po zastaranju na rewěrje su přiwuzni ze 60 kilometrow zdaleneho města 99lětneho pozdźišo wotewzali.
Róžkaty winowy sud je Pfalcowčan wuwił, zo by kóšty znižił a přetrjebu drjewa pomjeńšił. Blidarski mišter a powołanskošulski wučer Thomas Lutz je tuž nimale 2 000lětnu tradiciju kulojteho suda přetorhnył. Wón stwori konstrukt z duboweho drjewa a drohowocla, kotryž wupada kaž kamorčk. Za njón dósta samo Designowe myto Porynsko-Pfalcy.
To a tamne (19.12.17)
Adwentnička přistajenych Berlinskeho justicneho zarjadnistwa minjeny pjatk bě haru nastupajo chětro přehnata, tak zo dyrbješe policija zakročić. Přewšo wótreje hudźby na Salzburgskej w Schönebergu dla běchu wobydlerjo policiju wołali. Hakle ta postara so wo to, zo njebě hudźba na pózdnim wječoru na dróze wjace słyšeć, a 170 přizjewjenych hosći móžeše woměrje dale swjećić.
Po zdaću mortwe wowcy su w južnym Čornym lěsu zasadźenje policije zawinili. Wuchodźowar wuhlada njedźelu na pastwje w Kandernje tři wowcy stadła, kotrež na chribjeće ležachu. Myslo sej, zo su skoćata mortwe, informowaše wón policiju. Přichwatana patrulja je sej hromadźe z mějićelom wone tři wowcy wobhladała a spóznała, zo su strowe. Dokelž su subožne (trächtig), pak běchu padnyli a njemóžachu wjace stanyć.
To a tamne (18.12.17)
Zasadźenje policije zawinili su šulerjo w badensko-württembergskim Lörrachu. Chcychu we wučbje sudniske jednanje přewšo originalnje napodobnić. Za to su rjadowniskemu towaršej ruce sputali. Za naručne puta, kotrež bě sobušulerka minjeny pjatk bjez wědy staršeju wot doma sobu přinjesła, pak pobrachowaše wotpowědny klučik. Dokelž tež policija žadyn tajki njeměješe, wona puta zniči.
32 razow je so motorski w Ludwigsburgu wotpohladnje błyskać dał – doniž jeho njelepichu. Po informacijach města bě 17lětny hač do 43 km/h přespěšny. Tři měsacy je přeco zaso nimo samsneho błyskača jěł, myslo sej, zo motorskeho lepić njemóža. Pječa měješe wjeselo při tym. Město a policija pak stej jeho popadnyłoj. Dyrbi nětko pokutu 7 000 eurow płaćić, změje 36 dypkow w Flensburgu a 15 měsacow zakaz jězdźenja.
To a tamne (15.12.17)
Kruwy na pastwje napřećo jeho domskemu běchu bayerskemu předewzaćelej w Holzkirchenje přewjele. Zwonjenja bimbawkow, smjerda a strowotneho stracha muchow na pastwje dla je muž wotnajerku a gmejnu jako mějićelku łuki na krajnym sudnistwje Mnichow II wobskoržił, so tohole wzdać. Wón a jeho mandźelska hary bimbawkow dla njemóžetaj w nocy spać a mataj depresije. Sudnistwo je skoržbu wotpokazało.
Swojej inicialej „SB“ je chirurg a specialist za transplantaciju jatrow we Wulkej Britaniskej do jatrow dwěju pacientow zapalił. 53lětny lěkar swoju winu za tónle skutk před sudnistwom w Birminghamje přizna. Bóle grawěrowace wumjetowanje zranjenja ćěła pak wotpokaza, kaž britiske medije rozprawjachu. Wotkryli su inicialej jednoho pacienta, hdyž je druhi chirurg pozdźišo dalšu operaciju wotměł, bě w sćelaku BBC zhonić.
To a tamne (14.12.17)
Sowa je so do hale twornje VW w Brauntalu zadobyła a spjećuje so hižo tydźeń wšěm pospytam, ju wuswobodźić. Ptaka su w produkciskej hali za kolesyny wuhladali. Wutwarichu wokna, zo by so wón na swobodu dóstał, a sokołar spyta jeho won wabić. Kaž VW zdźěla, direktny strach za sowu njewobsteji. Po wšěm zdaću ma w hali dosć cyrobizny. Kónc tydźenja znowa spytaja ju wuswobodźić.
Mały plastikowy bow połny drobnych pjenjez je 69lětna na dnju swj. Mikławša w sewjerorynsko-westfalskim Meerbuschu namakała a policiji donjesła. Kripo zwěsći bórze na to mějićela nimale 600 eurow: Spediter bě pjenjezy wot kupca kasěrował, na nakładnym awće wotstajił a na nje zabył. Krótko po tym, zo bě wotjěł, padny bow z awta. Byrnjež so žona namakarskeje mzdy wzdała, je so jej předewzaćel z darikom dźakował.
To a tamne (13.12.17)
Z njewšědnje wjele njetopyrjemi bědźa so wobydlerjo awstralskeho městačka Charters Towers. Wjace hač 200 000 sobu najwjetšich njetopyrjow swěta je wobydlerjam na sewjerowuchodźe kontinenta napadnyło, rjekny měšćanostka Elizabeth Schmidt powěsćerni dpa. Ze swojimi křikami w tuchwilnym času porowanja njedadźa wone ludźom žanoho měra. Wšudźe nimo toho grawoćiwje smjerdźi, a ludźo njemóža sej samo dowolić raz do zahrodki hić.
Pozdatny zadobywar je so w delnjosakskim Stolzenauwje pola Nienburga jako spanski hósć dźowki wopokazał. Wobsedźerka bě policiju wołała, wuhladawši doma na chódbje w nocy naraz čornozdrasćeneho muža. Kaž policija rozprawja, so njeznaty na to z woknom zminy, swoje črije pak je w chwatku před łožom lubki stejo wostajił.
To a tamne (12.12.17)
Wosrjedź Rennsteigoweho tunla na awtodróze A 71 staj so njedźelu wječor šoferaj do włosow dóstałoj. Kaž durinska awtodróhowa policija zdźěla, je jedyn tamneho pola Gräfenrody wuspinał. Na to staj wobaj wozydło wopušćiłoj, do so biłoj a dale jěłoj. To wšo je jenož někotre mjeńšiny trało a njebě žadyn „bój w dźewjeć kołach“. Wobchad w tunlu bě přiwšěm krótki čas přetorhnjeny. Swědcy su zastojnikow informowali.
Zo by ludźi k tomu pohnuł mobilny telefon wužitnje nałožować, farar Alessandro Palermo na italskej kupje Sicilskej tež handyje žohnuje. Wěriwi měli na jutřišim dnju swj. Lucije swój mobilny telefon do cyrkwje San Matteo w měsće Marsala sobu přinjesć, piše farar w socialnych syćach. „Towaršnosć wotwisuje wot handyja, runočasnje pak nochce rozumić, kak maš jón wužiwać.“
To a tamne (11.12.17)
Rukopisnej cedlce z lěta 1777 su eksperća při restawrowanskich dźěłach na Jězusowej postawje w španiskim Sotillu de la Ribera (prowinca Burgos) našli. Storčili běchu na njej w prózdnicy skulptury, jeje zadku. Kapłan katedrale w bliskim Borgu de Osma Joaquín Mínguez bě tehdy informacije ze swojeho časa wo hospodarstwje, nabožinje, politice a kulturje zawostajił, kaž medije rozprawjeja. Rukopisne dokumenty w prózdnicach skulpturow namakać je jara njewšědne.
Dokelž je młody muž na wuznamnym Panoramahighwayju 1 swoje awto wopušćił, byrnjež poprawom wohnjowemu infernu wućeknyć dyrbjał, je wón małeho nukla z palaceho kerka před smjerću wuchował, maja jeho w interneće za rjeka. Kaž rěkaše, bě wot fotografa lokalneho powěsćoweho sćelaka KABC filmowane widejo připadnje nastało.
