To a tamne (15.08.17)
Wulke zbožo mějachu zawčerawšim pasažěrojo ćaha w Słowakskej. Tam bě so lokomotiwa spěšnika wotpowěsnyła a sama dale jěła. Awtomatiski system pak je ćah borzdźił, kotryž skónčnje zasta. Přiwšěm dyrbjachu pasažěrojo dlěje hač dwě hodźinje čakać, prjedy hač bu narunanska lokomotiwa pósłana. Jako přičinu njewšědneho podawka mjenowaše rěčnik železniskeje towaršnosće, zo drje bě material přetrjebany.
Připowěšak nakładneho awta połny šokolody, kotryž běchu njeznaći minjeny kónc tydźenja pola Marburga pokradnyli, je dale zhubjeny. Z připowěšakom pobrachuja tež 20 tonow šokolodźanych jejkow, nutella a dalše słódkosće. Hódnota rubizny wučinja 50 000 do 70 000 eurow. Nětko pyta policija za swědkami. W bjezposrědnjej bliskosći je so nimo toho dalše nakładne awto zhubiło.
To a tamne (14.08.17)
Drohe sportowe awto zešrotował je muž na probowej jězbje minjeny pjatk w Załomju. 46lětny bě so z 510 PSsow sylnym wozom typa Alfa Romeo na mokrej dróze suwać započał, do wjacorych štomow zrazył a skónčnje na ležownosći stejo wostał. Šofer a sobu jěducej wosobje wostachu njezranjeni. Policija pak trochuje wěcnu škodu na 70 000 eurow. Telko awto hižo w swojim zakładnym wuhotowanju płaći.
Štyrilětny pachoł je swoju mać a jeje znatu w Göppingenje z bydlenja na balkon wuzamknył a so na to spać lehnył. Jako wonej něšto pozdźišo pytnyštej, zo su durje zawrjene, hólčk hižo hłuboko a kruće spaše. Žonje zawołaštej tuž policiju. Po tym zo su zastojnicy na to podarmo při durjach bydlenja klinkali, dyrbješe wohnjowa wobora zamk durjow namócnje wułamać.
To a tamne (11.08.17)
Z bjezkablowym telefonom je žona swojeho mandźelskeho w Heilbronskim wokrjesu w Badensko-Württembergskej zbiła a tak zasadźenje policije zawinowała. Kaž zastojnicy zdźělichu, bě wona swojemu mužej z telefonom wotzady na hłowu biła, jako wón na terasy sedźeše. Tón na to swoju žonu ze šawlom sputa. Přičina agresiwnosće bě spěšnje jasna: Test alkohola wunjese wjace hač tři promile.
Přećelej zetkataj so k wječeri. Njejapce zemrějetaj. Tónle podawk sta so z hódančkom w francoskim městačku Authon-du-Perche. Kaž z přepytowanja policije wuchadźa, njebě jeju nichtó namócnje morił. Zastojnicy zdźělichu, zo bě so starši z njeju, kotryž bě trochu alkoholizowany, na kusku mjasa zasbrěbnył a so na to zadusył. Jeho přećel zemrě po zdaću šoka dla na infarkt wutroby. Pad je rozrisany a slědźenja zakónčene.
To a tamne (10.08.17)
Pod wliwom drogow stejaceho lokomotiwnika je policija w Hamburgu lepiła. 40lětny je po dotalnych dopóznaćach ćah z 40 wagonami a 3 800 tonami ranžěrował. Při tym ignorowaše signal a zajědźe bjezmała do barjery. Swědk bě do toho wobkedźbował, kak lokomotiwnik joint kuri. Drogowy test na THC, wobstatk hašiša, bě pozitiwny, policija zdźěli. Jězbnu dowolnosć lokomotiwnika dyrbješe 40lětny wotedać.
Jako powědarjo bajkow móža so sakscy politikarjo wopokazać. Při 4. bajkowym festiwalu swobodneho stata wot 17. do 27. awgusta chcetaj so tež sakski ministerski prezident Stanisław Tilich a prezident krajneho sejma Matthias Rößler (wobaj CDU) wobdźělić, Němski centrum bajkoweje kultury jako zarjadowar informuje. Festiwal wěnuje so lětsa pomjeznej kónčinje k Čěskej a tež serbskim tradicijam.
To a tamne (09.08.17)
Swojich dobrych kucharskich kmanosćow dla njeje Thailandźan do němskeho jastwa trjebał. Kaž zwjazkowa policija w Karlsruhe zdźěla, bě sudnistwo 43lětneho mjeńšich njeskutkow dla k 3 800 euram chłostaja abo sto dnjam jastwa zasudźiło. Dokelž njemóžeše wón pokutu zapłaćić, běchu jeho zajeli. „Chětro zadwělowany“ Thailandźan na to swojeho šefa, hosćencarja w Karlsruhe, telefonisce wo pomoc prošeše. Tón žadanu sumu bjez wahanja zapłaći, dokelž „tajkeho dobreho kucharja nihdźe wjace njenamakaš“.
W 52 dnjach 5 000 kilometrow běžała je 59lětna žona w USA. Yolanda Holder z kaliforniskeho Corona bě so 18. junija w New Yorku na puć podała. Minjenu nóc je pućowanje po 4 988 kilometrach skónčiła. Sportowča zmištrowaše wšědnje něhdźe sto kilometrow a popřa sej w nocy jenož krótki wotpočink.
To a tamne (08.08.17)
Sćěna prózdnych zastawnych blešow zbudźi tuchwilu zajim ludźi w Berlinje-Kreuzbergu. Twar je projekt pólskeho bjezdomneho Petrova Chojnackeho, kiž blešu po bleši pódla swojeho spanskeho městna stapluje. Dotal je 44lětny na wšě 3 000 blešow nastajał, docpěć chce 6 000 blešow. Chojnacki tam zhromadnje z pólskim přećelom nocuje. Zajim turistow, kotřiž sćěnu jako fotomotiw wužiwaja, jeho zwjesela. Připódla zawostajeja ludźo pjenježne dary a – dalše bleše.
2,6 tonow prózdnych patronowych kartušow je norwegska policija w bydlenskim mobilu němskeho porika namakała. Prawdźepodobje pochadźeja kartuše z třělanskich halow we kónčinje Nord-Trøndelag, do kotrychž běchu so paduši minjene dny zadobyli. Policija němski porik nětko přesłyšuje. Hódnota mosazowych kartušow wučinja 5 200 eurow.
To a tamne (07.08.17)
„Dyrbju najprjedy raz spać hić. Sym dospołnje pjany“. Z tutymi słowami je so šofer wosoboweho awta w Jenje po njezbožu rozžohnował, přepodawši ludźom swój wupokaz. Do toho bě 32lětny z wotmachom do parkowaceju awtow zrazył. Spać wšak zawinowar njezboža wulce njemóžeše, dokelž jeho policisća wopytachu. Woni wzachu jeho k přepytowanju kreje sobu na stražu. Tam zahajichu tež přepytowanske jednanje přećiwo njemu.
Najwjetše parkowanišćo kolesow Nižozemskeje su dźensa w Utrechće wotewrěli. W podzemskim twarjenju před dwórnišćom města je najprjedy raz městno za 6 000 kolesow. Po rozšěrjenju ma tam 2018 samo 12 500 kolesow stać. Tak by parkowanišćo w měsće ze 340 000 wobydlerjemi najwjetše po wšem swěće było. W Nižozemskej je wjace kolesow hač wobydlerjow.
To a tamne (04.08.17)
Z palacym acetonom je muž w Großröhrsdorfje spytał špundowanje rjedźić a by při tym skoro bydlenje zapalił. 26lětny je maćiznu na laminatne špundowanje kidnył a zapalił, dokelž bě přeswědčeny, zo budźe laminat tak wosebje čisty. Spěšnje so tež acetonowa bleša zapali. 26lětny ćisny ju na to z woknom a podusy płomjenja z nohu, při čimž so zrani. Nětko wšak dyrbi so lochkomyslneho zapalerstwa dla zamołwić. Test alkohola wunjese 1,8 promilow.
Wulki dźeń w Hamburgskim zwěrjencu Hagenbeck: Hnydom štyri małe tigry z cyle mjechkim kožuchom móžachu wopytowarjo wčera we wonkownym arealu wobdźiwać. Wot časa poroda 15. junija běchu ze swojej maćerju Marušku schowane byli. Tele štyri młodźata su wulki wuspěch. 15 lět dyrbješe zwěrjenc tam na dorost tigrow čakać.
To a tamne (03.08.17)
Pos bě wina, a zo dyrbješe wohnjowa wobora přijěć. Jako wobsedźerka runje doma njebě, skoči jeje lubušk w durinskim Altenburgu na kuchinske kachle a je při tym zaswěći. Na kachlach ležaca papjera so na to zapali. Jako alarmowani wohnjowi wobornicy dojědźechu, bě najhórše hižo nimo: Papjera drje so hišće dymješe, hewak pak so ničo njepaleše. Tež pos so na zbožo zranił njebě.
Z mjezwočom basista rockoweje skupiny Kiss je so ćelatko w zwjazkowym staće USA Texasu narodźiło. „Genie“ wupada kaž Gene Simmons z pomolowanym mjezwočom na koncertach skupiny. Předewšěm hdyž skoćatko jazyk pokazuje, je podobnosć na hudźbnika wočiwidna. Gitarist bě w 70tych lětach z tajkim čorno-běłym pomolowanym mjezwočom wustupował. Ćelo „Genie“ je so minjeny pjatk narodźiło.
To a tamne (02.08.17)
Z wětřikom wotnjeseny narodninski dar k 70ćinam je muž w Sakskej tola hišće dóstał. Policija je jemu wjacore z cyłkownje 550 eurami pjelnjene powětrowe balony wróćiła. Te bě muž ze Stollberga wot swojich dźowkow dóstał. Z heliumom pjelnjene balony pak přez wotewrjene terasowe durje twochnychu a po 150 kilometrach na kolesowanskej šćežce pola Polenza přizemichu. Tam je 14lětna namaka a policiji woteda.
Zastup do hosćenca wotpokazać chcychu sydom britiskim duchownym w Cardiffje, dokelž mějachu jich za wobdźělnikow fety k zakónčenju nježenjenosće. „Sorry, pola nas njejsu ani předrasćenja ani tajke fety dowolene“, rjekny jim stražnik při durjach. W poslednim wokomiku so manager hosćenca duchownych dohlada a prošeše jich nutř. Z darmotnym piwom bě problem ze swěta.
