To a tamne (16.02.17)
Při starće do jelenja zrazyła je mašina na lětanišću města Charlotte w zwjazkowym staće USA North Carolina. Lětadło so wobškodźi a dyrbješe so po wotlěće zawróćić a zaso přizemić. Nichtó ze 44 pasažěrow a štyrjoch čłonow wobsadki so na zbožo njezrani. Charlotte Douglas International Airport je jedne z najwjetšich lětanišćow USA. Wone je z lěsom, ale tež z wulkim płotom wobdate. Kak bě so jeleń na ležownosć dóstał, dotal njewědźa.
Bjez šofera je póstowy transporter w Durinskej něhdźe 200 metrow po nahłej dróze jěł a do parkowaceho awta prasnył. Při zražce nasta 20 000 eurow škody. Prawdźepodobnje njebě šofer transportera ručne borzdźidło přićahnył. Jako spyta jón tola hišće dosćahnyć, póstownik padny a so chětro wobodrě.
To a tamne (15.02.17)
Njewšědnu namakanku chce Heidelbergska policija swojemu wobsedźerjej wróćić: nowu čerwjenu zahrodowu budku. Kupc drje bě ju po puću z twarskich wikow zhubił. Policija z toho wuchadźa, zo njebě kruće dosć přiwjazana. Tak padny z připowěšaka a wosta w přirowje ležo, z wimplom wobchoda. Tam zastojnikam wobkrućichu, zo běchu minjene dny woprawdźe tajku budku předali. Policija pyta nětko za swědkami.
Ze starych zelenych uniformow bayerskeje policije maja nětko nachribjetniki nastać. Wotpowědnu kooperaciju je bayerske nutřkowne ministerstwo dźensa w Straubingu zahajiło. Tamniši pomocny skutk Miłosćiwych bratrow zbrašenych chce wudźěłki z uniformow zhotowić. W Bayerskej budźe hač do lěta 2018 wšitkich 27 500 policistow z módrymi uniformami wuhotowanych.
To a tamne (14.02.17)
Scena kaž w filmje: Ze zwažliwym manewrom zadźerža šofer pola Mnichowa ze swojim awtom dalše, kotrež njeměješe toho wodźer hižo pod kontrolu. Kaž wohnjowa wobora informuje, bě mužej awto před nim napadnyło, dokelž jědźeše po seklojtej liniji. Při přesćehnjenju wón widźeše, zo měješe wodźer strowotne problemy. Jědźeše tuž ze swojim wozom před awto a je tak borzdźeše. Skónčnje wostaštaj wobě awće stejo. Muža dowjezechu do chorownje.
Jeno na třoch kolesach jěł je šofer awta na awtodróze A4 w Durinskej. Do toho bě wón na parkowanišću do sćežora a kamjenja zrazył. Po pjeć kilometrach so wobruč pušći. Muž njeda so mylić a jědźeše na zwjenu dale. Policija jeho skónčnje při tankowni pola Erfurta dosćahny. Test alkohola wunjese 2,3 promile. Na šofera čaka nětko sudniske jednanje.
To a tamne (13.02.17)
Z pozdatnym infarktom wutroby je Berlinjan w pfalcskim Landauwje sanitetarjow zjebał, zo by wot nich morfium dóstał. Z tajkim trikom bě 25lětny hižo časćišo po wšej Němskej napadnył. Wočiwidnje wot drogow wotwisny muž bě při tankowni bolosćow w hrudźi dla skoržił a typiske symptomy infarkta wutroby rysował. Přiwołani sanitetarjo dachu jemu na to morfium. W chorowni wšak so spěšnje wukopa, zo njebě to infarkt. Skónčnje dyrbjachu policiju wołać, dokelž muž w chorowni randalěrowaše.
Na wšě 270 000 eurow je podružnik w Awstriskej při wurumowanju pincy swojeho noweho bydlenja w kartonje namakał. Muž zdźěli na to swoju namakanku policiji, kaž nowiny rozprawjeja. Komu pjenjezy słušeja a zwotkel pochadźeja, dotal hišće njewědźa. Policija za tym slědźi.
To a tamne (10.02.17)
Małaj detektiwaj staj policiji w Sewjerorynsko-Westfalskej pomhałoj zawinowarku njezboža namakać. Hólcaj w starobje wosom a dźewjeć lět běštaj na dompuću ze šule wobkedźbowałoj, kak žona z awtom při wróćostorkanju druhe awto wobškodźi a cyle jednorje wotjědźe. Zhotowištaj na to nadrobnu skicu a pokazaštaj ju staršimaj. Wonaj informowaštaj policiju, kotraž móžeše zawinowarku na zakładźe informacijow spěšnje wuslědźić.
Z masažu je skótna lěkarka hada wot tenisoweho bula wuswobodźiła a jemu tak žiwjenje wuchowała. Něhdźe połdra metra dołhi pyton bě bulik spóžrěł, mějo jón za žratwu. Röntgenowy aparat wobkrući, zo jedna so wo tenisowy bul. Lěkarka rozsudźi so za masažu, dokelž by operacija strašna była. Po dlěšim času bě bulik wumasěrowany. Zatykaneho črjewa dla by pyton hewak zahinyć dyrbjał.
To a tamne (09.02.17)
Podarmo je 32lětny při Bodamskim jězoru spytał, wóń marihuany ze smjerdźatym twarožkom zakryć. Policisća běchu chětro połny nachribjetnik muža na Lindauskim dwórnišću kontrolowali. We wačoku namakachu wšelake žiwidła a wjacore tyzy ze sylnje wonjacym twarožkom. Tam pak běchu drogi schowane. Zastojnicy marihuanu sćazachu, wupisachu skóržbu a pósłachu muža z twarožkom skónčnje dale.
Mjerzajo so na snědań, kotruž bě mać jemu do pěstowarnje sobu dała, je pjećlětny w Stuttgarće ćeknył a z měšćanskej železnicu wotjěł. Po puću do pěstowarnje bě so z maćerju tak zwadźił, zo jej twochny a na zastanišću do železnicy zalěze. Sobujěduca žona pjeracha narěča a přepoda jeho policiji, kotruž bě mać hižo zazwoniła. Tola tež jako hólc mać zaso widźeše, bě přeco hišće hněwny.
To a tamne (08.02.17)
Chětro bolostnje do ruki kusnył je w bayerskim Landshuće paduch wobchodowemu detektiwej. Tón bě 34lětneho wobkedźbował, jako wjacore zamróžene pizzy kradnješe. Při durjach 56lětny podhladneho narěča. Na to dóńdźe k rozestajenju, při čimž paduch detektiwej tak jara do ruki kusny, zo dyrbjachu ranu w chorowni lěkować.
Po dwěmaj měsacomaj je policija w Mnichowje zhubjene awto namakała. Kaž prezidij zdźěli, bě 55lětna žona z Durinskeje 11. decembra awto njedaloko hłowneho dwórnišća parkowała, pozdźišo pak je wjace njenańdźe. Zdźěliwši policiji, zo je wóz pokradnjeny, jědźeše z ćahom domoj. Nětko je policistam w starym měsće dospołnje zanjerodźene awto napadnyło, zhubjeny wóz z Durin- skeje. Žonu su mjeztym informowali.
To a tamne (07.02.17)
Njewotpohladnje woheń zamiškriła je rentnarka, jako na swojim balkonje kołbasu sušeše. 68lětna žona w badensko-württembergskim Balingenje bě čerstwe kołbasy sušiła, při čimž so dekoracija na balkonje horceje kurjenskeje komorki dla zapali. Chětře so płomjenja na drjewjanu konstrukciju balkona rozpřestrěchu. Spočatne pospyty žony, woheń sama podusyć, zwrěšćichu. Wohnjowa wobora porno tomu měješe połoženje spěšnje pod kontrolu. Nichtó so njezrani. Škoda na balkonje a fasadźe domu wučinja přiwšěm něhdźe 20 000 eurow.
Problem z jara aktiwnymi bobrami maja přiběrajcy w połobskej wsy Dolní Žleb w Čěsko-sakskej šwicy. Stajnje zaso hrymzaki cyłe štomy pušćeja, kotrež na milinowody padaja a je roztorhaja. Přeco zaso dochadźa w pomjeznym Dolnim Žlebje k wupadam miliny.
To a tamne (06.02.17)
Wopity, k tomu hišće bjez cholowow a čriji, je šofer pućowanskeho busa w Kaiserslauternje za wodźidłom sedźał. 53lětny bě sobudźěłaćerjej wěstotneje firmy napadnył, dokelž chcyše bjez dowolnosće do ameriskeje kaserny jěć. Přiwołana policija zwěsći w jeho kreji wjace hač dwaj promilej alkohola. Pobrachowacu drastu namakachu w busu, w kotrymž nichtó druhi njesedźeše. Zastojnicy wzachu šofera sobu na stražu.
Na wšě 87 zmužitych zymskich płuwarjow wobdźěli so wčera na Drježdźanskim póstniskim płuwanju we Łobju, kaž organizatorojo zdźěleja. Woda bě z 0,5 stopnjemi chětro zymna, powětr njeměješe wjace hač štyri stopnje. Najstarši wobdźělnik bě 73 lět.
To a tamne (03.02.17)
Wobsedźer złoćaneho pokłada, kotryž běchu dźěći w delnjej Bayerskej při hrajkanju w lěsu našli, je so přizjewił. Na zakładźe dokładnych znajomosćow wo schowje pokłada a jednotliwych pjenjezach móžeše dopokazać, zo pokład woprawdźe jemu słuša. Złoto je 250 000 eurow hódne. Muž bě je w lěsu zarył, dokelž boješe so paduchow w bydlenju. Bankam wón njedowěrješe. Sprawnosć dźěći muž z darom mytowaše.
Na wšě 27 lět bjez jězbneje dowolnosće po puću běše 73lětny muž ze Šwabskeje. Nětko jeho njedaloko Augsburga na traktoru sedźo při wobchadnej kontroli lepichu. Policistam bě alkoholowa wón napadnyła. Test wunjese 1,9 promilow. Jězbnu dowolnosć pak sćazać njemóžachu. Tón běchu jemu podobneho delikta hižo před 27 lětami wotewzali.
