To a tamne (17.05.18)
Prěni cebrasmuhaty přechod za pěškow w formaće 3D w durinskim Schmalkaldenje ma so zaso zhubić. Krajny zarjadniski zarjad je městu zdźělił, zo dyrbi přechod hač do jutřišeho wotstronić, dokelž njewotpowěduje třidimensionalne zwobraznjenje nadróžnowobchadnym předpisam. Trojodimensionalny efekt nastawa přez kombinaciju běłych a ćmowych smuhow na dróze. Šoferojo awtow dóstawaja tak zaćišć, zo tam hrjady leža, a su nuzowani borzdźić.
Do swimmingpoola plumpsnyła je ćeknjena kruwa w delnjosakskim Lanhausenje pola Cuxhavena. Skoćo bě wčera rano z pastwy twochnyło. Přez kerčinu dósta so na ležownosć, hdźež padny do swimmingpoola. Wobydlerjam so poradźi kruwu njezranjenu z wody wućahnyć, a to hišće prjedy, hač přiwołana wohnjowa wobora dojědźe.
To a tamne (16.05.18)
Zwadu mjez mužom a papagajom dyrbjachu policisća zakónčić. Dokelž běchu hižo dlěši čas wołanje w bydlenju w badensko-württembergskim Lörrachu słyšeli, alarmowachu susodźa policiju. Ta pak nańdźe chětro njezwučeneju kontrahentow. 22lětny muž přizna, zo bě so na papagaja swojeje přećelki hněwał a na njeho rjejił. Ptak reagowaše na to ze zwukami, kotrež klinčachu kaž šćowkacy pos. Zastojnicy wobeju změrowachu.
Mylnje dwaj hektaraj lěsa wotpalił je muž w saksko-anhaltskim Körbelitzu. 40lětny chcyše při najrjeńšim wjedrje z płunowym palakom njerodź na chódniku wotstronić. Při tym pak trawnik zapali. Na to chwataše do domu, zo by z bowom wody woheń zhašał. Jako so nawróći, pak běchu so płomjenja hižo na bliski lěs rozpřestrěli. Bow wody wjace njepomhaše, wohnjowa wobora dyrbješe přijěć.
To a tamne (15.05.18)
Stadło howjadow wosrjedź města je so w srjedźosakskim Rochlitzu wo zasadźenje policije postarało. Po tym zo běchu wobydlerjo něhdźe 20 kruwow w bydlenskej štwórći wuhladali, wołachu policiju. Wobsadce policajskeju awtow stej je njedaloko dwórnišća zadźeržałoj. Z pomocu zamołwiteho za kruwy móžachu je skónčnje zaso na pastwu honić.
Ručnu granatu w hosćencu wotedał je dźěd zhromadnje ze swojimaj wnučkomaj w čornolěsnym Feldbergu. Dźěsći běštej granatu z Druheje swětoweje wójny w bliskim lěsu namakałoj. Po tym zo bě muž tak mjenowanu jejowu ručnu granatu wotbył a wotešoł, zawoła hosćencar nablaku policiju. Fachowcy ju wotewzachu a znješkódnichu. Policija na to skedźbnja, zo njesměł so nichtó stareje municije přimać. W mjenowanym padźe wšak je wšitko derje wotběžało.
To a tamne (14.05.18)
Burger za runje jedyn cent a wustup rappera Eno183: Tutón poskitk je minjeny pjatk we Wiesbadenje 3 000 ludźi přiwabił. Zamołwići pak běchu k wotewrjenju noweho spěšnohosćenca z 200 hosćimi ličili. Přepjelnjenja dla dyrbjachu zarjadowanje po 40 mjeńšinach skónčić, a policija ludźi namołwi domoj hić. Zo by to spěšnišo šło, je samo dróhu zaraćiła. Njespokojni wopytowarjo pak so hišće cyłu hodźinu ze zastojnikami nasadźowachu.
Awto město ryby popadnył je wudźer w bayerskim Karlskronje. 35lětny bě wudu w něhdyšej pěskowej jamje wućisnył. Kótwička pak wosta hnydom tčacy a so hižo njepušći. Na to muž něhdźe wosom metrow hłuboko awto wuhlada a zawoła policiju. Kran je skónčnje z wody wućahny. Policija zwěsći, zo njebě wóz hižo přizjewjeny. Prawdźepodobnje je jón něchtó ilegalnje wotbyć chcył.
To a tamne (11.05.18)
Kipremu starcej je policija w pfalcskim Frankenthalu jězbnu dowolnosć sćazała. 89lětny bě na parkowanišću do druheho awta zrazył a 2 000 eurow škody načinił. Zastojnicy zwěsćichu, zo móže so muž lědma hišće na nohomaj dźeržeć, zo jich njesłyšeše a njemóžeše hižo na prašenja wotmołwić. Dokelž bě před poł lětom podobne njezbožo zawinił, papjery starca hnydom wobchowachu.
Swoju dźowku w ćahu zabyła je mać wjacorych dźěći w delnjosakskim Salzgitteru. Wosomlětna bě mylnje w ćahu wostała, jako mać z tamnymi dźěćimi wulěze. Po tym zo bě ćah dale jěł, wosomlětna płakaše. 27lětna sobujěduca so wo dźěćo staraše a wołaše policiju. Na přichodnym zastanišću zastojnicy dźěćo přewzachu a dowjezechu je maćeri.
To a tamne (09.05.18)
Koči hajzl z bydlenja pokradnyła je žona w sewjerorynsko-westfalskim Hückeswagenje. Při přesłyšowanju policije wona přizna, zo bě so namócnje do bydlenja zadobyła, dokelž chcyše za durjemi žałosćacej kóčce pomhać. Mějićel bydlenja drje něšto pozdźišo čiłu a strowu kóčku namaka, koči hajzl pak bě preč. „Što ludźi do kriminality ćěri, wostawa druhdy wulke potajnstwo“, policija piše.
Młodźi policisća w Posaarskej njetrjebaja za najlěpšu znamku w sporće hižo spěšniši być hač sprintar Usain Bolt. Wotpowědne směrnicy su nětko změnili, kaž krajne knježerstzwo zdźěla. Dotal bě plan předpisał, zo maja 30 metrow w 3,49 sekundach běžeć. Bolt wšak bě při swětowym rekordźe 2009 na sto metrow za prěnje 30 metrow 3,79 sek. trjebał.
To a tamne (08.05.18)
Katolske žony jako duchowne přeje sej generalna sekretarka CDU Annegret Kramp-Karrenbauer. Bjezposrědnje do jutře zahajaceho so zjězda katolikow w Münsteru wona w rozmołwje z přiłohu nowiny Zeit „Christ und Welt“ rjekny: „Přeju sej měšnisku swjećiznu za žony.“ Hižo nětko su wone wažny wobstatk wšědneho dźěła w cyrkwi. To měło so tež w zastojnstwach wotbłyšćować.
Grilowansku party ze 150 ludźimi a dwanaće nad wohenjom pječenymi wowcami je Berlinska policija w Friedrichshainskim ludowym parku rozpušćiła. Žehliwe wuhlo ležeše prosće na łuce. Dokelž knježeše strach zapalenja, alarmowachu wohnjowu woboru. Wobdźělnicy party běchu kooperatiwni a swoje wěcy zrumowachu. Přiwšěm hrozy jim chłostanka města hač do 5 000 eurow.
To a tamne (07.05.18)
Dokelž bě jimaj pěsk na twarnišću wušoł, staj so twarskaj dźěłaćerjej cyle jednorje na hrajkanišću w delnjofrankskim Kitzingenje posłužowałoj. Mužej sobotu rano z łopaču pěsk do swojeju karow sypaštaj a wotwjezeštaj jón. Susodźa to wobkedźbowachu a wołachu policiju. Ta namaka pěsk kaž tež dźěłaćerjow na bliskim twarnišću. Pječa bě jimaj šef kazał pěsk z hrajkanišća wzać. Přiwšěm mataj wonaj ličić ze skóržbu padustwa dla.
Za „wuprózdnjenje swojeho žołdka do wašeho awta“ je so maturant pola Stuttgartskeje policije zamołwił. Zastojnicy běchu młodeho muža spočatk meje na nalětnim swjedźenju chětro wopiteho před swjedźenskim stanom ležaceho našli a sobu na stražu wzali. Po puću pak wón w policajskim awće bluwaše. „Móžu sej derje předstajić, kak njepřijomne wam to bě“, šuler w lisće pisaše.
To a tamne (04.05.18)
Jandźela pěstona při sebi měło je 17 měsacow stare dźěćo při wobchadnym njezbožu na awtodróze A 60 njedaloko Bingena. Kaž policija zdźěli, bě so jedne ze zadnjeju kolesow bydlenskeho mobila puknyło. Dźěle wobruče přerazychu dno awta. Hólc w tym času w swojim dźěćacym sydle spaše, kiž bě runje nad tutym městnom přiwjazane. „Je wulki dźiw, zo njebu dźěćo zranjene“, policija zdźěli. Mobil dyrbjachu wotwlec.
Žana plasta w palasće: Norwegska krónprincowa swójba je spytała, wěsty čas doma bjez plastowych wotpadkow wuńć. Tole njeje wosebje derje fungowało, krónprincesna Mette-Marit (44) zdźěli. „Je njesměrnje ćežko, dźensniši dźeń žanu plastu njewužiwać“, rjekny wona telewizijnemu sćelakej NRK. Ze swojim mandźelskim Haakonom wona akciju ludźi podpěruje, w lěsach wotpadki zběrać.
To a tamne (03.05.18)
Ze swojoraznej kampanju chce Neuseelandska tomu zadźěwać, zo kraj stajnje zaso na swětowych kartach „zabudu“. Tole je ministerska prezidentka kraja Jacinda Ardern připowědźiła. Woprawdźe so stajnje zaso stawa, zo so Neuseelandska na kartach scyła njejewi, byrnjež kraj ze 4,8 milionami ludźi wjetši był hač Wulka Britaniska. Stało je so tole hižo UNO, BBC abo nahladnemu muzejowemu zwjazkej USA Smithsonian.
Na wopačnej pisće přizemiło je pasažěrske lětadło we Vietnamje. Airbus A-321 předewzaća Vietnam Airlines wužiwaše w dowolowym centrumje Nha Trang pistu, kotruž hišće twarjachu, narodny lětadła dohladowanski zarjad CAA zdźěla. Přizemjenje bě tuž chětro kopolate. Nichtó pak so njezrani. Crew w cockpiće nablaku suspendowachu. Pilot bě wočiwidnje hotowu a njehotowu pistu zaměnił.
