To a tamne (06.11.18)
Zwada wo spěrawych wotpadkach je w badensko-württembergskim Murgu zasadźenje policije zawiniła. Swědk bě wobkedźbował, kak muž spěrawe wotpadki do kontejnera za metalowy šrot mjeta. Jako tón na kritiku njereagowaše a prosće wotjědźe, hněwny swědk z připowěšakom wotpadki mužej dowjeze a je tam přez kerk na jeho ležownosć zmjeta, při čimž boiler muža na hłowje trjechi a zrani. Tón sej to lubić njeda a wěcy wróćo mjetaše. Hakle policija zwadu skónči.
Lětadło prezidenta je w Běłoruskej na předań. Tupolew-154M prezidenta Aleksandera Lukašenka móžeš za 1,7 milionow eurow kupić. Mašina ruskeje produkcije z lěta 1995 słuša běłoruskemu lětanskemu předewzaću Belavia. Hinak hač tamne modele Typolew smě Tu-154M europske lětanišća wužiwać, dokelž poměrnje mjelčo leći.
To a tamne (05.11.18)
Jónu wokoło Wulkeje Britaniskeje płuwał je 33lětny Ross Edgley. Wón trjebaše za 2 900 kilometrow dołhu čaru 157 dnjow. Jako so wón wčera pobrjohej w juhowuchodnym Margate bližeše, přewodźeše jeho witanski komitej 400 płuwarjow. Tam bě so rekordne „pućowanje“ 1. junija zahajiło. Poprawom chcyše płuwar čaru za sto dnjow zmištrować. Wulke žołmy, zyma a kwale pak tomu zadźěwachu. Edgley płuwaše wšědnje dwanaće hodźin a přenocowaše na čołmje.
Mjeztym 3. swěcowy spektakl w Podstupimje je sej kónc tydźenja na wšě 100 000 ludźi wobhladało. Wot pjatka bě tam něhdźe 30 objektow na wosebite a zdźěla spektakularne wašnje wobswětlenych. Ludźo ćahachu ze swěćacymi powětrowymi balonami po měsće. Na wjacorych městnach wustupowachu hudźbne skupiny a pokazachu wohnjowu show.
To a tamne (02.11.18)
Hrózbu šěrjaceho klawna přebił je swójbny nan na halloween w Lossatalu w Lipšćanskim wokrjesu. 19lětny klawn bě wjacore dźěći w swojim kostimje a z motyku w ruce nastróžił. Mać dźěći sej na to žadaše, zo měł so klawn pola nich zamołwić. Nan jeho samo z motyku přebi a nuzowaše, na kolenach klečo dźěći wo wodaće prosyć. 19lětny je 34lětneho nana mjeztym wobskoržił, po tym zo bě so w chorowni lěkować dał.
Alkoholowych problemow pilotow dla je japanski minister za wobchad prawidła w branši přiwótřił. Minjeny čas bě stajnje zaso k njeluboznym podawkam dochadźało. Hakle njedawno zaja britiska policija w Londonje 42lětneho japanskeho pilota, kiž bě w nocy do wotlěta do Tokija dwě bleši wina a dwaj litraj piwa wupił. Tež personal w mašinje su wospjet lepili, jako alkohol pijachu.
To a tamne (01.11.18)
Zo móhli kónčki cigaretow recyclować, chcedźa před wšitkimi 350 wobchodami wikowanskeho rjećaza Franprix w Parisu popjelniki nastajeć. Zwjazane je to z namołwu: „Dajće nam swoje cigaretowe kónčki, činimy něšto wužitneho z toho.“ Z filtrow cigaretow chcedźa kumštnu maćiznu wudobywać a nimo toho dróhirjedźerjam pomhać: Jeničce w stolicy Parisu namjetu kóžde lěto 350 tonow cigaretowych filtrow.
Tak derje před staršimaj so schował, zo dyrbještaj policiju wołać, je so třilětny w Kaiserslauternje. Staršej njemóžeštaj jeho ani w domje ani na zahrodźe namakać. Zastojnicy sej dom hišće raz wobhladachu a namakachu hólčka za kuchinskimi durjemi. Tam bě wón wołanje staršeju wotpohladnje ignorował.
To a tamne (30.10.18)
Při mjetanju gumijowych škórnjow je britiski princ Harry (34) swojej mandźelskej Meghan podležał. Wójwoda ze Sussexa dyrbješe po kurioznym wubědźowanju w Aucklandźe, najwjetšim měsće Nowoseelandskeje, swoju poražku přiznać, po tym zo bě wójwodka Meghan (37) škórń cyły meter dale ćisnyła hač wón. Přihladowarjo pak Harryja chwalachu, zo měješe pječa lěpšu techniku.
Na wjacore dny bjez pitneje wody hotuja so w Mexiku-měsće. Wot jutřišeho chcedźa w 13 z cyłkownje 16 zarjadniskich štwórćow wodowody porjedźeć, kotrež stolicu z dźewjeć milionami wobydlerjow z pitnej wodu z wokolnych horow zastaruja. Ludźo dyrbja znajmjeńša hač do 4. nowembra znjesć, zo njezměja žanu abo jenož jara mało wody. Měšćanske zarjadnistwo je 500 nakładnych awtow skazało, kotrež maja w tym času čerstwu wodu do města wozyć.
To a tamne (29.10.18)
Mału granatu namakał je wudźer w Hamburgu. Po informacijach policije bě muž z pomocu magneta w rěce Alster wudźił, zo by metaliske wěcy we wodźe namakał. Při tym wućahny dwaj centimetraj šěroku granatu, kajkuž běchu za čas Druheje swětoweje wójny k wotwobaranju lětadłow wužiwali. Policija je ju wotwjezć dała. Po měnjenju fachowcow bě granata hišće strašna.
Za swój spontany koncert na balkonje w Praze je popspěwar z USA Jason Derulo w socialnych medijach wjele chwalby žnjał. „Balkonowa serenada móže so legendarna stać“, pisa fan na portalu Instagram. Koncert 29lětneho we wjacezaměrowej hali w Praze dyrbjachu štwórtk wječor techniskich přičin dla krótkodobnje wotprajić. Na to stupi so Derulo na balkon, zo by čakacym fanam zaspěwał. Koncert chce pozdźišo nachwatać.
To a tamne (26.10.18)
Motorizowany piwowy kašćik je policija w badensko-württembergskim Berglenje zadźeržała. Młody pasler bě nastroj z dźesać PS sylnym motorom na štyrjoch koleskach tak konstruował, zo móžeše z nim hač do 50 km/h spěšnje jěć. Wězo njeměješe žanu dowolnosć za nadróžny wobchad, kaž policija w swojej rozprawje piše. 21lětny dyrbješe swoju jězbu ze spěšnym piwowym kašćikom přetorhnyć. Nimo toho hrozy jemu chłostanske jednanje.
Zemske worješki su prěni króć w Tirolu žnjeli. Horce a suche lěćo wšak je plahowanje subtropiskeje rostliny zmóžniło. Žně na 300 kwadratnych metrach wulkej pospytnej płoninje njedaloko Innsbrucka pak njeběchu scyła tak jednore, dokelž dyrbjachu kóždu jednotliwu rostlinu wuryć a pod zemju narosćene worješki wotšćipać. Přiwšěm nažnjachu 200 kg.
To a tamne (25.10.18)
Ze swojej mortwej mandźelskej, připasanej na zadnjej ławce awta, je Rusa spytał do Ukrainy jěć. Zastojnicy tamnišeho namjezneho škita pak muža na přechodźe Hoptiwka na wuchodźe kraja zajachu. Šofer bě spočatnje hišće twjerdźił, zo žona jeno spi. Při kontroli pak pokaza hranicarjam smjertne wopismo swojeje dwaj dnjej do toho zemrěteje žony. Zhromadnje ze swojim ukrainskim synom chcyše muž mandźelsku na Ukrainje pochować. Ruscy hranicarjo běchu jeho bjez problemow přepušćili, ukrainscy přepytuja nětko přećiwo njemu morjenja dla.
Wjele wusměšowanja žněje nowa kolesowarska šćežka w Berlinje. Runje dotwarjena čara w Friedrichshainje přicpěwa kolesowarjam chětro horbaty asfalt. Njedostatki bě měšćanske zarjadnistwo na přepodaću šćežki zwěsćiło. Twarska firma ma čaru přichodne tydźenje zrunać, přiwšěm wostanje wona tak dołho wotewrjena. „Dobra ideja to, prohi za pomjeńšenje spěšnosće tež na kolesowanskich šćežkach zatwarić“, wužiwar interneta žortuje.
To a tamne (24.10.18)
Plany za najwjetše hoberske koło swěta w New Yorku su doskónčnje zwrěšćili, kaž jeho planowarjo přesłapjeni zdźěleja. 190 metrow wysoke hoberske koło na kupje Staten Island měješe so poprawom hižo w lěće 2015 wjerćeć a turistam wulkotny napohlad na přistaw, Postawu swobody a Manhattansku skyline skićić. Spochi přiběrace kóšty a sudniske rozestajenja mjez inwestorami su pak projekt zadźerželi.
Hnydom šěsć awtow wobškodźiła je 78lětna šoferka wosoboweho awta w hornjofrankskim Breitengüssbachu při wuparkowanju. Najprjedy zjědźe při wróćostorkanju do parkowaceho awta, kotrež dalšej wozaj wobškodźi. Wustróžana jědźeše wona na to doprědka a wobškodźi před njej stejace awto. Te zrazy do dalšeju awtow. Škoda wučinja 47 000 eurow. Šokowanu žonu dyrbjachu lěkarsce zastarać.
To a tamne (23.10.18)
Dźěl nosa wotkusnył je kopar swojemu přećiwnikej w hrě wokrjesneje ligi w Essenje. Škodowany přisadźi tak dźěl praweje nosoweje połojcy. Kaž Essenske koparske towarstwo SG 99/06 zdźěli, dowjezechu jeho do chorownje. Skućićel dósta čerwjenu kartu a dyrbješe nablaku z hrajnišća. Koparjej běštaj so pozdatneho foula dla zwadźiłoj. Kusaty hrajer bě čłon mustwa SV Preußen Eiberg 11/31.
Direktnje před ćahom Pariskeje spěšnoželeznicy je so kołp na kolijach zadomił a tak dlěši čas železniski wobchad haćił. Tež na nastupišću čakacy ludźo njemóžachu jeho k wotlětej pohnuć. Jako někotři z nich fota kołpja w interneće wozjewichu a jemu tak hišće k wěstej populariće dopomhachu, přijědźechu wohnjowi wobornicy a ptaka zaso tam dowjezechu, zwotkelž bě přilećał, na někotre sta metrow zdalenu rěku Seine.
