To a tamne (12.09.19)
Powětrowe balony zakazać chcedźa Zeleni w Delnjej Sakskej. „K njebju pušćene balony přizemjeja w přirodźe, hdźež je ptački a dalše zwěrjata žeru a na to zahinu“, měni krajna předsydka Anne Kura medijam. Wona skedźbnja na to, zo je město Gütersloh z płunom pjelnjene balony hižo zakazało. Wobswětowe ministerstwo zakaz wotpokazuje. „Po powětře lětace balony su ludźo hižo přeco ze sonami a nadźiju zwjazowali. Zakaz balonow swět njewumóži“, ministerstwo zdźěla.
Šěsć razow 37 poschodow na kolesu horje skakał je pólski ekstremny sportowc Krystian Herba. Ze specialnym kolesom je 38lětny wčera w Berlinje zdobom swójski rekord w Guinnessowej knize přewinył. Dobrej dwě hodźinje Polak w hotelu Park Inn na Alexanderowym naměsće na swojim trialbikeu schody horje skakaše, bjeztoho zo by jónu z kolesa zlězł.
To a tamne (11.09.19)
Tykancy w hódnoće 81 000 eurow kradnył je bywši sobudźěłaćer wosobneje New-Yorkskeje pjekarnje. 32lětny dźěłaše jako šofer a měješe přistup do składu. Wot nowembra 2018 do februara 2019 je wón na te wašnje wjace hač tysac tykancow spakosćił a dale předawał. Pjekarnja „Lady M.“, kotraž bě lěta 2002 prěni wobchod w New Yorku wotewrěła, je sej ze swojimi worštowanymi tykancami wjele připóznaća zdobyła. Eks-sobudźěłaćer ma škodu nětko zarunać.
Kralowsku pyton je muž w sewjerorynsko-westfalskim Bönenje we wotpadkowym sudobju namakał. Po tym zo bě njewšědnu namakanku fotografował, informowaše policiju. Njejědojty had, kiž swoje wopory zadusy, je poprawom w tropiskich kónčinach zapadneje a centralneje Afriki doma. Fachowc za reptilije je hada najprjedy raz k sebi wzał.
To a tamne (10.09.19)
Sobujěduceho na parkowanišću zabyła je pućowanska skupina na dompuću do Pólskeje 70 kilometrow južnje Podstupima při awtodróze A 9. Kaž policija zdźěla, njemóžeše 31lětny bus telefonisce wjace docpěć a na so skedźbnić, dokelž bě baterija mobilneho telefona wučerpana. Pomocliwy pěšk wołaše tuž policiju, kotraž muža z parkowanišća Hagen West do Michendorfa dowjeze. Tam namaka wón krajana, kiž jeho ze swojim wosobowym awtom do směra na Pólsku sobu wza.
Chětro zahe wo hodownu dekoraciju starali su so paduši w Plauenje. Woni zadobychu so do zamknjeneje pincy wjaceswójbneho domu. Namócnje wotewrěchu jednu z pinčnych boksow a wzachu tři kartony sobu. W nich bě bjez wuwzaća swjedźenska dekoracija za hodowny čas. Cyłkowna hódnota: 200 eurow.
To a tamne (09.09.19)
Mašina za zhotowjenje popcorna je we Wuchodnej Friziskej zasadźenje wohnjoweje wobory zawiniła. Nastroj běchu na dnju wotewrjenych duri wužiwali. Awtomatiski sensor za kur direktnje nad nim pak wołaše wohnjowu woboru. Kameradow wotškódnichu z jědźu, napojemi a popcornom. Nimo toho jim wobswědčichu, zo běchu atrakcija swjedźenja.
Skradźu na měsačk sobu wzaty list misije Apollo 15 su w Hamburgu za 11 000 eurow přesadźowali. Anonymny kupc bě z Azije. Astronawća David Scott, James Irwin a Alfred Worden běchu 1971 bjez dowolnosće zamołwitych dźesatki listow skradźu sobu do swětnišća wzali a sej to zapłaćić dali. Němsko-ameriski překupc bě akciju swój čas organizował a listy po misiji předewzaću listowych znamkow w Badensko-Württembergskej dale předawał. Mjenowani astronawća pak njesmědźachu wjace do swětnišća lećeć.
To a tamne (06.09.19)
Honač Maurice w Francoskej smě dale spěwać. Skóržbu přećiwo jeho wobsedźerce je krajne sudnistwo w Rocheforće wčera wotpokazało. Nimo toho ma jej skóržbnik 1 000 eurow wotškódnjenja płaćić. Porik, kotryž ma na kupje Île d’Oléron dowolowy domčk, bě so spěwaceho honača dla njesměrnje hóršił, dokelž bě to po zdaću přewótře. Wobsedźerka pak měni, zo maja dowolnicy zwuki wjesnych kónčin znjesć.
Je to Bože znamjo?, praša so muž, kotremuž je 250 kilogramow ćežki dźěl zornowcoweje biblije nohu złamał. Skulptura, wustajena tuchwilu we Wasserburgu nad Bodamskim jězorom, hodźi so na štyrjoch městnach wočinić. 43lětny zajimc to činješe, biblija padny jemu na nohu a złama jemu podkoleno.
To a tamne (05.09.19)
Bayerski komunalny politikar AfD ma sej w interneće chětro wusměšowace komentary lubić dać, dokelž je wuslědki populistiskeje strony krajneju sejmow Sakskeje a Braniborskeje aděrował. René Jentzsch z frankskeho Höchstadta bě twjerdźił, zo je AfD w Sakskej a Braniborskej z 51 procentami hłosow najlěpje wotrěznyła. Kaž Jentzsch mjeztym zdźěli, bě sej jeno žort dowolił. Reakcije ludźi pak běchu wšo druhe hač žortne.
Z wopačnym urinom spyta wodźer awta policiju wobšudźić. Ta bě jeho přespěšneho jědźenja dla w Lünenje pola Dortmunda lepiła a chcyše šofera na drogi testować. 23lětny pak wobsta na tesće urina. Za to měješe titku z „čistym urinom“ spřihotowanu, kotryž je do nopaška pjelnił, njemóžeše pak policiju za nós wodźić.
To a tamne (04.09.19)
Gumijowa atrapa hłowy krokodila drje přińdźe bórze do měšćanskeho muzeja badensko-württembergskeho Kirchheima unter Teck. Atrapa symbolizuje dny trajacy wopačny alarm srjedź junija. Tehdy je město wjacore jězory we wokolinje zawrěło, po tym zo běchu ludźo twjerdźili, zo su krokodile we wodźe. Tež jako so jedyn tajki jako atrapa wukopa, ludźo dale wo nich rěčachu. Gumijowy krokodil je tuž jako „dźěl měšćanskich stawiznow“ wažny za muzej města.
Noweho sobuwobydlerja na swojim dźěłowym městnje ma wot najnowšeho britiski premierminister Boris Johnson. Na Downing Street čisło 10 w Londonje bydli wotnětka młody Jack-Russell-terrier. Johnson bě 15 tydźenjow stareho psa ze swojej přećelku Carrie Symonds ze zwěrjatownje přiwzał. Pos ma wšak so nětko z kocorom Larryjom jako dawnym wobydlerjom Downing Street 10 aranžować.
To a tamne (03.09.19)
Japanscy turisća su w Europje najwoblubowaniši dowolnicy. To je wuslědk naprašowanja slědźenskeho instituta YouGov mjez nimale 30 000 ludźimi w 26 krajach Europy. Wšudźe mějachu skromni a zdwórliwi Japanjenjo najlěpše wuslědki, w Finskej samo 26 procentow. Porno tomu njejsu Němcy we wukraju tak rady widźani. W Španiskej runje šěsć procentow wo nich rodźi. Najnjewoblubowaniši su Rusojo a Britojo.
Chětro smjerdźaty nadawk spjelnić mějachu policisća na awtodróhowym parkowanišću njedaloko Aachena. Z małotransportera dyrbjachu 151 kilogramow skaženeje ryby zrumować. Hižo při kontroli awta bě zastojnikam grawoćiwy smjerd dych wotrazył. 61lětny šofer bě rybu njechłódźenu z Brüssela přiwjezł, zo by ju w Němskej předawał. Jemu hrozy nětko bolostna pokuta.
To a tamne (02.09.19)
Hnydom prěnju šulsku hodźinu w powětře je awstralski lětanski šuler Max Sylvester ze swojej małej Cessnu wěsće přizemił, ale z nuzy, dokelž bě wučer w mašinje do womory padnył. Z pomocu lotsy so 30lětnemu šulerjej skónčnje poradźi, na wulkolětanišću zapadoawstralskeje metropole Perth přizemić. Wučerja dowjezechu do chorownje. W protokolu škričkoweje rozmołwy rěkaše na prašenja towera, hač móže šuler z lětadłom wobchadźeć: „To je moja prěnja hodźina.“
Sowu z kamina wuswobodźili su wobornicy we wuchodofriziskim Großefehnje. Ptak bě so prawdźepodobnje přez wuheń do kamina sunył a sedźeše za škleńčanymi durčkami kamina. Po krótkim času móžachu wohnjowi wobornicy sowu wuswobodźić, kotraž wosta na zbožo njezranjena. Wobydlerjo běchu ju sobotu popołdnju wuhladali.
To a tamne (30.08.19)
Přepytowanja wobchadneho njezboža, po kotrymž bě zawinowar ćeknył, wjedźechu policiju k 15lětnemu młodostnemu. Tón bě klučiki swójbneho awta wzał, zo by sej z přećelom wulećał. Při wróćostorkanju zrazy wón z tajkim wotmachom do druheho awta, zo zadnja storkawa z čisłowej tafličku wotpadny. 15lětny na to z awtom ćekny a staji je zaso do garaže. Krótko po tym zo běchu zastojnicy wobsedźerja tamneho woza zazwonili, přińdźe tón zhromadnje ze synom k městnu njezboža. Nastata škoda wučinja 6 000 eurow.
Kuriozneho podawka na swětowych mišterstwach wjesłowarjow dla dyrbjachu wubědźowanje w Awstriskej wospjetować. Po zražce pólskeje dwójki z čołmom sudnikow w štwórćfinalu na pódlanskej rěce Dunaja so swětowy zwjazk rozsudźi, wurisanje hišće raz přewjesć. Při hawariji je so wjesło pólskeho čołma złamało.
