To a tamne (25.06.20)
Móšnju ze 460 eurami namakała je wutoru popołdnju 13lětna holca w Drježdźanach blisko Hłowneho dwórnišća a je ju hnydom policiji přepodała. Sprawnosć chcedźa zastojnicy nětko honorować a jej darik přepodać. Hač tež wot wobsedźerja móšnje něšto dóstanje, to so hišće pokaza. Winowatosć za to dźě žana njewobsteji.
Dwaj razaj wob lěto narodniny swjećić smě nětko 15lětny młodostny z porynsko-pfalcskeho městačka Kirn. Na dompuću ze zetkanja z přećelemi bě wón tak mučny, zo so na kolije železnicy lehny a njepytny ani, kak regionalny ćah přijědźe. Lokomotiwnik bě jeho wuhladał a zawoła policiju. Zastojnicy dyrbjachu młodostneho samo budźić, tak kruće wón spaše. Zo je tajku strašnu situaciju přežiwił, jemu scyła wědome njebě.
To a tamne (24.06.20)
Jendźelske korčmy-puby wopytać je koronapandemije dla hižo dlěje hač tři měsacy zakazane. To drje nochcyše wjac hač sto ludźi akceptować a je so w jednej tajkej zetkało, zo bychu sej zaso raz zhromadnje připili. Po wulkej žlokańcy pak njesměrnje harowachu, zo wołachu wobydlerjo policiju, kotraž ilegalne zetkanje skónči. Młodźi ludźo pak so tomu chětro wobarachu a „so žałostnje zadźeržachu“, kaž w policajskej rozprawje steji.
Ze swojej kameru swójske wuchowanje filmował je 43lětny šofer awta na A 73 pola Forchheima. Wón bě kontrolu nad swojim jězdźidłom zhubił a tak zražku zawinił. Wón a 49lětna sobujěduca njemóžeštaj ćežko zranjenaj a zatłusnjenaj samaj z awta wulězć. Po wšěm zdaću pak měješe muž znajmjeńša hišće mocy dosć filmować, kak su jeju wohnjowi wobornicy wuswobodźili.
To a tamne (23.06.20)
Trójce klepać, wótře „abrakadabra“ wołać a so spěšnje zminyć: 13lětny hólčec w zwjazkowym kraju USA Delaware je sej přał, zo roznošowar póšty tak jedna. A póstownica je spodźiwne přeće woprawdźe chutnje brała, je runje tak postupowała a samo přez žiwy płót skočiła. Wobkedźbowanska kamera bě wšitko natočiła, a tak je widejo mjeztym hit na Facebooku. Mać hólčeca ma „wulki respekt před roznošowarku. Byrnjež zawěsće wjele stresa měła, je wona přeću mojeho syna z energiju a lóštom wotpowědowała. To mje wjeseli.“
Wosebje chrobłeho paducha je policija nětko w Nürnbergu lepiła. Jako jeho zastojnikaj sputaneho z drogerije wodźeštaj, je sej 28lětny přiwšěm hišće blešku parfima do zaka tyknył. Hakle na straži so jemu bleška z drohotnymi kapkami ze zaka suny. Kak bě sputany do regala sahnyć móhł, nochcyše pakostnik wězo přeradźić.
To a tamne (22.06.20)
Lubosćinskeje tyšnosće dla je młodostna w Awstriskej wulku ličbu picow na wopačnu adresu skazała. 19lětna chcyše tak swojeho bywšeho přećela wobkedźbować, kak wón picy rozwožuje, a je to tajnje činiła. Wot 20. februara do 12. měrca je cyłkownje 50 picow na wopačne adresy skazała, kotrež pak ludźo njepřiwzachu. Policija je skućićelku skónčnje wuslědźiła. Hač drje měješe bywši přećel akciju 19lětneje za dobru?
Zajimawa kniha je 31lětnu žonu w Tübingenskej bibliotece tak jimała, zo je na wšo zabyła. Jako chcyše dom wopušćić, bě hižo zawrjeny, a tak wona policiju zawoła. Zastojnicy informowachu na to stražnika, kiž žonu wuswobodźi. Hač je wona čas zabyła abo njeje namołwy z wótřerěčaka słyšała, njeje cyle jasne. Titul zajimaweje knihi pak nochcyše policiji přeradźić.
To a tamne (19.06.20)
W starobje 101 lěta jako měšćanska radźićelka wotstupiła je Lisel Heise w pfalcskim Kirchheimbolandenje. „Nima žadyn zmysł, hdyž su woči a wuši dotrjebane. Woboje pak tule trjebaš“, rjekny bywša wučerka. Žona sedźeše wot junija 2019 w měšćanskej radźe swojeho ródneho města na juhowuchodźe Porynsko-Pfalcy. Powěsć wo jeje wuzwolenju je so tehdy po cyłym swěće rozšěrjała.
Swojeho ćežko choreho bratra wopytał je emeritowany bamž Benedikt XVI. w Regensburgu. Bě to prěni króć, zo je mjeztym 93lětny Benedikt po spušćenju zastojnstwa w lěće 2013 Vatikan wopušćił, wotwidźane wot wulěta na lětnju rezidencu Castelgandolfo pola Roma. Bratr Benedikta, 96lětny Georg Ratzinger, je ćežko chory. Benedikt bě bamža Franciskusa prosył, hač směł swojeho bratra „hišće raz w tutym žiwjenju“ widźeć.
To a tamne (18.06.20)
Krjepjeńčku wosebiteho razu maja wot najnowšeho w baroknej putniskej cyrkwi w Uhldingenje-Mühlhofenje nad Bodamskim jězorom. Kemšerka bě hladajo na dawak desinfekciskich srědkow na mysličku přišła, nastroj w časach koronakrizy tež za swjećenu wodu wužiwać. A tón na samsne wašnje funguje. Zawod w Hornjej Pfalcy tajke nastroje mjeztym samo produkuje, wužiwajo dotalne bjezkontaktne dawaki kečupa a žonopa. Model chcedźa nětko Němskej biskopskej konferency předstajić.
Paniska reakcija pawka dla je w badiskim Kehlu zasadźenje policije zawinowała. Žona bě so pawka swojim w bydlenju nastróžiła a ze strachom wótře zarjejiła. Muž, kiž runje nimo domu dźěše, žonu słyšeše a so starosćeše. Alarmowani zastojnicy pak móžachu pad spěšnje rozrisać. Pawk bě so hižo zminył.
To a tamne (17.06.20)
Hač do 36 inteligentnych ciwilizacijow w našim blišim swětnišću eksistuje. Wo tym su fachowcy přeswědčeni. Dźensniša technika pak hišće njedowola je namakać a so z nimi skontaktować, měnja wědomostnicy uniwersity w jendźelskim Nottinghamje. Přerězny wotstawk mjez ciwilizacijemi wučinja 17 000 swětłolět. Swětłolěto je čara, kotruž swětło a škričkowy signal w běhu lěta přeprěčatej.
Lubowarjo ptakow móža wokomiknje w internetnym livestreamje wobkedźbować, kak so młode pustawy (Turmfalke) na prěnje wulěty po Berlinje podawaja. „Pjeć młodźatam na terenje parkoweje kliniki we wobwodźe Weißensee je poněčim wočiwidnje wusko a wostudłe w hnězdźenskim kašćiku“, zdźěla Berlinski přirodoškitny zwjazk. Wobstatk Berlinskich pustawow wšak móže so widźeć dać: Wjace hač 300 porow tam maja.
To a tamne (16.06.20)
Pjenjez w płucach pacienta namakali su lěkarjo we westfalskim Hammje. Muž bě centowy pjenježk w januaru při darće mylnje spóžěrał. Fachowcy za płuca su jemu cuzy předmjet wuspěšnje wuoperowali, po tym zo bě so z kašelom a zahorjenymi płucami lěkarjej předstajił. Muž bě sej při hrě ze centom w hubje hrajkał, jako jemu towarš na ramjo klepny a wón pjenjez na to do so srěbny.
Z gumijowym čołmom Ryn přeprěčił je muž w Bonnje. Pěšk bě wohnjowu woboru informował, zo jědźe po rěce čołm w formje flaminga. W nim leži muska wosoba, kotraž na wołanje njereaguje. Centrala pósła 45 wobornikow a helikopter. „Po intensiwnym pytanju“ su muža skónčnje na tamnym brjohu Ryna čiłeho našli. Wobornicy wšak dyrbjachu jeho powučić, zo je rěku z tajkim „jězdźidłom“ přeprěčić přewšo strašne.
To a tamne (15.06.20)
Wuswědčenja na jewišću awtokina dóstali su absolwenća Mjezynarodneje šule Hannover. W kinje pod hołym njebjom na kromje města přepodachu kónčne wuswědčenja něhdźe 50 šulerkam a šulerjam, kotřiž stejachu tam w swojich čerwjenych płašćach z wotpowědnym wotstawkom, na dostojnej, byrnjež jara njewšědnej ceremoniji graduacije. Hosćo sedźachu w 120 awtach před jewišćom a zahoriće trubjachu. Na Hannoverskej šuli wuwučuja 600 chowancow ze 60 krajow wot pěstowarnje hač do 12. lětnika.
Za wobsedźerjom nimale štyrjoch kilogramow złota w hódnoće 170 000 eurow w Šwicarskej přeco hišće pytaja. Tón ma pjeć lět chwile so přizjewić. Paket złota běchu w oktobru 2019 we wagonje šwicarskeje statneje železnicy namakali. Najebać intensiwne pytanje njeje so dotal poradźiło wobsedźerja zwěsćić.
To a tamne (12.06.20)
Z psom wopytać smědźa ludźo zwěrjenc w Kamjenicy we wobłuku pospyta, kotryž ma wot přichodneje póndźele hač do kónca lěta trać. Při tym chcedźa zwěsćić, kak wobydlerjo coowa na psy reaguja a hač je to za psy a wobsedźerjow spomóžne. W někotrych coowach su psy dowolene, štož pak zdźěla tež k stresej wjedźe: Mnohim zwěrjatam njejsu psy ničo druhe hač rubježne zwěrjo, a tuž wotpowědnje reaguja.
Tołstu móšeń ze stami eurow a wupokazami su policisća w delnjosakskej gmejnje Wietze w swojim listowym kašćiku našli. Wot njeznateho namakarja wotpołožena drohoćinka słušeše 45lětnemu wikowarjej lodowych tworow, kiž bě móšeń na jězbje z čołmikom zhubił. Zastojnicy muža informowachu, a tón dari na to sto eurow pomocnej organizaciji a policistam wězo lód.
