To a tamne (21.03.18)
Pjenjezy dešćowali su so na puću w sewjerorynsko-westfalskim Bergisch-Gladbachu. Hosćencar chcyše z kónctydźenskimi dochodami wjacorych tysac eurow na banku jěć. Pjenjezy bě wón na třěchu awta połožił a wotjěł. Te so z wětrikom spěšnje rozdźělichu. 30 do 40 šoferow je zastało a pjenjezy zezběrało. Jenož někotři pak běchu sprawni a je wotedachu. Za tamnymi policija nětko pyta.
Alarm zawinił je chětro natutkany muž na turkowsko-grjekskej mjezy pola Kastaniesa. Do toho bě so wón kontroli na turkowskim boku wuwinył a móst přeprěčiwši grjekski kontrolny dypk docpěł. Muž bě tak pjany, zo njemóžachu z nim ani prawje rěčeć. Kak bě so scyła přez móst dóstał, njewědźa sej rozjasnić.
To a tamne (20.03.18)
Wosrjedź powołanskeho wobchada dźěćo porodźiła je žona w šwicarskim Zürichu. Nowy čłowječk chcyše na kóždy pad na swět, jako nan hišće spyta so přez blachowu lawinu do chorownje předrěć. Skónčnje wón wosrjedź wjacečaroweje dróhi zasta, štož je skedźbnosć policistki zbudźiło. Wona móžeše dźěćko runje hišće popadnyć, kotrež bě žona na pódlanskim sedle porodźiła. Policistka sleče so pulower, zawi holčku do njeho a wołaše wuchowansku słužbu.
Nócnej harje wosebiteho razu njemóžeše tež policija w Badensko-Württembergskej wotpomhać: 66lětna žona wołaše zastojnikow, dokelž bě jej „wjacore nocy dołho trajacy monotony zwuk“ spar rubił. Zastojnicy do Denzlingena přijědźechu a zwěsćichu, zo bydli na štomje w susodstwje wulka sowa. A jej je nócny měr ludźi smorže. Žona dyrbi haru tuž dale znjesć.
To a tamne (19.03.18)
Na zubnolěkarskim terminje paducha zajał je policist w Bayerskej. Zastojnik ležeše w šwabskim Neu-Ulmje na lěkowanskim stólcu, jako so 34lětny paduch přez durje balkona do pódlanskeje rumnosće zadoby a tam ručnu tobołu chorobneje sotry pokradny. Jako policist podhladne zwuki zasłyša, skoči wón ze stólca a muža zaja. Kaž so wukopa, je paduch za cyłu seriju tajkich njeskutkow zamołwity. Wón sedźi mjeztym w jastwje.
6 000 eurow na nuzniku Duisburgskeho hłowneho dwórnišća je muž w móšni namakał a policiji přepodał. 23lětny sprawny namakar z Essena do toho hišće wobsedźerja pjenjez zazwoni, po tym zo bě w móšni jeho telefonowe čisło našoł. Zbožowny wobsedźer sej pjenjezy na policajskim rewěrje wotewza. Wón chcyše sej awto kupić a měješe tohodla telko pjenjez při sebi, kaž zastojnikam rozłoži.
To a tamne (16.03.18)
Hnydom dwójce tak spěšnje kaž dowolene bě šofer wosoboweho awta pola Weimara po puću. Spěšnosć 205 kilometrow na hodźinu je policija při kontroli mjez wsomaj Kleinbrembach a Großbrembach naměriła, hdźež je sto km/h dowolene. Šoferej hroža nětko třiměsačny zakaz jězdźenja, 600 eurow pokuty a dwaj dypkaj w Flensburgu.
Zwěrjeće misnjenje je so lětanskemu předewzaću United Airlines stało: Pos Irgo měješe poprawom z Denvera do Wichita w staće USA Kansas lećeć. Jeho pak tyknychu sobudźěłaćerjo mylnje do mašiny, kotraž poda so do Japanskeje. Po 16 hodźinach Irgo tuž w měsće Narita přizemi. United Airlines je so mjeztym zamołwiła: Na Denverskim lětanišću běchu sobudźěłaćerjo němskeho hońtwjerskeho psa a němsku doggu zaměnili. Irgo je mjeztym zaso doma.
To a tamne (15.03.18)
Kompjuterowy program je muža w Badensko-Württembergskej tak roznjemdrił, zo dyrbješe jeho mandźelska policiju wołać. Muž w Neuriedźe bě so powołanskeho překubłanja dla z programom za tabulkowu kalkulaciju bětlował. Při tym pak zadwělowaše a započa cychnować. Žona so naboja a wołaše zastojnikow wo pomoc. Jako woni přijědźechu, sedźeše muž kurjo před durjemi. Wón bě so sam změrował. Hač je digitalny problem rozrisać móhł, njeje jasne.
Dźiwje swinjo je so do chorownje w Aalenje zabłudźiło. Wone bě přez hłowny zachod do chorownje přišło a so ludźi njeboješe. Personal měješe swoju lubu nuzu, je z twarjenja wuhnać. Tež po tym dźiwje swinjo na to njemysleše so zaso do lěsa zminyć. Dokelž pak ludźi a wobchad wohrožeše, dyrbješe je policist po dorěči z hajnikom zatřělić.
To a tamne (14.03.18)
Njewjestu w ručnych putach wotwjedli su policisća w USA, a to po puću na kwas. 32lětna steješe po tukanju policije pod wliwom alkohola abo drogow a bě do toho w měsće Marana na juhu stata Arizona do wobchadneho njezboža splećena była, kaž medije rozprawjeja. K městnu njezboža přichwatani zastojnicy žonu zajachu a dowjezechu ju na policajski rewěr, zo bychu jeje krej přepytowali. Arizona ma sobu najrazniše zakonje nastupajo alkohol a drogi za wodźidłom.
W škleńčanej witrinje steji wot najnowšeho blido, za kotrymž bě bywši prezident USA Barack Obama lěta 2016 we vietnamskej stolicy Hanoiju něšto jědł. Nudlowy hosćenc „Bun Cha Huong Lien“ je so wot toho časa na hotowe kultnišćo wuwił. Mjeztym poskićeja tam „Obama-meni“: nudle z grilowanym swinjacym mjasom a zelowu poliwku z chilijom.
To a tamne (13.03.18)
Kenguru Viggo, kiž hižo dlěje hač tři lěta pola swójby w delnjosakskim Bergnje bydli, dyrbi wućahnyć, njemóhła-li swójba wšelake wuměnjenja spjelnić. To je krajnoradny zarjad města Celle připowědźił. „Zahroda, po kotrejž Viggo skaka, je přemała. Nimo toho trjeba kenguru partnera, zo njeby wosamoćił.“ Swójba, kotraž bě zwěrjo po smjerći jeho maćerje přiwzała, argumentuje, zo je jej Viggo mjeztym kaž dźěćo.
Nic pawk, ale drogi běchu wina na wobchadnym njezbožu w šwabskim Gersthofenje. To je policija zwěsćiła, po tym zo bě po njezbožu wulkeho pawka w awće wuhladała. Tón pak njeje jědojty, kaž mjeztym zwěsćichu. 33lětny bě wopak do kružneho wobchada zajěł a do hromady drjewa prasnył. Dospołnje apatiskeho šofera dowjezechu do chorownje.
To a tamne (12.03.18)
Wo njewšědnym „wuswobodźenju jateho“ rozprawja policija w badensko-württembergskim Neckargemündźe. Tam bě nan ze swojim synom na policajski rewěr přišoł. Jědnaćelětny bě na kolesowarskej šćežce ručne puta namakał a sej je sam připinył, mějo je za hrajku. Pozdźišo pak zwěsći, zo njehodźa so puta hižo wočinić. Dokelž so tež žadyn z policajskich klučikow njehodźeše, spaslichu zastojnicy ze stareho kamoroweho klučika tak mjenowany „dietrich“. Z nim móžachu puta skónčnje wotamknyć. Zwotkel wone pochadźachu, njebě jasne.
Rubježnika popadnył je muž w Augsburgu, jako při čerwjenej ampli čakaše. 17lětny kriminelny bě runje loto-filialu nadpadnył a bě na ćěkańcy. 25lětny słyšeše w swojim awće wołanje wurubjeneje předawarki a rubježnika hnydom přesćěhaše. Po někotrych stach metrow jeho dosćahny a přepoda 17lětneho policiji.
To a tamne (09.03.18)
Kedźbliwa kóčka je swoju wobsedźerku w hessenskim Rüsselsheimje před paduchom škitała. Zadobywar bě w nocy na srjedu ćeknył, dokelž tam micka žałosćeše. Štyrilětna Nala tak wótře mjawčeše, zo wobsedźerka wotući a za njej pohlada. Při tym runje hišće widźeše, kak so paduch z jeje bydlenja we wjaceswójbnym domje zminje. Pokradnył wšak přespěšeneje ćěkańcy dla ničo njebě.
Jenož w spódnich cholowach wosnje wokoło chodźacy muž je sej w badensko-württembergskim Pforzheimje na policajsku stražu wućeknył. Wón bě so prawdźepodobnje sam z bydlenja wuzamknył a zymu mrějo po měsće błudźił. Zastojnikam 29lětny rozłoži, zo časćišo wosnje wokoło běha. Jeho mać na zbožo móžeše pomhać, dokelž wobsedźi tohorunja kluč bydlenja. Wona muža na policiji wotewza a přewodźeše jeho domoj.
To a tamne (08.03.18)
Mrowje su w badensko-württembergskim Aalenje alarm zawinili. Warnowanska připrawa w internaće bě woheń signalizowała. Na to přijědźechu kameradojo z třomi jězdźidłami, za wohenjom pak podarmo pytachu. Kaž so wukopa, su mrowje na alarmje wina byli. Wone běchu w alarmowej připrawje po puću, kotraž dźeržeše je mylnje za kur. Wohnjowi wobornicy móžachu so tuž změrowani zaso na dompuć nastajić.
Harowacych mórskich lawow dla ma Kölnski zwěrjenc nětko mjerzanje na šiji. Susodka bě so pola města hóršiła, zo mórske lawy w nocy haruja. Wjednistwo coowa wšak njemóže sej rozkłasć, čehodla dyrbjeli mórske lawy w nocy haru činić. Nimo toho dyrbi kóždy, kiž w susodstwje zwěrjenca bydli, z tym ličić. Přiwšěm chcedźa nětko z kameru wobkedźbować, što so tam w nocy stawa.
