W parku so słónčić móže jara drohe być. W italskim Venedigu je so 23lětna Ka­nadźanka na Papadopoli-zahrodach w bikiniju słónčiła a dyrbješe za to 250 eurow­ pokuty płaćić. Zo njeje dowolene po lagunowym měsće z jeho wu­znam­nym historiskim centrumom w kupanskej drasće so po­hibować, na zjawnych městnach přebywać abo priwatne jězdźidło wužiwać, wona nje­wědźeše.

Město Mnichow je porno Venedigej wotewrjeniši.­ Hač mužojo abo žony, wšitcy smědźa so při rěce Isar tež jenož w kupanskich cholowčkach słónčić. Hłowna wěc, zo su primarne splažne dźěle njewidźomne, tak rěkaše tele dny jednohłósnje w Mnichowskej měšćanskej radźe. To wšak hladajo na přewšo katolsku Bayersku chětro překwapja. Zwonka wupokazanych městnow pak maja wšitcy wotpowědnje zdrasćeni być.

Čerstweho a wokřewjaceho wětřika dla je muž w braniborskim wokrjesu Märkisch-Oderland póndźelu dospołnje nahi z motorskim jěł. Jako jeho policistaj zadźerže­štaj, wón jimaj rjekny, zo dźě je ćopło. Z konsekwencami muž ličić njetrjeba, wšako měješe krute črije wobute a nahłownik. Nimo toho njeje so nichtó pola policije hóršił. Zastojnikaj zwě­sćištaj tuž jenož identitu muža a proše­štaj jeho, znajmjeńša so cholowy wobuć.

Jara njerozumny je so 85lětny muž minjenu njedźelu na awtodróze do Cuxhavena zadźeržał. Tak je wotjězdku skomdźił a so z awtom cyle jednorje na dróze zawróćił. Dalši 50lětny šofer móžeše zražce runje hišće tak zadźěwać, 85lětny pak dale jědźeše. Jako policistaj jeho doma nańdźeštaj, jimaj wuměnkar wotmołwi, zo wšak so ničo stało njeje. Zastojnikaj pak sćazaštaj jemu jězbnu dowolnosć. Nimo­ toho ma starc z chłostanskim jednanjom ličić.

Zo so jednostronska lubosć zwjetša nje­spjelnja, dyrbješe 33lětna žona w Mnichowje nazhonić. Před dwěmaj lětomaj bě so na dowolu do muža zalubowała a je jeho wot toho časa zas a zaso přesćěhała. Byrnjež jej 43lětny wjackróć – samo sudnisce –, kontakt zakazał, je so wona w nocy na minjenu sobotu do jeho by­dlenja zadobyła a kruće spjaceho žadosćiwje hubkowała. Wotućiwši wón hnydom policiju­ zawoła, a ta 33lětnu na městnje zaja.

Wo rozhorjenje postarał je so muž w Hemerskej kupnicy, hdźež so we wotdźělu chłódźakow dospołnje nahi zeslěka. Jako předawarka zakroči, bě so 32lětny cholowy na zbožo zaso wobuł. Prjedy hač móžeše jeho zadźeržeć, wón twochny a hrabny sej spěšnje hišće tyzu piwa z regala a we wotdźělu za sad bananu. Hač bě so muž přewysokich temperaturow dla zeslěkał, dotal jasne njeje.

Zhromadnje z třilětnej holčku nastaji so policist w Germersheimje pola Landauwa njedźelu popołdnju na puć, zo by za domom pytał, w kotrymž wona bydli. Kedźbliwi pasanća běchu ju mjenujcy samolutku našli a zastojnikej přewostajili. Holčka twjerdźeše, zo puć domoj namaka a tak je z policistom prawdźepodobnje po měsće błudźiła. Znata staršeju tři­lětnu skónčnje spózna a wědźeše, dokal słuša. Kaž so wukopa, bě holčka z bydlenja twochnyła, jako starši bratr wokomik na nju njekedźbowaše.

Sudnik dźěćaceho koparskeho turněra w Ludwigshafenje je njedźelu ze strachom policiju alarmował, dokelž běchu so starši pozdatnje wopačneho rozsuda dla do włosow dóstali. Hakle přiwołanymaj zastojnikomaj so poradźi rozhorjenych staršich skludźić.