To a tamne (01.03.17)
Sprawna duša: Ručnu tobołku z wjace hač 14 600 eurami je žona na jednej ze stacijow Mnichowskeje spěšnoželeznicy namakała a policiji přepodała. 39lětna bě na swojich narodninach wosamoćenu tošku na ławce wuhladała. Policija móžeše wobsedźerku, kiž bě zastojnikow hižo alarmowała, spěšnje zwěsćić. Poprawom chcyše 40lětna hosćencarka dochody dnja na banku donjesć, ta pak bě karnewala dla hižo zawrjena.
Štyri tony mandlow a sultaninow su njeznaći z nakładneho awta při awtodróze A 9 w Hornjej Frankskej pokradnyli. Z Pólskeje přijěduce awto bě minjeny kónc tydźenja na parkowanišću wotstajene. Paduši planu jězdźidła wočinichu a su, bjez toho zo by to něchtó pytnył, sydom paletow z mandlemi a sultaninami w hódnoće wjacorych tysac eurow wotkładowali.
To a tamne (28.02.17)
Při rjedźenju swojeho awta z milionarom stał je so starc w awstralskim měsće Newcastle. Muž, kiž chce anonomny wostać, nańdźe zabyty lotowy lisćik, kotryž hižo lěto w jězdźidle ležeše. Jako jón w interneće přepruwowa, wón zwěsći, zo je zrazom wo 1 020 496,38 awstralskich dolarow bohatši. Muž prawidłownje loto hraje, njeje pak hišće ženje dobył. Pjenjezy chce wón nětko za wukubłanje swojich wnučkow nałožić.
Rańše mloko dźěćom kradnył bě tydźenje dołho muž w delnjosakskim Hagenburgu. Wot spočatka lěta je sej tam stajnje póndźelu a štwórtk wotstajene połne mlokowe sudobja před dwěmaj pěstowarnjomaj sobu brał. Wčera je policija skućićela na městnje njeskutka lepiła. Kaž 38lětny twjerdźeše, chcyše so jenož strowy zežiwić, za čož pak jemu pjenjezy njedosahachu.
To a tamne (27.02.17)
W bydlenju swojeje prawowki randalěrował je 16lětny w Porynsko-Pfalcy, dokelž internet njefungowaše, 78lětna žona z Weilerbacha bě drje spěšny internetny přistup skazała. Tón pak chcyše fachowc hakle spočatk tydźenja přizamknyć. Dokelž w tym času žadyn přistup k internetej móžny njebě, započa młodostny pjatk wječor cychnować. 78lětna ćekny z bydlenja a zawoła policiju. Zastojnicy dowjezechu młodostneho k jeho wowce. Hač je tam internet fungował, njeje znate.
Pytajo za swojim bydlenjom je so pjany póstniski nora w Augsburgu do bydlenja susoda zadobył. Mějićel bydlenja słyšeše, kak něchtó wokno rozbije. W kupjeli wuhlada wón susoda w kostimje róžojteho zajaca. Tón pak móžeše ćeknyć. Policija namaka muža skónčnje we łožu swójskeho bydlenja. Tež tam bě wón durje z nohu rozbił.
To a tamne (24.02.17)
Podružnicy njesmědźa na balkonach swojich bydlenjow štomy sadźeć. Tole potwjerdźa Mnichowske hamtske sudnistwo w dźensa wozjewjenym wusudźe. Podružnik bě na balkonje swojeho bydlenja wosrjedź Mnichowa před 15 lětami hórski klon do hornca sadźił. Mjeztym je štom chětro narostł a je daloko widźeć. Wšitke namołwy wobsedźerki domu, jón wotstronić, muž dotal ignorowaše. Nětko je wona skoržiła.
Do wonjaceho mjasa zapakowane staj pašowarjo z Awstralskeje pjenjezy bjez cła do wukraja dowjezć chcyłoj. Z mjasom chcyštaj policajske psy na lětanišću w Adelaide za nós wodźić. Jedyn z nich pak reagowaše. Zastojnicy namakachu 375 000 eurow we wačokach muži. Wobeju pašowarjow zajachu.
To a tamne (23.02.17)
Pytajo za nowymi wobsedźerjemi swojich kóčkow kroči jedna ze zwěrjatownjow w Islandskej njezwučene puće. Wona prezentuje kóčki w internetnym livestreamje. Z třomi kamerami wšitko zapopaduje, štož kóčki w swojim dwuposchodowym klankowym domje činja. Cyły dźeń wusyłana dokusoap je iniciatiwa islandskeje towaršnosće za škit kóčkow, kotraž zwěrjatownju Kattholt w stolicy Reykjavíku wobhospodarja. Namaka-li so nowy wobsedźer, přińdźe druha bjezdomna kóčka na městno dotalneje.
Slědy kopytow a konjace zawostajenki wjedźechu policiju w Delnjej Frankskej k pohončej, kiž bě so po njezbožu zminył. 78lětny bě so z kuču parkowaceho awta šmórnył a 2 000 eurow škody zawostajił. Jeho šofer pak zawoła policiju, kotraž slědam sćěhowaše. Tak dojědźe runjewon do konjenca pohonča.
To a tamne (22.02.17)
Chětro drohu jězbu ze swojim spěšnym awtom je sej 19lětny na Berlinskej měšćanskej awtodróze dowolił. Policisća naměrichu na wšě 172 km/h, prjedy hač jeho njezadźeržachu. Dowolene je tam najwjace 80 km/h. Mužej hroža nětko chłostanka 960 eurow, tři měsacy trajacy zakaz jězdźenja a dwaj dypkaj w Flensburgu. Nimo toho so tež hišće runje sylnje dešćowaše, jako smaler zastojnikam ciwilneje patrulje napadny.
Psa staruški zawlekłoj a 68lětnu na to wudrěwałoj staj młodostnaj w starobje 16 a 18 lět w Hamburgu. Wonaj žadaštaj sej 10 000 eurow. Psa běštaj sobu wzałoj, jako tón po parku běhaše. Na to žonu wospjet zawołaštaj. Wobsedźerka psa wšak hłós jej znateho 16lětneho spózna a zawoła policiju. Při planowanym přepodaću psa w parku móžachu skućićelow zajeć. Pos „Schörli“ je akciju derje přetrał.
To a tamne (21.02.17)
Masowu bijeńcu wumyslił je sej pjany muž w sewjerorynsko-westfalskim Werdohlu, zo móhł z policajskim awtom domoj jěć. Jako w nocy na póndźelu wjacore policajske awta k městnu pozdatneje bijeńcy přijědźechu, nańdźechu tam jenož chětro alkoholizowaneho muža. Jako pak so zastojnicy spjećowachu jeho domoj dowjezć, bu 26lětny agresiwny. Tak jeho policisća skónčnje tola w awće sobu wzachu – nic pak domoj, ale na policajsku stražu. Tam smědźeše w celi přenocować.
Ze swojim mócnym hłosom je tankownik w Kasselu wobrónjeneju rubježnikow wućěrił. Z pistolu w ruce běštaj maskěrowanaj mužej sobotu do tankownje přišłoj. Sobudźěłaćer přiwoła swojeho kolegu ze susodneje rumnosće. Jako to njepomhaše, wón z cyłeje šije na njeju rjeješe, doniž so bjez rubizny njezminyštaj.
To a tamne (20.02.17)
Do policajskeho awta prasnył je muž při wobchadnej kontroli w Zwickauwje. Jako chcychu 31lětneho kontrolować, je tón njejapcy na płunowy pedal stłóčił a do awta policistow zrazył. Na to so wukopa, čehodla bě muž tak nuzne měł: Wón steješe pod wliwom drogow a njeměješe jězbnu dowolnosć, awto njebě přizjewjene a měješe pokradnjene čisłowe taflički. Nimo toho namaka policija w jězdźidle tež hišće drogi a 31lětneho zaja.
Z wotmachom po myjerni awtow jěła je 84lětna žona w delnjosakskim Hollenstedće. Wona pak wosta njezranjena a dźěše po njezbožu ze swojim rolatorom domoj. Staruška bě sobotu z wulkej spěšnosću do myjernje zjěła a něhdźe 90 000 eurow škody zawostajiła. Policija na to tuka, zo je prosće płunowy pedal a borzdźidło zaměniła.
To a tamne (17.02.17)
Z runje pokradnjenym gumijowym čołmom staj so pjanaj paduchaj na Wulkim Wannseeju w Berlinje powróćiłoj. Chětro přestudnjeneju dowjezechu muži w starobje 22 a 25 lět do chorownje. Wobsedźer gumijoweho čołma bě jeju njedaloko pobrjoha we wodźe wuhladał. Prawdźepodobnje běštaj wonaj spytałoj z čołmom a padlomaj po zdźěla hišće zamjerznjenym jězoru ćeknyć. Wodoškitna policija pad nětko přepytuje.
Z rołu prochsrěbaka w ruce je njeznaty w Falkenseeju pola Berlina korčmu wurubić spytał. Wón zastupi wčera rano do lokala. Pjenjezy sej žadajo započa z rołu do pinčnika bić. Tón pak so wobaraše a runje hišće tak tomu zadźěwa, zo móžeše rubježnik do kasy přimnyć. Překwapjeny wot telko spjećowanja so tón zaso zminy. Pinčnika dyrbjachu zranjenjow w mjezwoču dla lěkarsce zastarać.
To a tamne (16.02.17)
Při starće do jelenja zrazyła je mašina na lětanišću města Charlotte w zwjazkowym staće USA North Carolina. Lětadło so wobškodźi a dyrbješe so po wotlěće zawróćić a zaso přizemić. Nichtó ze 44 pasažěrow a štyrjoch čłonow wobsadki so na zbožo njezrani. Charlotte Douglas International Airport je jedne z najwjetšich lětanišćow USA. Wone je z lěsom, ale tež z wulkim płotom wobdate. Kak bě so jeleń na ležownosć dóstał, dotal njewědźa.
Bjez šofera je póstowy transporter w Durinskej něhdźe 200 metrow po nahłej dróze jěł a do parkowaceho awta prasnył. Při zražce nasta 20 000 eurow škody. Prawdźepodobnje njebě šofer transportera ručne borzdźidło přićahnył. Jako spyta jón tola hišće dosćahnyć, póstownik padny a so chětro wobodrě.
