To a tamne (07.12.16)
Europa nima tuchwilu wusahowace wodźace wosobiny. Wo tym je bamž Franciskus přeswědčeny. Politikarjo kaž němski powójnski kancler Konrad Adenauer, francoski wonkowny minister Robert Schuman a italski knježerstwowy šef Alcide De Gasperi běchu swój čas „sprawnje“ za Europu dźěłali, rjekny pontifeks w rozmołwje z belgiskimi nowinarjemi, kotruž Vatikan dźensa wozjewi. „Europa trjeba nawodow, kotřiž puć pokazuja.“
Wosrjedź rubježneho nadpada do womory padnył je skućićel w Düsseldorfje. 40lětny bě spytał z nožom w ruce wobchod za žiwidła wurubić. Jako so 24lětny kasěrar spjećowaše jemu pjenjezy dać, dóńdźe k bijeńcy. Při tym rubježnik nadobo do womory padny. „Měšeńca drogow, alkohola a stresa drje bě za njeho přewjele“, rěka w rozprawje policije, kotraž jeho krótko na to zaja.
To a tamne (06.12.16)
15 kilogramow ćežke kulojte blido je so po sněhakowarskej čarje w awstriskich Alpach kulało a tam snowboardera zraniło. Njeznaty bě blido z hórskeho hosćenca pokradnył a na pistu w Schladmingu ćisnył. Blido so tam wjacore sta metrow po horje dele kuleše, doniž do 22lětneho snowboardera njeprasny. Tón so na zbožo jenož na ruce zrani. Padajo dale do doła so blido při skłoninje skónčnje rozłama. Policija pyta swědkow.
Zwada wo městno na dźěćacym karuselu je so w Umkirchu pola Freiburga z namócnosću skónčiła. 56lětna žona chcyše swoju třilětnu wnučku na wěste městno lokomotiwy sadźić. Tam sedźaca pjećlětna holca tuž městno na jeje próstwu wopušći, bjezposrědnje na to pak sej to hinak přemysli. Nan pjećlětneje so do žony da, kopny jej do nohi a kidny jej horce wino na kabat.
To a tamne (05.12.16)
Telewizijny wječor 65lětneho w delnjofrankskim Kitzingenje su paduši njejapcy skónčili. Muž bě sobotu wječor pozdźe hišće film hladał, jako bě signal naraz preč a wobrazowka čorna. Wón dźěše tuž na balkon, zo by za satelitnej šklu pohladał, kotraž bě při wobhrodźenju přišrubowana. Tam pak jenož hišće přerěznjene kable wisachu. Njeznaći běchu šklu pokradnyli. Pokiwy na skućićelow policija dotal žane nima.
Póstowe awto w rěce su ludźo wčera dopołdnja při přechodźowanju w saksko-anhaltskim Biederitzu našli. Žołty transporter steješe dospołnje pod wodu, něhdźe 15 metrow wot pobrjoha zdaleny. Prawdźepodobnje bu wón pokradnjeny a pozdźišo do rěki storčeny. Listy a pakety běchu dospołnje rozmokane. Hdźe bu póstowe awto pokradnjene, hišće jasne njeje.
To a tamne (02.12.16)
Ze swojim mortwym bratrom je 49lětny w Rostocku cyły měsac w zhromadnym bydlenju žiwy był, bjez toho zo by někoho informował. Jako wón wčera skónčnje policiju zawoła, sedźeše ćěło hišće za kuchinskim blidom. 45lětny bě po dlěšej chorosći přirodneje smjerće zemrěł, štož přiwołana lěkarka wobkrući. Prawdźepodobnje njebě Rostockčan smjerć swojeho bratra přewinył a chcyše ju na swoje wašnje předźěłać.
Fasadu swojeho domu zapalił je 76lětny w durinskim měsće Gotha, jako z horcopowětrowej pistolu za kunu honješe. Kaž policija informuje, bě fasada z drjewa. Spočatnje chcyše muž płomjenja z hadźicu sam podusyć. Jako so to njeporadźi, zawoła wón wohnjowu woboru. Wěcna škoda wučinja 5 000 eurow. Što je so z kunu stało, njeje znate.
To a tamne (01.12.16)
Do kóždeho filma narodnu hymnu spěwać dyrbja wotnětka we wšitkich kinowych žurlach Indiskeje. Nimo toho maja wopytowarjo při tym jako znamjo respekta stanyć. Tole je najwyše sudnistwo kraja w New Delhiju wukazało. Noworjadowanje ma ludźom „začuće angažowaneho patriotizma zašćěpić“. Dotal bě hymna jenož w někotrych statach Indiskeje z wašnjom.
Na kruwjacu pastwu nawróćiło je so dźiwje swinjo Johann w Delnjej Sakskej, po tym zo bě w lěću po lěsu brodźiło. Kruwy běchu so hižo loni z wjele lubosću wo wosamoćene prosatko starali a je do swojeho cyłka přiwzali. Prawdźepodobnje bě Johann swoju mać zhubił. Mjeztym je kundroz chětro narostł. Najebać to bě witanje na kruwjacej pastwje wutrobne: Kruwy swojeho Johanna lizachu a dźělachu z nim swoju picu.
To a tamne (30.11.16)
Praktikum pola queen w Londonje? Młodym hotelownikam z Karibiki móhło so tole zmóžnić. Princ Harry bě tam na dwutydźenskej jězbje wosebity program předstajił. Tak pytaja dźewjeć praktikantow w Buckinghamskim palasće a na hrodźe Windsor, kaž britiski kralowski dom zdźěla. Šěsć tydźenjow trajacy praktikum měri so na zajimcow karibiskich statow Jamaiki, Grenady a Santa Lucije, hdźež je queen hłowa stata.
Njetrjebachu woheń hašeć, ale dyrbjachu sej z klockami hrajkać: wohnjowi wobornicy w Mnichowje. Nan dwulětneho hólca dyrbješe problemow dychanja dla nuznje do chorownje. Dokelž njebě mać hišće doma, so wohnjowi wobornicy tak dołho wo hólčka starachu, kiž wopokaza so „jara kooperatiwny“. Maćeri móžachu skónčnje wšelake „wotdźěłane hry“ a wulki twar z lego-klockami přepodać.
To a tamne (29.11.16)
Swoju winu jako wobchadny rowdy je 82lětna minjeny pjatk policiji w Lommatzschu w Mišnjanskim wokrjesu wuznała. Policija bě zjawnje za šoferom awta pytała, kotrež bě na dróze najebać napřećiwny wobchad traktor přesćahnyło a sej při tym wonkowny špihel wottorhnyło. Traktorist a wodźer napřećo jěduceho awta móžeštaj ze sylnym spinanjom zražce runje hišće zadźěwać. Rentnarka ma nětko z jednanjom strašneho jězdźenja dla ličić.
Atrapu policajskeho awta móžeš sej w Berlinje požčić, chceš-li paduchow wottrašić. Wobsedźerjo domow móža atrapu, kotraž wupada kaž prawe policajske awto, w dowolu před zachod stajić, kaž přenajenska firma Bieseke informuje. Awta njesmědźa pak na zjawnych parkowanišćach stać a po dróze jězdźić.
To a tamne (28.11.16)
Dwaceći metrow dołhi šawl a čapka pyšitej nětko historisku wěžu južnobraniborskeho Łukowa (Luckau). Dźesatki dobrowólnikow su za to minjene měsacy pilnje pletli a wjace hač sto dźělow znosyli, kaž Łukowske přemysłowe towarstwo zdźěla. Hač do 3. adwenta ma wěža swoju „zymsku drastu“ wobchować. Wona je dźěl historiskeho měšćanskeho wobhrodźenja a zdobom symbol města. Wobydlerjo sej stajnje zaso swojorazne akcije wokoło njeje wumysleja.
Přichodna zyma budźe kruta. Tole je wuslědk tradicionalneho waženja kóčki w małym rudnohorinskim Voigtsdorfje. Kocor Nero wažeše wčera 6 470 gramow. To je 40 procentow wjace hač w lěću. Normalnje pak tajke skoćo wo 25 procentow wahi přibywa. „Nero je so porjadnje nažrał, to budźe kruta zyma.“ Tole pišu organizatorojo spektakla wotpowědnje hesłu: Čim tołša kóčka, ćim zymnišo budźe. Zarjadowanje, kotrež su w Voigtsdorfje hižo třeći króć organizowali, je wjace hač 300 wopytowarjow přiwabiło.
To a tamne (25.11.16)
Wujězd parkowanskeho domu ze schodom zaměniłoj stej žónskej fanaj koparskeho kluba FC Schalke po wčerawšim dobyću swojeho mustwa přećiwo Nizzy. Wohnjowu woboru dosćahny pózdni wječor informacija, zo běštej žonje z awtom mjez poschodomaj tčacy wostałoj. Wobornicy móžachu jězdźidło z pomocu specielnych zawkow a z powjazami bjez wjetšich škodow wuswobodźić.
800 kilometrow do wopačneho směra jěł je šofer spedicije z Badensko-Württembergskeje. Poprawom měješe wón nastroj za storkanje sněha na sněhakowarskich pistach do Seefelda w Tirolu dowjezć. Město toho pak dojědźe wón z 200 000 eurow drohim pistowym wlečakom do Seefelda, měšćanskeho dźěla w schleswigsko-holsteinskim Bad Oldesloe. Prawdźepodobnje bě šofer nawigaciskemu nastrojej slepje dowěrił.
To a tamne (24.11.16)
30 000 eurow namakachu dźěći w Gundelfingenje pola Freiburga, jako běchu po puću do šule – a su so jako sprawni namakarjo wopokazali. Kaž policija zdźěli, běchu šulerjo w starobje 12 do 13 lět wčera na kromje wsy wjacore baliki pjenjez namakali a na policajsku stražu donjesli. Tam napisachu jim zastojnicy zamołwjenje, wšako dźěći swojeje sprawnosće dla spočatk wučby zapasechu. Policija dotal njewě, zwotkel pjenjezy pochadźeja.
Tójšto mjerzanja napara sej farar w norwegskim Gjerdrumje, po tym zo je z dźesaćlětnymi šulerjemi pohrjeb „hrał“. Komuna jako nošerka šule je jemu tole mjeztym zakazała. Duchowny bě šulerjow kašć njesć dał. Kritiku wón wotpokazuje: Smjerć je dźensa mnohim wulki tabu. Dźěći pak maja tójšto prašenjow. Wopyt cyrkwje je dźěl wučbneho plana.
